Эпир хамӑрӑнни ҫинче тӑманнине пурин те курса тӑмалла. Хӑвӑртан ыйтӑр: «Ыттисем ман пирки вӑл хӑйӗнни ҫинче тӑмасть, ҫемҫе кӑмӑллӑ тесе шутлаҫҫӗ-и? Е ман пирки кутӑн та тӳрккес теҫҫӗ-и? Эпӗ ыттисене итлетӗп-и тата, вырӑнлӑ пулсан, вӗсем мӗн каланине шута илетӗп-и?» Мӗн чухлӗ сахалрах эпир хамӑрӑнни ҫинче тӑратпӑр, ҫавӑн чухлӗ лайӑхрах Иеговӑпа Иисусран тӗслӗх илетпӗр. Пурнӑҫри лару-тӑру улшӑнсан та пирӗн хамӑрӑнни ҫинче тӑмалла мар. Улшӑнусене пула кӗтмен ҫӗртен йывӑрлӑхсем сиксе тухма пултараҫҫӗ. Сӑмахран, эпир йывӑр чирлесе ӳкме пултаратпӑр. Экономикӑпа тата политикӑпа ҫыхӑннӑ улшӑнусем те пирӗн пурнӑҫа самаях йывӑрлатса яма пултараҫҫӗ (Еккл. 9:11). Унсӑр пуҫне, организацире хамӑр туса тӑракан тивӗҫсем те улшӑнма пултараҫҫӗ. Ҫавӑн чухне те пире ҫӑмӑл мар пулма пултарать. Ҫӗнӗ лару-тӑрӑва хӑнӑхма пире тӑватӑ утӑм пулӑшӗ: 1) лару-тӑру улшӑннине йышӑнӑр, 2) малалла пӑхӑр, 3) лайӑххи ҫинчен шухӑшлӑр, 4) ыттисене пулӑшӑр. w23.07 21—22 с., 7, 8 абз.

Даниила тӑван килӗнчен уйӑрса аякри Вавилона тыткӑна илсе кайнӑ чухне вӑл ҫап-ҫамрӑк пулнӑ. Унта ӑна тӳрех асӑрханӑ, мӗншӗн тесен вӑл «ӳт-пӳ тӗлӗшӗнчен пӗр кӑлтӑксӑр, хитре сӑн-питлӗ» пулнӑ тата ятлӑ-сумлӑ ҫемьерен тухнӑ. Ҫавӑнпа ӑна патша керменӗнче ӗҫлесе тӑма хатӗрлеме пуҫланӑ (Дан. 1:3, 4, 6; 1 Пат. 16:7). Даниил Иеговӑна юрама чун-чӗререн тӑрӑшнӑ, ҫавӑншӑн Иегова ӑна юратнӑ. Шухӑшласа пӑхӑр-ха, Даниил 20 ҫулсенче кӑна пулнӑ, ҫапах та ӑна Иегова хӑйӗншӗн вун-вун ҫул хушши шанчӑклӑн ӗҫлесе тӑнӑ Нойпа тата Иовпа пӗр шая тӑратнӑ (Пулт. 5:32; 6:9, 10; Иов 42:16, 17; Иез. 14:14). Даниил нумай пурӑннӑ тата унӑн пурнӑҫӗнче тем те пулнӑ, Иегова вара ӑна нихӑҫан та юратма пӑрахман (Дан. 10:11, 19). w23.08 2 с., 1, 2 абз.

Эсир ҫурт туянасшӑн пулсан, ӑна вак-тӗвек таранах пӑхса тухӑр пулӗ. Библи вуланӑ тата тӗпченӗ чухне те эпир ҫапларах тума пултаратпӑр. Ӑна хӑвӑрттӑн вуласа тухсан «Туррӑн сӑваплӑ сӑмахӗнчи тӗп чӑнлӑхсене» кӑна пӗлме пулать (Евр. 5:12). Ҫавӑнпа та, ҫурт илнӗ чухнехи пекех, «шала» кӗрсе вак-тӗвексене тӗпчемелле. Сӑмахран, Библи тӗпчемелли лайӑх майсенчен пӗри — унта мӗн ҫырни пӗр-пӗринпе мӗнле ҫыхӑнса тӑнине курма тӑрӑшни. Хӑвӑр мӗне ӗненнине тата мӗншӗн ҫавна ӗненнине ӑнланма тӑрӑшӑр. Турӑ Сӑмахне лайӑх ӑнланас тесен ӑна тарӑн тӗпчемелле. Павел апостол тӑвансене «чӑнлӑхӑн сарлакӑшне, вӑрӑмӑшне, ҫӳллӗшне тата тарӑнӑшне» ӑнланса илмешкӗн Сӑваплӑ Ҫырӑва тӑрӑшса тӗпчеме хавхалантарнӑ. Вара ҫав христиансем ӗненӳре тымар ярса ӗненӗвӗн «ҫирӗп никӗсӗ ҫинче» тӑма пултарнӑ пулӗччӗҫ (Эф. 3:14—19). Пирӗн те ҫаплах тумалла. w23.10 18 с., 1—3 абз.