ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ

10 N ꞊dhegblü ˗nu, a˗ ˈˈpiʋ̈ kö ˈka˗ ˈwɔn dɔ ꞊dhɛ kwa ˈˈbhɛman ˗nu ꞊gban ˈˈpɛpɛ ˗wo ˗kë ˈˈdhuu kpö ꞊löö, ˈö ˗an ꞊gban ˈˈpɛpɛ ˗wo ꞊weeyi ˗kan. 2 ˗An ꞊gban ˈˈpɛpɛ ˗wo ˗bɔ ˈˈyi ꞊bhaa ˗ʒiö Moizö ˈˈpiʋ̈ ˗sü ˈka, ˈö ˈˈdhuu kpö ˗yö ˈˈdhiʋ̈sü ˗an ˈka ˈö ˈwo ꞊weeyi ˗kan. 3 ˗Bhöpë do ˈö ˗Zlan ˗ya nu ˗an ˗dhɛ bhë ˈyö ˗an ꞊gban ˗wa ˗bhö, 4 ˈö ˗an ꞊gban ˈˈpɛpɛ ˗wo ˈˈyi do ˈö ˗Zlan ˗ya nu ˗an ˗dhɛ bhë ˗a mü. ˗A pö ˈa˗ wo ˈˈdhʋ̈ bhë ˗a ˗gɛn ˗mü ꞊dhɛ, ˗Zlan ˗bha ˗gwö gbɔŋ˗ ˈö kun ʒiö ˗ni ˈgü ˗an ˈˈpiʋ̈ bhë, ˈˈyi ˈö go ˗a ˈgü ˈyö ˈwo˗ mü. ˗A ˗gwö gbɔŋ˗ ˈö ˈˈdhʋ̈ yö ˈnën ˈö kun ꞊dhɛ Klito ꞊zuaan ˈdhö.* 5 ˈˈKɛɛ ˗an ꞊vadhɛ ˈˈdhiaa ˈyaa kun ˗Zlan ˈgü, ˈyö sü ꞊dhɛ ˗wo ˗ga ˈˈyɛta.

6 Kwa ꞊mɔɔn˗ ˗bha ˈkwa ˗gleŋ sü ˈwɔn ˗nu ˈwo bhë ˗an ˈgü, ˗yö kë ˈˈdhʋ̈ kö kwa zuʋ̈ˈˈ ˈyaa ˗dho bhɔ ˈwɔn yaa ˗nu ˗bha ꞊dhɛ ˗kɔ ˈö ˗an zuʋ̈ˈˈ ˗yö bhɔ ˗a ˈka ˗an ˗bha bhë ˗a ˈdhö. 7 ˈKaa ˗dho kë ꞊geebɔ gbamɛn ˗nu ˈka ˈpö ꞊dhɛ ˗kɔ ˈö˗ mɛn ˈbhaa ˗nu ˗wa ˗kë ˗a ˈka ˗a ˈdhö. ˗A mɛn ˗nu ˈwo ˈˈdhʋ̈ ˈwɔn ˈö ˗gban ˗an ˗bha ˗yö ˗bɛnzë ˗sü ˈka ˗Zlan ˗Wo ˈsëëdhɛ ˈgü. ˗Ya ˗pö: «ˈˈSɛgümɛn ˗nu ˗wo ˈɲaannu ˈö ˈwo pë ˗bhö, ˈö ˈwo müpë ˗nu mü. ˈDhɛ ˈwo wo bo, ˈyö ˈwo ꞊luu ˈwo ˗ya trʋʋˈˈ kë ˗sü ˗bha.» 8 ˈKwaa ˗dho ˗a pö ˈkwa ˈˈɲangüyaa kë ꞊dhɛ ˗kɔ ˈö˗ mɛn ˈbhaa ˗nu ˗wa ˗kë ˗a ˈka, ˈö˗ mɛn ˈˈgblü ˗kɔŋ ꞊plɛ ö ga ˗yaaga (23.000) ˗wo ga ˗dhɛkpaɔyi dosɛnŋ ˈgü bhë ˗a ˈdhö. 9 ˈKwaa ˗dho ˗a pö ˈkwa Zoova ˈgüdan ˈpö ꞊dhɛ ˗kɔ ˈö˗ mɛn ˈbhaa ˗nu ˗wa ˈgüdan ˗a ˈka, ˈö ꞊mlɛɛn ˗nu ˗wo ˗an zë bhë ˗a ˈdhö. 10 ˈKaa ˗dho ˗dɔn bho ka ˗wo ꞊löö ꞊dhɛ ˗kɔ ˈö˗ mɛn ˈbhaa ˗nu ˗wa ˗kë ˗a ˈka ˈö ˗Zlan ˗bha ˈˈkiö ˗yö ˗an ˈgüshiʋ̈ bhë ˗a ˈdhö. 11 Kwa ꞊mɔɔn˗ ˗bha ˈkwa ˗gleŋ sü ˈwɔn ˗nu ˈwo bhë ˗an ˈgü. ˗Wo ˗an ˗bɛnzë ˈˈdhʋ̈ kö ˗wo ˗gleŋ ˗da mɛn ˈö ˈˈkpɔnŋtaadhɛ ɲën ˈˈtʋ̈ŋ ˗yö ˗wo kwa ˗bha bhë, kwa ˗bha.

