CCANGKUNAW 07

Zahova Tuh Pawtecihpaw Pachia Mou?

Printed Edition

Zahova Pachia kong na tua ze na thinglung kya pawmou yn ung? Amaw tuh eih alesae keiccuze vaawlang e awsi hae hawte ccungccaw hae te myarya a sawkuh cite na tua tou? Tuhkhyhze pyng pyngkheit thualeite khise hawte thungnaw ccangkheit cite tou na tua? Zahova tuh pawtecihpaw Pachia mou? Baebu nynh Zahova a ziazae hae te nang kha pe aeki cipaw mah a langsah.

1. Pachia tuh pawcce ah muih kho khyh oh?

‘Pachia tuh Muisaw nynh thua.’ (Johan 4:24) Zahova tuh chisaw pyng hoi khyh. Vaawlang ung zah muih kho leipaw muisaw pyng nynh thua.

2. Zahova ziazae abang tuh pawhaemou?

Zahova tuh muihkho ung khyh. Thuasalama ahoypaw ziazae hae a hoipaw pyng pyngkheit nynh thua cipaw ah ny vae oh zetuh Pachia kha ah sungsah vae cih oh. Baebu nynh: ‘Zahova nynh byading kha a ry, alungzipaw a mithyaa hae kha vua lan khyh hae’ a ci. (Sam 37:28) Abapite vawsawnaw tung hae paw hanglang Zahova tuh “myarya thawccih thyapaw te ngaethyaumsah thyapaw nynh thua.” (James 5:11) “BAWIPAW tuh thinlung a koipaw kalan naekuh zah, ngaehoinaw a hoi lei hae paw kha a khum hae.” (Sam 34:18) Ah cyisaohnaw nynh Pachia tuh a thingria kho zah a lung mah a paw kho. Ahoy leipaw cyi langze Pachia a ngaethah cih. (Sam 78:40, 41) Ahoypaw cyi langze Pachia a lung paw cih.—Phungtangbya 27:11.

3. Zahova nynh aening yn sungsah cipaw pawtemou a langsah?

Zahova kya-e a laehuapaw ziazae tuh sungsakunaw nynh thua. “Pachia tuh sungsakunaw nynh thua.” (1 Johan 4:8) Zahova nynh Baebu ccaw te a rae hae paw kyate sungsakunaw kha a langsah. (Locceihtu 14:17 kha ria.) Tousenawze, aening yn raenaw kong kha tuatua. A puithyapaw azong hae muihkhonaw, ngaery ungpaw roi hae ngaekhonaw te a thuapaw aepaw niapaw athuanaw nykhonaw te nynh yn rae. Aening kha lungpaw lang ungpaw hingnaw yn muesah ry.

HOUH CCANGKUH LANG HOUH MUIH LANG

Zahova nynh paw mangte mou ngaeang lang ungpaw uccaw hae kha a rae cipaw ccangkuh tua. Ahoypaw a ziazae hae kha pawtemou a langsah cipaw mah do tua.

4. Pachia nynh amangpaw—Thyamuisaw

Collage: Pachia thyamuisaw liate rae hae paw. 1. Jo hae te vaaw te lae. 2. Baebu zeitupaw lukheit nynh Pachia tuanaw hae kha ccakue kya a zei cciamang paw.

Aening nynh kuih mangte rya a law oh hawte Zahova nynh thyamuisaw mangte rya a law. Baebu nynh thyamuisaw tuh pyng pyngkheit thua khyh, ccangkhakheit cyi lang Pachia nynh amangpaw thungnaw nynh thua cite a ci. Luka 11:13 te Locceihtu 2:17 kha ria tuhkoute e bakhianaw hae kha hokuh oh:

Thyamuisaw mue lang sawsang langze Pachia nynh thyamuisaw yn “bu” cih. Tuhtethuaze thyamuisaw tuh pyng pyngkheit tou tuhkhyhze Pachia nynh amangpaw thungnaw tou? Pawcce tuhte na ho kho?

Zahova nynh thyamuisaw kha mangte ngaeang lang ungpaw uccaw hae kha a rae. Sam 33:6 te 2 Peter 1:20, 21 kha ria tuhkoute e bakhianaw kha hokuh oh:

Zahova nynh thyamuisaw mangte pawhaemou a rae?

5. Zahova tuh ahoypaw ziazae hae a hoi

Moses tuh Pachia kha zyntyng te a beihpaw thua zemah Raetu Pachia kong houh a ny ry. Tuhkeiccuze Moses nynh: “namaw kha kae ny nawlan, na laanpi kha yn muihsah” a ci. (Exodus 33:13) Zahova nynhmah amaw tuh pawtecihpaw Pachia mou cipaw Moses kha a hopya. Exodus 34:4-6 kha ria tuhkoute e bakhianaw hae kha hokuh oh:

Zahova nynh amaw kong Moses kha pawtemou a hopya?
Zahova kya-e paw ziazae hae mou na ryhua?

6. Zahova nynh ccungccaw hae hynh pe yn ki

Pachia minphuin, Hebru hae tuh Egypt ram kya see lang la tang hae. Vawsaw riathaenaw yn tung hae tuh Zahova tuh pawtemou a ung? AUDIO kha phuing, Exodus 3:1-10 kha ria bua. Tuhkoute akaw lang-e bakhianaw hae kha hokuh oh.

AUDIO: Vawsaw Riathaenaw A Tung Lya Hae Zahova Nynh Peki Hae (2:45)

E Baebu ccaw liate ccungccaw hae vawsaw riathaenaw tung vae ze Zahova tuh pawtemou a ung?—Adihpaw 7 te 8 kha do.
Zahova nynh ccungccaw hae kha a bung ry hae, bung mah a bungkho hae cite na tua tou? Pawccemou?