Nang Ae Thaesahryhaepaw Thungpang Hoipaw
ZisuLaephivawlang unglya zuituhaenynh akahlangnaekuhaezah “naethuanawlangpawte laephisethangnawlangpaw . . . syngtawnaw pawsyngtawnaw mou” yn ung cih cite akhiahae. Rangkheihte rangkheih rawtuhkuhnaw, ccahkangnaw, cciinawhawnaw, innrysuekuhnaw, hoileinawkaethungnaw, ameleipawbeihnaw, sazae haenynh ccungccawpahtae cciakhaeseinaw, zuitu amehaepaw huanawte kiareihnaw, ccungccawhaenynh dingnaw phungbyarynawccahkangcciinaw ynthuacih cite Zisu nynh alahphipya hae. Ee haeblynghynh ynciikutakawvaezetu mihtemuihleipaw Zisu yngthuavae ciinawpawte vawlangpenaw anaevae ciinawpaw nynh thua. Ou ee tu thehoipaw nynh thua. Tukeiccuze syngtawnaw ccangkheihkha Zisu nynh hynhte vaeleih bua acii- “Mingphunmiakaw ccaeccei athuanawlang hae [Pachia] penawkong thehoipawbyakhah laephi khyhzaw vawkawblyng ho ynthua cih.”—Matu 24:3-14.
Atu acihkupaw laephi ungtuziahynh hoikhyhsahlazema syngtawnaw alahopaw Zisu athuavae arungvae ciipawtuh ahoipaw uhccawnynh athua. Aluhki ee alahhohaepawhynh lahhotyhawte 1914 kumkhetuh he ynthotahkawvae. Tu ee kumtuh mingphun ccanghaepawccyh thangnawkum te ccungccaw uknawkyate Zisukhrih akum 1000 uknaw lahku e ccyh athotahkawnawnynh thua.
Hynh te ynciikulangpaw kong hynh Sam 110:1, 2 te Bia 12:7-12 haenynh aho. Zisukhrih vaening ynthua ynrungmawtuh vawlangkhua apawranglangnynh ahah-ung ynciipya. Tuhkoute vawlangkhua rawtuhkuhnaw a-ungcih, setanghynh laephilang vua athua cih, laephi hynh thyalawnaw a-ung cih, Zisukhrih nynh arawhae lahkukya a ukcih. Hoileinaw hynh vawsaw runawpipite ynroh cihzah Amakeidon rawtuhnaw puai te athangsah cih, adaepaw Zisukhrih kum 1000 uknaw kha ynzui kuh cih.—Matu 24:21, 33, 34; Bia 16:14-16.
Baebunynh hynh te aci. “Nyathyaccyhtu ruunawccyh ynthuacih ciipaw ningnang oh. Pawtema ciilangze Ccungccawhaetu amawkele asungsahkuhpaw, phua aduapaw, apokuhpaw, Ccungccaw thethya hopaw, nungpawbya ngaeleipaw, thawccii nyhleihpaw, athyaleipaw, ngaethya ungsahkuhnaw hoileipaw, rawkunaw araepaw, acihruhpaw, asungkuhkholeipaw, are aropaw, Ccungccah hoi ahuapaw, zyntyngleipaw, raeringnawpyapaw angaeryleipaw, atangsahkupaw, Pachiarynawlaeze pyngsawrynaw aryhuapaw, Pachia kabeihpawlangsalah ciza Pachiabyaccahccingkhahtuh yn eicih hae. Khah ee haekhah si haekuh oh.”—2Tim 3:1-5.
Abangnynh hynh e haehynh aa langmawlyapite alahcihkuryng vaepaw khazawtaa acihcih hae. Thuaslahzema hynh ee haehynh hynhte ccahcceituh vaekheihsangmah cihkuboilohkhyh ciipawtuh amepaw nynh thua. Phungpawlangte mihawhaenynh ahohaepawtuh 1914 kum kyatethozah acihkupaw uhccawhae hynh laevawlang vaekheih sangmah lacihkuboilohkhyh leihciihae. (ccahkia nangbah 7 kyado) Ee Runaw vawsawnawhae hynh alahcihkuboi vaehaepawlaeze houh ale hua, akohua. Tuhpiaze nyathyaccyhte asekuhpaw Zisunynh alahoty paw syngtawnaw haehynh tuabialang accang- Zisukhrih arungvae ciipawte Pachia Penawkong laephi pyngpikya hopawhynh phungpaw lungkhuze vaekheihsangmah tungboi unglohkhyh. Phunghokeiccuze Zahova ccaecceihaetuh kianaw reihnaw amuehae. Minming lungkhuze athung ahzah haetuh Hitlar nynh alahchiahae. Atuninzemah Zahova ccaecceihae mihryalawnaw khah khehaezah kyngnaw, thungccawnaw, zianaw, buanaw, chianaw amuehae. Eehae blyng hynh Zisunynh alahotypaw syngtawnawhae nynh thua.
