ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ

7 ˈWɔn ˗nu ˈö ˈka ˈsëëdhɛ bɔ n ˗dhɛ ˗an ˗wɔn ˈgü bhë, n ˗man ˈö n ˗gɔ kö ˈa˗ pö ˗a ˈgü ˈyö ꞊nɛn: ˗yö ˗dho kë ˗së kö gɔɔn˗ ˈyaa ˗dho ˈpa dhebɔ ˈka.* 2 ˈˈKɛɛ ˈdhɛ ˈö ˗kë ꞊dhɛ ˈˈɲangüyaa kë ˗sü ˗ya ˗pɛn bhë, gɔɔn˗ ˈdhɛ ˈö ˈdhö ˗a ˗de ˗bha dhebɔ ˗yö kë ˗dhö, kö dhebɔ ˈdhɛ ˈö ˈdhö ˈpö ˗a ˗de ꞊gɔn ˗yö kë ˗dhö. 3 Gɔɔn˗ ˗yö pë ˈö˗ ˗bha dhebɔ ꞊duaa ˈka ˗a nu ˗a ˗dhɛ, kö dhebɔ ˗de ˈpö ˗ya kë ö ꞊gɔn ˗dhɛ ꞊dhɛ ˗kɔ do ˈö bhë ˗a ˈdhö. 4 Dhebɔ bun ˈyaa ˗a ˗de ˗bha ˈka, ˗yö ˗a ꞊gɔn ˗bha ˈka. ˗Kɔ do ˈö bhë ˗a ˈka ˈpö gɔɔn˗ bun ˈyaa ˗a ˗de ˗bha ˈka, ˗yö ˗a ˗bha dhebɔ ˗bha ˈka. 5 ˈKaa ˗dho ka ˗ta yö ka ˈko ˗bha, kö yö ˈti kë ˗a ˈdhɛ ˈö mɛn ꞊plɛ ꞊gban ka ˗wo ˗yö ˗mɔn ˗a ˈgü kö ˈka˗ kë ˈˈdhʋ̈ ˈˈtʋ̈ŋ ˈnën ˈbhaa ˈˈpiʋ̈, kö ˗a ˈˈtʋ̈ŋ ˈö bhë ˈka˗ ˈsü ˈka bhɛɛˈˈ, kö ˈˈtʋ̈ŋ ˈö ˈˈdhʋ̈ ˗ya ʒiö, ka ˗bha sɛɛˈˈ ˗yö kë do ˈzü ˗dɛɛwo ˗a ˈka. ˗Yö kë ˈˈdhʋ̈ kö Sɔtraan ˈyaa ˗dho bɔ ˗mɔn ˈö ˈkaa˗ wo ka ˗de ꞊sɔŋ ˗bha bhë ˗a ˗ta ˈö ka ˈgüdan. 6 ˈˈKɛɛ ˈwɔn ˈa˗ ꞊blɛɛ bhë, ʒiaan ˗pʋ mɛn ˗gɔ ˗wo ˗mü, ˈtɔŋ˗ ˈyaa ˗mü. 7 Pë ˈa˗ ˈˈpiʋ̈ ˈyö ˗tɔ gɔɔn˗ ˗nu ˈˈpɛpɛ ˗wo kë ꞊dhɛ n ˈdhö. ˈˈKɛɛ mɛn ˈö ˈdhö ˗a ˗bha ˗kɔmɔnwɔnbhasü ˈö ˗Zlan ˗ya gbɔɔ ˗a ˗gɔ ˗yö ˗dhö. Mɛn ˈbhaa ˗bha ˗ya kë pë ˈbhaa ˈka, ˈyö mɛn ˈbhaa ˗bha ˗yö ˗kë ˈpö pë ˈˈwɛɛ ˈbhaa ˈka.

