CCANGKUNAW 22
Thehoypaw Kha Pawtemou Na Ho Kho?
Baebu byaccing na ccangkuh vae ze, ‘E kong hynh ccungccaw miakaw nynh a ny hae ahoo’ cite na tua kho! Ame, ccungccaw miakaw nynh ny ahoo! Thuasalama, na ccangkuh hae paw kong kha minccang paw hae hopya lang na rih kho. Rinaw kha tae kho te Baebu kya-e thehoypaw kong kha lungtua lungpaw te hokhonaw kong kha hokuh tua oh si.
1. Na ccangkuh hae paw kong kha na ny hae paw kalang pawtemou na ho kho?
Zisu zuitu hae nynh hynhte a ci hae: “Kaening tuh kae muihpaw te kae thaepaw kong kha ho leite kae um kho khyh.” (Locceihtu 4:20) Byaccing kha myarya a phutesah hae keiccuze ccungccaw patae kha a hopya ry hae. Nangso tuhte na tua tou? Tuhte thua langze, na ccangkuh hae paw kha na innbyng te na vaeccaw hae ny lang sawtua te ho lang ccyhhoy ccung.—Kolose 4:6 kha ria.
Thokhonaw zia abang
Na innbyng hae te bya na hokuh oh lya: “Atuh lonaw kya nyry ungpaw akong ccangkheit ka la ccangkuh” cite Baebu kya-e akong ccangkheit kha hopah hae.
Adang leipaw tuhkhyhze a thinphangpaw na vaeccaw kha thawzung yn pyapaw Baebu ccaw ccangkheit kha hopah.
Pawtemou na ung cite ae khiapaw ryalakheihtu paw kha Baebu ccangkunaw tuhkhyhze pungkunaw kya na ccangkuh hae paw kong kha hopah.
Na vaeccaw hae kha jw.org website kha pia hae.
Baebu na ccangkuh lya haung bua lang hyy bua tuhkhyhze jw.org kya Baebu ccangkunaw ngianaw zia kha dosah.
2. Khrihccawbuu ryte phungho kheih lang eenaw nungkuhpaw tuh pawcce thanenaw a ung?
Zisu a zuitu hae tuh a nyhkuh hae paw ccungccaw hae kele kha phung hopah khyh hae. Zisu nynh phungho lang a zuitu hae kha “khua te hmin takyh langkhe lu ning ccite a saw lalo hae.” (Luka 10:1) Tuhte ccyhmamyh te phungho hae keiccuze ccungccaw patae nynh thehoypaw kha a thae kho hae. Pyngkheih lang phunghonaw nynh zuitu hae kha myarya mih lung a pawsah. (Luka 10:17) Nangso Khrihccawbuu ryte phungho kheih lang eenaw na nungkuh kho tou?
HOUH CCANGKUH LANG HOUH MUIH LANG
Rinaw thinlung kha taekhonaw zia te thehoypaw honaw kyate lungpawnaw muekhonaw kong kha tuatua.
3. Zahova tuh nangte pyngkheih lang a ung cih
Abang nynh phung a ho ry hae zemah ccungccaw hae nynh pawtemou a muih cih hae, pawtemou a liaru cih hae cite a rih kho hae.
Na ccangkuh hae paw kha ho lang na rih tou? Pawccemou?
VIDEO kha pia, tuhkoute akaw lang-e bakhianaw kha hokuh oh.
E Witness ngawphue hae nynh rinaw thinlung kha pawtemou la tae kho hae?
Isaiah 41:10 kha ria tuhkoute e bakhianaw kha hokuh oh:
Phungho lang na ri ze sawsangnaw nynh pawtemou ae bung kho cih?
Na nyh tou?
Zahova Ccaeccei a lunghua nynh thehoypaw ho ngan leilang cite a tuaboi hae. Tousenaw langze, Sergey tuh mawtemaw zynkunaw hoi khyh zah minccang paw hae te bya hokuh lang a ruusah. Thuasalama Baebu kha a ccangkuh. Amaw nynh hynhte a ho: “Ka ri zemah ka ccangkuh hae paw kha minccang paw hae kha ka hopah hae. Ngae-ang lang ungpaw tuh, Baebu kong minccang paw hae ka hopah hae tuh kamawte kamaw zynkunaw ka hoi vae. Tuhte ka honaw nynh ka zynnaw kha houh yn tynsah.”
4. Sawtuanaw hoi
Thehoypaw ho vae ze, ho langpaw a kong kele thua leite pawtemou ho lang cipaw mah tua. 2 Timote 2:24 te 1 Peter 3:15 kha ria tuhkoute e bakhianaw hae kha hokuh oh:
Baebu kong ho vae ze e Baebu ccaw hae kha pawtemou mang kho lang?
Na innbyng te na vaeccaw hae abang nynh na hopaw kha lehkhan khyh hae ze pawmou na cyi kho? Pawmou cyi lang ccang khyh?
Pawmou zyn lang a ccang cite thohpae lang ho leite hawnaw te byakhiapaw tuh pawcce a hoyhua?
5. Thehoypaw honaw nynh lungpawnaw yn muesah
Zahova nynh Zisu kha thehoypaw ho lang ryalaw la pya. Zisu nynh e ryalaw kha pawtemou a tua? Johan 4:34 kha ria tuhkoute e bakhianaw hae kha hokuh oh:
Athuapaw aepaw aenaw nynh yn hingsah apiaze ah lung mah yn pawsah. Zisu nynh thehoypaw honaw cita hawpaw—Pachia rynaw lawpaw kha—aepaw aenaw te pawcce a touse?
Thehoypaw ho langze paw lungpawnaw hae mou mue lang cite na tua?
Tuanaw pyapaw hae
Alaku pungkunaw kya byahokunaw thokhonaw kong kha ccangkuh.
Alaku pungkunaw kya siaimua taevue hanglang ccahzing pyakuh. E nynh na ccangkuh hae paw kha minccang paw hae hopya lang ae bung kho.
“Ccungccaw Abang Nynh Ho Hae Paw” tuhkhyhze “Ccungccaw Lukheit Nynh Khiapaw” cihkuhpaw kha mangte a khiathya hae paw bakhianaw hae te rawsenaw bya hae kha pawtenynh phi lang cipaw kha ccangkuh.
CCUNGCCAW LUKHEIT NYNH KHIAPAW: “Na dang tou, thungpang hoy tou?”
Tuhte ae khia hae ze na ccangkuhpaw Baebu kong hae hopya lang ccyhhoy pawtemou na ccung kho?
ADYNGNAWTE
Minccang paw hae kha thehoypaw honaw nynh ah lung yn pawsah zah tua hawte ruu khyh cipaw mah yn nysah.
Bua Liathuinaw
Minccang paw hae kha pawcce thehoypaw hopya lang hae?
Sawtuanawte pawtemou na ho kho?
Ho lang na ri ze pawmou na cyi kho?
HOUH CCUNGCHIH
Jw.org contact card mangte thehoypaw honaw zia phuin pali kha leihla tua.
Thehoypaw ho lang yn bungpaw ziazae ccangpali kha ria tua.
“Ccungccaw Kyngpaw Lang Tang Lang Na Ungty Vae Tou?” (Rawvianaw, September 2020)
Thehoypaw ho lang ngawphue hae kha rawthungnaw a hoisah hae paw Baebu tousenaw kha do tua.
A zyn lei hae paw innbyng hae kha Zahova kong pawtemou hopya kho lang hae cipaw kong kha ria tua.
“A Zyn Lei Hae Paw Puizia Hae Kha Mih Lung Tungsah” (Rawvianaw, March 15, 2014)