Ырӑ хыпар сарма сире юрату хавхалантарса тӑтӑр

1. 2023 ҫулхи ҫулсеренхи тӗлпулура эпир мӗн пӗлтӗмӗр?

2023 ҫулхи ҫулсеренхи тӗлпулуa чӑннипех те паллӑ событи пулчӗ. Библири хӑш-пӗр вӗрентӳсене ҫӗнӗлле ӑнлантарса пачӗҫ. Унсӑр пуҫне, сӑваплӑ ӗҫпе ҫыхӑннӑ темиҫе пӗлтерӳ турӗҫ. Тӗслӗхрен, Аслӑ Вавилона пӗтернӗ хыҫҫӑн та ҫынсем Иеговӑна пуҫҫапма пуҫлама пултарӗҫ пулӗ тесе каларӗҫ. Унсӑр пуҫне, эпир 2023 ҫулхи ноябрь уйӑхӗнчен пуҫласа хыпарҫӑсен ырӑ хыпар сарас ӗҫ пирки отчётра, унчченхипе танлаштарсан, пур вак-тӗвеке те ҫырмалла маррине пӗлтӗмӗр. Ҫакӑ хамӑрӑн хастарлӑха чакармаллине пӗлтерет-и? Паллах, ҫук!

2. Мӗншӗн ырӑ хыпар сарас ӗҫ кашни кун пӗлтерӗшлӗрех пулса пырать? (Марк 13:10).

² Ырӑ хыпар сарас ӗҫ кашни кун пӗлтерӗшлӗрех пулса пырать. Мӗншӗн? Мӗншӗн тесен вӑхӑт пӗтсе пырать. Хӑйӗн хыҫҫӑн пыракансем юлашки кунсенче тӑвас ӗҫ пирки Иисус пророкла мӗн калани ҫинчен шухӑшласа пӑхӑр-ха. (Марк 13:10 вуласа парӑр.) Матфей Иисус ҫапла каланӑ тенӗ: «Ырӑ хыпара... пӗтӗм ҫӗр ҫийӗпе пӗлтерсе тухӗҫ, вара пӗтес вӑхӑт ҫитӗ» (Матф. 24:14). Кунта Шуйттанӑн усал тӗнчи пӗтесси ҫинчен сӑмах пырать. Пулас событисем «хӑш кун, хӑш сехетре» пулассине Иегова палӑртса хунӑ ӗнтӗ (Матф. 24:36; 25:13; Ап. ӗҫ. 1:7). Ҫав вӑхӑт кунран-кун ҫывхарса пырать (Рим 13:11). Хальлӗхе вара пирӗн ырӑ хыпар пӗлтермелле.

3. Пире ырӑ хыпар сарма мӗн хавхалантарать?

³ Айтӑр ҫакӑн пек ыйту ҫинчен шухӑшлар: «Ырӑ хыпар сарма пире мӗн хавхалантарать?» Пӗр сӑмахпа калас пулсан — юрату. Ырӑ хыпар сарнӑ чухне эпир ҫак хыпара, ҫынсене, чи кирли вара, Иеговӑна тата унӑн ятне юратнине кӑтартатпӑр. Айтӑр ҫавӑн ҫинчен тӗплӗнрех калаҫар.

ЫРӐ ХЫПАРА ӐНА ЮРАТНӐРАН ПӖЛТЕРЕТПӖР

4. Лайӑх хыпарсем илтсен эпир мӗн туятпӑр?

⁴ Пӗр-пӗр лайӑх хыпар илтсен хӑвӑр мӗн туйнине аса илӗр-ха. Тен, сирӗн хурӑнташсен ача ҫуралнӑ. Е эсир хӑвӑра питӗ кирлӗ пулнӑ чухне ӗҫ тупнӑ. Паллах, сирӗн ҫавӑн ҫинчен туссемпе ҫывӑх ҫынсене хӑвӑртрах каласа парас килнӗ. Чи чаплӑ хыпара вара — Турӑ Патшалӑхӗ ҫинчен калакан хыпара илтсен, эсир мӗн туйнӑ?