8 A˗ ˗pö mɛn ˗nu ˈö dhe ˈyaa ˗an ˗gɔ ɛɛnˈˈ ˈö ˈwaa gwaan˗ ˗bha waa ꞊gɛandhe ˗nu ˗an ˗dhɛ ˗yö ˗dho kë ˗së kö ˗wo ˈto ꞊dhɛ n ˈdhö. 9 ˈˈKɛɛ ˗ya kë ꞊dhɛ ˗an ˗kɔ ˈyaa ˗mɔn ˗ni ˈgü wo ˗de ꞊sɔŋ ˗bha, ˗yö ˗dho kë ˗së kö ˗wo wo ˗bha dhe ˈsü ɛɛnˈˈ kö ˗wo gwaan˗ ˈkpɔ. ˗A ˗gɛn ˗mü ꞊dhɛ dhe ˈsü ˗sü ɛɛnˈˈ gwaan˗ ˈkpɔ ˗sü ꞊fiëë ˗yö ˗dhö ˈö ˗ʒiö ˗a ˈka gɔɔn˗ ˗dhɔ ɛɛnˈˈ dhe ˗dhɔ ˈˈshiʋ̈ ˗bha ˗dɔ mɛn zuʋ̈ˈˈ ˈka ˗sü ˗ta.

10 Mɛn ˗nu ˈwo gwaan˗ ˗bha ɛɛnˈˈ ˈö dhe ˈdhö ˗an ˗gɔ, ˗dhioo ˈa ˗dho ˗a dɔ ˗an ˗ta yö, yö ˈti ˈgo man ꞊dede n ˈgü, ˗yö ˗go Dëmɛn ˈˈpiʋ̈. Dhebɔ dua ˈyaa ˗mü kö ˗yö ˈgo ö ꞊gɔn ˈˈpiʋ̈. 11 ˈˈKɛɛ ˗ya ˈgo ö ꞊gɔn ˈˈpiʋ̈, ˗a dua ˈyaa ˗mü kö ˗yö gwaan˗ ˈˈwɛɛ ˈkpɔ, ˈyaa ˈˈdhʋ̈ ˗yö ö ꞊yɛɛ kë ˗yö nu ö ꞊gɔn ˈˈpiʋ̈ kö ˈwɔn ˈö ˗an ꞊zinŋgü ˗wa baaˈˈ. Gɔɔn˗ ˗de ˈpö, ˗a dua ˈyaa ˗mü kö ˗yö ˈˈkan ö ˗bha dhebɔ ˗bha.

12 Mɛn ˈˈwɛɛ ˗nu ˈö ˈka to, ˗a ˈdhɛ ˈa ˗dho ˗a pö ka ˗dhɛ yö man ꞊dede ˈnën ˈa˗ pö, ˈyii ˈgo Dëmɛn ˈˈpiʋ̈: Mɛn ˈö kwa ꞊dhegblü ˈka ˈö˗ ˗bha dhebɔ ˈyaa ˗zo ˗yö Dëmɛn ˗dhɛ ˗mɛn ˈka, ˗a dhebɔ ˗ya ˈˈwɩ ˗a ˗bha kö ˈö ˈto ˗a ˈˈpiʋ̈, ˗a dua ˈyaa ˗mü kö ˗yö ˈˈkan ˗a ˗bha. 13 Dhebɔ ˈö˗ ꞊gɔn ˈyaa mɛn ˈö ö ˗zo yö Dëmɛn ˗dhɛ ˗a ˈka ˈpö, ˗a ꞊gɔn ˈö bhë ˗ya ˈˈwɩ ˗a ˗bha kö ˈö ˈto ˗a ˈˈpiʋ̈, ˗a dua ˈyaa ˗mü kö ˗yö ˈˈkan ˗a ˗bha. 14 ˗A ˗gɛn ˗mü ꞊dhɛ gɔɔn˗ ˈö ˈyaa ö ˗zo yö Dëmɛn ˗dhɛ bhë ˗ya kë ˈˈslʋ̈ʋ̈slʋ̈ ˈwɔn ˈö ˗gban ˗a ˗bha dhebɔ ˗bha ˗a ˈgü. Dhebɔ ˈö ˈyaa ö ˗zo yö Dëmɛn ˗dhɛ ˈpö, ˗ya kë ˈˈslʋ̈ʋ̈slʋ̈ ˈwɔn ˈö ˗gban ˗a ꞊gɔn ˈö kwa dhegblü ˈka ˗a ˗bha bhë ˗a ˈgü. ˗Ya kë ꞊dhɛ ˈyaa ˈˈdhʋ̈ ˗be, ka ˗bha ˈnën ˗nu wo ˈti ˗dho kë ˈˈslʋ̈ʋ̈slʋ̈. ˈˈKɛɛ ꞊dɛɛ, ˗wo ˈˈslʋ̈ʋ̈slʋ̈ ˗Zlan ˈˈɲan ˈˈdhiʋ̈. 