Y Llyfr Imitate Their Faith
1. Beth mae’r llyfr Imitate Their Faith yn ei drafod?
1 Mae’r llyfr Imitate Their Faith yn edrych yn fanwl ar hanesion 14 o ddynion a merched ffyddlon yn y Beibl. Mae’n gwneud hyn mewn modd sy’n dod â chymeriadau ffyddlon yn fyw yn ein meddyliau, ac mae hyn yn ein helpu ni i’w gweld fel pobl go iawn a wynebodd anawsterau wrth addoli Jehofa. Mae’r llyfr hefyd yn dysgu gwersi y gallwn ni i gyd eu rhoi ar waith yn ein bywydau heddiw.—Heb. 6:12.
2. Esboniwch rai o nodweddion y llyfr Imitate Their Faith.
2 Nodweddion: Mae’r llyfr yn cynnwys llinell amser a mapiau i’n helpu ni i weld pa bryd a yn lle roedd pob cymeriad yn byw. Hefyd, mae pob pennod yn cynnwys y rhan “To Think About. . . ,” sy’n ein helpu ni i fyfyrio ar yr hanesion, a rhoi’r gwersi ymarferol rydyn ni’n eu dysgu ar waith. Mae’r llyfr yn llawn lluniau lliwgar sydd wedi eu hymchwilio’n fanwl ac sy’n helpu dod â’r hanesion yn fyw.
3. Beth y gallwn ni ei wneud i elwa ar astudio’r llyfr hwn?
3 Sut Gallwch Chi Elwa? Mae llythyr agoriadol y Corff Llywodraethol yn ein hannog ni i wneud hyn: “Defnyddiwch eich dychymyg a’ch synhwyrau. Ceisiwch deimlo’r hyn yr oedd y cymeriadau’r Beibl yn ei deimlo, a gweld yr hyn a welon nhw. Cymharwch eu hymateb nhw â’r ffordd y buasech chi wedi ymateb i’r un sefyllfa.” Wrth gwrs, nid oes angen mynd dros ben llestri ond dylen ni ddychmygu’r hyn y mae’r hanes ysbrydoledig yn ei ddweud a cheisio cydymdeimlo â’r cymeriadau. Bydd hi’n cymryd amser i fyfyrio ar yr hanesion hyn.—Neh. 8:8.
4. Pam mae angen inni astudio’r llyfr Imitate Their Faith?
4 Rydyn ni’n byw mewn byd sy’n ceisio erydu neu wanhau ein ffydd a hynny bob dydd. Mae’r llyfr hwn, ynghyd â’r gyfres o erthyglau yn y Watchtower sy’n sail iddo, yn anrheg werthfawr oddi wrth Jehofa sy’n ein helpu ni i gryfhau ein ffydd. (Iago 1:17) Felly, beth am inni fanteisio’n llawn ar y llyfr hwn drwy ei astudio yn ein Haddoliad Teuluol?