Ʒuɛn

Zoova ˗yö ˈdhuëë˗ ˗kpɔ kletiɛn ˗blɛɛsü ˗nu ˗bha, ˈyö sü ꞊dhɛ ˗an ˗bha ˗tosɛta ˈö go ˈˈgblʋʋ bhë, ˗wa ˈkun ˗dhɛ ˗yö. ˗Wo ˗an ˈˈklʋʋ ˗bhɔ. ˈˈTʋ̈ŋ ˈbha ˗nu ˈka ˗ʒiaanwo, ˈˈklʋʋbhɔdhe ˈö˗ ˗wɔn ˈyaa kun ˗an ˈˈɲaan ˗be ˗yö ˗nu ˗an ˗ta. ˈWɔn ˈö ˗kë Baanabasö waa bɔmɛn Pɔdhö ˗an ˈka kö ˗wo ˗zlanwopö ˗ni ˈgü Dhitrö, ˗kwaa ˗ga. ˗A züdɔdhɛ ˈgü mɛn ˗nu ˗wo wo ˗kɔ ˗ya ˗an ˗gɔ ˗së ˈka, ˈwo wo ˈˈtʋ ˗to ˗an ˗bha. ˈˈKɛɛ ꞊taabha, ˗gban ˗an ˗gɔ ˗mɛn ˗nu ˗wo «mɛ kpö bha˗ ˗nu zuëˈˈ ˗slëë wo ˈˈpiʋ̈.» Mɛn ꞊dede ˈwo wo ˗kɔ ˗ya ˗an ˗gɔ ˗së ˈka ˈˈdhʋ̈ bhë ˗wo Pɔdhö ˗zuö ˗gwö ˈka, ˈwo˗ ˗ga ˗be ꞊dhɛ ˗ya ga. (Këw. 14:19) ˈKö ˗kë ˈˈdhʋ̈, Baanabasö waa Pɔdhö ˗wo ˗zlanwopö ˈˈkwipö ˈˈwɛɛ ˈgü. ˈWɔn ˗së ˗mɛɛn ˗nu ˈwo˗ ꞊slɔɔ? ˗Wo ‹mɛgbɛdhɛ ˗kë ˈdhang˗ ˗bho Yesu ˗wɔn ˈˈdhiʋ̈ ˗mɛn ˗nu ˈka,› ˈö go mü ˈwo wo ꞊dhegblü ˗nu ꞊faanmën wo ˗bha ꞊klaŋwo waa wo këwɔn ˗nu ˈgü. (Këw. 14:​21, 22) ˈDhɛ ˈˈklʋʋbhɔdhe ˈö ˗wɔn ˈyaa ˗an ˈˈɲaan ˗be ˈö nu Baanabasö waa Pɔdhö ˗an ˗ta, ˗wo ˈti ˈˈkan ˗zlanwopösü ˗bha. ˗A ˗wɔn ˈgü, ˗wo ˈwɔn ˗së ˗kë mɛn ꞊va ˗dhɛ. Kwa ˈti ˈˈkan yö ˈö Zoova ˗ya nu kwa ˗dhɛ ˗a ˗bha, ˗yö ˗dho ˈdhuëë˗ ˈkpɔ kwa ˗bha. w23.04 16-17 § 13-14.

˗Gblüdë Davi ˗bha ˗tosɛta ˈgü, ˗a ˈyɔɔ˗ ˗nu ˗kun ꞊va. ˗A ˗wɔn ˈgü, ˈˈtʋ̈ŋ ˈbha ˗nu ˈka ˗ya ˗pö Zoova ˗dhɛ ˗yö ö ˗takun.˗Yö ˗kun ga ˗sü ˈka Davi ˈgü ꞊dhɛ Zoova ˗yö ö ˈˈtʋ ˗to ö ˗bha bhɛɛwo ˗nu ˗bha, ˈö ˗an ˗daakë. ˗Yö ꞊mɔɔn˗ ˗bha ˈö ga kwa ˈgü ˈˈdhʋ̈ ˈpö. Biblö ˗yö kwa ˗zogban ꞊dhɛ Zoova ꞊mɔɔn˗ ˗bha ˈö kwa gba ꞊kpɔɔdhɛ waa ꞊faan ˗an ˈka kö ˈkwa bɔ ˈwɔn ˈˈgbɩɩ˗ ˗nu ˈgü. ˗Yö ꞊mɔɔn˗ ˗bha ˈzü ˈö bɔ ˗zlanwokɔdhigümɛn ˗nu ɛɛnˈˈ mɛn ˗nu ˈö ˈwaa˗ ˗dhɔkë ˗ni ˈgü ꞊köŋ ˗an ˗ta ˈö kwa ˗takun. ˈKö ˗kë ꞊dhɛ Zoova ˈyaa kwa ˗bha bhɛɛwo ˗nu ˗daakë ꞊dhɛ ˗kɔ ˈö ˈkwa˗ ˈˈpiʋ̈ ˗a ˈdhö ˈˈtʋ̈ŋ ꞊gban ˈka, ˗yö ga ˗sü ˈka kwa ˈgü ꞊dhɛ ˗yö ˗dho ˗an ˗yɔ bɔ ˗kɔ ˈˈwɛɛ ˗ta. Pë ˈö kwa ˗bhawɔn ˈdhö˗ ˗bha ˈyö Zoova ˗ya nu kwa ˗dhɛ ö ˈˈtʋ̈ŋ ˗së ˗bha. ˗Dhɛ ˈö ˈˈdhʋ̈, ˗kwa bhɛɛˈˈ Zoova ˗dhɛ ˗kplawo ˗zogbandhe ˈka ꞊dhɛ ˗yö ˗dho ö ˗zokë kwa ˈˈpiʋ̈ ꞊dɛɛ, ˈö go mü ˈzü ˈö ‹pë ˈˈbhɩɩ˗ ˈˈpɛpɛ zuʋ̈bhɔbhapë nu ˗an ˗dhɛ› ˈˈkpɔnŋtaadhɛ ˗dɛɛ ˈgü.—Ps. 145:16. w23.05 8 § 4; 13 § 17-18.

ˈWɔn ˗së ˗nu ˈwo dho ˈgo pë ˗nu ˈwo kwa ˗zo ˈˈpiʋ̈ ˗an kë ˗sü ˈgü, ˗kwa kwa ˗zota ˗an ˈgü. ˈWɔn ˗së ˗nu ˗mɛɛn ˈö ˈkwa dho ˗an ꞊slɔɔ ˗a ˈgü? ꞊Ya kë ꞊dhɛ pë ˈö ˈkwa˗ ˗ya kwa ˗zo ˈˈpiʋ̈ ˈyö ˗tɔ Biblö ˗wopösü waa bhɛɛsü, ˈkwa kwa ˗zota ˗kɔ ˈö dho kwaa Zoova kwa ˗bha ˗mlɛɛn ˗gɛn ˗gban ˗a ˈka ˗a ˈgü, ˗a kë ˗sü ꞊faan ˗dho kë kwa ˗gɔ. (Ps. 145:​18, 19) ꞊Ya kë ꞊dhɛ pë ˈö kwa ˗zo ˈˈpiʋ̈ ˈyö ˗tɔ kletiɛn ˗nu ˗bha ˈˈklʋʋsë ˈbha ˗ya ꞊bhlëë ˈgü ˗sü, ˗kɔ ˈö dho kwaa mɛn ˈˈwɛɛ ˗nu kwa ˗bha ˗mlɛɛn ˗gɛn ˗gban ˗a ˈka, ˗kwa kwa ˗zota ˗a ˈgü. (Kodh. 3:14) Pë ˈö˗ ˗wɔn ˈgü ˈkwa˗ ˈˈpiʋ̈ ˈkwa ˈwɔn ˗nu ˈwo ˈˈdhʋ̈ ˗an kë, ˗kwaa ˗bɛnzë ˈsëëdhɛ ˗ta, kö ˈkwa˗ ˗ga zoodhö zoodhö. ˗Kwa ꞊nënŋ mɛn ˗nu ˈwo dho kwa ꞊faanmën ˗an ˗bha. (Prov. 13:20) Mɛn ꞊gban ˈˈpɛpɛ, yi ˈbha ˗nu ˈka ˈwɔn ˗nu kë ˗sü ꞊faan ˈyaa kë kwa ˗gɔ. ꞊Ya kë ˈˈdhʋ̈ kö ˈwɔn ˈö ˈkwa˗ ˗ya kwa ˗zo ˈˈpiʋ̈ ˈkwaa ˗mɔn ˗a kë ˗sü ˗bha ˈnën bhë ˗ee? ˗Abin. ˗A ˈwɔnzuan ꞊nɛn: ˈˈTee ˈˈgbɩɩ˗ ꞊mɔɔn˗ ˗bha ˈö ˈˈyitagɔ ˗blü, ˈö dho ˈö ˗lo ˗a ˈka ˗dhɛ ˈö dho ˗a ˗bha ˗a ˈgü. ˈˈKɛɛ ˗dhɛ ˈbha ˗nu ˈgü, ˈˈtee ˈyaa ʒiö mü ˈˈgbɩɩ˗. ˗Dhɛkpaɔyi ˈbha ˗nu ˈka ˗ʒiaanwo, ˈˈtee ˈyaa ʒiö. ꞊Ya kë ˈˈdhʋ̈ kö ˈˈyitagɔʒiömɛn ꞊dede ˈyaa ꞊mɔɔn˗ ˗bha kö ˗ya ˗blü ˗ee? ˗Abin. ˈKwa ˗mɔn ˗a kë ˗sü ˗bha, kwa zuʋ̈ˈˈ ꞊nii ˗dho ˗da. w23.05 27-28 § 5-8.

ˈKwa˗ ˈwɔn ˗dɔ ꞊dhɛ kwa ˗bha ˗da ˈwɔn ˗nu ˗ʒian ˗ta ˗sü ˈö bhë ˗yö ˗sü kwa ꞊dede kwa ˗bha, kwa ˗dho go kwa ˗bha ꞊sɔnŋ yaa ˗nu ˈgü ˈö ˈkwa kwa ˈˈtakɔ ꞊baa kö ˈkwa ˗dho ˗puö ˗a ˈgü ˈzü. ˈKwa˗ kë ˈˈdhʋ̈, kwa ˗dho ˗bia ˗lö tosɛta kë ˗ʒian ˗ta ˗kplawo. ˈKwa ˗da ˈwɔn yaa ˗ʒian ˗ta, ˈmën ˈkwa dho ˗a kë? ˈKwa ˗dho kwa ˗bha ˈˈtʋ̈ŋ shiʋ̈ˈˈ kö ˈkwa˗ pö kwa ˗de ˗dhɛ ꞊dhɛ kwa˗ ˗kë ˗së ɛɛnˈˈ mɛn ˈˈwɛɛ ˗nu ˈnën ˈwo kwa ˗blü. ˈPë ˈkwa dho ˗a kë ꞊ʒiaan ˈyö ˗tɔ ˗a ˈwɔn dɔ ˗sü ˈö ꞊dhɛ ˈkwa ˈwɔn yaa kë kö ˈkwa ˈto mü ˈkwa pë ˈˈpɛpɛ kë, ˈkwa ˈwɔn ˗së kë. ˈKwa˗ yö ꞊dhɛ kwa ˈwɔn yaa kë, ˗kwa kwa ˗de kë ˈˈtɩtɩ ˈkwa bhɛɛˈˈ Zoova ˗dhɛ kö ˗yö kwa ˗bhawɔn ˈto. (Ps. 25:11; 51:​3, 4) ˗Kwa ˗bhawɔntodhe ˗dhɛ mɛn ˗nu ˈö ˈkwa ˈwɔn yaa ˗kë ˗an ˈka ˗an ˗gɔ. Kwa ꞊mɔɔn˗ ˗bha ˈpö ˈkwa ˗takundhe ˗dhɛ mɛn zii ˗nu ˗gɔ. (Zak. 5:​14, 15) ˗Kwa ˗gleŋ ˈsü ˈwɔn ˗nu ˈwo zë kwa ˗gɔ bhë ˗an ˈgü, ˈkwa pë ˈˈpɛpɛ kë kö ˈkwa ˗dho ˗puö ˗an ˈgü ˈzü. ˈKwa˗ kë ˈˈdhʋ̈, ˗yö kë kwa ˈˈɲaan ꞊dhɛ Zoova ˗dho kwa ˗wëëzë ˈö kwa ˗takun.—Ps. 103:​8-13. w23.08 28-29 § 8-9.