15 ˈˈKɛɛ ˗ya kë ꞊dhɛ mɛn ˈö ˈyaa ˗zo ˗yö Dëmɛn ˗dhɛ ˗mɛn ˈka bhë, ˗ya ˈˈpiʋ̈ ˈö ˈˈkan ö ꞊gɔn ɛɛnˈˈ ö ˗bha dhebɔ ˗bha, ˗yö ö ˗bha ˈdho wo. ˗Ya kë ˈˈdhʋ̈ kö kwa ꞊dhegblü ˈö to bhë bhuʋ̈ˈˈ ˗ya ˈˈpʋ ˗a ˗bha ˈwɔn ˈö bhë ˗a ˈgü. ˗Zlan ˗yö ka ˗dhɛ kö zuʋ̈waannusü ˗yö kë ka ˗gɔ. 16 Dhebɔ, ˗ya kë ꞊dhɛ ü ꞊gɔn ˗dho dha ü ˈsaa˗ ˈgü ü˗ ˈwɔn ˗dɔ ˗ee? Gɔɔn˗ bhi ˗de ˈpö, ˗ya kë ꞊dhɛ ü ˈbɔɔ ˗dho dha ü ˈsaa˗ ˈgü ü˗ ˈwɔn ˗dɔ ˗ee?

17 Mɛn ˈö ˈdhö ˗yö ˗tosɛta kë ꞊dhɛ ˗kɔ ˈö Zoova ˗yö ˗we ˗a ˗bha kö ˗ya kë ˗a ˈka ˗a ˈdhö, ˗ya kë ꞊dhɛ ˗kɔ ˈö kun ˗a ˈka ˗be ˈö ˗Zlan ˗ya ˗dhɛ bhë ˗a ˈdhö. ˗Dhioo ˈö bhë, yö ˈnën ˈa˗ dɔ ˗zlanwokɔdhi ˈˈpɛpɛ ˈgümɛn ˗nu ˗ta. 18 ˗Zlan ˗yö mɛn ˈbhaa ˗dhɛ kö ˗ya ˈgo ˈˈbɔnŋ ˈsaadhö ˗ee? ˗A ˗mɛn ˈyaa ˗dho ˗a ˈˈslö mɛɛnˈˈ kö ˗yö kë ˈzü ꞊duɛɛn ˈka. ˗Yö mɛn ˈbhaa ˗dhɛ ˈpö kö yö ˈti ˈgo ˈˈbɔnŋ ꞊köŋ ˗ee? ˗A ˗mɛn ˗yö ˈto ˈˈdhʋ̈, ˈyaa ˗dho ˈdho ˈˈbɔnŋ. 19 Pë ˈdhɛ ˈö˗ ˗wɔn ˈdhö ˈˈgbɩɩ˗ ˈyaa ˈnën ˈö ˗tɔ ˗dho ˈˈbɔnŋ ˗sü ɛɛnˈˈ ˗to ꞊duɛɛn ˈka ˗sü. Pë ˈö˗ ˗wɔn ˈdhö ˈˈgbɩɩ˗ ꞊ʒiaan ˈyö ˗tɔ ˗Zlan ˗bha ˈtɔŋ˗ ˗nu ꞊bhlëë ˗ya ˗sü. 20 ˗Kɔ ˈö mɛn ˈö ˈdhö ˈö kun ˗a ˈka ˈö ˗Zlan ˗ya ˗dhɛ bhë, ˗yö ˈto ꞊dhɛ ˗kɔ ˈö bhë ˗a ˈdhö. 21 ˈˈTʋ̈ŋ ˈö ˗Zlan ˗yö ü ˗dhɛ ˗a ˈka bhë, kö ü ꞊dhuëŋ ˈka ˗ee? ˈBhaa ˗dho ˗ya ˗a ˈdhɛ ˈö bhë ˗a ꞊zɔnŋ ˗ta. ˈˈKɛɛ ˗ya kë ꞊dhɛ ˗go ꞊dhuëŋdhɛ ˈgü ˗sü ˈˈkwee ˗ya ˈˈpʋ ü ˗gɔ, ˗bhö ˈgo ˗a ˈgü. 22 ˗A ˗gɛn ˗mü ꞊dhɛ mɛn ˈˈoo ˗mɛn ˈö kun ꞊dhuëŋ ˈka ˈö ˗Zlan ˗ya ˗dhɛ kö ˗yö kë Dëmɛn ˗bha gwëëˈˈ ˈka, kö ˗ya ˈgo ꞊dhuëŋdhɛ ˈgü ˗ya kë Dëmɛn ˗bha ˈka. ˗Kɔ do ˈö bhë ˗a ˈka ˈpö, mɛn ˈö ˈyaa kun ꞊dhuëŋdhɛ ˈgü ˈˈtʋ̈ŋ ˈö ˗Zlan ˗ya ˗dhɛ ˗a ˈka bhë ˗a ˈgü, kö ˗yö Klito ˗bha ꞊dhuëŋ ˈka. 23 Ka ˈdhɔ ˈnën ˈwo˗ wo ꞊sɔnŋ ˈˈgbɩɩ˗ ˈka. ˈDhɛ ˈö ˈˈdhʋ̈ ˗ka ˈˈkan ˗kë mɛnbhɩɩdhe ˗nu ˗bha ꞊dhuëŋ ˈka ˗sü ˗bha. 24 N ꞊dhegblü ˗nu, ˗kɔ ˈö mɛn ˈö ˈdhö ˈö kun ˗a ˈka ˈö ˗Zlan ˗ya ˗dhɛ bhë, ˗yö ˈto ꞊dhɛ ˗kɔ ˈö bhë ˗a ˈdhö ˗Zlan wë ˈˈdhiʋ̈.

25 ˈWɔn ˈdhɛ ˈö ˗gban mɛn ˗nu ˈö ˈwaa gɔɔn˗ ˗wɔn dɔ ɛɛnˈˈ ˈö ˈwaa dhe ˗wɔn dɔ* ˗an ˗bha bhë, Dëmɛn yö ˈti pë ˈbhaa pö n ˗dhɛ ˗a ˗bha. ˈˈKɛɛ n ˗wëë ˈö Dëmɛn ˗kë, ˈö ˈa ˗kë ˗zo ˗yö ˗a ˗dhɛ ˗mɛn ˈka bhë ˗a ˗wɔn ˈgü, n ˗man ˈö n ˗gɔ a ˗dho ˗a blɛɛˈˈ. 26 N ˗man ˈgü, ˈwɔn ˈˈgbɩɩ˗ ˗nu ˈwo ˈˈtʋ̈ŋ ˈö yö ˗a ˈgü bhë ˗an ˗wɔn ˈgü, ˗yö ˗dho kë ˗së kö gɔɔn˗ ˗yö ˈto ꞊dhɛ ˗kɔ ˈö˗ ˈka bhë ˗a ˈdhö. 27 Dhe ˗yö ü ˗gɔ ˗ee? ˈBhaa ˗dho ˗a ˈˈslö mɛɛnˈˈ kö ˈü ˗a bho ˈˈblü. Dhe ˈyaa ü ˗gɔ ˗ee? ˗Bhö ˈˈkan dhe mɛɛnˈˈ ˗sü ˗bha. 28 ˈˈKɛɛ ˈbha dhe ˈsü, kö ü ˈti ˈwɔn yaa kë. Mɛn ˈö ˈyaa gɔɔn˗ ˗wɔn ɛɛnˈˈ dhe ˗wɔn dɔ ˗ya gwaan˗ ˈkpɔ ɛɛnˈˈ ˗ya dhe ˈsü, kö yö ˈti ˈwɔn yaa kë. ˈˈKɛɛ mɛn ˈwo dhe sü ɛɛnˈˈ ˈwo gwaan˗ kpɔ ˗wo ˗dho saanˈˈ ˈsü.* ˈYö man ˗zë ˈa˗ ˈˈslö mɛɛnˈˈ ˗ni ˈgü kö ˈa ka dha saanˈˈ ˈö bhë ˗a ˗gɔ.