12 ˈDhɛ ˈö ˈˈdhʋ̈, mɛn ˈö ö ˗zota ꞊dhɛ ö dɔ ˗sü ˈka ö ˗gɛn ˗ta, ˗ya kë ö ˈsuaan˗ ˈka kö ˈyaa ˗dho ˗puö. 13 ˈGüdandhe ˈkö ˗dho nu ka ˗ta ˈö ˈyaa nu ˈpö mɛn ˈˈwɛɛ ˗nu ˈwo to ˗an ˗ta ˈyaa ˈdhö. ˈˈKɛɛ ˗Zlan ˗yö ˗to ö ˗wo ˗ta. Yö ˈti ˗dho ˈˈwɩ ˗a ˗bha kö ˈgüdandhe ˗ya nu ka ˗ta, ˗yö kë ˈˈgbɩɩ˗ ˗yö ʒiö ˗a ˈka ꞊faan ˈö ka ˈgü ˗a ˗ta. ˈGüdandhe ˗ya nu ka ˗ta, ˗yö ˗dho ʒiaan ˈbhaa ˈˈpʋ ka ˗gɔ kö ˈka ˗mɔn ˗a bun ˗sü ˗bha.

14 ˈDhɛ ˈö ˈˈdhʋ̈ n dhɔɔbhaamɛn ˗nu, ˗ka ꞊duëë ꞊geebɔ gba ˗sü ˗gɔ. 15 A ˈwɔn ˗blɛɛ ka ˗dhɛ ꞊dhɛ ˗kɔ ˈö bhë ˗a ˈdhö, ˈyö sü ꞊dhɛ ˈwɔn ˗bhokoodɔsü ˗yö ka ˗gɔ. ˈDhɛ ˈö ˈˈdhʋ̈, ˗ka ˗dhɛ ˗ga pë ˈa˗ pö ˗ni ˈgü bhë ˗a ˈgü ˗së ˈka. 16 ˈDhuëë˗ ˗kɔɔ ˈö ˈkwa bhɛɛˈˈ ˗ni ˈgü ˗a ˗ta bhë, ˈyaa˗ ˗zɔn ꞊dhɛ Klito ꞊ɲɔɔn ˈö ꞊wɛnŋ bhë kwa ˗a ꞊trɔɔn ꞊slɔɔ ˗ni ˈgü ˗ee? ˈBluu˗ ˈö ˈkwa˗ ˈˈkluklu bho ˗ni ˈgü bhë, ˈyaa˗ ˗zɔn ˈpö ꞊dhɛ Klito kwi* ˈö˗ nu kwa ˗wɔn ˈgü bhë kwa˗ ꞊trɔɔn ꞊slɔɔ ˗ni ˈgü ˗ee? 17 ˈDhɛ ˈö ˗kë ꞊dhɛ ˈbluu˗ ˈö bhë ˗yö dosɛnŋ bhë, kö kwa ˗de ˈpö ˈkö ˗kë ꞊dhɛ kwa ꞊va, kwa mɛn ˗dhü do ˈka. ˗A ˗gɛn ˗mü ꞊dhɛ ˈbluu˗ dosɛnŋ ˈö bhë ˈyö mɛn ꞊gban ˈˈpɛpɛ ˈkwa˗ ˗bhö.