Ʒoadö ˗yö ˗gblüdë Ʒoasö ˗takun kö ˗yö kë mɛn ˗tiaandhö ˈka. ˗A ˗wɔn ˈgü, kö ˗gblüdë ˈö bhë ˗yö ꞊kun wlüünën ˈka, ˗yö ˗kun ˗a ˈˈpiʋ̈ kö ˈö kë Zoova ˗dhɛ ˗së. ˈˈKɛɛ ˈdhɛ Ʒoadö ˗yö ga, Ʒoasö ˗yö ö ˈˈtʋ ˗to ˗gblüdë gbö ˗nu ˈö ˈwo wo ꞊taa yö ˗Zlan ˗bha bhë, ˗an ˗bha. (2 Chron. 24:​4, 17, 18) ˈKö ˗kë ꞊dhɛ ˈwɔn ˈö bhë ˗yö ˗mën Zoova ˈka ꞊dedewo, ˗yö ö «˗wodhiʋ̈lomɛn ˗nu ˗bɔ ˗an ˈˈpiʋ̈ ˗kplawo kö ˗wo ˈˈkan ˈwɔn yaa ˈö ˈˈdhʋ̈ ˗a ˗bha, ˈˈkɛɛ ˈwaa kun wo ˈˈtʋ ˈto ˗ni ˈgü ˗an ˗bha.» Wo ˈti wo ˈˈtʋ ˈto ˗ʒianwo Ʒoadö gbö Zakadhi ˈö kun Zoova ˗wodhiʋ̈lomɛn waa˗ ˗bha ˈˈsaabhomɛn ˈka, ˈö go mü ˈzü ˈö ˗kë Ʒoasö ꞊dhegblü ˈka bhë, ˗a ˗bha. ˗Gblüdë Ʒoasö ˗yö ˗dho ꞊taabha ˈö Zakadhi zë. (2 Chron. 22:11; 24:​19-22) ˗Suʋ̈ Zoova ˗gɔ ˗sü ˈyaa kun Ʒoasö ˗gɔ. Zoova ˗ya ˗pö: «Mɛn ˗nu ˈö n ˗san ˗yö ˗an ˗kë, ˗an ˗san ˗dho n kë ˈpö.» (1 Sam. 2:30) Sidhi ˈˈsɔdha kpö ˈdɛdɛ ˗yö ˗nu Ʒoasö ˗bha «ˈˈsɔdha kpö ꞊va» ˗gɔ, ˈö Ʒoasö ˗yö «˗gi yaa ˈka.» (2 Chron. 24:​24, 25) ˈDhɛ Sidhimɛn ˗nu ˗wo ˗ʒiö, Ʒoasö ˗de ˗bha yökëmɛn ˗nu ˗wa ˗zë, Zakadhi zë ˈö˗ ˈwo bhë ˗a ˗wɔn ˈgü. w23.06 18-19 § 16-17.

Bɔmɛn Pɔdhö ˗yö ˈˈtʋ̈ŋ ˈbha ˗kë ˗zlanwopösü waa mɛn ˗nu ꞊klaŋkësü ˈgü Efɛzö. (Këw. 19:​1, 8-10; 20:​20, 21) ˗A ꞊dhegblü ˗nu ˗dhɔ ˗kun ˗a kë ˗ni ˈgü ꞊dedewo, ˗a ˗wɔn ˈgü ˗yö ˗kun ˗a ˈˈpiʋ̈ kö ˈö ˗an ˗takun ˗wo ˈto ˗klu ˗sü ˈka Zoova ˗bha. Efɛzömɛn ˗nu ˈö Pɔdhö ˗yö ˈsëëdhɛ bɔ ˗an ˗dhɛ bhë ˗wo ˗kun ꞊sua ˗zlanwo ˗bha ꞊dhuëŋ ˗nu ˈka, ˈwo ˈdhaŋ˗ bho düpë ˗nu ˈˈdhiʋ̈. ˗Wo ˗kun ˈˈɲangüyaa ꞊dede kë ˗ni ˈgü ˈö˗ ˈlëë˗ ˈyaa ˗an kë. ˈKɔ ˈˈgblʋ̈gblʋ̈ ˗nu ˈwo kun ˗an ˗gɔ ˈplöö bhë, ˗wo ˗kun ˈˈɲangüyaa ˈˈdoodɔ ˗ni ˈgü mü ˈö ˈwlaan˗ ˗nu ˈwo ˗gban ˈˈɲangüyaa ˗bha ˈwo ˗an ˗kë. (Efɛ. 5:3) Efɛzömɛn ꞊vadhɛ ˗nu ‹ˈwaa kun ˈyiʋ̈˗ ˗wɔn ˈbha ˗zian dɔ ˗ni ˈgü ˈzü.› ˗Wo ˈö bhë ˗a ˗gɛn ˈnën ˗tɔ ꞊dhɛ «pë gbɛ˗ ˈyaa ˈmën ˗an ˈka ˈzü.» (Efɛ. 4:​17-19) Kö ˈwii Zoova ˗bha ˈtɔŋ˗ ˗nu ˈwo ˗gban ˈwɔn yaa waa ˈwɔn ˗së ˗an ˗bha ˗an dɔ ꞊köŋ, Efɛzömɛn ˗nu zuʋ̈ˈˈ ˈyaa kun za dɔ ˗ni ˈgü ˗an ˗bha ˈwɔn yaa ˗nu ˈwo ˗an ˗kë ˗an ˗wɔn ˈgü. Pɔdhö ˗ya ˗pö ꞊dhɛ «˗a ˗nu ˗bha ˈwɔndɔdhe ˗ta ˗yö trö ˗sü ˈka, ˗wo ꞊dhɛ ˗dhɛng ˈdhö ˗tosɛa ˈö ˗gban [˗Zlan] ˗bha bha˗ ˗wɔn ˈgü.» ˈKö ˗kë ˈˈdhʋ̈, Efɛzömɛn ˈbha ˗nu ˈti ˈto ˗dhɛtiidhɛ ˈgü. w24.03 20 § 2, 4; 21 § 5-6.

Ʒedeɔn ˗bhawɔn ˗kun ˈgügbɩɩdhɛ ˗bha kö ˗yö ˈˈdhiʋ̈sü Izraɛdhö ˈka. ˗Dhɛ ˈö ˈko ˗ya Madianmɛn ˗nu ˗bha, ˈö ˈwo ˗ya ꞊duëë ˗sü ˗bha gbeŋ, Ʒedeɔn ˗yö ˗to ˗an ˈˈpiʋ̈ ˈö go ˗a ˈka Ʒezreɛdhö goo ˈgü, ˈö yö˗ ˈka Zuudɛn ga ꞊bhaa. ˗A ˈbha ˗ya kë kö ˗a ˗dhɛ ˗kun ˈˈblü tii ˈgü ˗dhɛ ˈka. (Juges 7:22) Ʒedeɔn ˈˈdhiʋ̈ ˗to Zuudɛn ga ˗bha ˗ee? ˗Abin. ˈKö ˗kë ꞊dhɛ waa ö ˗bha ˈˈsɔdha ˗nu 300 bhë ˗wo ˗kun blɔ ˗sü ˈka, ˗wo ˈˈyi ˗kan ˈö ˈwo to Madianmɛn ˗nu ꞊kee˗ ˈwo dho ˈwo ˈko bhë ˗a ga sü. (Juges 8:​4-12) ˗Yö ˗kë ga ˗sü ˈka Ʒedeɔn ˈgü ꞊dhɛ Zoova ˗dho ꞊faan nu ö ˗dhɛ. Pë ꞊dede ˈö Zoova ˗ya ˗kë ˈyö bhë. (Juges 6:​14, 34) ˈDhɛ ˈˈtʋ̈ŋ ˈbha ˗yö ˗wo, Ʒedeɔn waa ö ˗bha ˈˈsɔdha ˗nu ˗wo Madian ˗gblüdë ꞊plɛ ˈwo kun ꞊ɲɔɔnmɛan ꞊taa ˗an ˗kë ˗bia. (Juges 8:​12, 21) Zoova ˗bha ˗takundhe ˈsaa˗ ˈgü, ˗wo ˗gblüdë ˗nu ˈwo bhë ˗an ˗kun, ˈö ˗gblü ˗yö dhi ˗an ˗gɔ. Mɛn zii ˗nu ꞊mɔɔn˗ ˗bha ˈwo wo ˗zoyö Zoova ‹ˈö˗ ˈgü ˈyaa ga toŋtoŋdhö bhë ˗a ˗dhɛ.› ˗An ˗bhawɔn ˗ya yö ꞊faan ˗bha, Zoova ˗dho ˗a nu ˗an ˗dhɛ.—Is. 40:​28, 29. w23.06 6 § 14; 7 § 16.

