Thehoipaw Neelang Amanghae Paw Zia

KHRIHCCAW hae tuh “Mingphun miakaw zuitulang” tangsahpaw ryalaw kaw amue hae. Thuasahlazema hynh te ciilang ccungccawluhkheih khah haesahdelangpaw tuh thuakhyh. Zisu pyapawryalawtu “zakawsangsahkuh haepawkhah thehoipawbya hopyalang” “mihlungthingccih haepaw lungdaesahlang” mihlungvawsawpaw soihbialanghae” nynh thua. (Matu 28:19; Isaiah 61:1, 2; Luka 4:18,19) Hynhte ciikhonawlang Zahova ccaecceihae nynh Baebukya e thungpanghoipaw khah aho hae. Profek Ezakia hawte atunin Zahova ccaecceihaemah “anungsikuhpaw uhccawkeiccuze rawkhuite unghaepaw ccungccawhaekhah” leihccunghae.—Ezekia 9:4.

Atu see e ungtuziazaekeiccuze mihlungvawsawhaepaw ccungnawlang amanghaepawzia ccangkheihtuh, innkheihte innkheih phunghopaw nynhthua. Hynhte nynh ccungccawhaete tungkukho athuahua. Zisu mah khohtakyh khiakuhza Pachiapenaw thehoipawbya ahohawkhate Azuitu haenynhma ahobuahae. (Luka 8;1; 9:1-6, 10:1-9) Atunin Zahova ccaecceihaemah kum kheihze inn takyhlang vaeleihvaeleih cciate innhoitu angaerylangpaw kong ccangkhakheih hokheihkulang azuakuhae. Tuakheihlangpaw Baebu ccangkheih ccangning ahopahkouhaete innhoitunynh angaery ung langze aciikuthyanaw ccyhkya buahokukheihlang apaethuihae. Baebuccawtarahraw apyakupaw ccawkhah pyahaezah innhoitu nynh anawccawze Baebuccaw ccangkunaw araehae. Laephi pyngpi kya riataelei ccungccawhaekhah luhkheihte thuasah, innbyngtethuasah, Baebuccaw ccangkunawkhah merahrih langaraepyahae.

“[Bawipaw Pachia] penaw thehoipawbyakhah minccangpawhae thaesahrynawzia ccangkheihtuh Penawpungkunaw innkya pungku nawliate nynhthua. Tunkyakhe ccaecceihaenynh nawtakyhte bang bangapungkuhae. Pungkunaw ccangkheihkyakhe angaeryhualang haepawkongkhah dote ahopyahae. Kinghmiawsing rawvianaw ccah uh pungkunawkhah apiahae, Baebukya e akongccangkheih (or) Profek bya hangkhakheih ccangkunaw pungkunaw nynh thua. Tuh koute pungkunaw ccangkheihtuh thehoipawbya khah houh hothya khonawlang ccangkupaw siainnmua pungkunaw thuazah, tuh e he athangte zahkuetkya phunghothyanaw pungkupawkhah bua apia hae. Tuh apiaze ccaecceihaetuh ccungccawinnkya nawtakyh pung ku haezah Baebu accangkuhae.

Ee pungkunawkya ccungccawmiakaw pungkukho athua. A hlu khoi ungkhyh. Tuh e pungkunawhae nynh ccungccawmiakaw hoinaw amuesah. Baebunynh “nasungsah kukhonawlangoh, ziazaehoi nahrae khonaw langoh lukheihte lukheih bungkuklang ohsii. Aphungpawthyh hawte pungkuleite ungnangohsih. Lukheihtelukheih tuh-oukuh klangohsih. Accyh eihnaevae keiccuze houhzuakuohsih” acii. Amawte amaw Baeburiate ccangku ccungku myarya ho. Minccang pawhaete pungkukheihtuh thawzungpyaku klangnynh thua. “Sih vawtuh sihvawnynh ahesahawte ccungccawtuh bangruivaeccaw mih maenynh ahesah.”—Hebru 10:24, 25; Phungthlukbia 27:17.