5. Турӑ Сӑмахӗнчи чӑнлӑха пӗрремӗш хут илтсен эсир мӗн туйрӑр? (Ӳкерчӗксем ҫине те пӑхӑр.)

⁵ Турӑ Сӑмахӗнчи чӑнлӑха пӗрремӗш хут илтнине аса илӗр-ха. Эпир пирӗн ҫӳлти Атте пире юратнине тата хӑйӗн ҫемйине йышӑнасшӑн пулнине ӑнланса илтӗмӗр. Вӑл пур хуйха та, ыратнине те пӗтерессе пӗлтӗмӗр. Тата пирӗн хамӑрӑн вилнӗ ҫывӑх ҫынсене вӗсем ҫӗнӗ тӗнчере чӗрӗлсе тӑрсан курма шанчӑк ҫуралчӗ (Марк 10:29, 30; Иоанн 5:28, 29; Рим 8:38, 39; Ӳлӗм. 21:3, 4). Ҫак хаклӑ чӑнлӑхсем пирӗн чӗрене ӑшӑтрӗҫ (Лука 24:32). Эпир ҫак чӑнлӑхсене юратрӑмӑр тата вӗсене ыттисене пӗлтермесӗр тӑраймарӑмӑр! (Иеремия 20:9 танлаштарӑр.)

6. Эрнестпа Розӑн тӗслӗхӗ сире мӗне вӗрентет?

⁶ Акӑ пӗр ҫемьен тӗслӗхӗ. Эрне́стb вуннӑра пулнӑ чухне унӑн ашшӗ вилнӗ. Ӑна пӗр ыйту канӑҫ паман: ашшӗ халь пӗлӗтре-и е вӑл ниҫта та ҫук-и? Вӑл ытти ачасене — камӑн ашшӗ пур, ҫавсене — ӑмсаннӑ. Эрнест кашни кун тенӗ пекех масар ҫине кайса ашшӗн вил тӑпри умӗнче чӗркуҫленсе ҫапла кӗлтунӑ: «Турӑҫӑм, атте ӑҫта пулнине пӗлме пулӑшсам мана, тархасшӑн». 17 ҫула яхӑн иртсен Эрнеста Библи вӗренме сӗннӗ, вӑл вара хаваспах килӗшнӗ. Вӑл вилнисем, тарӑн ыйхӑпа ҫывӑрнӑ пек, нимӗн те пӗлменнине, пуласлӑхра вара чӗрӗлсе тӑрассине ӑнланса илнӗ (Еккл. 9:5, 10; Ап. ӗҫ. 24:15). Вара вӑл калама ҫук савӑннӑ! Тинех Эрнест хӑйне нумай ҫул хушши канӑҫ паман ыйтӑвӗсен хуравӗсене тупнӑ. Ӑна Библири чӑнлӑхсем питӗ килӗшнӗ. Унӑн арӑмӗ Роза та унпа пӗрле Библи вӗренме пуҫланӑ. Ӑна та Библири чӑнлӑхсем питӗ килӗшнӗ. Вӗсем 1978 ҫулта шыва кӗнӗ. Ҫак мӑшӑр хаклӑ чӑнлӑхсене хурӑнташӗсене, юлташӗсене тата ыттисене те хастаррӑн пӗлтернӗ. Эрнестпа Роза 70 ытла ҫынна Иеговӑпа паллашма тата шыва кӗме пулӑшнӑ.

7. Библири чӑнлӑха хытӑ юратни пире мӗн тума хавхалантарать? (Лука 6:45).

⁷ Чӑн та, Библири чӑнлӑха хытӑ юратнӑран эпир ним чӗнмесӗр тӑраймастпӑр. (Лука 6:45 вуласа парӑр.) Эпир Иисусӑн пӗрремӗш ӗмӗрти вӗренекенӗсем мӗн туйнинех туятпӑр. Вӗсем: «Эпир хамӑр мӗн курнине, мӗн илтнине каламасӑр тӑраймастпӑр», — тесе каланӑ (Ап. ӗҫ. 4:20). Чӑнлӑха ҫав тери хытӑ юратнӑран пирӗн ун ҫинчен май килнӗ таран ытларах ҫынна каласа парас килет.