˗Zogbinŋdhɛ ꞊mɔɔn˗ ˗bha ˈö ˗kë kwa ˗gɔ ˈwɔn ˈˈgbɩɩ˗ suu ˈˈpɛpɛ ˈö nu kwa ˗ta, ˗a ˈgü.ˈDhɛ ˈˈdhʋ̈, ˗kwa ˈdhaŋ˗ bho Zoova ˈˈdhiʋ̈. ˈDhɛ Badhakö ˗yö ˈdhaŋ˗ bho Zoova ˈˈdhiʋ̈ ꞊kwɛŋzü, ˗kɔ ˈö ˈwɔn ˗nu ˗wo dhi ˗a ˈka ˗a ˗gɔ ˗kwaa ˗ga. ˈKö ˗kë ꞊dhɛ ˈwaa kun baasü ˈka ˗gblü ˗bha, ˈö ˗gblü ˗gɔn ˗a ˈka ꞊kwɛɛ˗ ˗nu ˈwaa kun ˗an ˗gɔ, Zoova ˗ya ˗pö Badhakö ˗dhɛ ꞊dhɛ ˗wo ˈdho kö ˗wo ˗gblü ˗da Sizedha waa˗ ˗bha ˈˈsɔdha ˗nu ˈwo kun baasü ˈka bhë, ˗an ˗ta. (Juges 5:8) ˗Zlan ˗wodhiʋ̈lodhe Debodha ˗ya ˗pö Badhakö ˗dhɛ ꞊dhɛ ˗wo ˈgo ˗tɔn ˗nu ꞊troo kö ˗wo ˈdho Sizedha waa ö ˗bha ˗gblü ˗gɔn ˗a ˈka ˗gɔ 900 ˗an ˗gɔ ˗dhɛ ˗kpɛikpɛdhɛ ˈgü. ˗Gblü ˗gɔn ˗dhɛ ˗kpɛikpɛ ˈgü ˗sü ˗dho kë Izraɛdhömɛn ˗nu ˗gɔ ˈˈgbɩɩ˗ ꞊dedewo, ˈyö sü ꞊dhɛ ˗an ˈyɔɔ˗ ˗nu ˗bha gɔ ˗nu ˈwo ˗bialö ˈgbɛ. ˈKö ˗kë ˈˈdhʋ̈, Badhakö ˗yö ˈwɔn ˗man Zoova ˗ta. ˈDhɛ Izraɛdhö ˈˈsɔdha ˗nu ˈdhö yɔɔˈˈ ˗ni ˈgü Tabɔ ˗tɔn ˗bha, Zoova ˗yö dha ˈkpii˗ do ˗ban ˈö Sizedha ˗bha gɔ ˗nu ˗wo ꞊nënŋ böö˗ ˈgü. Zoova ˗ya ˗kë ˈö Badhakö ˗yö to ˗a ˈˈgbɩɩ˗ ˈka. (Juges 4:​1-7, 10, 13-16) ˗Kɔ do bhë ˗a ˈka, ˈkwa ˈdhaŋ˗ bho Zoova ˈˈdhiʋ̈, ˈkwa ˈto ˗a ˗bha ˗kɔlokota ˗bha ˗dhioo ˈnu ˈˈpiʋ̈, kwa ˗dho ˈto ˗a ˈˈgbɩɩ˗ ˈka. w23.07 18˗19 § 17-18.

ˈKwa˗ pö ˗tosɛta ˈö ˈyaa ɲën ˈkwa˗ ꞊slɔɔ, kwa dua ˗mü kö ˈkwa kwa zuʋ̈ˈˈ kë ˗saa. ꞊Dhɛ Zoova ˗dhɔkëmɛn ˗nu ˈwo kun ˗klu ˗sü ˈka ˗a ˗bha ꞊kwɛŋzü ˗an ˈdhö, kwa dua ˗mü ˈpö ˈkwa kwa zuʋ̈ˈˈ kë ˗saa kö ˈkwa kwa ˈˈɲan ˈto pë ˗nu ˈö Zoova ˗yö ˗an ˈˈplüün bho, ˗an ˗gɔ. (Ebl. 6:​11, 12) Biblö ˗yö kwa ˗zɔn ˈkeekëmɛn ˈka. (Zak. 5:​7, 8) ˈKeekëmɛn ˗yö ö ˈgü ˗dɔ ˈˈgbɩɩ˗ ˈö pë ta, ˈö ˈˈyi ˗lo ˗a ˗ta. ˈˈKɛɛ ˈˈtʋ̈ŋ ꞊dede ˈö ˗tapë dho ˈˈgla ˗a ˈka, ˈyaa˗ dɔ. ˗A ˗wɔn ˈgü, ˗a dua ˗mü kö ˗yö ö zuʋ̈ˈˈ kë ˗saa ˗yö ˗dhɛ ˈˈdhiʋ̈ ˈˈgan kö ˗yö ꞊kun ˗a ga ɛɛnˈˈ ˗a bhɛ bho. ˗Kɔ do ˈö bhë ˗a ˈka ˈkö ˗kë ꞊dhɛ ‹yi ˈö kwa Dëmɛ Yesu dho nu ˗a ˈka ˈkwaa˗ dɔ›, kwa kwa ˈgü ˗dɔ ˈˈgbɩɩ ˈkwa Zoova ˗bha yökë. (Mat. 24:42) Kwa kwa zuʋ̈ˈˈ ˗kë ˗saa ˈö ˈkwa Zoova ˈˈdhiʋ̈ ˈˈgan kö pë ˗nu ˈö ˗an ˈˈplüün bho ˗yö ˗an kë. ˈKwii kwa zuʋ̈ˈˈ kë ˗saa, kwa ˈgü ˗dho ga ˈö ˈkwa ˗kan Zoova ˗bha ˈˈdhiʋ̈ ˈˈdhiʋ̈. Ɛɛnˈˈ ˈkwa ˗ya ˈzü pë ˗nu ˈwo dho zuʋ̈ˈˈ ˈˈgblü dhi ˈö ˈyaa ꞊gwëë ˗a nu mɛn ˗dhɛ, ˗an mɛɛnˈˈ ˗sü ˗bha. ˈˈKɛɛ ˈkwa kwa zuʋ̈ˈˈ kë ˗saa, kwa ˗dho ˗mɔn ˈwɔn ˈˈgbɩɩ˗ ˗nu bun ˗sü ˗bha ˈö dho ˈö yö˗ ˈka ˗a ˈˈdhiʋ̈todhɛ ˗bha, ˈö ˈkwa dha.—Mich. 7:7. w23.08 22 § 7.

ˈWɔn ˈö Daniɛdhö ˗ya ꞊blɛɛ Daniel 2:​41-43 ˈgü bhë waa˗ ˈˈwɛɛ ˈbha ˗nu ˈwo Daniel ˈsëëdhɛ ˗be waa ˗Dhɛkpaɔ dhiaˈˈ ˈsëëdhɛ ˗be ˈgü, ˈkwa ˗an dan ˈˈkwöö, kwa˗ ˗yö ꞊dhɛ ˗wo ˗wɩ Angletɛɛ waa Amedhikö ˈwo ˈˈkpɔnŋtaadhɛ ꞊kɔɔn ˗ni ˈgü ꞊dɛɛ ˗an ˈka. Daniɛdhö ˗ya ˗pö: «˗An ˈgü ˗dho kë ˈˈgbɩɩ˗ ˈwɔn ˈbha ˈgü, ˈwo ˗kë ˈpö ˈtëëtë ˈwɔn ˈˈwɛɛ ˈbha ˈgü.» ˗Mën ˈö ˗an ˗kë ˈtëëtë? Pë ˈö ˗an ˗kë ˈtëëtë ˈyö ˗tɔ ˈwaa ꞊mɔɔn˗ ˗bha kö ˗wo wo ˗bha ˈgügbɩɩdhɛ kë wo ˗bha ˈˈsɛgümɛn ˗nu ˗ta ˈˈƝɛɛn ˈö Daniɛdhö ˗ya ˈklɔɔ˗ pö bhë, kwa ꞊mɔɔn˗ ˗bha ˈkwa gagade ˗wɔngbɩɩsü ꞊va ꞊draan ˗a ˗bha. ˗A ˗blɛɛsü ˈnën ˗tɔ Amedhikö waa Angletɛɛ ˈwo ˈˈkpɔnŋtaadhɛ ꞊kɔɔn ˗ni ˈgü bhë, ꞊waa˗ ˗zɔn ˈko ˗ta ꞊va ꞊dhɛ wo ˈgü ˗yö ˈˈgbɩɩ˗. ˗A ˈwɔnzuan ˈnën ˗tɔ ˗wo ˗kun mɛn ˗nu ˈwo ˈˈkpɔnŋ ꞊taa ˗gblü ˈˈgblʋ̈gblʋ̈ ꞊plɛ ga sü ˗an ˈˈpiʋ̈. ˈˈKɛɛ ˈkö ˗kë ˈˈdhʋ̈ ˗wo ˈtëëtë, ˈyö ˗sü ꞊dhɛ ˗an ˗bha ˈˈsɛgümɛn ˗nu ˈwaa wo ˈko ˗wo ˈgüman. ˗A ꞊plɛ ˗bha ˗naan ˈnën ˗tɔ ˗wo ˗dho ˈˈkpɔnŋtaadhɛ ꞊kɔɔn kö ˗yö yö ˗a ˈka ˗Zlan ˗bha ˗Gblüdëdhɛ ˗bha nu ˗sü kö ˗yö mɛnbhɩɩdhe ˗nu ˗bha ˗gblüdëdhɛ bho ˈˈshia˗, ˗a ˗bha. w23.08 11 § 12-13.

ˈˈTʋ̈ŋ ˈbha ˗nu ˈka, Davi ˗yö ˗kë ö ˗de ˈgü ˈya˗ ˈwɔn ˈˈgbɩɩ˗ ˗nu waa ˈgüdandhe ˗nu ˈwo nu ˗a ˗ta, ˗an ˗wɔn ˈgü. (Ps. 18:​4, 5) ˈˈKɛɛ Zoova ˗bha ˗dhɔ ꞊dede waa˗ ˗bha ö ˗zokë ˗a ˈˈpiʋ̈ ˗sü ˗yö Davi zuʋ̈ˈˈ ˗kë ˗saa. Zoova ˗yö ö ˈˈtɔŋdë ˈö zuʋ̈ˈˈ ˈˈdhiʋ̈ kun ˈˈtɛ ˗ni ˈgü ˈˈdhʋ̈ ˗a ˗sü ˈö dho ˗a ˈka ˗dhɛ ˈö «blëëdhɛ ˗nu» waa «ˈˈyi ˗nu ˈwo mü ꞊va ˗an ˈgü.» ˗A ˗wɔn ˈgü, Davi ˗yö ꞊faan ꞊slɔɔ ˈzü ˈö Zoova ˗dhɔkë zuʋ̈gblüdhi ˈka. (Ps. 18:​28-32; 23:2) ˗Kɔ do ˈö bhë ˗a ˈka ꞊dɛɛ «Zoova ˗bha ˗dhɔ ꞊dede ˈsaa˗ ˈgü, ˈyö kwa suu ˈti ˈgo ˈˈshia ꞊köŋ.» (Lam. 3:22; Kodh. 1:11) ˗Ya kë ꞊shiöŋ Davi ˗bha ˗tosɛta ˗yö ˗dɔ ga ˗yɛ ˈˈdhiʋ̈, ˈö˗ ˈyɔɔ˗ ˗nu ˗wo kë ꞊va. ˈKö ˗kë ˈˈdhʋ̈ Zoova ˗bha ˗dhɔ ˗ya ˗kë ˈö Davi ˗yö ˗kë ö ˗de ˈgü ˗së, ˈö˗ yö ꞊dhɛ Zoova ˗yö ö ˗takpa. Davi ˗ya ˈwɔn ˗dɔ ˈzü ꞊dhɛ Zoova ˗kun ö ˈˈpiʋ̈ ˈwɔn ꞊gban ˈgü. ˗A ˗wɔn ˈgü, ˗ya ˗zogban. ˗Yö ˈˈtan ˗bho ˈö˗ pö: «[Zoova] ˗yö ˗nu n ˗dhɛ n ˗man ˈˈsuʋ̈wɔn ˈˈpɛpɛ ˈgü.» (Ps. 34:4) ˗A ˗dhɛ ˗mü kö ˈˈsuʋ̈ ˗yö Davi kë, ˈˈkɛɛ Zoova ˗bha ˗dhɔ ˈsaa˗ ˈgü ˈˈsuʋ̈ ˗yö ˗go ˗a ˗ta. w24.01 30 § 15-17.

