ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ

6 ˈMën ˗kë ˈö ka ꞊zinŋgü mɛn ˈbhaa ˗shiödhɛwɔn ˗ya kë ö ˈˈtɛɛdo ˗bha, ˈö dho ˈö˗ ˗wɔn ˗da mɛn ˗nu ˈö ˈwaa ˗Zlan ˗dhɔkëmɛn ˗nu ˈka ˗an ˗dhɛ, ˈö ˈyaa˗ ˗wɔn ˗da ꞊ʒiaan mɛn ˈˈslʋ̈ʋ̈slʋ̈ ˗nu ˗dhɛ? 2 Ɛɛnˈˈ ˗a ˈwɔn ˈnën ˈkaa˗ dɔ ꞊dhɛ mɛn ˈˈslʋ̈ʋ̈slʋ̈ ˗nu ˗dho za dɔ ˈˈkpɔnŋtaamɛn ˗nu ˗bha ˗ee? ˈYö ˈmɛn ˈö ˈka ˗dho za dɔ ˈˈkpɔnŋtaamɛn ˗nu ˗bha bhë, ˈkaa ꞊mɔɔn˗ ˗bha ˈka ˈwɔn ˗bhaasü ˗nu ˈˈɲan bhɔ ˗ee? 3 ˈKaa˗ ˈwɔn dɔ ˈpö ꞊dhɛ kwa ˈnën ˈkwa ˗dho za dɔ ˈˈkiö ˗nu ˗bha ˗ee? ˈDhɛ ˈö ˈˈdhʋ̈, kwa dua ˗mü kö kwa ˗kɔ ˗yö ˗mɔn ˈwɔn ˗nu ˈwo ꞊dɛɛ ˗an ˈˈɲan bhɔ ˗sü ˗bha. 4 ˈMën ˗kë ˈsa ˈö ˈwɔn ˗nu ˈwo ꞊dɛɛ ˗an ˈˈɲan bhɔ ˗wɔn ˗ya ˗da, ˈö ˈka dho ˗an ˈka mɛn ˗nu ˈö ˗zlanwokɔdhi ˈgümɛn ˗nu ˈwaa wo ˗zo yö ˗an ˗dhɛ ˗an ˈˈdhiʋ̈ kö ˗wa ˈˈɲan bhɔ? 5 A ˈwɔn ˗blɛɛ ˈˈdhʋ̈ kö ˈlëë˗ ˗yö ka ˈkun. Ka kpö ˈgü, mɛn ˈö ˗dho kë ꞊kpɔɔsü kö ˗yö ˈwɔn ˗nu ˈˈɲan bhɔ ö ꞊dhegblü ˗nu ꞊zinŋgü ˈyaa ˈdhö ˗ee? 6 ˈˈKɛɛ ka ka ˗ta ˗yö ˗a ˈdhɛ ˈö bhë ˗a ˗bha ꞊ʒiaan ˈö ꞊dhegblüzë ˗nu ˈka ka ˈko ˗nu ˗wɔn ˗da, ˈö zakanmɛn ˗nu ˈö ˈwaa ˈdhaŋ˗ bho ˗Zlan ˈˈdhiʋ̈ bhë, ˈwo ˗kë ka ˗bha ˈwɔn ˈˈɲanbhɔmɛn ˗nu ˈka!

7 ˗A kë ˗sü kö ˈka za ˗ya ka ˈko ˗nu ˗bha ꞊dhɛ ˗kɔ ˈö bhë ˗a ˈdhö, ˗ya ˗zɔn ꞊dhɛ ˈlëë˗ ˗ya dɔ ka ˗bha* ˈsaadhö. Ka ꞊dhegblü ˗nu ˗wa ˈwɔn yaa kë ka ˈka, ˈmën ˗kë ˈö ˈkaa˗ ˈkun ka ˗bha zuʋ̈saadhɛ ˈka? ˈMën ˗kë ˈö ˈkaa ˈˈwɩ ˗a ˗bha kö ˗wo ka ˗bha pë ꞊gban ˈsü ka ˗gɔ? 8 Ka ˗kpɔ ˗a ˗kë ˈˈdhʋ̈ ˗sü ˈka ꞊ʒiaan ˈö ˈka pë yaa ˗kë mɛn ˗nu ˈka, ˈö ˈka ˗an ˗bha pë ˗nu sü ˗an ˗gɔ. Mɛn ˗nu ˈö ˈka˗ ˗kë ˗an ˈka ˈˈdhʋ̈ ˗ʒiaanwo ˈyö ˈwo ˗tɔ ka ꞊dhegblü ˗nu!