ЫРӐ ХЫПАРА ҪЫНСЕНЕ ЮРАТНӐРАН ПӖЛТЕРЕТПӖР

8. Ыттисене ырӑ хыпар пӗлтерме пире мӗн хавхалантарать? («Ҫынсене юратӑр. Вӗренекенсене хатӗрлӗр» рамкӑна пӑхӑр.) (Ӳкерчӗк ҫине те пӑхӑр.)

⁸ Иеговӑпа унӑн Ывӑлӗ ҫынсене юратаҫҫӗ (Ытар. 8:31; Иоанн 3:16). Пирӗн те вӗсем пекех пулас килет. Эпир ҫынсене чун-чӗререн хӗрхенетпӗр, мӗншӗн тесен вӗсем Турӑсӑр пурӑнаҫҫӗ тата вӗсен шанчӑк ҫук (Эф. 2:12). Вӗсем йывӑрлӑхсем ӑшне путнӑ, пирӗн вара вӗсем валли ҫӑлӑнмалли ункӑ — Турӑ Патшалӑхӗ ҫинчен калакан ырӑ хыпар — пур. Ҫынсене юратнӑран тата хӗрхеннӗрен вӗсене ырӑ хыпар пӗлтерес тесе эпир пур майпа та усӑ курма тӑрӑшатпӑр. Турӑ ҫинчен пӗлсе пыни вӗсене халех телейлӗрех пулма пулӑшма пултарать тата «чӑн-чӑн пурнӑҫа» — ҫӗнӗ тӗнчери ӗмӗрлӗх пурнӑҫа — илме шанчӑк парать (1 Тим. 6:19).

9. Эпир ҫынсене мӗн пирки асӑрхаттаратпӑр тата мӗншӗн? (Иезекииль 33:7, 8).

⁹ Ҫынсене юратни пире ҫак усал тӗнче кӗҫ-вӗҫ пӗтесси ҫинчен асӑрхаттарма та хавхалантарать. (Иезекииль 33:7, 8 вуласа парӑр.) Иеговӑшӑн ӗҫлемен ҫынсемпе, ҫав шутрах пирӗн хурӑнташсемпе, мӗн пуласси ҫинчен шухӑшласан, чун ыратать. Пысӑк хӗн-асап ҫывхарса пырать, «ҫавӑн пекки тӗнчене пултарнӑранпа халиччен те пулман, урӑх пулас та ҫук» (Матф. 24:21). Нумайӑшӗ вара ҫавӑн пирки пӗлмест. Эпир вӗсем Иегова суд тунӑ чухне мӗн пулассине пӗлччӗр тетпӗр: малтан суя тӗн тӗп пулӗ, кайран вара Армагеддонра пӗтӗм усал тӗнче пӗтӗ (Ӳлӗм. 16:14, 16; 17:16, 17; 19:11, 19, 20). Эпир май килнӗ таран ытларах ҫын асӑрхаттарнине итлетӗр те пирӗнпе пӗрле халех Турра тӗрӗс пуҫҫапма пуҫлатӑр тесе кӗлтӑватпӑр. Эпир калакан хыпара хальлӗхе итлемен ҫынсем пирки вара, ҫав шутрах пирӗн хаклӑ хурӑнташсем пирки, мӗн калама пулать?

10. Мӗншӗн ҫынсене кӗҫех мӗн пуласси ҫинчен халех асӑрхаттармалла?