˗Kwa ˗gleŋ ˈsü ˈwɔn yaa ˗nu ˈö Ʒoasö ˗da ˗an ˗ʒian ˗ta, ˗an ˈgü. ˈDhɛ ˈˈsaabhomɛn ˈkpii˗ Ʒoadö ˗yö ga, Ʒoasö ˗yö ˈˈtɔŋdhɛ ˗kun mɛn yaa ˗nu ˈka. (2 Chron. 24:​17, 18) ˗Yö ö ˈˈtʋ ˗to ˗gblüdë gbö ˗nu ˈwo kun Zuda ˈö Zoova ˗dhɔ ˈyaa ˗an kë, ˗an ˗bha. ˈYaa za ˈgü ꞊dhɛ ka ˗dho ˗a pö ꞊dhɛ ˗a dua ˈyaa ˗mü kö ˗yö ˈˈtɔŋdhɛ ˈkun ˗an ˈka. ˈˈKɛɛ pë ˈö˗ ˗kë ˈyö ˗tɔ ö ˈˈtʋ ˗to ˗an ˗bha ˗dhioo yaa ˗nu ˗bha ˗sü. ˗A ˗de ˗ʒiaan ˗dhɛ ˈö˗ ꞊dhegblü Zakadhi ˗ya ˈˈslö ꞊mɛɛn kö ˈö˗ dɔɔˈˈ, Ʒoasö ˗ya ˗zë. (2 Chron. 24:​20, 21; Mat. 23:35) ˗Yö ˗kun ˈwɔn yaa ꞊dedewo ˈka! Ʒoasö ˗yö ö ˗bha ˗tosɛta zübho ˗së ˈka. ˈˈKɛɛ ꞊taabha ˗yö ˗dho ˈö ˗gban ˗Zlan -gɔ, ˈö ˗kë mɛnzëmɛn ˈka. ˗A ˈˈdhiʋ̈todhɛ ˈgü, ˗a ˗de ˗bha yökëmɛn -nu ˗wa ˗zë ˈpö. (2 Chron. 24:​22-25) ꞊Ya kë ꞊dhɛ ˗yö ö ˈˈtʋ ˗to Zoova waa ö ˗dhɔkëmɛn ˗nu ˗bha ˗be, ˗a ˗bha ˗tosɛta ˈˈdhiʋ̈ ˗dho ˈto ˗së. w23.09 9 § 6.

Yesu ˗ya ˗yö ꞊dhɛ bɔmɛn Piɛdhö ꞊mɔɔn˗ ˗bha kö ˗yö ˈto ˗klu ˗sü ˈka ˗Zlan ˗bha. ˗A ˗wɔn ˈgü, ˗ya ˗pö Piɛdhö ˗dhɛ: «ˈˈSuʋ̈ ˈya ˈdho i kë.» Yesu ˗bha ˈdhaŋ˗ ˗bho ˗a ˈˈdhiʋ̈ ˗sü ˗yö Piɛdhö ˗bha ˗tosɛta ˗bho ˈˈgblʋʋ. Piɛdhö waa ö ꞊dhegblü Andre ˗wo ˗kan ˈˈyiblükësü ˗bha ˈwo ˗ʒiö Yesu ˈˈpiʋ̈ ˈˈtʋ̈ŋ ꞊gban ˈka. Zoova ˗yö ˈdhuëë˗ ꞊va ˗kpɔ ˗an ˗bha. (Mak. 1:​16-18) Piɛdhö ˗bha ˗kë Yesu ˗bha gwëëˈˈ ˈka ˗sü ˗wɔn ˈgü, ˈwɔn ˗së ꞊va ꞊dede ˗kë ˗a ˗dhɛ. ˈDhɛ Yesu ˗yö mɛn ˗nu ˗dhɛ bo, ˈö ˗zuu yaa ˗nu bho mɛn ˗nu ˈgü, ˈö mɛn bho ga ˈgü ˗ʒiaanwo Piɛdhö ˗yö ˗kpan ˗a ˗bha. (Mat. 8:​14-17; Mak. 5:​37, 41, 42) ˗A ˈˈɲan ˈgü ˗da ˈö ˗kpan Yesu ˗bha kö ˗ya kë ˗Gblüdë ˈka ˗Zlan ˗bha ˗Gblüdëdhɛ ˗gɔ ˈˈdhiʋ̈. ˗Yö ˗pa ˗a ˈka ꞊dedewo. (Mak. 9:​1-8; 2 Piɛ. 1:​16-18) Piɛdhö ˗yö ˗kpan pë ˗nu ˈö ˗yö ˈti kë Yesu ˈˈpiʋ̈ ˗bë ˈö ˈti ˗dho ˗kpan ˗an ˗bha toŋtoŋdhö bhë, ˗an ˗bha. ˗A zuʋ̈ˈˈ ˈˈgblü ˗kun dhi ˗sü ˈka ꞊dedewo ˈyö sü ꞊dhɛ ˗yö ˗to ˗a ˈˈgbɩɩ˗ ˈka ˗zotakɔ yaa ˗nu ˗ta ˈö ˈdhuëë˗ ꞊va ꞊slɔɔ. w23.09 21 § 4-5.

Bɔmɛn Piɛdhö ˗ya ˗pö ö ˗bha ˈsëëdhɛ ˗blɛɛsü ˈgü ꞊dhɛ ‹ka ˗dhɔ ˗yö ka ˈko kë ꞊dedewo.› ˗Dhɔ suu ˈö bhë ˈwɔn yaa ˈdɛdɛ ˈyaa ˈnën ˗bhawɔn to, ˈˈkɛɛ «ˈwɔn yaa ˈgbɛ ꞊dede» ˗mü. (1 Piɛ. 4:8) ˗A ˈbha ˗ya kë kö Piɛdhö ˗zo ˗yö ˗bo mɛn ˗bhawɔn ˈto ˗sü ˗gleŋ ˈö Yesu ˗ya ˗da ˗a ˗bha ˈö˗ ˗kwɛ ˗ya kë ꞊va, ˗a ˈka. ˈˈTʋ̈ŋ ˈö ˈˈdhʋ̈ ˗a ˈka, Piɛdhö ˗ya ˗ga ˗be ꞊dhɛ mɛn ˗bhawɔn ˈto ˗sü ˈö «˗gɛnɲaan ˈka ˈˈsɔɔplɛ» bhë, ˈnën ˗tɔ ˈwɔn ˗së ꞊dede. ˈˈKɛɛ, Yesu ˗ya ˗pö ˗a ˗dhɛ ꞊dhɛ ˗a dua ˗mü kö ˗yö mɛn ˗nu ˗bhawɔn ˈto «˗gɛnɲaan ˈka ˗kɔŋ ˈˈsɔɔplɛ ö ga ˈˈsɔɔplɛ (77).» ˗Yö ˗kun ˗a ˈˈpiʋ̈ kö ˈö˗ pö ꞊dhɛ ˗yö mɛn ˗nu ˗bhawɔn ˈto ꞊kplawo. ˗Wo ˈö bhë ˗yö ˗gban kwa ˗bha ˈpö. (Mat. 18:21) ˗A kë ˗sü ˗ya kë ka ˗kɔa ˈˈgbɩɩ˗, ka ˈgü ˈya ˗dho ga. ˈWɔn yaa kë ˗dhii ˗yö mɛn ˈˈpɛpɛ kwa ˗bha. ˗A ˗wɔn ˈgü, mɛn ˗bhawɔn ˈto ˗sü ˈyaa ˈˈplëëplë. ˗A ˗dhɛ ˈö ˗wɔn ˈdhö ˈˈgbɩɩ˗ ꞊dɛɛ ˈyö ˗tɔ kwa dua ˗mü ˈkwa pë ˈˈpɛpɛ kë kö ˈkwa kwa ꞊dhegblü ˗nu ˗bhawɔn ˈto, ˈkwa dhi kwa ˈko ˗dhɛ. w23.09 29 § 12.

Kö Ʒonasö ˗yö ˈyuö˗ ˈˈgblüŋ, ˗yö ˗kun ga ˗sü ˈka ˗a ˈgü ꞊dhɛ ˈya ö ˗de kë ˈˈtɩtɩ ˈya ˈgo ö ˗bha ꞊sɔnŋ yaa ˈgü ˈya bhɛɛˈˈ, Zoova ˗dho ö ˈˈtʋ ˈto ö ˗bha ˈö ö ˗takun. ꞊Taabha, ˗yö ˗wɩ yö ˈö Zoova ˗ya dɔ ˗a ˗kɔ ˈka bhë ˗a kë ˗sü ˗bha. (Jon. 2:10–3:4) ˈWɔn ˈˈgbɩɩ˗ ˗nu ˗wa nu kwa ˗ta, kwa zuʋ̈ˈˈ ˈˈdhiʋ̈ ˗yö ˗tɛ ˈö ˈpë ˈkwa dho ˗a pö kwa ˗bha bhɛɛwo ˈgü, ˈkwaa˗ dɔ ˗ee? Ɛɛnˈˈ kwa ˈgü ˗yö ˗ga Biblö ˗draan kwa ˗de ˈˈpiʋ̈ ˗sü ˈka ˗ee? ˗Yö kë kwa ˈˈɲaan ꞊dhɛ ˈwɔn ˈö kwa ˗ta, Zoova ˗ya ˗dɔ ˗së ˈka. ˈDhɛ ˈˈdhʋ̈, ˈkö ˗kë ꞊dhɛ pë ˗bhaasü ˈnën ˈkwa˗ ˗dhɛ ˗a ˗gɔ bhɛɛwo ˈgü, ˗yö ga kwa ˈgü ꞊dhɛ ˗yö ˗dho pë ꞊dede ˈö kwa ˗bhawɔn ˈdhö˗ ˗bha ˗a nu kwa ˗dhɛ. (Efɛ. 3:20) ˈˈYua ˗yö kwa kë ˗ni ˈgü, kwa ˈgü ˗ya ga ɛɛnˈˈ ˈzü zuʋ̈dhiʋ̈tɛ ˗ya kë kwa ˗bha, Biblö draanˈˈ ˗sü ˗kë kwa ˗kɔa ˈˈgbɩɩ˗. ˗Ya kë ˈˈdhʋ̈, kwa ꞊mɔɔn˗ ˗bha ˈkwa kwa ˈˈtʋ to Biblö ɛɛnˈˈ kwa ˗bha ˈsëëdhɛ ˗nu ˗bha ˈˈtʋtobhapë ˈgü. Kwa ꞊mɔɔn˗ ˗bha ˈzü ˈkwa kwa ˈˈtʋ to kwa ˗bha ˈˈtan ˗nu ˗bha ɛɛnˈˈ ˈkwa kwa ˗bha video ˗nu ˈwo jw.org ˗ta ˗an ˗ga. ˈKwa bhɛɛˈˈ Zoova ˗dhɛ, ˈkwa pë ˗nu mɛɛnˈˈ Biblö waa kwa ˗bha ˈsëëdhɛ ˗nu ˈgü, Zoova ˗dho ꞊faan nu kwa ˗dhɛ. w23.10 13 § 6; 14 § 9.