29 ˗Ya ˈgo mü ˈzü, n ꞊dhegblü ˗nu, ˗yö kë ka ˈˈɲaan ꞊dhɛ ˈˈtʋ̈ŋ ˈö ˗ya ˈto ˈyaa ꞊va ˈzü. ˈDhɛ ˈö ˈˈdhʋ̈, ˈö sü ꞊dɛɛ ˗bha, mɛn ˗nu ˈö dhe ˈdhö ˗an ˗gɔ, ˗wo kë ꞊dhɛ mɛn ˗nu ˈö dhe ˈyaa ˗an ˗gɔ ˗an ˈdhö. 30 Mɛn ˗nu ˈwo ˈˈgbʋ bɔ ˗ni ˈgü, ˗wo kë ˈpö ꞊dhɛ mɛn ˗nu ˈö ˈwaa ˈˈgbʋ bɔ ˗ni ˈgü ˗an ˈdhö. Mɛn ˗nu ˈö ˗an zuʋ̈ˈˈ ˈˈgblü ˈdhö dhi ˗sü ˈka, ˗wo kë ꞊dhɛ mɛn ˗nu ˈö ˗an zuʋ̈ˈˈ ˈˈgblü ˈyaa dhi ˗sü ˈka ˗an ˈdhö. Kö mɛn ˗nu ˈwo pë ˈˈdhɔ ˗ni ˈgü, ˗wo kë ꞊dhɛ mɛn ˗nu ˈö pë ˈyaa ˗an ˗gɔ ˗an ˈdhö. 31 Mɛn ˗nu ˈwo ˈˈkpɔnŋtaadhɛ ꞊trɔɔn ꞊slɔɔ˗ ˗ni ˈgü, ˗wo kë ꞊dhɛ mɛn ˗nu ˈö ˈwaa˗ ꞊trɔɔn ꞊slɔɔ ˗ni ˈgü ˈgbɛ ꞊dedewo ˗an ˈdhö, ˗a ˗gɛn ˗mü ꞊dhɛ ˈˈkpɔnŋtaadhɛ ˈö yö ˗yö ˈgo ˗ni ˈgü ˈˈgblʋʋ. 32 Pë ˈa˗ ˈˈpiʋ̈ ˈyö ˗tɔ ˗zotadhe ˈyaa ˗dho kë ka ˗bha. Mɛn ˈö dhe ˈyaa˗ ˗gɔ, ˈwɔn ˗nu ˈwo ˗gban Dëmɛn ˗bha ˈyö ˗ya ˗an ˗wɔn ꞊zɔnŋ ˗ta, ˗a ˗gɛn ˗mü ꞊dhɛ ˗ya ˈˈpiʋ̈ ˈö kë Dëmɛn ˗dhɛ ˗së. 33 ˈˈKɛɛ mɛn ˈö dhe ˈdhö˗ ˗gɔ, ˈˈkpɔnŋtaapë ˗nu ˈnën ˈö ˗ya ˗an ˗wɔn ꞊zɔnŋ ˗ta, ˈyö sü ꞊dhɛ ˗ya ˈˈpiʋ̈ ˈö kë ö ˗bha dhebɔ ˗dhɛ ˗së. 34 ˗Ya kë ˈˈdhʋ̈ ˗a ˗mɛn ˗zotagüwɔn ˈyaa kë do. ˗Ya ˈgo mü ˈzü, dhebɔ ˈö ˈyaa gwaan˗ ˗bha waa˗ mɛn ˈö ˈyaa gɔɔn˗ ˗wɔn dɔ, pë ˈwo ˗ya ˗a ˗wɔn ꞊zɔnŋ ˗ta ˈyö ˗tɔ ˈwɔn ˈö ˗gban Dëmɛn ˗bha, ˗yö kë ˈˈdhʋ̈ kö ˈwo kë ˈˈslʋ̈ʋ̈slʋ̈ wo bun waa wo ˗zotagüwɔn ˗nu ˈgü. ˈˈKɛɛ dhebɔ ˈö gwaan˗ ˗bha, pë ˈö ˗ya ˗a ˗wɔn ꞊zɔnŋ ˗ta ˈyö ˗tɔ ˈˈkpɔnŋtaapë ˗nu, ˈyö sü ꞊dhɛ ˗ya ˈˈpiʋ̈ ˈö kë ö ꞊gɔn ˗dhɛ ˗së. 35 ˈWɔn ˗nu ˈwo bhë, a ˗an ˗blɛɛ ka ˗dhɛ ˈˈdhʋ̈ ka ˗bha ˈwɔn ˗së ˗wɔn ˈgü, n ˈti˗ kë ˈˈdhʋ̈ kö ˈa ka ꞊kɛɛ˗ ˈˈkan pë ˈbhaa kë ˗sü ˗bha. A˗ ˗kë ˈˈdhʋ̈ ꞊ʒiaan kö ˈa ka ꞊faanmën pë ˈö ˗së ˗a kë ˗sü ˗bha, ˗yö kë ˈˈdhʋ̈ kö ˈka yökë Dëmɛn ˗dhɛ ka zuʋ̈ˈˈ ꞊gban ˈˈpɛpɛ ˈka ˗kplawo, kö pë ˈbhaa ˈyaa ˗dho ka ˗zo bho ˗a ˈˈpiʋ̈.