¹⁰ Унчченхи статьяра каланӑ пек, хӑш-пӗр ҫынсем, суя тӗн пӗтнине курсан, Иеговӑна ӗненме пуҫлама пултараҫҫӗ, вӑл вара вӗсене, тен, ҫӑлӑнса юлма май парӗ. Апла пулсан, Аслӑ Вавилонпа мӗн пуласси ҫинчен малалла та каласа тӑмалла. Шутласа пӑхӑр-ха: ҫынсем эпир вӗсене халӗ мӗн каланине кайран аса илме пултараҫҫӗ. (Иезекииль 33:33 танлаштарӑр.) Тен, вӗсем эпир асӑрхаттарнине аса илсе, кая юличчен, пирӗнпе пӗрле Турра тӗрӗс пуҫҫапма пуҫлӗҫ. Тӗслӗхрен, Филиппӑри тӗрме хуралҫи «ҫӗр питӗ хытӑ чӗтренсе кайнӑ» хыҫҫӑн тин Иисуса ӗненме пуҫланӑ (Ап. ӗҫ. 16:25—34). Аслӑ Вавилон сасартӑк пӗтни, тен, хӑшӗ-пӗрисене, сӑнарлӑ каласан, чӗтретсе илӗ. Вӗсем халӗ ырӑ хыпара йышӑнмасан та, пуласлӑхра хӑйсен шухӑшне улӑштарма пултараҫҫӗ.

ЫРӐ ХЫПАРА ИЕГОВӐНА ТАТА УНӐН ЯТНЕ ЮРАТНӐРАН ПӖЛТЕРЕТПӖР

11. Мӗнле майпа эпир Иеговӑна чыс, мухтав кӳретпӗр тата хамӑр хӑвата паратпӑр? (Ӳлӗмхи 4:11). (Ӳкерчӗксем ҫине те пӑхӑр.)

¹¹ Ырӑ хыпар сарма пире пуринчен ытла мӗн хавхалантарать? Иеговӑна тата унӑн сӑваплӑ ятне юратни. Ырӑ хыпар сарни пире хамӑрӑн ҫӳлти Аттене мухтама май парать. (Ӳлӗмхи 4:11 вуласа парӑр.) Эпир «Иегова, пирӗн Турӑ, эсӗ мухтав та, чыс та, хӑват та илме тивӗҫлӗ» тенипе пӗтӗмпех килӗшетпӗр (Ӳлӗм. 4:11, сноска). Ҫынсемпе калаҫнӑ май Иегова пурне те тунине тата эпир ӑна пула пурӑннине кӑтартакан ҫирӗплетӳсене илсе панӑ чухне эпир ӑна чыс тата мухтав кӳретпӗр. Ырӑ хыпар сарас ӗҫре хамӑртан мӗн килнине веҫех тӑвас тесе хамӑр вӑхӑта, вӑя тата укҫа-тенкӗне уйӑрнипе эпир Иеговӑна хамӑр хӑвата паратпӑр (Матф. 6:33; Лука 13:24; Кол. 3:23). Ҫакна веҫех эпир хамӑр юратнӑ Турӑ ҫинчен ыттисене каласа пама килӗшнӗрен тӑватпӑр. Унсӑр пуҫне, пирӗн ыттисене Туррӑн ячӗ ҫинчен тата вӑл мӗнлерех Турӑ пулни ҫинчен каласа парас килет. Мӗншӗн?

12. Ырӑ хыпар сарса эпир Иеговӑн ятне мӗнле майпа сӑваплӑ тӑватпӑр?

¹² Иеговӑна юратнӑран эпир унӑн ятне сӑваплӑ тӑвасшӑн (Матф. 6:9). Шуйттан сӗмсӗр суя каласа Турӑ ятне вараланӑ, эпир вара унӑн сӑмахӗсем тӗрӗс мар пулнине кӑтартасшӑн (Пулт. 3:1—5; Иов 2:4; Иоанн 8:44). Хамӑра итлес текенсене Турӑ ҫинчен чӑнлӑха каласа парса эпир ун хутне кӗретпӗр. Эпир ытти ҫынсем те хамӑр мӗн пӗлнине пӗлччӗр тетпӗр. Иеговӑн чи чаплӑ енӗ — юрату. Вӑл тӳрӗлӗхпе тата тӗрӗслӗхпе ертсе пырать. Унӑн Патшалӑхӗ кӗҫех пур хӗн-асапа та пӗтерӗ тата пур этемлӗхе мирпе телей кӳрӗ (Пс. 36:10, 11, 29; 1 Иоанн 4:8). Иегова ҫинчен ҫак чӑнлӑхсене каласа парса эпир унӑн ятне сӑваплӑ тӑватпӑр. Иегова Свидетелӗсем пулнӑ май ҫак ятпа килӗшӳллӗн пурӑнни те пире телей кӳрет. Ҫакӑнпа эпир мӗн каласшӑн?