˗Zlan ˗dhɔkë ˗a ˈgü sɔ ˈkɔ waa ˗Zlan ˗dhɔkëgükɔ ˗nu ˈwo ˗an dɔ ꞊taabha Zedhizadhɛmö bhë, ˗wo ˗bhɔ wo ˈkwëë˗. ˗An ˈgüdhɛ ˗kun ˈˈpɛ ˗sü ˈka ˈkoo ꞊plɛ. ˗A ˈˈpian do ˗kun ‹˗dhɛ ˈˈslʋ̈ʋ̈slʋ̈› ˈka, ˈö˗ ˈˈpian do kun ‹˗dhɛ ˈö ˈˈslʋ̈ʋ̈slʋ̈ ꞊dedewo› ˗a ˈka. Sɔ ˈˈpɛn ꞊gblɛɛn ˗kun ˗an ꞊zinŋgü. (Ebl. 9:​2-5; Ex. 26:​31-33) ˗A ˗dhɛ ˈˈslʋ̈ʋ̈slʋ̈ ˈgü, ˗dhaŋba ˗dɔtapë ˈö ˈˈsënŋ ˈka, ˈˈsaabhotapë ˈwo ansansö ˗gʋ ˗a ˗ta waa tablö ˈwo ˈbluu˗ ˗nu ˗lo ˗a ˗ta ˗wo ˗kun mü. «ˈˈSaabhomɛn ˗nu ˈwo ˈˈɲɔn ˗a ꞊troo ˗nu» ˈka bhë, wo dosɛnŋ ˈnën ˗an dua ˈdhö ˗mü kö ˗wo yökë mü. (Nomb. 3:​3, 7, 10) ˗A ˗dhɛ ˈö ˈˈslʋ̈ʋ̈slʋ̈ ꞊dedewo ˗a ˈgü, ˗mlɛɛn ꞊gbëë ˈö ˈˈsënŋ ˈka ˈö˗ ˗zɔn ꞊dhɛ Zoova ˗yö ˗dhɛ ˈö bhë ˗a ˈgü, ˗yö ˗kun mü. (Ex. 25:​21, 22) ˈˈSaabhomɛn ˈkpii˗ dosɛnŋ ˈnën ꞊mɔɔn˗ ˗bha kö ˗yö ʒiö sɔ ˈˈpɛn ˗ta, ˗yö ˗da ˗dhɛ ˈö ˈˈslʋ̈ʋ̈slʋ̈ ꞊dedewo ˗a ˈgü ˗gɛnɲan ˈka do ˗kwɛ ˗bha, mɛn ˗nu ˗bhawɔn ˈto ˗yi ˈka. (Lév. 16:​2, 17) ˗Yö ˗da ˗dhɛ ˈö bhë ˗a ˈgü wü ˗nu ꞊ɲɔɔn ˈka, kë ˈˈdhʋ̈ kö Zoova ˗yö waa ˈˈsɛgümɛn ˗todhʋ̈sü wo ˗bha ˈwɔn yaa ˗nu ˗bhawɔn ˈto. Zoova ˗bɔ ˗a ˗ta kö pë ˗nu ˈwo kun ˗Zlan ˗dhɔkë ˗a ˈgü sɔ ˈkɔ ˈgü ˈö ˗an ˈgü ˈˈpʋ kwa ˗dhɛ ˗së ˈka.—Ebl. 9:​6, 7. w23.10 27 § 12.

ˈTɔŋ˗ ˈö ˗kë ‹kwa ˗dhɔ ˗yö kwa ˈko kë› ˈka bhë, kwa˗ ˗yö ˗Zlan ˈˈDhiwo ˈgü ˗gɛnɲan ˈka ꞊va. (Zan 15:12; Wlɔ. 13:8; 1 Tes. 4:9; 1 Piɛ. 1:22; 1 Zn. 4:11) ˈˈKɛɛ ˗dhɔ ˗yö ˈˈklʋʋsë ˈö kwa zuʋ̈ˈˈ ˈgü, ˈö mɛnbhɩɩdhe ˗nu ˈwaa ꞊mɔɔn˗ ˗bha kö ˗wo ˗kpan ˗a ˗bha ˗a ˈka. ˈDhɛ ˈˈdhʋ̈, kwa ˗dho kwa ˗bha ˗dhɔ ˗zɔn kwa ꞊dhegblü ˗nu ˗dhɛ ˗kɔ ˗kë ꞊dhɛ? Kwa ˗dho ˗a kë ˈˈdhʋ̈ kwa ˈˈdhiwo waa kwa këwɔn ˗nu ˈgü. Kwa ꞊mɔɔn˗ ˗bha ˈkwa ˗dhɔ ˗zɔn kwa ꞊dhegblü ˗nu ˗dhɛ ˗kɔ ꞊va ˗ta. ˗A ˈwɔnzuan ˈbha ˗nu ꞊nɛn: «˗Ka gagade pö ˈka ˈko ˗nu ˗dhɛ.» (Zach. 8:16) «[˗]Ka ˗tosiadhe kë ka ˈko ˗nu ziën ꞊zuöyagluu ˈka.» (Mak. 9:​50, NTBL) «Ka ˈko ꞊bhlëë -ya ˗sü -pɛng -yö dɔ ka -ta.» (Wlɔ. 12:10) «˗Ka ka ˗kɔ ˈkpɔ ka ˈko ˗nu ˗gɔ.» (Wlɔ. 15:​7, NBTL) «˗Ka ka ˈko ˗nu ˗mawɔn ˈto.» (Kodh. 3:13) «ˈWɔn ˈˈpɛpɛ ˈö yaa˗ ˗da ka ˗ta, ˗ka ka ˈko ˗nu ˗ta ˈkun˗ ˈgü.» (Ga. 6:2) «˗Ka ka ˈko ˗nu ˗zʋ ˗gban.» (1 Tes. 4:18) «[˗]Ka ka ˈko ˗nu faan dɔ yi ꞊gban ˈka.» (1 Tes. 5:11) «[˗]Ka ka ˈko ˗nu ˈˈdhiʋ̈ bhɛaˈˈ wo [˗Zlan] ˗dhɛ.»—Zak. 5:16. w23.11 9 § 7-8.

Yi ˈˈpɛpɛ ˈka, ˈwɔn ˗nu ˈö kwa ˗bhawɔn ˈdhö ˗zoyödhe ꞊dede ˗bha ˗an ˈgü, kwa ˗da ˗an ˗ʒian ˗ta. ˗A ˈbha ˗nu ˈnën ˈwo ˗tɔ kwa ˗nënŋ ˗an ˗bha ˗mɛn ˗nu, kwa ˗bha trʋʋˈˈ ˗nu, ꞊klaŋ ˈkwa ˗dho ˗a kë, ˈwɔn ˈö ˗gban dhe waa ö ꞊gɔɔn ɛɛnˈˈ ˈnën ˗nu ˗bha waa kwa ˗bha yö ˗wɔn ˗nu. ˗Kwa kwa ˗de dhɛɛˈˈ ˈkpɔ, ˈkwa˗ pö: «Pë ˗nu ˈa n ˗kɔ ˗yɛ ˗an ˗bha ˗wa ˗zɔn ꞊dhɛ ˗yö ga ˗sü ˈka n ˈgü ꞊dhɛ ˈˈkpɔnŋtaadhɛ ˈö yö, ˗a yi ˈyaa ꞊gblɛɛn ˈzü kö ˗Zlan ˗ya kë ꞊bhɔɔ ˈˈsɛ ˈka ˗ee? Ɛɛnˈˈ ˗wa ˗zɔn ꞊ʒiaan ꞊dhɛ mɛn ˗nu ˈwo˗ pö ꞊dhɛ ga ˈnën ˗tɔ pë ꞊gban ˈˈdhiʋ̈todhɛ bhë, yaa˗ ˗nu yi ˗bha ˈwɔn yö ˗kɔ ˗yö do ˗ee?» (Mat. 6: 19, 20; Dhu. 12:​16-21) ˈKwa kwa ˗bha ˗zoyö ꞊bhɔɔ ˈˈsɛ ˗dhɛ ˗sü ˗gɛn ˗gban ꞊dedewo, ˗ya ga kwa ˈgü ꞊dhɛ ˗a nu ˗yi ˗ya ˈto ꞊klöö˗ kwa ˗dho ˗da ˈwɔn ˗së ˗nu ˗ʒian ˗ta. ˈWɔn ˈˈgbɩɩ˗ ˗nu ˗wa nu kwa ˗ta, kwa ˗bhawɔn ˗yö ˈpö ˗zoyödhe ꞊dede ˗bha. Pë ˗nu ˈwo ˗kë ꞊dhɛ ˈˈklʋʋbhɔdhe, ˈˈyua ˈˈgbɩɩ˗ ɛɛnˈˈ ˈwɔn ˈˈgbɩɩ˗ ˈbha ˗nu ˈdhö bhë ˗wo ꞊mɔɔn˗ ˗bha ˈwo kwa ˈgü ga. ˗A ˈbha ˗ya kë, ˗a züdɔdhɛ ˈgü, kwa ˗dho pë ˈˈpɛpɛ kë kö ˈkwa ˗an ˈkun kwa ˗bha. ˈˈKɛɛ ˈˈtʋ̈ŋ ˈbha ˗nu ˈka, ˗wo ꞊gwëë kwa ˗bha. ˗A ˗wɔn ˈgü, kwa ˗bhawɔn ˗yö ˗zoyödhe ꞊dede ˗bha kö ˈkwa ˈto ˗an ˈgü, ˈkwa Zoova ˗dhɔkë zuʋ̈gblüdhi ˈka ˗kplawo.—1 Piɛ. 1:​6, 7. w23.04 27 § 4-5.

Zoova ˗ya ˈˈpiʋ̈ kö ˈkwa kwa këwɔn ˗nu ˗bɛ kwa ˗bha bhɛɛwo ˗nu ˗bha. ˗A ˈwɔnzuan ˈnën ˗tɔ kwa ꞊dhegblü do ꞊mɔɔn˗ ˗bha ˈö ˗takundhe ˗dhɛ Zoova ˗gɔ kö ö ˗gɔmɛn ˗yö ˗dhɛkpaɔyi nu ö ˗dhɛ ˈö ˈdho kwa ˗bha ˗bhɔkwëë ˈkpii˗ ˗ta. Zoova ꞊mɔɔn˗ ˗bha ˈö˗ ˗bha bhɛɛwo ˗daakë ˗kɔ ˗kë ꞊dhɛ? ˗Yö ꞊mɔɔn˗ ˗bha kö ꞊faan ˈö˗ ˗bhawɔn ˈdhö˗ ˗bha, ˗ya nu ˗a ˗dhɛ kö ˗yö ꞊ɲɔɔn ö ˗gɔmɛn ˗bha. ˈˈKɛɛ kwa ꞊dhegblü ꞊dede ˈnën dho ˗a blɛɛˈˈ ö ˗gɔmɛn ˗dhɛ. ˗A ˈbha ˗ya kë, ˗yö ˗dho dho ˗a ˈˈpiʋ̈ ˗gɛnɲan ˈka ꞊va. ˗Yö ꞊mɔɔn˗ ˗bha ˈö yökë ö yökëyɔɔ do ꞊ʒiaan ˈgü yi ˈˈwɛɛ ˈka,ˈö ˈwii dho ˗a ꞊saabho. Zoova ˗ya ˈˈpiʋ̈ kö kwa bhɛɛˈˈ ˗kplawo ˈwɔn ˗nu ˈwo kwa ˗kaanbho ˗an ˗wɔn ˈgü. Yesu ˗ya ˗pö ꞊dhɛ ˈˈtʋ̈ŋ ˈbha ˗nu ˈka, ˈkwa bhɛɛˈˈ pë ˈbha ˗wɔn ˈgü, kwa ˈti ˗dho ˈto mü ˈkwa˗ ꞊slɔɔ. (Dhu. 11:9) ˈDhɛ ˈˈdhʋ̈, kwa ˗kɔ ˈya ˗dho ꞊zɔɔ˗. ˗Kwa bhɛɛˈˈ kwa ꞊faan ˈka ˗kplawo. (Dhu. 18:​1-7) ˈKwa˗ kë ˈˈdhʋ̈, kö kwa ˗zɔn ˗ni ˈgü Zoova ˗dhɛ ꞊dhɛ ˗a ˗pë ˈwɔn ˗yö kwa ˗gɔ ˈˈgbɩɩ˗, ˈö ga ˗sü ˈka kwa ˈgü ˈzü ꞊dhɛ ˗a ˗kɔ ˗mɔn ˗a ˗bha kö ˗yö kwa ˗takun. w23.11 22 § 10-11.

