YMDOPI Â’R CYNNYDD MEWN PRISIAU

Rheoli Eich Arian yn Ofalus

Mae prisiau cynyddol yn her i bob un ohonon ni. Ond does dim angen ichi deimlo’n ddiymadferth. Mae’n debyg bod pethau y gallwch chi eu gwneud i wella’r sefyllfa.

PAM MAE’N BWYSIG?

Os nad ydych chi’n gwneud dim i reoli eich arian, mae’n hawdd i’r sefyllfa waethygu, a bydd hynny yn ychwanegu at eich pryderon. Hyd yn oed os ydy arian yn brin, mae sawl peth y gallwch ei wneud i reoli eich sefyllfa ariannol.

BETH ALLWCH CHI EI WNEUD?

Gwario llai na’ch incwm. Drwy wneud hyn, byddwch chi’n teimlo bod y sefyllfa ariannol dan reolaeth, a byddwch chi’n fwy parod ar gyfer costau annisgwyl.

Er mwyn gwario llai na’ch incwm, mae’n help mawr os ydych chi’n creu cyllideb—hynny yw cynllun sy’n dangos faint rydych chi’n ei ennill a faint sydd ei angen i dalu eich biliau. Wrth lunio’r gyllideb, meddyliwch yn ofalus am eich gwir anghenion. Yna gwnewch eich gorau i gadw at eich cynllun, a’i addasu os bydd prisiau, neu eich incwm, yn newid. Wrth gwrs, os ydych chi’n briod, dylech chi wneud penderfyniadau gyda’ch gilydd.

Rhowch gynnig ar hyn: Yn lle prynu ar gredyd, defnyddiwch arian parod os gallwch. Drwy wneud hyn, mae rhai’n ei chael hi’n haws rheoli eu gwario ac osgoi mynd i ddyled. Hefyd, cofiwch edrych ar eich cyfriflenni banc. Bydd gwybod faint o arian sydd gynnoch chi yn lleihau straen.

Gall fod yn anodd byw o fewn eich incwm. Ond bydd cyllideb ymarferol, wedi ei chynllunio’n dda, yn help mawr. Bydd yn gwneud ichi deimlo bod y sefyllfa dan reolaeth.

‘Cyfrifwch y gost.’—Luc 14:28.

Cadwch eich swydd. Pa bethau ymarferol gallwch chi eu gwneud i gadw eich swydd? Dyma rai syniadau: Byddwch yn brydlon. Cadwch agwedd bositif tuag at eich gwaith. Helpwch eraill a gweithiwch yn galed. Dangoswch barch. Dilynwch y rheolau, a cheisiwch wella eich sgiliau.

Peidiwch â gwastraffu eich arian. Gofynnwch, ‘A oes gen i arferion costus neu wastraffus?’ Er enghraifft, mae llawer o bobl yn gwastraffu arian maen nhw wedi gweithio’n galed amdano drwy gamddefnyddio cyffuriau, gamblo, smygu, neu yfed gormod o alcohol. Mae’r arferion hyn yn gallu costio rhywun ei iechyd a’i swydd.

“Gwyn ei fyd y sawl a gafodd ddoethineb . . .Y mae mwy o elw ynddi nag mewn arian.”—Diarhebion 3:13, 14, Beibl Cymraeg Newydd Diwygiedig.

Cynilwch ar gyfer costau annisgwyl. Pan fydd hi’n bosib, rhowch ychydig o arian o’r neilltu ar gyfer costau annisgwyl neu i’w ddefnyddio mewn argyfwng. Mae cael cronfa wrth gefn yn gallu lleddfu’r straen os byddwch chi neu rywun yn y teulu yn mynd yn sâl, yn colli swydd, neu’n wynebu rhywbeth arall annisgwyl.

“Mae damweiniau’n gallu digwydd i bawb.”—Pregethwr 9:11.

Awgrymiadau Arbed Arian

Paratoi prydau bwyd yn y cartref.

Mae mynd allan i fwyta’n aml neu brynu prydau parod a diodydd yn gallu bod yn gostus. Wrth gwrs, mae paratoi bwyd gartref yn cymryd amser ac ymdrech, ond mae’n arbed llawer o arian. Mae’n debyg y byddwch yn bwyta’n iachach hefyd.

Siopa’n gall.

Gwnewch restr siopa a chadwch ati. Peidiwch â phrynu ar fympwy.
Os bydd eich cyllid yn caniatáu, gall fod yn rhatach prynu rhai pethau mewn llwyth. Ond sicrhewch fod modd ichi gadw nwyddau darfodus rhag dirywio er mwyn peidio â’u gwastraffu.
Ystyriwch brynu cynnyrch brand y siop os ydyn nhw’n ddigon da.
Prynwch ar lein i gael prisiau gwell, i gadw llygad ar faint rydych chi’n ei wario, ac i osgoi cael eich temtio yn y siop. Os oes modd siopa ar lein yn eich ardal chi, beth am roi cynnig arni?
Edrychwch am sêls a defnyddiwch gwponau os ydyn nhw ar gael. Cymharwch brisiau, gan gynnwys cost eich trydan, nwy, dŵr, a biliau rheolaidd eraill.

Meddwl cyn prynu’r teclyn diweddaraf.

Mae cwmnïau sy’n gwneud ffonau a phethau eraill yn cyflwyno modelau newydd o hyd er mwyn gwneud elw. Felly cymerwch funud i ofyn: ‘A fydda i’n well fy myd o gael y model diweddaraf? Oes gwir angen imi gael un newydd ar hyn o bryd? Ac os ydw i’n prynu un newydd, oes gwir angen imi gael y model diweddaraf un?’

Trwsio ac ailddefnyddio.

Bydd eich dyfeisiau’n para’n hirach os ydych chi’n edrych ar eu holau, ac yn eu trwsio yn lle eu taflu os bydd hynny yn gost-effeithiol. Gall fod yn werth ystyried prynu pethau ail-law.

Tyfu bwyd.

A oes modd ichi dyfu rhywfaint o’ch bwyd eich hun? Bydd hyn yn lleihau eich bil am fwyd, ac efallai bydd gynnoch chi ddigon i’w werthu, i’w gyfnewid, neu i’w rannu ag eraill.

“Mae llwyddiant yn dod o gynllunio gofalus a gwaith caled.”—Diarhebion 21:5.

“Rydyn ni’n cadw llygad ar brisiau pethau bob dydd, ac rydyn ni’n ofalus am faint rydyn ni’n defnyddio’r cerdyn credyd.”—Miles, Lloegr.

“Cyn inni siopa am fwyd, rydyn ni bob amser yn gwneud rhestr o’r pethau sydd eu hangen arnon ni.”—Jeremy, UDA.

“Rydyn ni’n diweddaru cyllid y teulu yn rheolaidd, gan ystyried newidiadau economaidd, ac rydyn ni’n cadw arian wrth gefn i dalu costau annisgwyl.”—Yael, Israel.

“Rydyn ni wedi dysgu’r plant i drwsio pethau yn lle prynu rhai newydd. Mae hyn yn cynnwys y car a phethau yn y tŷ. Mae fy ngwraig a minnau hefyd yn ceisio osgoi prynu’r modelau diweddaraf.”—Jeffrey, UDA.

“Dw i wedi lleihau costau drwy blannu llysiau a chadw ieir. Mae gen i ddigon o lysiau bellach i’w rhannu â phobl eraill.”—Hono, Myanmar.