9 ˗A ˈwɔn ˈnën ˈö ˈkaa˗ dɔ ꞊dhɛ ˈwɔnyaakëmɛn ˗nu* wo ˈti ˗dho ˗Zlan ˗bha ˗Gblüdëdhɛ ꞊slɔɔ˗ ˗ee? Mɛn ˈbhaa ˈyaa ˗dho ˈˈkpënŋ˗ kë ka ˗gɔ.* ˈYö sü ꞊dhɛ ˈˈɲangüyaakëmɛn ˗nu, ꞊geebɔ gbamɛn ˗nu, mɛn ˗nu ˈö ˈwo wo ꞊gɔn ɛɛnˈˈ wo ˗bha dhebɔ to ˈwo ꞊niënŋ, wo ˈko ˗nu ˗kun ˈˈnɔɔnbɔ ˈka ˗gɔn ˗nu,* 10 ꞊kwaanmɛn ˗nu, mɛn ˗nu ˈö pë ˈyaa ˗an ˗zokun, we ˈˈdudu mü ˗mɛn ˗nu, ˈsibhomɛn ˗nu waa mɛntabhömɛn ˗nu, wo ˈti ˗dho ˗Zlan ˗bha ˗Gblüdëdhɛ ꞊slɔɔ˗. 11 Mɛn ˈbhaa ˗nu ka ˗kun ˈwɔn ˗nu ˈwo bhë ˗an kë ˗ni ˈgü ˈˈdhiʋ̈ ˗be. ˈˈKɛɛ ˗Zlan ˗ya ka ˈˈzu, ˗ya ka kë ˈˈslʋ̈ʋ̈slʋ̈, ˗ya ka kë kpɛnŋdhö ö ˈˈɲan ˈˈdhiʋ̈ kwa Dëmɛn Yesu Klito ˈtɔ ˈgü ö ˗bha ˗zuu ˈka.

12 ˈWɔn ˈˈpɛpɛ ˈö ˗dhi n ˗dhɛ a ꞊mɔɔn˗ ˗bha ˈa˗ ˗kë, ˈˈkɛɛ ˗a ˈbhaa ˗nu kë ˗sü ꞊trɔɔn ˗së ˈyaa ˈdhö. ˈWɔn ˈˈpɛpɛ ˈö ˗dhi n ˗dhɛ a ꞊mɔɔn˗ ˗bha ˈa˗ ˗kë, ˈˈkɛɛ n ˈti ˗dho n ꞊kwaa pë ˈˈoo ˗pë ˗zü kö ˗a ˗kɔ ˗yö ʒiö n ˗gɔ. 13 ˗Bhöpë ˗yö mɛn ˈgwü* ˗bha ˈka, ˈö mɛn ˈgwü ˈdhö ˗bhöpë ˗bha ˈka. ˈˈKɛɛ pë ꞊plɛ ˈwo bhë ˗Zlan ˗dho ˗an kë ˗dhɛfuöödhɛ ˈka. Kwa bun ˈyaa ˈˈɲangüyaa ˗kë ˗a ˈka ˗pë ˈka, ˗yö Dëmɛn ˗bha ˈka, ˈö Dëmɛn ˈdhö kwa bun ˗bha ˈka ˈpö. 14 ˗Ya ˈgo mü ˈzü, ˗Zlan ˗yö Dëmɛn ˗bho ga ˈgü, ˈö ˗dho kwa bho ga ˈgü ˈpö ö ˗bha ˈˈpiigbɩɩdhɛ ˈka.

15 ˗A ˈwɔn ˈnën ˈö ˈkaa˗ dɔ ꞊dhɛ ka bun ˗yö Klito dɔɔ˗ ˗nu ˈka ˗ee? ˈDhɛ ˈö ˈˈdhʋ̈, n dua ˗mü kö ˈa Klito dɔɔ˗ ˗nu ˗kpo kö ˈa ˗an ˗gban niënŋdhe ˗bha ˗ee? ˗Abin toŋtoŋdhö! 16 ˈKaa˗ ˈwɔn dɔ ꞊dhɛ mɛn ˈö waa niënŋdhe ˗an ˗bha sɛɛˈˈ ˗yö ˗kë do, kö waa˗ ˗nu ˗wa kë mɛn ˗dhü do ˈka ˗ee? ˗A ˗gɛn ˗mü ꞊dhɛ pë ˈö ˗Zlan ˗ya pö ˈyö ˗tɔ «˗kɔ ˈö ˈwo˗ ˗bha ꞊plɛ,» «˗wo ˗dho kë mɛn ˗dhü do ˈka.» 17 ˈˈKɛɛ mɛn ˈö ˗gban ˗sü ˈka Dëmɛn ˗bha, kö waa Dëmɛn ˗an ˗zotakɔ ˗yö do.* 18 ˈDhɛ ˈö ˈˈdhʋ̈, ˗ka ꞊duëë ˈˈɲangüyaa* kë ˗sü ˗gɔ! ˈWɔn yaa ꞊suu ˈˈwɛɛ ˈˈpɛpɛ ˈö mɛn ˗ya ˗kë, ˈyaa pë ˈbhaa kë ˗a bun ˈka. ˈˈKɛɛ mɛn ˈö ˈˈɲangüyaa ˗kë, kö ˗ya pë ˈˈdhiʋ̈˗ kë ö ˗de bun ˈka. 19 ˈKaa˗ ˈwɔn dɔ ꞊dhɛ ka bun ˈnën ˈö ˗tɔ ˗dhɛ ˈˈslʋ̈ʋ̈slʋ̈ ˈö ˗zuu ˈˈslʋ̈ʋ̈slʋ̈ ˈö ˗Zlan ˗ya nu ka ˗dhɛ bhë, ˈö ˗ya ˗sü ˈka mü ˗ee? ˗Ya ˈgo mü ˈzü, ˈkaa ka ˗de ˗bha ˈka, 20 ˈyö sü ꞊dhɛ ˗Zlan ˗ya ka ˈdhɔ ꞊sɔnŋ ˈˈgbɩɩ˗ ˈka. ˈDhɛ ˈö ˈˈdhʋ̈, ka bun dua ˗mü kö ˗yö kë ˗Zlan ˈtɔ bhɔ ˗pë ˈka.