CCANGKUNAW 05
Baebu Tuh Pachia Kyate Yn Thuapaw Bya Nynh Thua
Aening kha Zahova nynh yn pyapaw ahoyhuapaw lasung ccangkheit tuh a uh—66 a cihpaw Baebu nynh thua. Thuasalama hynhte na tua kho: ‘Baebu hynh pawtemou a mueku? A zeitupaw tuh hungmou?’ E bakhianaw hae aphi nynaw lang Baebu kya ungpaw Pachia bya muenaw kong kha ccangkuh tua.
1. Baebu tuh ccungccaw hae nynh a zei hae paw thuaze pawcce Pachia kyate yn thuapaw cite ho kho a thua?
Baebu tuh B.C.E. 1513 te C.E 98 cia kum 1,600 lae laku ccungccaw 40 hang nynh la zei hae. Ungtuzia lokuh lei hae paw nynh a zei hae paw thua zemah Baebu bya tuh marya a lokuh. Tuh-e tuh pawtemou thua kho cih? Baebu zeisatupaw tuh Pachia thua keiccuze. (1 Thesalon 2:13 kha ria.) Baebu zeitu hae paw nynh mih tuanaw hae kha zei khyh hae. ‘Pachia Thyaa Muisaw nynh a cciakhae hae thyhte nynh a ho hae.’a (2 Peter 1:21) Pachia nynh thyaa muisaw te hysawnua hae zah a tuanaw hae kha ccungccaw hae a la zeisah hae.—2 Timote 3:16.
2. Baebu kyate hunghaemou thanenaw a mue kho cih hae?
“Ram miakaw, phin miakaw, bya miakaw te minphuin miakaw” hae balyn nynh Baebu kya-e thehoypaw kyate thanenaw a mue kho hae. (Byaphy 14:6 kha ria.) Pachia nynh ccangpaw ccah-uh hae laeze Baebu ccaw kha byaphuin patae te muekhonaw lang yn cyipya. Ccungccaw a lunghua nynh Baebu ccaw kha a ria kho vae hae. Pawpaw kya ung zemah pawpaw bya ho zemah Baebu kyate thanenaw mue kho a thua.
3. Zahova nynh Baebu kha pawtemou a la thungkhaw?
Baebu kha khaw tyn leipaw saphua ccakue te papyrus ccakue kya la zei hae. Thuasalama Baebu phutesatu hae nynh hoyte bua la khawpi hae. Kawhoi hae paw nynh Baebu kha ro lang a zuakuh hae zemah hingnaw pyakuhte thungkhawtu hae mah la ung hae. Ccungccaw hae Baebu ccaw mue khyh nawlang kheepaw miakaw Zahova nynh kaw ua khyh. Baebu nynh: “Pachia bya tuh zungzae atyn cih” a ci.—Isaiah 40:8.
HOUH CCANGKUH LANG HOUH MUIH LANG
Pachia nynh ccungccaw hae Baebu a la zeisanaw hae kong, Baebu la thungkhawnaw kong te ccungccaw miakaw mue kho lang a cyinaw kong kha ccangkuh tua.
4. Baebu nynh a zeitupaw kong a ho
VIDEO kha pia. Tuhkoute 2 Timote 3:16 kha ria. Akaw lang-e bakhianaw hae kha hokuh oh.
Baebu tuh ccungccaw hae nynh zei hae paw thuaze Pachia kyate yn thuapaw cite pawcce ho kho a thua?
Pachia nynh Baebu zei hae paw kha a tuanaw miakaw a nysah kho hae cipaw tuh a thua kho cih tou?
Ccungccaw lukheit nynh a kuihzakaw e paw mangte ccaw a zeisah hawte Pachia nynh mah ccungccaw hae mangte Baebu bya kha a zeisah hae
5. Rawsenaw laku a tynpaw Baebu
Baebu tuh Pachia kyate yn thuapaw thuazah atu cia a zo khyh nawlang Pachia nynh a thungkhaw. She takyh kya kawhoi hae paw nynh Baebu kha ro lang la zuakuh hae. Beihnaw cciakhaetu hae nynh mah Baebu kha ccungccaw hae kalang a thua khyh nawlang a la khee hae. Thuasalama ccungccaw patae nynh rawsenaw te chiakukhonaw laku Baebu ccaw kha hingnaw pyakuh ciate la thungkhaw hae. Tuh-e hae lungkhu e lukheit kong nynaw lang VIDEO kha pia. Tuhkoute akaw lang-e bakhianaw hae kha hokuh oh.
Baebu kha hingnaw pyakuhte la thungkhaw hae cipaw na nyh tuh Baebu ria rynaw thinglung na hoi tou? Pawkeiccumou?
Sam 119:97 kha ria tuhkoute e bakhianaw kha hokuh oh:
Baebu kha ccungccaw patae nynh hingnaw pyakuh ciate Baebu leih te thokhonaw lang pawnynhmou mih lung a thosah hae?
6. Ccungccaw miakaw elang ccah-uh
She takyh kya Baebu tuh bya leih huaccepaw te tho huaccepaw ccah-uh nynh thua. Locceihtu 10:34, 35 kha ria tuhkoute e bakhianaw hae kha hokuh oh:
Baebu tuh bya leih huaccepaw te tho huaccepaw ccah-uh thua nawlang Pachia nynh pawcce a ry?
Baebu te asekute pawhynhmou na ry?
Laephi ccungccaw
100%
loukaw
nynh mimaw a thaethya hae paw bya te Baebu a ria kho vae hae
Baebu tuh uhkheit te thuasah abang te thuasah byaphuin
3,000
laete a muekuh kho vae
5,000,000,000
Baebu tuh hynhzeih loukaw tho a thua vae,
ccangpaw ccah-uh hae lae a lunghua
CCUNGCCAW ABANG NYNH HO HAE PAW: “Baebu tuh ccungccaw hae nynh zei hae paw khuryn ccah-uh nynh thua.”
Nangso pawtemou na tua?
Baebu tuh Pachia bya nynh thua cipaw paw ccaeccei mou a ung?
ADYNGNAWTE
Baebu tuh Pachia bya thuazah ccungccaw miakaw muekhonaw lang Pachia nynh yn paccyn pya.
Bua Liathuinaw
Pachia nynh Baebu kha ccungccaw hae a zeisah hae cipaw tuh pawmou a ho ry?
Baebu thungkhawnaw, byaleihnaw, thonaw te asekute pawkhamou na ry?
Pachia nynh namaw te thaekukhonaw lang a zuakuh cipaw nae nyh vae tuh pawtemou na ung?
HOUH CCUNGCHIH
Athonaw khuryn kuihte pyapaw ccaw hae—kyate khuthaw Baebu leihnaw hae kyacia Baebu konglang kha ria tua.
“Aening She kyacia Baebu Yn Tynnaw Kong” (Thaekuh!, November 2007)
Kheenaw pi ccangthung laku Baebu yn tynnaw kong kha ccangkuh tua.
Baebu kha hingnaw pyakuh ciate bya la leihnaw hae kong kha do tua.
Baebu kha vae patae khawpi hae zah la leih hae. Baebu bya rulaekuh leite amaw maming te ung zah ame rarih cipaw zyn kho ung tou?
a Thyaa muisaw tuh Pachia nynh mangpaw thungnaw nynh thua cipaw kong kha Ccangkunaw 07 kya hokuh lang.