Турӑ Патшалӑхӗ ҫинчен тӗплӗн пӗлтерсе ҫӳретпӗр
1. Февралӗн 21-мӗшӗнчен пуҫласа эпир мӗнле публикацие вӗренме тытӑнатпӑр?
1 2011 ҫулхи февралӗн 21-мӗшӗнче пуҫланакан эрнере пухура Библи вӗреннӗ чухне эпир «Основательно свидетельствуем о Царстве Бога» кӗнекене вӗренме пуҫлатпӑр. Ҫак публикаци вулакана Апостолсен ӗҫӗсем ятлӑ кӗнекери хӑвӑрт аталанса пыракан лару-тӑру ҫинчен интересленсех вулама хавхалантарать. Апостолсен ӗҫӗсем кӗнекери кашни сӑвӑ йӗркине, пӗрин хыҫҫӑн теприне, пӑхса тухмаҫҫӗ. Материала ҫак Библи кӗнекинчен усӑ илмелле пултӑр тесе тата вӗреннипе пурнӑҫра мӗнле усӑ курмаллине кӑтартас тесе уҫса панӑ (Рим 15:4).
2. «Основательно свидетельствуем» кӗнекен хӑш-пӗр уйрӑмлӑхӗсем ҫинчен каласа парӑр.
2 Кӗнекен уйрӑмлӑхӗсем. 2-мӗш страницӑра ум сӑмах пур — Ертсе пыракан совет чӗререн ҫырнӑ ҫыру, унта ҫак кӗнеке пирӗншӗн хӑш тӗлӗшрен усӑллӑ пулма пултарнине ӑнлантарнӑ. Иккӗмӗш сыпӑкран пуҫласа сыпӑксен пуҫламӑшӗнче кашни сыпӑкра сӑмах мӗн ҫинчен пынине тата Апостолсен ӗҫӗсем кӗнекери хӑш сӑвӑ йӗркисене сӳтсе явассине кӗскен каланӑ. Нумай сыпӑкра ҫынсем, вырӑнсем тата событисем ҫинчен тӗплӗнрех ӑнлантарса панӑ питӗ кирлӗ шухӑшсене кӑтартнӑ рамкӑсем пур. Страница хӗрринчи сарлака, таса вырӑнсенче вара хӑвӑрӑн шухӑшсене ҫырма пулать. Кӗнекере вак-тӗвексене кӑтартнӑ ӳкерчӗксем нумай, вӗсем пире Библири пысӑк пӗлтерӗшлӗ событисене куҫ умне кӑларса тӑратма пулӑшаҫҫӗ, юлашки страницӑра вара усӑллӑ индекс, ӳкерчӗксен тата фотографисен индексӗ, пур — унта вӗсем ҫинче мӗн ӳкернине ӑнлантарса панӑ. Форзацсем ҫинче карттӑсем пур, вӗсем пире «ҫӗрӗн вӗҫӗ-хӗррине ҫитичченех» ырӑ хыпара вӗрентсе ҫӳресе пӗрремӗш ӗмӗрти христиансем хӑш вырӑнсене ҫитнине курма пулӑшаҫҫӗ (Ап. ӗҫ. 1:8).
3. Апостолсен ӗҫӗсем кӗнекене вӗреннӗ май эпир мӗнле кирлӗ ыйтусем ҫине хуравсем илӗпӗр?
3 Питӗ кирлӗ ыйтусен хуравӗсем. Апостолсен ӗҫӗсем кӗнекене вӗренсе пынӑ май эпир христиансен сӑваплӑ ӗҫӗпе ҫыхӑннӑ кирлӗ ыйтусем ҫине уҫӑмлӑ хуравсем илӗпӗр. Сӑмахран, Иисус Христосӑн чӑн вӗренекенӗсен мӗнле ӗҫе туса тӑмалла тата мӗнле хыпара пӗлтерсе ҫӳремелле? Пӗтӗм тӗнчипе ырӑ хыпар сарас ӗҫе кам тата мӗнле ертсе пырать? Хӑваланипе хӗсӗрленисем Туррӑн ӗҫлекенӗсене мӗнле майсем уҫса параҫҫӗ? Святой сывлӑш пирӗн сӑваплӑ ӗҫре мӗнле вырӑн йышӑнать?
4. Ҫак публикацие вӗреннӗ чухне пысӑк усӑ илме пире мӗн пулӑшать?
4 Ҫак кӗнекене вӗренни пысӑк усӑ патӑр тесе материала маларах вӗренӗр тата пухура сӳтсе явнӑ чухне хутшӑнма хатӗрленӗр. Тӗлпулусене ан сиктерӗр тата мӗне вӗреннипе сӑваплӑ ӗҫре мӗнле усӑ курмалли ҫинчен шухӑшлӑр. Ҫак интереслӗ публикацие сӳтсе явни Турӑ Патшалӑхӗ ҫинчен тӗплӗн пӗлтерсе ҫӳрес кӑмӑла пирӗнте ӳстертӗр! (Ап. ӗҫ. 28:23.)