36 ˈˈKɛɛ ˗ya kë ꞊dhɛ mɛn ˈbhaa ꞊yaa˗ yö ꞊dhɛ ö ˗bha ˗to ˈˈkwiaa ˈka ˗sü ˈgü ˈyaa ˗mɔn ˗ni ˈgü ö ˗de ˗bha, ˈö˗ mɛn ˈö ˈˈdhʋ̈ ˗a ˗kwɛ ˗ya ˗mɔn, pë ˈö˗ ˈˈpiʋ̈ ˈö˗ kë bhë, ˗ya kë. ˗Yö ö ˗bha dhe ˈsü. ꞊Yaa˗ kë ˈˈdhʋ̈ kö yö ˈti ˈwɔn yaa kë. 37 ˈˈKɛɛ mɛn ˈbhaa zuʋ̈ˈˈ ˗ya kë ˈˈwɩ ˗sü ˈka ˗a ˗bha, ˗a ˗bhawɔn yö ˈti kë ˈwɔn ˈdhɛ ˈö bhë ˗a ˗bha, ˗ya ˗mɔn ö ˗de ꞊sɔŋ ˗bha, ꞊yaa˗ ˈsü ö ˗de ˈgü ꞊yaa˗ pö ꞊dhɛ ö ˗dho ˈto ˈˈkwiaa ˈka, kö ˗ya ˗kë ˗së. 38 ˈDhɛ ˈö ˈˈdhʋ̈, mɛn ˈö dhe sü ɛɛnˈˈ ˈö dho gwaan˗ ˗bha, kö ˗ya ˗kë ˗së. ˈˈKɛɛ mɛn ˈö yö ˈti dhe ˈsü ɛɛnˈˈ yö ˈti gwaan˗ ˈkpɔ, kö ˗ya ˗kë ˗së ˈzü ˈgbɛ ˈö ˗ʒiö ˗a ˈka mü.

39 Dhebɔ ˈö˗ ꞊gɔn ˈdhö ꞊kun ˈö ˈˈɲaan, kö ˗yö ꞊kun gɔɔn˗ ˈö ˈˈdhʋ̈ ˗a ˗bha dhebɔ ˈka. ˈˈKɛɛ ˗ya kë ꞊dhɛ ˗a ꞊gɔn ˗ya ga, ˗yö ꞊mɔɔn˗ ˗bha ˈö gwaan˗ kpɔ mɛn ˈö ˗dhi ˗a ˗dhɛ ˗a ˗gɔ, ˈˈkɛɛ ˗a ˗mɛn ˗yö kë mɛn ˈö ö ˗zo yö Dëmɛn ˗dhɛ ˗a ˈka. 40 ˗Yö ˈˈdhʋ̈, ˈˈkɛɛ n ˗man ˈgü, ˗ya ˈto ö do ˈka ˈˈdhʋ̈, ˗a zuʋ̈ˈˈ ꞊nii ˗dho ˗da ꞊dedewo. ˗Yö ga ˗sü ˈka n ˈgü ꞊dhɛ man ˗de ˈpö ˗Zlan ˗bha ˗zuu ˈˈslʋ̈ʋ̈slʋ̈ ˗yö n ˗ta.