Torrais Un o Reolau’r Teulu—Beth Nawr?

Mae gan bron pob teulu reolau. Gall y rhain gynnwys pa amser mae’n rhaid iti ddod adref, faint o amser gelli di ei dreulio ar dy ddyfeisiau electronig, a sut i drin eraill yn gwrtais.

Beth os wyt ti’n torri un o’r rheolau? Gelli di ddim newid dy gamgymeriad. Ond gelli di wneud rhywbeth i stopio’r sefyllfa rhag gwaethygu. Bydd yr erthygl hon yn dangos sut gelli di wneud hynny.

• Beth i beidio â’i wneud

• Ffordd well o ymateb

• Beth mae dy gyfoedion yn ei ddweud

Beth i beidio â’i wneud

• Os dydy dy rieni ddim yn gwybod dy fod ti wedi torri rheol, efallai byddet ti’n teimlo fel cuddio unrhyw dystiolaeth.

• Os dydyn nhw ddim yn gwybod dy fod ti wedi torri rheol, efallai cei di dy demtio i wneud esgusodion neu i roi’r bai ar rywun arall.

Dydy’r rhain ddim yn opsiynau da. Pam? Oherwydd dydy person aeddfed ddim yn cuddio’r hyn a ddigwyddodd neu’n gwneud esgusodion. Byddai gwneud hynny ond yn dangos i dy rieni nad wyt ti’n ddigon aeddfed.

“Nid dweud celwydd yw’r ateb. Mewn amser, bydd y gwir yn dod i’r amlwg, a bydd dy rieni yn dy ddisgyblu di’n fwy llym nag os oeddet ti wedi dweud y gwir yn y lle cyntaf.”—Diana.

Ffordd well o ymateb

• Cyfaddef beth wnest ti. Mae’r Beibl yn dweud: “Fydd y sawl sy’n cuddio’i feiau ddim yn llwyddo.” (Diarhebion 28:13) Mae dy rieni yn gwybod na elli di fod yn berffaith, ond y cwestiwn ydy, A elli di fod yn onest?

  “Bydd dy rieni yn fwy parod i faddau iti os wyt ti’n dweud y gwir. Wrth wneud hynny, bydd dy rieni yn dy drystio di’n fwy.”—Olivia.

• Ymddiheura. Mae’r Beibl yn dweud: “Mae’n rhaid i bob un ohonoch chi wisgo gostyngeiddrwydd amdanoch chi.” (1 Pedr 5:5) Mae’n cymryd gostyngeiddrwydd i ddweud “Dwi’n sori” a dweud hynny heb wneud esgusodion.

  “Pan mae pobl yn gwneud esgusodion drwy’r amser, fyddan nhw ddim yn teimlo mor euog am wneud rhywbeth o’i le. Yn y pen draw, fydd gwneud drygioni ddim yn pigo ar eu cydwybod bellach.”—Heather.

• Derbynia’r canlyniadau. Mae’r Beibl yn dweud: “Gwrandwch ar beth dw i’n ddweud.” (Diarhebion 8:33) Paid â chwyno am unrhyw ddisgyblaeth, ond derbynia’r rheolau mae dy rieni yn eu gosod.

  “Os wyt ti’n cwyno am y gosb, bydd dy sefyllfa ond yn mynd yn waeth. Ffeindia ffordd o dderbyn y rheolau newydd, heb ganolbwyntio ar beth rwyt ti wedi ei golli.”—Jason.

• Gweithia’n galed i ailadeiladu tryst. Mae’r Beibl yn dweud: “[Rhowch] heibio’r hen bersonoliaeth sy’n cydymffurfio â’ch hen ymddygiad” (Effesiaid 4:22) Dal ati i ymddwyn yn dda fel bod dy rieni yn gallu dy drystio di unwaith eto.

  “Os wyt ti’n gwneud penderfyniadau da yn gyson ac yn dangos i dy rieni na fyddi di’n gwneud yr un camgymeriad eto, yn y diwedd bydd eu tryst ynot ti yn cael ei adfer.”—Karen.

AWGRYMIAD: Gwna ymdrech i ddangos i dy rieni eu bod nhw’n gallu dy drystio di. Er enghraifft, gad i dy rieni wybod pan wyt ti ar dy ffordd adref hyd yn oed os na fyddi di’n hwyr. Bydd y neges yn glir: ‘Rydw i eisiau cael eich tryst unwaith eto.’