Bia 11:18, (NW) kya ahotyhawte “minphunmiakawhae nynh Zahova ccaecceihae khah mihthingrianua cih hae.” Tuh e tuh minphun hae tungvawkya Zahova “amawccahccei nynh athingrianua” rucih hae aci. Ee Baebu ccahfangkya e mawnynh “laephirohtuhaekhah Pachianynh arohrucih hae” bua aci. Hingnaw do oihtuh laephi ryalawnawhae ro- lang furawkutuh ccungccawseelungkhu vaekheihsangmah atungboi khyh oh. Thuaslahzema atu tuh tuhte thuavaekhyh, ccungccawhae nynh laephikhah palei athusahaelang thuaze ccungccawnynh ungkho leinaw laephilang atangcih cite mihawhae (Scientists) nynh raeringnaw ynpyahae. Thuaslahzema Zahova nynh “ahysuepaw ungnaw lang kahrae” keiccu minming nynh laephi arokoumawhaeze laephi thusahtuhaepaw khah Zahova nynh arohcihae.—Isaiah 45:18.
PACHIAPENAW ZAHKAW LAEVAWLANG HYTHUANAW HAE
Pachiapenawzahkaw laephivawlang ccungccaw a-ungcihhae ciipawbya hynh khungnaw muepawblyng vawlangkaelangcihte azynghaepaw hanglangtuh mihngae mih-ang athua cih. Rikhyahae pawkele vawlangkaecihhaezah Laephivawlangzungzae a-ungcihhaepawtuh rikhyaleipaw Bupi acih cihhae cite Baebu nynh aci.( Sam 37:11, 29; Bia 7:9; 14;1-5) Khrihkuihkaw Pachiapenaw nynh Laephipyngpi pung ynpe nawlangpawkong Denia Baebu nynh alah hoty.
Tuh ee kyaze Zisukhrih penawkhah Zahova muate lokuhpaw atyngare uknaw anaa khah lungtungte atouse. Laephivawlang uknaw anaakhah tousenaw azuhpipikhah lungtungnynh a rohkoute azuh arohtu lungtungtuh lethungzah mualepawpipilangtangzah Laephipyngpi pung akhung.” Profekbya nynh ahochihpawtuh- “ aroh kholeipaw penawccangkheihkhah laephi Siapharanghaesee kyakhe vawlang Pachianynh atyng sahcih. Tuh ee penawtuh ccungccawhae kuihklang thuavaeleite Laephipenawmiakawblyng pung arohcihzah zungzae atyngvae cih.”—Denia 2:34, 35, 45.
Ee penawte apuithyapaw Laephivawlangzungzae hinglangpaw kong ngaehoinaw hynh Zahovaccaeccei haenynh nangkhah hopya aery hae. Atu ahingpawccungccaw riataeleihaete mihchii riataeleihae khah tunkyatun zungzae hingnaw amue cihae. Laephikhah raezah zuhvawhae nynh alah ungboinawhaepaw Pachia a ee naw hawkhah te Zisukhrih akum 1000 uknawzahkawtuh ynccingvae ci. Tuh ee Laephi Paradise tuh pawpawtemah ungru cii ungvaelang khyh. Edenkhokhukya Adamryalaw apyahawkhah te ccungccawhae mah Laephipi thingku ruaku rangsawhae do-oihnaw ryalawkhah thawmun te alavae cihae. Minmingtu aciikuhaepaw uhccawkhah hynhsepi amangvae cihae.”—Isaiah 65;22; Genesis 2:15.
“[Bawipaw Pachia] nahpenaw thuaccahvaesah. Vawlangkhua nah rynaw accinghawkhahte laevawlangmah ccingccahvaesah” cite Zisu ccangpyapaw sawsangnawhawte ynthua cih ciipaw Baebupatae a-ung. (Matu 6:10) Ee Baebuccangkheih mawte phezawvae. “Vawlang te roithawte ynccaezah Pachia inntuh ccungccawhaekyanynh ung ccungccawte pyngkheihlang a-ungkheih cihae. Minmingtu amawccungccawlang atangcih hae. Pachia amawtuh mihPachia athua cih. Pachia nynh mihmiphiikha ahupavae cihae. Chiinaw ungvaelangkhyh, lungthingcciinaw, siaruanaw, bang ciiungvaelang khyh. Pawcceciize aryngpaw uhccawhaekhah pungnuekuhvae hae. Bawiha-ungnawkya aha-ungpaw ccungccawnynh, kahmawnynh atyng aremiakawblyng athawlangte kahraevae a ci. Ee byahynh zeila ee byatuh zyntyngbyate amepawbya nynh thua.”—Bia 21:3-5.
[Hmanthlak biu 15]
“runawccyh”
THUASLAHMA “tuhkoute nynh athangnaw yn thua cih”
[Hmanthlak biu 18]
Netherlands
[Hmanthlak biu 18]
Nigeria