18 ˗Ka Izraɛdhömɛn ˗nu ˗ga: Pë ˗nu ˈwo ˈˈsaa˗ bho ˗an ˈka ˗Zlan ˗dhɛ ˈˈsaabhodhɛ ˈgü bhë ꞊waa˗ ˗an ˗bhö, kö waa ˗Zlan ˈwaa pë ˗bhö ˗ni ˈgü wo ˈko ˈˈpiʋ̈ ˗ee? 19 ˈMën ˈa˗ ˈˈpiʋ̈ ˈa˗ pö? Ka ˗bha ˈgü a˗ ˈˈpiʋ̈ ˈa˗ pö ꞊dhɛ pë ˗nu ˈwo ˗an ˈˈsaa˗ bho gbapë ˗nu ˗dhɛ ɛɛnˈˈ ˗a gbapë ˗nu ꞊dede ˈwo bhë ˗wo ꞊bhlëësü ˗ee? 20 ˗Abin. Pë ˈa˗ ˈˈpiʋ̈ ˈa˗ pö ꞊ʒiaan ˈyö ˗tɔ pë ˈö ˈˈsɛ ˈˈwɛɛ ˈgümɛn ˗nu ˈdhö ˈˈsaa˗ bho ˗ni ˈgü ˗a ˈka bhë, ˗zuu yaa ˗nu ˈnën ˈwo˗ ˈˈsaa˗ bho ˗an ˗dhɛ, ˗Zlan ˈyaa ˗mü. ˈMaan˗ ˈˈpiʋ̈ kö kaa ˗zuu yaa ˗nu ka ˗bha ˈwɔn ˈbhaa ˗yö kë ˈkwëë˗. 21 ˈKaa ꞊mɔɔn˗ ˗bha kö ˈka ka ˗bɛn ˗ya Zoova ˗bha ˗kɔɔ ˈˈdhiʋ̈, kö ˈka ˈgo mü ˈzü ˈka ka ˗bɛn ˗ya ˗zuu yaa ˗nu ˗bha ˗kɔɔ ˈˈdhiʋ̈. ˈKaa ꞊mɔɔn˗ ˗bha kö ˈka pë ˗bhö «Zoova ˗bha ˈtaablö» ˈˈdhiʋ̈ kö ˈka ˈgo mü ˈzü ˈka pë ˗bhö ˗zuu yaa ˗nu ˗bha ˈtaablö ˈˈdhiʋ̈. 22 Ɛɛnˈˈ ‹kwa˗ ˈˈpiʋ̈ kö ˈkwa ꞊druɛɛ˗ ˗da Zoova ˈgü ˗ee›? Kwa ˈgü ˈyaa ˈˈgbɩɩ˗ ˈyaa ʒiö ˗a ˈka ˗a ˗ta, ˈyaa ˈˈdhʋ̈ ˗ee?

23 ˈWɔn ˈˈpɛpɛ ˈö ˗dhi mɛn ˗dhɛ ˗yö ꞊mɔɔn˗ ˗bha ˈö˗ ˗kë, ˈˈkɛɛ ˗a ˈbhaa ˗nu kë ˗sü ꞊trɔɔn ˗së ˈyaa ˈdhö. ˈWɔn ˈˈpɛpɛ ˈö ˗dhi mɛn ˗dhɛ ˗yö ꞊mɔɔn˗ ˗bha ˈö˗ ˗kë, ˈˈkɛɛ ˗a ˈbhaa ˗nu ˈwaa mɛn ꞊faanmën. 24 ˈWɔn ˈö ˗së mɛn ˈˈwɛɛ ˗nu ˗bha ˈka ˗kaa mɛɛnˈˈ ˗kplawo, ˈkaa ˗dho ˗ya ka dosɛnŋ ka ˗de ˗wɔn ꞊zɔnŋ ˗ta.