Ccaecceihaetuh nintakyh mih hingnawkya atungkuhaepaw takyh phung ahopyahae. Innpaw lopaw (or) mawtawkaa, vawzou, khycce acceihkheih haepawryte hokukheih, vaeccaw (or) bangrui haekya aekheih niakheihnawkya ryalahkheih haepawryte Baebu bya ahokukheih hae. Zisu laephivaw lah unglyamah alunghuaphung lah honawtuh rihlipepang langpikya, muavaw ahah ungnawkya, zerya a aenawkya, zuhdynaw puaikya, (or) kalali kuakya vohkualungte a ccialya blyngkhe phungaho. Zerusalem khua pungkunaw innkya phung accangpyahae. Athuanaw takyhkyakhe Pachia penawthehoi pawbya hokhonawccyhkhah leih accung. Zahova ccaecceihaemah e hawte amawccuhnoh zuilang azuakuhae.—1Pite 2:21.

ZIAZAEHOITE PHUNG HONAW

Nang phungaeho patupawnynh ahohawte azuikhyhlangze paw pawcihte ahozemah, nahanglang asuilang unglangkhyh. Ho hawte ryalaw lokuleipawtuh phuaa bungkupaw nynhthua. Ameleipaw beih naw haenynh ccungccawpahtae haekhah Baebu accangpya seivae hae. Ametetuh Baebuhynh seisahkho ungkhyh. Baebu ccahthyahae farasi haenynh Hebru Baebuccaw kynghaeslahzema minmingtuh phuaa bungkuhaepaw nynhthua cite Zisunynh accaehae. Mosi kawbyakhah riatuhmangriahae acihkoute azuituhaekhah “Phung atanghaepaw bya haekhah zuiohlah mihziazaehawte cihbua nangoh. Pawcce ciilangze ahohaehawte mihmawtoulou nynh zuikhyh hae” cite acii. (Matu 23:3) Khrihccaw lukheih a ungtu aziazae ahoipaw nynh suimihlang pataepi phunghopawlae accungkiahua. Mihvawpawhae zyngtu thualeihaepaw khrih ccawnohpi haekhah hynh te aciipya hae-“Minmingnynh phungbya a ngaekhyhhaezemah, naeziazaehoi zah sawtua rawrinaw nahoinaw ohliate zyngtulang atangbuakho hae.”—1Pite 3:1, 2.

Tuhkeiccuze Zahova ccaecceihaenynh oziate thehoipawbya khah mingccangpawmah arybua khonawlang azuakuhae- Leihho pyahaehawte khrihccaw ziazaehoipawkhah leihlangsahae. Minming nynh ‘ccungccaw nynh kahtungvaw hynhte ynciipahaesah cii aryhawte ccungccawhae cipyalang’ azuakuhae. (Matu 7:12) Ccaecceihae, vaeccawhae, innpaw haete, puipawziapawhae kelethualeite, ccungccah miakawte hynhte vaeccawkulang azuakuhae. Accingkhyhhae keiccu ze pheccinglangtuh raekholangkhyh hae. Thuaslahzema Pachiapenaw thehoipaw hopawkelete thualeite athuakhozetuh ccungccaw miakaw bunglang hoinawraepya langpaw lungthing ahoihae.—Zeim 2:14-17.

[Hmanthlak biu 19]

Hawaii

[Hmanthlak biu 19]

Venezuela

[Hmanthlak biu 19]

Yugoslavia

[Hmanthlak biu 20]

Accangthyanaw Pachiapenaw pungkunawinnkyakhe Baebuleihccang kuhae

[Hmanthlak biu 21]

Mihinnbyngkya thuasah, mingccangpawhaete thuasah ccaecceihae tuh minghae leih atuh ou haehawte zuilang azuakuhae