Zoova ˗ya ˗pö ö ˈˈtɔŋdë Ablaamö ˗dhɛ ꞊dhɛ ö ˗dho bɔ ˗a suugünën do ˗ta kö ˈˈsɛgɔ ˈˈpɛpɛ ˈwo ˈˈkpɔnŋ ꞊taa ˈö ˈdhuëë˗ ˈkpɔ ˗an ˗bha. (ˈWun. 15:5; 22:18) ˈDhɛ ˗kë ꞊dhɛ ˗zoyödhe ꞊dede ˗kun Ablaamö ˗gɔ bhë, ˗yö ˗kun ga ˗sü ˈka ˗a ˈgü ꞊dhɛ pë ˈö Zoova ˗ya ˈˈplüün bho ˈˈdhʋ̈, ˗yö ˗dho ˗a kë. ˈˈKɛɛ ˈkö ˗kë ˈˈdhʋ̈, Ablaamö ˗kwɛ ˗yö ˗kë 100, ˈö˗ ˗bha dhebɔ ˗bha ˗kë 90 kö ˗klu ˗Zlan ˗bha mɛn ˗nu ˈwo ˈˈdhʋ̈ ˈwii ˈnën ˈkpɔ ꞊köŋ. (ˈWun. 21:​1-7) Biblö ˗ya ˗pö Ablaamö ˗yö ‹ˈdhaŋ˗ ˗bho ˗a pö ˈö ˗Zlan ˗ya wo ꞊dhɛ ˗a suu ˈgü ˗në ˗nu ˗dho pa ˈwo ˗kë ˈˈsɛgɔ ˗zii ˗sü do ˈka› bhë, ˗a ˈˈdhiʋ̈. (Wlɔ. 4:18) Kwa˗ ˈwɔn ˗dɔ ꞊dhɛ ˗wo ˈö ˈˈdhʋ̈ ˗yö ˗yökodhiʋ̈ˈˈ. Ablaamö ˗yö ˈnën ˈö kun ˗a dhiʋ̈ˈˈ ˗gan ˗ni ˈgü ˈö˗ yi ˗ya ꞊gwëë ˈwo˗ Izaakö ˗kë bhë, ˗a ˗kpɔ. Ablaamö ˗bha ˗zoyödhe ˗gɛn ˗kun ˗gban ˗sü ˈka ˗mën ˗ta? ˈDhɛ ˗kë ꞊dhɛ Ablaamö ˗yö Zoova ˗dɔ ˗së ˈka bhë, «˗yö ˗kun ga ˗sü ˈka ˗a ˈgü ˈkpakpadhö ꞊dhɛ pë ˈö ˗Zlan ˗ya ˈˈplüün bho ˗yö ˗dho ˗a kë.» (Wlɔ. 4:21) Ablaamö ˗bha ˗zoyödhe ˗wɔn ˈgü, ˗a ˈˈdhiaa ˗kun Zoova ˈgu ˈö˗ ˗dhɛ mɛn kpɛnŋdhö.—Zak. 2:23. w23.12 8 § 1-2.

Wlüünën gɔɔn˗ ˈö ˈdhaŋ˗ ˗bho ˗a ˈˈdhiʋ̈ ˗mɛn ˈka, ˗wa yö ˗nu nu ˗a ˗dhɛ, ˗yö ˗an ˗kë ˗së ˈka. ˗Kwa Yesu ˗bha ˈwɔnzuan ˗ga. Yesu ˈyaa kun mɛn ˈö ˈwɔn ˈyaa˗ ˗kaan bho ˗a ˗dhɛ ɛɛnˈˈ ˈö ˗wa yö dɔ ˗a ˗kɔ ˈka ˈö˗ ˈˈtʋ ˈyaa kë ˗a ˗bha, ˗a ˈka. ˗Yö yö ˈö Zoova ˗ya dɔ ˗a ˗kɔ ˈka bhë ˗a ˗kë. ˈKö ˗kë ꞊ʒianwo ꞊dhɛ ˈyaa kun ˈˈplëëplë, mɛn ˈˈpɛpɛ ˈö dho ˈö yö ˗a ˈka ˗a ˗bha gwëëˈˈ ˗nu ˗bha ˗an ˗dhɔ ˗kun ˗a kë ˗ni ˈgü, ˈö ˗wɩ ö ˗bha ˗tosɛta nu ˗sü ˗bha ˗an ˗wɔn ˈgü. (Zan 13:1) ꞊Dhɛ Yesu ˈdhö ˗ka pë ˈˈpɛpɛ kë kö yö ˈwo˗ dɔ ka ˗kɔ ˈka, ˈka˗ kë. ˗Kɔ ˈö yö ˈö ˈˈdhʋ̈ ˈka dho ˗a kë ˗a ˈka ˈkaa dɔ, ˗ka ka ˗de kë ˈˈtɩtɩ kö ˈka ˗takundhe ˗dhɛ kwa ꞊dhegblü gɔɔn˗ ˗nu ˈö ˗wa ˗kian ˗an ˗gɔ. ˈKa ˗dho kë ˈˈfiaasü. (Wlɔ. 12:11) Yö ˈwo˗ dɔ ka ˗kɔ ˈka, «˗kaa kë ka zuëˈˈ ˈˈpuu ˈka, ka faan ꞊gban ˈka ꞊dhɛ ˈpë ˈkii˗ kë mɛ ˈˈbhɩɩ˗ ˗zë ˗dhɛ ˈö ˈka˗ ˗kë kwa Dëmɛ ꞊në˗ ˗dhɛ ˗a ˈdhö.» (Kodh. 3:23) ˈˈKɛɛ ˗kaa ˈwɔn dɔ ꞊dhɛ ˈwɔn yaa kë ˗dhii ˗yö ka ˗bha, kë ˈˈdhʋ̈ kö ˈwɔn ˗nu ˗wa zë ka ˗gɔ ˈka ˈˈwɩ ˗a ˗bha.—Prov. 11:2. w23.12 26 § 8.

Kwa ˗bha ˗bɔyibhaasü kö ˈkwa kë Zoova ˗bha ˈkɔdhigümɛn ˗nu ˈka bhë, ˗yö kwa zuʋ̈ˈˈ ˈˈgblü ˗dhi. Kwa ˗bha ˗kë Zoova ˈˈtɔŋdë ˗tiaandhö ˗nu ˈka ˗sü ˈö bhë, ꞊bhlëëwɔn ˈkpii˗ ˗mü. Pë ˈö Psaume ˗bɛnzëmɛn Davi ˗ya pö yö, ˗yö kwa ˗zokun. ˗Ya ˗pö: «Mɛn ˈü ü ˗kɔ ˗yɛ ˗a ˗bha, ˈü ˗a ꞊ɲɔɔn ü ˈˈsuee kö ˗yö kë ü ˗bha ˈˈkwɛnŋdhö bhë ˗a ˗bha ˗yö ˗së.» (Ps. 65:4) Mɛn ˈˈpɛpɛ ˈyaa ˈnën ˈwo ˗kë Zoova ˗bha ˈkɔdhigümɛn ˗nu ˈka. ˗Yö ö ˗kɔ ˗yɛ mɛn ˗nu ˈwo kpɛnŋdhö ˗an ˗bha kö ˗wo kë ö ˈˈtɔŋdë ˗nu ˈka. (Zak. 4:8) ˈKa ka ˗de nu Zoova ˗dhɛ ˈka bɔ ˈˈyi ꞊bhaa, ˗yö ꞊mɔɔn- -bha ˈo ga ka ˈgü ꞊dhɛ ˗yö ˗dho «ˈdhuëë˗ kpɔ ka ˗bha ˈö dho ˗a ˈka ˈˈdhʋ̈ ,ˈö pë ˈbha ˗kpla ˈyaa kë ka ˗bha.» (Mal. 3:10; Jér. 17:​7, 8) ˗Bɔyibhaasü ˗ya zübhodhɛ ˈka. ˈKa ka bo ˗a ˈka, ka ˗dho ka ˈgü dɔ ˈˈgbɩɩ˗ kö ka ˗wo ˈka˗ ˗bhö bhë, ˈka˗ ˗ya ꞊bhlëë ˈgü ˈkö ˗kë ˗ʒiaanwo ꞊dhɛ ˈgüdandhe ˗nu ˗wo ˗nu ka ˗ta. (Eccl. 5:​4, 5) Ka ˗bha ˗kë Yesu ˗bha gwëëˈˈ ˗nu ˈka ˗sü ˗wɔn ˈgü, ka dua ˗mü kö ˈka ˈto ˗a ˗bha ˈwɔnzuan ˈˈpiʋ̈, ˈka˗ ˗bha ˈtɔŋ˗ ˗nu ˗ya ꞊bhlëë ˈgü.—Mat. 28:​19, 20; 1 Piɛ. 2:21. w24.03 8 § 1-3.

꞊Ya kë ꞊dhɛ kaa ü ˗bha dhebɔ ɛɛnˈˈ ü ꞊gɔɔn, ˈˈtʋ̈ŋ ˗kë ka ˈkwëë˗ ˗sü ˗dhɔ ˈyaa ka kë, ˈmën ˈka dho ˗a kë? ˈWɔnzuan do ˈö ˗gban ˈˈshiʋ̈ ˗bha, ˗kwaa ˗wɔn blɛɛˈˈ. ˗Wa ˈˈshiʋ̈ ˗ya ˗dɛɛ ˈgü, ˈyaa ˈto mü kö ˗yö kë ˈkpii˗. ˗A ˗mɛn dua ˗mü kö ˗yö ˈˈwo ˈˈgbanga ˈˈgblʋ̈gblʋ̈ ˗nu ˗ya ˗a ˗bha ˈˈdhiʋ̈ ˈˈdhiʋ̈. ˗Kɔ do ˈö bhë ˗a ˈka, ka ꞊mɔɔn˗ ˗bha ˈö ˈka˗ zübho ˈˈtʋ̈ŋ ˈnën ˈdɛdɛ ˗kë ka ˈko ꞊bhaa ˗sü ˗ta, yi ˈˈpɛpɛ ˈka. ˗Ka pë ˈˈpɛpɛ kë kö pë ˈö mɛn ꞊plɛ ꞊gban ka ˗dhɛ ˗së, ˈka˗ kë. (Zak. 3:18) ˈKa˗ kë ˈˈdhʋ̈ ˈˈdhiʋ̈ ˈˈdhiʋ̈, ka ˗bha ˗dhɔ ˗dho ˗dadhiʋ̈. ˈKo ꞊bhlëë ˗ya ˗sü ˈö ˈkosüsü ˈgü, ˗a ˗wɔn ˗yö ˈˈgbɩɩ˗. ˗Yö ꞊dhɛ ˈˈtee ˈö ˈˈshiʋ̈ yö ˈkwëë˗ ꞊dedewo ˗a ˈdhö. ˈˈTee ˈti ʒiö, ˈˈshiʋ̈ ꞊mɔɔn˗ ˗bha ö ꞊dhuu ˈˈvaandhö. ˗Kɔ do ˈö bhë ˗a ˈka, ˈkosümɛn ˗nu ˈti wo ˈko ˗nu ꞊bhlëë ˗ya, ˗dhɔ ˈö ˗an ꞊zinŋgü ˗yö ˗dho ˈdho ˈˈshia˗ ˈzozodhö. ˈˈKɛɛ ˗wa wo ˈgü dɔ ˈˈgbɩɩ˗ ˗wa wo ˈko ˗nu ꞊bhlëë ˗ya, ˗an ˗bha ˗dhɔ ˗dho ˈto ˈˈgbɩɩ˗ ˗kplawo. ˗Yö kë kwa ˈˈɲaan ꞊dhɛ pë ˈdhɛ˗ ˗wɔn ˈdhö ˈˈgbɩɩ˗, ˈyaa ˈnën ˗tɔ ˗a ˗pö kwa ˗de ˗dhɛ ˗sü ˈö ꞊dhɛ kwa kwa ˗bha dhebɔ ɛɛnˈˈ kwa ꞊gɔɔn ꞊bhlëë ˗ya. Kwa dua ˗mü ꞊ʒiaan ˈkwa˗ kë kö yöö ꞊dede ˗ya yö ꞊dhɛ kwa ö ꞊bhlëë ˗ya. w23.05 22 § 9; 24 § 14-15.

