Helpu Pobl Ddall i Ddysgu am Jehofa
1. Sut dangosodd Iesu drugaredd tuag at bobl ddall?
1 Dim ond ychydig o ddyddiau cyn i Iesu farw, aeth i Jericho. Ar ei ffordd allan o’r ddinas, clywodd Iesu ddau ddyn dall yn gweiddi: “Syr, trugarha wrthym.” Er bod y treialon o flaen Iesu yn pwyso’n drwm ar ei feddwl, fe stopiodd a galw’r dynion ato, a’u hiacháu. (Math. 20:29-34) Sut medrwn ni efelychu trugaredd Iesu tuag at bobl ddall?
2. Sut gallwn dystiolaethu i rywun dall rydyn ni’n ei gyfarfod mewn man cyhoeddus?
2 Byddwch yn Barod i Helpu: Os ydych yn cyfarfod rhywun dall, efallai mewn man cyhoeddus, cyflwynwch eich hunan a gofyn a oes angen help arno. Gan fod rhai yn cymryd mantais ar y deillion, gallen nhw deimlo’n amheus. Ond, os ydyn ni’n gyfeillgar ac yn dangos gwir ddiddordeb ynddyn nhw, bydden nhw’n ymlacio. Cofiwch fod rhai yn gallu gweld yn well nag eraill, felly bydd hyn yn effeithio ar faint o help sydd ei angen arnyn nhw. Ar ôl helpu’r unigolyn, efallai bydd cyfle i ddweud eich bod chi’n dysgu eraill am y Beibl. Cynigiwch ddarllen adnod iddo, er enghraifft Salm 146:8 neu Eseia 35:5, 6. Mae rhai yn darllen Braille, felly gofynnwch a oes ganddo ddiddordeb mewn derbyn llenyddiaeth Braille er mwyn iddo ddysgu mwy am y Beibl. Gallwch hefyd ei helpu i lawrlwytho ffeiliau sain o jw.org. Mae’n bosibl bod rhaglen darllenydd sgrin ar ei gyfrifiadur sy’n darllen ysgrifen sydd ar y sgrin yn uchel. Efallai bydd yn mwynhau’r erthyglau ar jw.org ynghyd ag unrhyw lenyddiaeth a all eu lawrlwytho yn RTF (Fformat Testun Cyfoethog).—Gweler y blwch “Wrth Helpu Rhywun Dall . . .”
3. Sut medrwn ni chwilio am bobl ddall yn ein tiriogaeth?
3 Chwiliwch am Bobl Ddall: Anaml y bydden ni’n cwrdd â phobl ddall wrth fynd o ddrws i ddrws gan fod nifer ohonyn nhw yn teimlo’n anghyfforddus yn siarad â phobl ddiarth. Felly, mae’n cymryd ymdrech i chwilio am y deillion er mwyn tystiolaethu iddyn nhw. (Math. 10:11) Oes gennych gyd-weithiwr neu ffrind ysgol sy’n ddall? Cymerwch y cyfle i siarad â nhw. Os oes ysgol ar gyfer y deillion yn eich tiriogaeth, cynigiwch roi llenyddiaeth Braille i lyfrgell yr ysgol. A ydych chi’n adnabod rhywun â pherthnasau dall? Oes unrhyw elusennau neu gymdeithasau yn eich tiriogaeth sy’n cynnig gwasanaethau i’r deillion, neu oes unrhyw leoliadau sy’n rhoi cymorth byw i’r rhai sy’n ddall? Esboniwch i aelod y teulu, y derbynnydd, neu’r rheolwr fod Tystion Jehofa yn ceisio helpu’r rhai dall, a chynigiwch ddod â llenyddiaeth Braille neu sain iddo. Dangoswch addewid Duw ynglŷn â sut y byddai’n adfer golwg y rhai dall am byth. Efallai byddwch eisiau dangos y fideo “Without It, I Would Feel Lost,” sydd ar jw.org. Mae’n sôn am hanes dyn dall a elwodd o gael Beibl mewn Braille. Gall esbonio pwrpas eich ymweliad agor y drws i chi gysylltu â mwy o bobl ddall.
4. Beth mae profiad Janet yn ein dysgu ni?
4 Ymwelodd chwaer ddall o’r enw Janet â chartref gyda phreswylwyr dall. Yno, dechreuodd sgwrs â dynes ifanc. Dywedodd Janet wrthi, “Iachaodd Iesu bobl ddall er mwyn dangos yr hyn a fydd yn ei wneud ar gyfer pob un o’r deillion yn y dyfodol.” Wrth drafod Datguddiad 21:3, 4 gyda’i gilydd, esboniodd Janet sut bydd yr addewid yma yn cael ei gyflawni o dan Deyrnas Dduw. Aeth y ddynes ifanc yn ddistaw, ac yna fe ddywedodd: “Dw i erioed wedi clywed hyn o safbwynt person dall. Mae’r rhan fwyaf o bobl sy’n medru gweld yn credu bod pobl yn ddall oherwydd rhywbeth y gwnaethon nhw, neu rywbeth y gwnaeth eu cyndadau.” Anfonodd Janet e-bost i’r ddynes gyda dolen i’r llyfr Beibl Ddysgu, ac maen nhw nawr yn astudio’r Beibl ddwywaith yr wythnos.
5. Er nad ydyn ni’n gallu iacháu’r deillion fel y gwnaeth Iesu, pa fendithion a ddaw o ddangos diddordeb ym mhobl ddall?
5 Wrth gwrs, ni allwn iacháu’r deillion fel y gwnaeth Iesu. Ond, gallwn helpu’r rhai sydd wedi cael eu dallu yn feddyliol gan dduw’r oes bresennol, gan gynnwys y deillion, i ddeall gwirionedd Gair Duw. (2 Cor. 4:4) Iachaodd Iesu y ddau ddyn dall yn ymyl Jericho oherwydd iddo ‘dosturio wrthyn nhw.’ (Math. 20:34) Os ydyn ninnau hefyd yn dangos diddordeb yn y rhai dall, gallwn fwynhau’r fraint o’u helpu nhw i ddysgu am Jehofa, yr un a fydd yn adfer golwg y deillion am byth.