25 Wü ˈˈpɛpɛ ˈwo˗ ˈˈdhoodɔ ˈˈdhookwëë˗ ˗kaa ˗bhö, ka zuʋ̈ˈˈ ˈyaa ˗dho ˈto ˈzlöö ˈö ˈka ka ˗de dhɛɛˈˈ kpɔ ˗a ˈgodhɛ ˈka. 26 ˗A ˗gɛn ˗mü ꞊dhɛ «ˈˈkpɔnŋtaadhɛ waa pë ˈˈpɛpɛ ˈwo˗ ˗ta, ˗wo Zoova ˗bha ˈka.» 27 Mɛn ˈö ˈyaa ˈdhaŋ˗ ˗bho Yesu ˈˈdhiʋ̈ ˗mɛn ˈka ˗ya ka ˗dhɛ ˗bhöpë ˈka, ˈka ˈˈwɩ ˗a ˗bha kö ˈka ˈdho, pë ˈˈpɛpɛ ˈö ˗dho ˗a dɔ ka ˈˈdhiʋ̈ ˗kaa ˗bhö, ka zuʋ̈ˈˈ ˈyaa ˗dho ˈto ˈzlöö ˈö ˈka ka ˗de dhɛɛˈˈ kpɔ ˗a ˈgodhɛ ˈka. 28 ˈˈKɛɛ kö mɛn ˈbhaa ˗ya pö ka ˗dhɛ: «ˈPë ˈwo ˈˈsaa˗ bho ˗a ˈka yö ˗mü,» ˈkaa ˗dho ˗a ˗bhö mɛn ˈö˗ pö ka ˗dhɛ ˈˈdhʋ̈ bhë ˗a ˗wɔn ˈgü, ɛɛnˈˈ kö mɛn ˈbhaa zuʋ̈ˈˈ ˈyaa ˗dho za dɔ ˗a ˗bha. 29 N ˈti ˈˈwɩ ka ˗zë ka zuʋ̈ˈˈ ˈka, mɛn ˈˈwɛɛ ˈö ˈwɔn ꞊blɛɛ bhë ˈyö ˈa ˗we ˗a zuʋ̈ˈˈ ˈka. ˈKö ˗kë ꞊dhɛ pë ˈö n zuʋ̈ˈˈ ˗dhɛ ˗së a ꞊mɔɔn˗ ˗bha ˈa˗ ˗kë, ˈmaan˗ ˈˈpiʋ̈ ˈa˗ kë kö mɛn ˈˈwɛɛ zuʋ̈ˈˈ ˗yö za dɔ n ˗bha ˗a ˗wɔn ˈgü. 30 ˈKö ˗kë ꞊dhɛ n ˗man ˗bhöpë ˈa ˗Zlan ˈˈnuɛ bho ˗a ˗wɔn ˈgü yö ˗mü, ˗ya kë ꞊dhɛ ˈman˗ ˗bhö mɛn ˈˈwɛɛ ˗nu ˗dho n ˗wɔn yaa blɛɛˈˈ ˗a ˗wɔn ˈgü, n dua ˗mü kö ˗bhöpë ˈa ˗Zlan ˈˈnuɛ bho ˗a ˗bha ˈˈdhʋ̈ bhë ˈa˗ ˗bhö ˗ee?

31 ˈDhɛ ˈö ˈˈdhʋ̈, ˗yö ˗kë pë ˗bhö ˗sü ˈka oo, ˗yö ˗kë pë mü ˗sü ˈka oo, ɛɛnˈˈ ˗yö ˗kë pë ˈˈoo ˗pë kë ˗sü ˈka, ˗kaa ꞊gban kë ˗Zlan ˈtɔ bhɔ ˗dhɔ ˗dhɛ. 32 ˗Ka pë ꞊gban ˈˈpɛpɛ kë kö ˈkaa ˗dho kë Zuifö ˗nu, Glɛkö ˗nu waa ˗zlanwokɔdhi ˈgümɛn ˗nu ˗gɛn ˈˈdhiʋ̈ ˗zuö ˗mɛn ˈka. 33 Pë ꞊gban ˈˈpɛpɛ ˈgü, a n ˈgü ˗dɔ ˈˈgbɩɩ˗ kö ˈa kë mɛn ꞊gban ˈˈpɛpɛ ˗dhɛ ˗së. ˈMaan ˗ya man dosɛnŋ n ˗man ˈwɔn ˗së ˗wɔn ꞊zɔnŋ ˗ta. ˈWɔn ˈö ˗së mɛn ꞊va ꞊dede ˗bha ˈka ˈyö ˈa˗ ꞊mɛɛn, kë ˈˈdhʋ̈ kö ˗wo dha.