Biblö ˈgü, ˗klu ˗Zlan ˗bha ˗mɛn ˈbha ˗nu ˗wo ˈˈtʋ̈ŋ ˈwo kun ꞊zii ˗ni ˈgü ˗a ˈka kö ˗an ˈyɔɔ˗ ˗nu ˗wa nu ˗an gɔ ɛɛnˈˈ kö ˗wa ˗gban ˗an ˗gɔ ˗a ˗wɔn ˗blɛɛ. (Ps. 18:4; 55:​1, 5) ˗Kɔ do ˈö bhë ˗a ˈka, ˗wo ꞊mɔɔn˗ ˗bha ˈwo ˗gban kwa ˗gɔ ꞊klaŋplöö, kwa ˗bha yö ˈˈdhiʋ̈, kwa ˗bha ˈkɔdhi ˈgü ɛɛnˈˈ ˈˈsɛgɔdhiʋ̈mɛn ˗nu ꞊mɔɔn˗ ˗bha ˈwo ˗gban kwa ˗gɔ. ˗A ˈbha ˗ya kë kö ˈˈyua ˈö ˈˈdhɛ ˈyaa ˈdhö ˗yö kwa ˗bha. ˈˈTʋ̈ŋ ˗nu ˈwo ˈˈdhʋ̈ ˗an ˈgü, kwa ꞊mɔɔn˗ ˗bha ˈkwa ˗kë ˈˈtëëtë ꞊dhɛ ˈnën ˈsɛɛn˗ ˗nu ˈdhö. Zoova ˗yö kwa ˗takun ˗kɔ ˗kë ꞊dhɛ ˈˈtʋ̈ŋ ˗nu ˈwo ˈˈdhʋ̈ ˗an ˈgü? ˗Yö kwa ˗zogban ˈö kwa zuʋ̈ˈˈ ꞊dhuaa. ˈDhɛ ˈˈdhʋ̈, ˗kwa ˈˈtʋ̈ŋ ˈsü zoodhö zoodhö kö ˈkwa bhɛɛˈˈ Zoova ˗dhɛ, ˈkwa Biblö ˗wo pö. (Ps. 77:​1, 12-14) ˗Ya kë ˈˈdhʋ̈ ˈwɔn ˈˈgbɩɩ˗ ˗nu ˗wa nu kwa ˗ta, pë ˗blɛɛsü ˈö ˈkwa dho ˗a kë ˈyö ˗tɔ ˗bhɛɛ kwa Dë ˈö dhaŋ˗ ˈgü bhë ˗a ˗dhɛ ˗sü. ˗Kwa kwa ˗bha ˈˈsuʋ̈wɔn waa zuʋ̈dhiʋ̈tɛwɔn ˗nu blɛɛˈˈ Zoova ˗dhɛ. ˗Kwa kwa ꞊kwaa ˗a ˗zü kö ˗yö dhiaŋzë kwa ˗dhɛ, ˗yö kwa ˗zogban ö ˈˈDhiwo ˈka.—Ps. 119:28. w24.01 24-25 § 14-16.

ˈKwa˗ pö pë ˈö ˈkwa˗ ˗ya kwa ˗zo ˈˈpiʋ̈ ˗yö kë, ˗a kë ˗sü ˗dhɔ ꞊dede dua ˗mü ˗yö kë kwa ˈgü. Pë ˈö mɛn ˗ya ˗ya ö ˗zo ˈˈpiʋ̈ ˗a kë ˗sü ˗dhɔ ꞊dede ˗ya kë ˗a ˈgü, ˗yö ö ˈgü ˗dɔ ˈˈgbɩɩ˗ kö ˈö ˗mɔn ˗a ˗bha. pë ˈö ˈkwa˗ ˗ya kwa ˗zo ˈˈpiʋ̈ ˗a kë ˗sü ˗dhɔ ꞊dede ˗ya kë kwa ˈgü, kwa ˗dho ꞊mɔɔn˗ ˗bha ˈkwa˗ ˗kë. ˗Dhɛ ˈö ˈˈdhʋ̈, ˗mën ˈö kwa dua ˈdhö ˗mü ˈkwa˗ kë kö ˈwɔn ˗nu ˈwo kwa ˗zo ˈˈpiʋ̈ ˗an kë ˗sü ˗dhɔ ˗yö kwa kë? ˗Kwa bhɛɛˈˈ kö Zoova ˗yö kwa ˗bha ˈwɔn ˗nu kë ˗sü ˗dhɔ ˗dadhiʋ̈. Zoova ꞊mɔɔn˗ ˗bha ˈö bɔ ö ˗bha ˗zuu ˈˈslʋ̈ʋ̈slʋ̈ ˗ta ˈö ꞊faan nu kwa ˗dhɛ kö ˈpë ˈkwa˗ ˗ya kwa ˗zo ˈˈpiʋ̈, kwa ˗kɔ ˗yö ˗mɔn ˗a kë ˗sü ˗bha. ˈˈTʋ̈ŋ ˈbha ˗nu ˈka kwa ˈwɔn ˗nu ˗ya ˈkwa ˗zo ˈˈpiʋ̈, ˈyö ˗tɔ kwa˗ ˈwɔn ˗dɔ ꞊dhɛ kwa dua ˗mü kö ˈkwa˗ kë. ˗A ˗kë ˈˈdhʋ̈ ˗sü ˗yö ˈwɔn ˗së ˈka. ˈˈKɛɛ ˗a ˈbha ˗ya kë kö ˗a kë ˗sü ˗dhɔ ꞊dede ˈyaa kwa ˈgü. Pë ˗nu ˈö Zoova ꞊yaa ˗an kë kwa ˗dhɛ ˗kwa kwa ˗zota ˗an ˈgü. (Ps. 143:5) Bɔmɛn Pɔdhö ˗yö ö ˗zota ˗gasitɛ ˈö Zoova ˗ya ˗kë ˗a ˗dhɛ ˗a ˗wɔn ˈgü. ˗A ˗kë ˈˈdhʋ̈ ˗sü ˗ya ˗blü ˈö yökë Zoova ˗dhɛ ö ꞊faan ˈka. (1 Ko. 15:​9, 10; 1 Tim. 1:​12-14) ˗Kɔ do ˈö bhë ˗a ˈka, ˈkwa kwa ˗zota pë ˗nu ˈö Zoova ꞊yaa˗ ˗an kë kwa ˗dhɛ ˗an ˈgü, pë ˈö ˈkwa˗ ˗ya kwa ˗zo ˈˈpiʋ̈ ˗a kë ˗sü ˗dhɔ ˗dho ˗da kwa ˈgü.—Ps. 116:12. w23.05 27 § 3-5.

ˈKwa kwa Dë ˈö dhaŋ˗ ˈgü ˗a ˈtɔ bhɔ, kwa ˗kë ˗a ˗dhɛ ˗së. (Ps. 119:108) ˗A ˗gɛn ˈnën ˗tɔ ꞊dhɛ ˗Zlan ˈö˗ ˗bha ˈˈpiigbɩɩdhɛ ˈˈdhiʋ̈todhɛ ˈyaa ˈdhö bhë, ˗yö ꞊dhɛ mɛnbhɩɩdhe ˗nu ˈö ˈwɔn yaa kë ˗dhii ˈdhö ˗an ˗bha, ˈwo ˈtɔbhɔdhe ꞊mɛɛn ˗an ˈdhö ˗ee? ˗Abin. ˈKwa Zoova ˈtɔ bhɔ kö kwa ˈˈdhɛ bho ˗ni ˈgü ꞊süa ˈö Sɔtraan ˗ya ˗kë kwa ˗bha bhë, ˗a ˗ta. ˗Ya ˗pö ꞊dhɛ mɛnbhɩɩdhe gbɛ˗ ˗kɔ ˈyaa ꞊mɔɔn˗ ˗bha kö ˗yö Zoova ˈtɔ bhɔ ˈˈtʋ̈ŋ ꞊gban ˈka. ˗Ya ˗pö ˈzü ꞊dhɛ ˈgüdandhe ˗ya nu kwa ˗ta, ˈkwaa ꞊mɔɔn˗ ˗bha kö ˈkwa ˈto kwa ˗wo ˗ta. ˗Ya ˈˈpiʋ̈ kö ˈkwa kwa ˗zota ꞊dhɛ ˈkwa ˈˈkan ˗Zlan ˗bha, kwa ˗bha ˗tosɛta ˗dho kë ˗së. (Job 1:​9-11; 2:4) Zɔbö ˗yö ˗to ˗klu ˗sü ˈka ˗Zlan ˗bha ˈö˗ ˗zɔn ꞊dhɛ Sɔtraan ˈö bhë ꞊suamɛn ˗mü. ˈYö kwa ˗de ˈpö ꞊wɛ? ˗Kɔ ˈö ˈkwa˗ ˗bha do do ˈka kwa ꞊mɔɔn˗ ˗bha ˈkwa kwa Dë ˈtɔ bhɔ, ˈkwa˗ zuʋ̈ˈˈ ˈˈgblü dhi ˗klu ˗a ˗bha ˗sü ˈka. (Prov. 27:11) ꞊Bhlëëwɔn ˈkpii˗ ꞊dede ˗mü kwa ˗bha ˈka. w24.02 8-9 § 3-5.

