Ocho jach miʼ chaʼ chumtʌlob

Tsaʼ ochiyob ti arca i familia Noé yicʼot jiñi añimal tac. Jehová tsiʼ ñupʼu jiñi arca. Cʌlʌxix tsaʼ caji jaʼal i jiñi arca tsaʼ caji ti cʼʌjlel. Xucʼu xucʼul tsaʼ caji ti bujtʼel ti jaʼ ili pañimil. Jiñi jontol (maña) bʌ wiñicob xʼixicob (quixtañujob) maʼañic tsaʼ ochiyob ti arca i tsaʼ chʌmiyob. Pero Noé yicʼot i familia maʼañic chuqui tsiʼ chaʼleyob come tsaʼ ochiyob ti arca. ¿Muʼ baʼ ñaʼtan bajcheʼ cʼamel i tijicñʌyel tsiʼ yubiyob cheʼ bʌ tsiʼ jacʼbeyob i tʼan Jehová?

Cʌlʌxix tsaʼ caji jaʼal, tsaʼ jalʼa 40 qʼuin yicʼot 40 acʼʌlel i cheʼ jiñi tsaʼ lajmi. Cheʼ bʌ tsaʼ ñumi jiñi qʼuin, tsaʼ caji ti jubel. Ti wiʼil, jiñi arca tsaʼ cʌyle tiʼ pam jumpʼejl wits. Noé yicʼot i familia maʼañic tsaʼ mejliyob ti loqʼuel ti ora come anto cabʌl jaʼ.

Tsaʼ ñumi majlel jiñi qʼuin i jiñi jaʼ tsaʼ caji ti jubel. Ñumen ti jumpʼejl jab tsaʼ ajñi Noé yicʼot i familia yaʼ ti arca. Cheʼ jiñi, Jehová tsiʼ subeyob chaʼan muqʼuix i loqʼuelob. ¡Lajal bajcheʼ jumpʼejl tsijiʼ bʌ Pañimil! Tsiʼ wen aqʼueyob wocolix i yʌlʌ Jehová cheʼ tsiʼ coltayob i tsiʼ yʌqʼueyob i majtan.

Jehová tsiʼ mulaj jiñi majtañʌl i tsiʼ yʌlʌ chaʼan maʼañic mi caj i chaʼ jisan ti butʼjaʼ jiñi am bʌ ti pañimil. Tsiʼ yʌcʼʌ ti loqʼuel ñaxam bʌ tʼoxjaʼ (xojob) yaʼ ti panchan bajcheʼ jumpʼejl señal chaʼan isujmʌch tsaʼ bʌ i yʌlʌ. ¿Am ba a qʼuele jumpʼejl xojob?

Cheʼ jaʼel, Jehová tsiʼ sube Noé yicʼot i familia chaʼan miʼ pʼolob i yalobil yicʼot chaʼan miʼ butʼob ili pañimil.