Gwaith Adeiladu Llwyddiannus cyn y Pandemig

Mae cannoedd o filoedd yn cael eu bedyddio bob blwyddyn, felly rydyn ni angen mwy o adeiladau theocrataidd. Oherwydd hyn, gwnaeth Adrannau Dylunio ac Adeiladu’r Canghennau gynllunio i adeiladu ac adnewyddu mwy na 2,700 o addoldai yn ystod blwyddyn wasanaeth 2020.a

Yn anffodus, cafodd y cynlluniau hyn eu rhwystro gan y pandemig COVID-19. Er mwyn gofalu am ein brodyr a’n chwiorydd a dilyn rheolau’r llywodraeth, gwnaeth Pwyllgor Cyhoeddi y Corff Llywodraethol ohirio’r rhan fwyaf o brosiectau adeiladu ar draws y byd. Er hynny, cyn y pandemig, cafodd mwy na 1,700 o addoldai eu hadeiladu neu eu hadnewyddu yn ystod blwyddyn wasanaeth 2020. Hefyd, cafodd dros 100 o brosiectau cangen eu cwblhau. Ystyriwch sut mae’n brodyr wedi elwa ar ddau brosiect adeiladu.

Cangen y Camerŵn. Roedd yr hen gangen yn Douala yn rhy fach ac angen lot o addasiadau. Ystyriodd y Pwyllgor Cyhoeddi adnewyddu’r gangen, ond byddai’r gost wedi bod yn uwch na gwerth yr adeiladau. Hefyd, gwnaethon nhw ystyried y posibilrwydd o adeiladu ar safle newydd neu brynu adeilad a’i adnewyddu, ond daeth y cynlluniau i ddim.

Yn y cyfamser, gwnaeth y brodyr ddysgu bod y llywodraeth leol yn bwriadu adeiladu ffordd wrth ymyl un o’n Neuaddau Cynulliad sydd i’r gogledd o Douala. Byddai’r ffordd yn dod â mynediad gwell a gwasanaethau i’r adeilad. Roedd y gwelliannau hyn yn union beth roedd y gangen ei angen. Felly, gwnaeth y corff llywodraethol gymeradwyo i gangen newydd gael ei hadeiladu ar ran o dir y Neuadd Cynulliad.

Gweithiodd contractwyr a Thystion gyda’i gilydd ar y prosiect—strategaeth a arbedodd amser ac arian. Mewn gwirionedd, gwnaethon nhw arbed dros ddwy filiwn o ddoleri (UDA) nag y disgwyliwyd ar y prosiect! Roedd y teulu Bethel yn gallu symud i mewn i’r adeiladau newydd yn fuan cyn i COVID-19 gychwyn.

Mae gweithwyr Bethel y Camerŵn wedi elwa o gael lle gwell i fyw a gweithio, ac maen nhw’n ystyried y gangen newydd fel anrheg gan Jehofa. Dywed un cwpl, “’Dyn ni eisiau gweithio’n galetach a dangos cymaint rydyn ni’n gwerthfawrogi’r anrheg hon.”

Swyddfa Gyfieithu (RTO) Tojolabal, Mecsico. Am flynyddoedd lawer, mae tîm cyfieithu Tojolabal wedi gweithio yng nghangen Canolbarth America, sy’n agos i Ddinas Mecsico. Ond mae iaith Tojolabal yn cael ei siarad fwyaf yn Altamirano a Las Margaritas—tua 620 milltir (1,000 km) i ffwrdd! O ganlyniad, roedd hi’n anodd i gyfieithwyr Tojolabal ddefnyddio iaith gyfoes. Ac roedd hi’n her i’r gangen ddod o hyd i frodyr a chwiorydd cymwys yn lleol oedd yn gallu helpu gyda’r gwaith o gyfieithu a recordio.

Am y rhesymau hyn, roedd Pwyllgor Ysgrifennu y Corff Llywodraethol eisiau symud y tîm cyfieithu i ardal ble roedd Tojolabal yn cael ei siarad. I wneud hyn, penderfynodd y gangen i brynu adeilad a’i adnewyddu. Roedd hyn yn rhatach nag adeiladu neu rentu swyddfeydd.

Mae un cyfieithydd yn esbonio sut mae wedi elwa: “Yn y deng mlynedd dw i wedi gweithio fel cyfieithydd yn y gangen, wnes i ddim cwrdd â’r un teulu yn yr ardal oedd yn siarad fy iaith. Mae ein swyddfa nawr yng nghanol yr ardal ble mae Tojolabal yn cael ei siarad. Dw i’n sgwrsio â siaradwyr Tojolabal bob dydd. Mae hyn wedi ehangu fy ngeirfa a gwella ansawdd fy ngwaith.”

Prosiectau ar Gyfer Blwyddyn Wasanaeth 2021

Os ydy amgylchiadau yn caniatáu yn ystod blwyddyn wasanaeth 2021, mae yna gynlluniau i weithio ar 75 RTO ac adeiladau ysgolion Beiblaidd. Bydd gwaith yn parhau ar wyth prosiect mawr cangen, gan gynnwys prosiect newydd y pencadlys yn Ramapo, Efrog Newydd, yn ogystal â symud y canghennau yn yr Ariannin a’r Eidal. Ar ben hynny, mae angen adeiladu mwy na 1,000 o Neuaddau’r Deyrnas newydd, mae angen amnewid mwy na 6,000 o addoldai sydd ar hyn o bryd yn anaddas, ac mae angen adnewyddu 4,000 o Neuaddau’r Deyrnas eraill.

Sut mae’r holl waith adeiladu ac adnewyddu hyn yn cael ei ariannu? Gwnaeth y Brawd Lázaro González, aelod o Bwyllgor Cangen Canolbarth America, ateb y cwestiwn hwn wrth drafod prosiect Swyddfa Gyfieithu Tojolabal. “Yn nhiriogaeth ein cangen, ’dyn ni’n brin o adnoddau. Felly heb gymorth y frawdoliaeth gyfan, byddai’n amhosib adeiladu swyddfeydd cyfieithu i’n cyd-gredinwyr brodorol. Mae’r arian a roddwyd gan frodyr ledled y byd wedi gwneud hi’n bosib i gyfieithwyr symud yn agosach i gymunedau ble mae eu hieithoedd yn cael eu siarad. ’Dyn ni wir yn ddiolch i’n brawdoliaeth fyd-eang am eu cefnogaeth hael.” Yn wir, mae’r prosiectau adeiladu hyn yn bosib diolch i’ch cyfraniadau chi i’r gwaith byd-eang, sy’n dod yn aml trwy donate.jw.org.