ˈDhɛ Moizö waa Ʒosue ˗an ˗bha ˈˈtʋ̈ŋ ˗yö ˗ʒiö, Zoova ˗yö ö ˗kɔ ˗yɛ zakanmɛn ˗nu ˗bha kö ˗wo ˈˈdhiʋ̈sü ö ˗dhɔkëmɛn ˗nu ˈka. ꞊Taabha ˗gblüdë ˗nu ˗bha ˈˈtʋ̈ŋ ˈgü, Zoova ˗yö ö ˗wodhiʋ̈lomɛn ˗nu ˗ya kö ˗wo ˈˈdhiʋ̈sü ö ˗dhɔkëmɛn ˗nu ˈka. ˗Gblüdë ˗nu ˈwo ˗klu ˗Zlan ˗bha ˗wo wo ˈˈtʋ̈ ˗to ˗a ˗wodhiʋ̈lomɛn ˗nu ˈwo ˈˈdhʋ̈ ˗an ˗bha. ˗A ˈwɔnzuan ˈnën ˗tɔ ˗gblüdë Davi ˗yö ö ˗de ˗kë ˈˈtɩtɩ ˈö ˗wɩ ˗Zlan ˗wodhiʋ̈lomɛn Natan ˗bha ö ꞊dɔɔ ˗sü ˗bha. (2Sam. 12:​7,13; 1 Chron. 17:​3, 4) ˗Gblüdë Ʒozafa ˗yö ˗to ˗Zlan ˗wodhiʋ̈lomɛn Ʒaaziɛdhö ˗bha ˗dhioo ˗nu ˈˈpiʋ̈ ˈö ˈˈsɛgümɛn ˗nu ꞊faanmën kö ˗wo «ˈdhaŋ˗ bho [˗Zlan] ˗wodhiʋ̈lomɛn ˗nu ˈˈdhiʋ̈.» (2 Chron. 20:​14, 15 ) ˈDhɛ ˈwɔn ˈˈgbɩɩ˗ ˗yö nu ˗gblüdë Ezekiasö ˗ta, ˗yö ˗takundhe ˗dhɛ ˗Zlan ˗wodhiʋ̈lomɛn Izai gɔ. (Is. 37:​1-6) ˈˈTʋ̈ŋ ˈˈpɛpɛ ˈö ˗gblüdë ˗nu ˗wa ˈˈwɩ ˗a ˗bha kö Zoova ˗yö ˈˈdhiʋ̈sü wo ˈka ˗a ˈgü, ˗yö ˈdhuëë˗ ˗kpɔ ˗an ˗bha ˈö ˈˈsɛgümɛn ˗nu ˗takpa. (2 Chron. 20:​29, 30; 32:22) Mɛn ˗nu ˗wa yö ˈkpakpadhö ꞊dhɛ Zoova ˈnën bɔ ö ˗wodhiʋ̈lomɛn ˗nu ˗ta kö ˈö ˈˈdhiʋ̈sü ö ˗bha ˈˈsɛgümɛn ˗nu ˈka. w24.02 21 § 8.

Sɔtraan ˗ya ˈˈpiʋ̈ kö ˈkwa ꞊nënŋ mɛn ˗nu ˈwo dho Zoova ˗bha ˈtɔŋ˗ ˗nu ˗ya ꞊bhlëë ˈgü ˗sü kë kwa ˗kɔa ˈˈgbɩɩ˗ ˗an ˗bha. Kwa ˗zo ˗yö ˗bo ꞊dhɛ kwa ˗nënŋ ˗a ˗bha ˗mɛn ˗nu ˈˈdhiʋ̈ ˈyaa ˈto mɛn ˗nu ˈö kwaa˗ ˗nu ˈkwa kwa ˈko ꞊bhaa dosɛnŋ ˗an ˗bha. ˗Wo ꞊mɔɔn˗ ˗bha ˈpö ˈwo ˗kë ˗kpankwëëdhɛ ˈö Ɛntɛnɛtö ˗ta ˗a ˈgü. Kwa dua ˗mü kö ˈkwa ˈkozë ˈˈkpɔnŋtaamɛn ˗nu ˗zotakɔ ˈö ˗kë ꞊dhɛ ˈˈɲangüyaa ˗yö ˗së bhë, ˗a ˈka. ˈˈKɛɛ, kwa ˗zë kwa˗ ˈwɔn ˗dɔ ꞊dhɛ ˗yö ˈya˗. (Efɛ. 4:​19, 20) ˗A ˗wɔn ˈgü ˗kwa kwa ˗de dhɛɛˈˈ ˈkpɔ, ˈkwa˗ pö: «A pë ˈˈpɛpɛ ˗kë kö ˈman ˗dho ꞊nënŋ n yökëyoo ˗nu, n ˈˈtɛɛbɔ ˗nu ˈwo ꞊klaŋplöö waa mɛn ˈˈwɛɛ ˗nu ˈö ˈwaa Zoova ˗bha ˈtɔŋ˗ ˗nu ˗ya ꞊bhlëë ˈgü ˗an ˗bha ˗ee? A n ˈgü ˗dɔ ˈˈgbɩɩ˗ kö ˈa ˈto Zoova ˗bha ˈtɔŋ˗ ˗nu ˈˈpiʋ̈, ˈkö ˗kë ꞊dhɛ mɛn ˈbha ˗nu ꞊mɔɔn˗ ˗bha ˈwo˗ pö ꞊dhɛ ˈmaan mɛn ˗nu ˗bhawɔn ˈto ˗ee?» ꞊Dhɛ ˗kɔ ˈö 2 Timote 2:​20-22 ˗ya pö ˗a ˈka bhë ˗a ˈdhö, ˈkwa˗ pö ˈkwa kwa ˗kɔ ˈˈyɛ kwa ˈˈtɔŋdë ˗nu ˗bha ˗zlanwokɔdhi ˈgü, kwa dua ˗mü kö ˈkwa˗ kë kwa ˈsuan˗ ˈka. ˗Yö kë kwa ˈˈɲaan ꞊dhɛ mɛn ˈbha ˗nu ˈwaa ꞊mɔɔn˗ ˗bha kö ˗wo kwa ˗takun ˈkwa ˈto ˗klu ˗sü ˈka Zoova ˗bha yö ˗bha. w24.03 22-23 § 11-12.

Mɛn ˈö Zoova ˈdhö˗ ˈka, ˈkwa kwa ˗zota ˗a ˈgü do ˗ee? ˈKö ˗kë ꞊dhɛ ˈkwaa ˗kpan ˗a ˗bha, Biblö ˗yö mɛn ˈö˗ ˈka ˗a ˗zɔn kwa ˗dhɛ ˗kɔ ꞊va ˗ta. ˗Ya ˗pö ꞊dhɛ Zoova ˈnën ˗tɔ «ˈˈwo ˈbhü waa ˗gblü ˈdhaa˗», ˈö˗ ˗kë ˈzü «pɛng ˈö mɛ ˗bhö» ˗a ˈka. (Ps. 84:11; Ebl. 12:29) ˈDhɛ Ezekiɛdhö ˈˈɲan ˈgü ˗yö ˗da, ˗ya ˗pö Zoova ˗yö kë ˗sü ˈka ꞊dhɛ Safii ˗gwö ˈdhö, ˈö˗ ˈbhü ˗yö bhɔ, ˈö˗ ˗kë ˈzü ꞊dhɛ dha ˈkpoŋ˗ ˈdhö. (Ézéch. 1:​26-28) ˈDhɛ ˗kë ꞊dhɛ ˈkwaa ˗kpan Zoova ˗bha bhë, ˗a pö ˗sü ˈö ꞊dhɛ kwa ˗dhɔ ˗ya ˗kë ˗yö ꞊mɔɔn˗ ˗bha ˈö ˗kë kwa ˗kɔa ˈˈgbɩɩ˗. Mɛn ˈbha ˗nu ˗de ˈpö ˗wa ˗pö ꞊dhɛ wo ˗dhɔ ˈyaa ꞊mɔɔn˗ ˗bha kö ˗yö Zoova kë toŋtoŋdhö, ˈyö sü ꞊dhɛ ˈwɔn yaa ˗nu ˗wo ˗nu wo ˗ta. ˈWɔn yö ˗kɔ suu ˗nu ˈwo ˈˈdhʋ̈ Zoova ˗yö ˗an ˈgüman kwa ˗gɔ. ˗A ˗wɔn ˈgü, ˗yö ö ˗bha ˈˈklʋʋsë ˗nu ˗zɔn kwa ˗dhɛ Biblö ˈgü. Biblö ˗ya ˗pö ꞊dhɛ «waa˗ pö ˗dhɔ kö ˗wo ˗wɩ [Zoova] ꞊nɛ˗ ˈka.» ˗Dhɔ ˈnën ˗tɔ Zoova ˗bha ˈˈklʋʋsë ˈkpii˗. (1 Zn. 4:8) Pë ˈˈpɛpɛ ˈö˗ ˗kë, ˗dhɔ ˈnën˗ ˗blü ˗a kë ˗sü ˗bha. ˗A ˗bha ˗dhɔ ˈˈpii ˗yö ˈˈgbɩɩ˗, ˈyö sü ꞊dhɛ ˗ya ˗zɔn ˗ʒianwo mɛn ˗nu ˈö ö ˗dhɔ ˈyaa ˗an kë, ˗an ˗dhɛ.—Mat. 5:​44, 45. w24.01 26 § 1-3.

Zoova ˗yö ö ˗kɔ ˗yɛ Moizö ˗bha kö ˗yö ˈˈdhiʋ̈sü Izraɛdhömɛn ˗nu ˈka ˗wo ˈgo Eʒitö. ˈˈDhuu ˗yö yö ˗an ˗nu ˗dhɛ ˈˈdhiʋ̈ ˈɲënŋ˗ ˈgü, ˈö ˈˈwo ˈbhü ˗yö ʒian bho ˗an ˈka gbeŋ. (Ex. 13:21) Moizö ˗to pë ˗nu ˈwo ˈˈdhʋ̈ ˗an ˈˈpiʋ̈ ˈö waa Izraɛdhömɛn ˗nu ˈwo ˗lo ꞊weeyi ˗zɔɔndhö ꞊bhaa. ˈˈKɛɛ ˗yö ˗kun Izraɛdhömɛn ˗nu ˈgü ꞊dhɛ ˈwa ꞊nënŋ ꞊weeyi ˗zɔɔndhö waa Eʒitö ˈˈsɔdha ˗nu ˈwo kun ˗an kë ˗ni ˈgü ˗bia bhë, ˗an ꞊zinŋgü. ˈˈKpënŋ ˈyaa ˈnën ˗kë ˗an gɔ. Zoova ˈnën bɔ ˗a ˗ta ˈö nu ö ˗bha ˈˈsɛgümɛn ˗nu ˈka ˗dhɛ ˈö bhë ˗a ˈgü. (Ex. 14:2) ˗Zlan ˗yö ˈˈdhabhliwɔn ˗kë ˈö ˗an dha ˗an ˈyɔɔ˗ ˗nu ˗gɔ. (Ex. 14:​26-28) ˗Kwɛ 40 ˈˈpiʋ̈, Moizö ˗yö ˗to ˈˈdhuu kpö ˈˈpiʋ̈ ˈö ˈˈdhiʋ̈sü ˗Zlan ˗bha ˈˈsɛgümɛn ˈka ˈˈyɛta. (Ex. 33:​7, 9, 10) Zoova ˗yö ˗bɔ ˈˈdhuu kpö ˈgü ˈö dhiaŋzë Moizö ˗dhɛ, ˈö Moizö ˗de ˈpö ˈö Zoova ˗wodhiʋ̈lo ˈˈsɛgümɛn ˗nu ˗dhɛ. Izraɛdhömɛn ˗nu ˗wa ˗yö ˈkpakpadhö ꞊dhɛ Zoova ˈnën bɔ Moizö ˗ta ˈö ˈˈdhiʋ̈sü wo ˈka. w24.02 21 § 4-5.