¿Chuqui miʼ mejlel i yotsan lac bʌqʼuen?

«Anquese an lac chaʼan cabʌl tecnología, ciencia yicʼot jiñi taqʼuin chaʼan tijicña mi lac chumtʌl, tsʼitaʼ jachix yom chaʼan mi lac jisan ili pañimil (mulawil)». (Informe Global de Riesgos 2018 del Foro Económico Mundial).

¿CHUCOCH AN CABɅL WIÑICOB XʼIXICOB MUʼ BɅ I WEN CʼOJOʼTAÑOB CHUQUI MI CAJ I YUJTEL TIʼ TOJLELOB YICʼOT TIʼ TOJLEL ILI LUM? LAʼ LAJ QʼUEL JIÑI WOCOL TAC WOLI (CHONCOL) BɅ LAC ÑUSAN ILI ORA.

• 

  WOCOL TAC TI INTERNET: Jumpʼejl periódico ti Australia tsiʼ yʌlʌ chaʼan «jiñi Internet wen bʌbʌqʼuen jax woli (yʌquel) i sujtel come yaʼʌch baqui ñumen an jiñi muʼ bʌ i ticʼlañob ti piʼleya alobob, muʼ bʌ i ticʼlañob xcolelob yicʼot muʼ bʌ i letsañob mach bʌ weñic i cheʼ jaʼel jiñi muʼ bʌ i cʼʌñob Internet chaʼan miʼ chaʼleñob xujchʼ. Junchajp wocol woli bʌ i ñumen pʼojlel jiñʌch cheʼ miʼ chʼʌmob laj cʼabaʼ chaʼan miʼ melob (chaʼleñob) mach bʌ weñic [...]. Yaʼ ti Internet yaʼʌch baqui miʼ pʌsob leco bʌ i melbal jiñi wiñicob xʼixicob: Jiñi tsʼiʼlel yicʼot jiñi jontolil».

• 

  MACH JUNLAJALIC AÑOB I TAQʼUIN: Jiñi informe i chaʼan jumpʼejl organización muʼ bʌ i coltan pʼumpʼuñoʼ bʌ tsiʼ yʌlʌ chaʼan mi tsaʼ tempʌnti i taqʼuiñob jiñi 3 mil 600 millón pʼumpʼuñoʼ bʌ, lajal i yonlel miʼ cʼotel bajcheʼ am bʌ i chaʼañob jiñi 8 lac piʼʌlob wen añoʼ bʌ i taqʼuin. Jiñi informe tsiʼ yʌlʌ chaʼan mach weñic bajcheʼ miʼ taj taqʼuin jiñi país tac. Cheʼ jaʼel, tiʼ petol pañimil mach junlajalic añob i taqʼuin jiñi wiñicob xʼixicob (quixtañujob). Jiñi wen añoʼ bʌ i chaʼan, ñumen yomob ochel ti rico i jiñi pʼumpʼuñoʼ bʌ woliʼ ñumen sujtelob ti pobre. Tiʼ caj iliyi cabʌl miʼ bʌcʼñañob chaʼan miʼ mejlel ti tejchel ñuc tac bʌ wocol.

• 

  JIÑI GUERRA YICʼOT CONTRAJINTEL: Cheʼ ti 2018, jumpʼejl Agencia i chaʼan jiñi Naciones Unidas muʼ bʌ i coltañob woliyoʼ bʌ ti putsʼel, tsiʼ yʌlʌ: «Ti ili ora woli laj qʼuel chaʼan cabʌl wiñicob xʼixicob woliʼ putsʼelob loqʼuel tiʼ lumal». Ñumen ti 68 millón quixtañujob an i cʌyʌyob i yotot tiʼ caj jiñi guerra yicʼot contrajintel. Cheʼ jaʼel, jiñi informe tsiʼ yʌlʌ chaʼan «ti chaʼchaʼpʼejl segundo juntiquil quixtañu miʼ putsʼel loqʼuel».

• 

  I TICʼLɅNTEL JIÑI LUM: Jiñi Informe Global de Riesgos 2018 tsiʼ yʌlʌ chaʼan «jiñi animal tac yicʼot jiñi mateʼel orajach woliʼ jilel majlel, [...] i jiñi i bibʼesʌntel jiñi icʼ yicʼot mar woliʼ yʌcʼ ti wocol i cʼocʼlel jiñi wiñicob xʼixicob». Cheʼ jaʼel, jiñi i chʌñil Pañimil ti ora woliʼ jilel majlel ti yan tac bʌ país. Jiñi científicojob miʼ yʌlob chaʼan ili Lum miʼ mejlel ti jilel, come maʼañix chuqui miʼ mejlel i coltan jiñi teʼ tac chaʼan miʼ colel yicʼot miʼ yʌcʼ i wut.

¿Muʼ ba i mejlel laj coltan ili Lum chaʼan maʼañix chuqui bʌbʌqʼuen miʼ pʌs i bʌ? An muʼ bʌ i ñaʼtañob chaʼan jiñi quixtañujob yomto miʼ ñumen tajob i ñaʼtʌbal. ¿Chuqui yom miʼ cʌñob chaʼan miʼ qʼuextañob i pensar yicʼot i melbalob? Ti jiñi yambʌ temaj tac mi caj lac tajben i jacʼbal.