13. Иегова Свидетелӗсем пуласси мӗншӗн пирӗншӗн пысӑк чыс? (Исаия 43:10—12).

¹³ Иегова пире хӑйӗн свидетелӗсем пулма суйласа илнӗ. (Исаия 43:10—12 вуласа парӑр.) Ертсе пыракан советӑн пӗр ҫырӑвӗнче ҫапла каланӑ пулнӑ: «Иегова Свидетелӗ пуласси ҫыншӑн чи пысӑк чыс»c. Мӗншӗн ҫапла калама пулать? Пӗр тӗслӗх пӑхса тухар. Калӑпӑр, сире преступлени тунӑ тесе айӑплаҫҫӗ. Сире хӑвӑр пирки лайӑх ҫын тата эсир ҫавӑн пек преступлени тума пултарайман тесе калакан свидетель кирлӗ. Эсир кама чӗннӗ пулӑттӑр? Кама лайӑх пӗлетӗр тата шанатӑр, кам ыттисем умӗнче ырӑ ятлӑ тата шанӑҫа тивӗҫлӗ, ҫав ҫынна чӗнӗр паллах. Иегова пире хӑйӗн Свидетелӗсем пулма суйласа илнипе ҫакна кӑтартнӑ: вӑл пире лайӑх пӗлет тата хӑй пӗртен-пӗр чӑн Турӑ иккенне ыттисене каласа пама пире шанса панӑ. Пирӗншӗн унӑн Свидетелӗсем пуласси — пысӑк чыс! Ҫавӑнпа та эпир унӑн ячӗ ҫинчен каласа памашкӑн тата ун пирки каланӑ пур суяна та тӑрӑ шыв ҫине кӑлармашкӑн пур майпа та усӑ куратпӑр. Ҫапла эпир, Иегова Свидетелӗсем пулнӑ май, хамӑрӑн мӗн тумаллине тӑватпӑр (Пс. 82:19; Рим 10:13—15).

ЭПИР МӖН ВӖҪНЕ ҪИТИЧЧЕНЕХ ЫРӐ ХЫПАР ПӖЛТЕРӖПӖР

14. Эпир мӗн пуласса кӗтетпӗр?

¹⁴ Эпир мӗн пуласса кӗтетпӗр? Пысӑк хӗн-асап пуҫланиччен, Иегова пилленипе, нумай-нумай ҫын чӑнлӑха йышӑнасса шанатпӑр. Унсӑр пуҫне, пире ҫакӑ та савӑнтарать: этемлӗхӗн чи япӑх саманинче — пысӑк хӗн-асап вӑхӑтӗнче — ҫынсен ҫак пӗтсе пыракан Шуйттанӑн тӗнчинчен тухса пирӗнпе пӗрле Иеговӑна пуҫҫапма май пулать пулас (Ап. ӗҫ. 13:48).

15, 16. Эпир малалла та мӗн тӑвӑпӑр тата хӑҫанччен?

¹⁵ Хальлӗхе вара эпир питӗ пӗлтерӗшлӗ ӗҫ туса тӑратпӑр. Ҫак ӗҫе тек нихӑҫан та тумӑпӑр: эпир пӗтӗм тӗнчипех Турӑ Патшалӑхӗ ҫинчен калакан хыпара пӗлтеретпӗр. Ҫав вӑхӑтрах эпир ҫынсене ҫак тӗнче кӗҫ-вӗҫ пӗтесси пирки асӑрхаттаратпӑр. Вара, суд кунӗ килсен, вӗсем эпир каланӑ хыпар Иеговӑран пулнине ӑнланса илӗҫ (Иез. 38:23).

¹⁶ Эппин, ҫак статья пире мӗн тума хавхалантарать? Айтӑр юратнӑран — ырӑ хыпара, ҫынсене, чи кирли вара, Иегова Турра тата унӑн ятне юратнӑран — Иегова «ҫитет!» тесе каличчен хастаррӑн та чун-чӗререн ырӑ хыпар пӗлтерер.