Ʒue

Pë ˈˈpɛpɛ ˈö Yesu ˗ya pö ɛɛnˈˈ ˈö˗ ˗kë, ˈö˗ ˈbha ˗nu ˗kë ˗dhidha ˗nu ˈka bhë, ˗yö ˗to ö Dë ˗zotakɔ waa˗ ˈwɔn yö ˗kɔ ˈˈpiʋ̈ ˈkpakpadhö. (Zan 14:9) ˗Gleŋ -mɛɛn ˈkwa ꞊mɔɔn˗ ˗bha ˈkwa˗ ˈsü Yesu ˗bha ˗dhidha ˗nu ˈgü? Kwa ˗dhɔ ˗yö Yesu waa ö Dë ˗an ˗kë ꞊dedewo. Kö Yesu ꞊kun ˈˈsɛ ˗ta, ˗yö ˗dhɔ ꞊dede ˗zɔn ˗dhidha ˗nu kë ˗sü ˈka kö mɛn ˗nu ˈwo kun saanˈˈ ˗ni ˈgü, ˈö ˗an ˗takun. Yi do ˈka, ˈˈɲɛɛntiimɛn ꞊plɛ ˗wa ˗pö Yesu ˗dhɛ ˗yö wo ˗takun. (Mat. 20:​30-34) Biblö ˗ya ˗pö ꞊dhɛ ‹˗wëë ˗yö ˗bɔ Yesu ˗ta,› ˈö ˗an ˗dhɛ bo. Glɛkö ˗wo kpö ˈwo˗ ꞊dhiëëta ˈö ˗kë ‹˗wëë ˗yö ˗bɔ ˗a ˗ta› ˈka bhë, ˗yö ˗gban mɛn ˈbha ˗wëë ꞊dedewo ˗bha mɛn kë ˗sü ˗bha. Mɛn ˗wëë ˗bha mɛn kë ˗sü ˈö ˈˈdhʋ̈ ˗ya ˗kë ˈö Yesu ˗yö mɛn ˗nu ˈö din kun ˗an ˗bha ˗an ˈˈdhi gba, ˈö ꞊weemɛn do ˈˈdhɛkë. (Mat. 15:32; Mak. 1:41) ˗Yö ꞊mɔɔn˗ ˗bha ˈö ga kwa ˈgü ꞊dhɛ Zoova ˈö ˗kë ˗Zlan ˈö ‹mɛn ˗wëë ˗ya ˗kë› ˗a ˈka waa ö Gbö kwa ˗dhɔ ˗yö ˗an ˗kë ꞊dedewo. ˗Wa kwa yö kö kwa saanˈˈ ˗ni ˈgü, ˗yö ˗mën ˗an ˈka. (Dhu. 1:78; 1 Piɛ. 5:7) ˈWɔn ˈˈgbɩɩ˗ ˗nu ˗bho mɛnbhɩɩdhe ˗nu ˗bha ˗sü ˗lele ˗yö ˗an ˗ta. w23.04 3 § 4-5.

Kwa dua ˗mü ˈkwa ˈˈkan pë ˗nu ˈwo dho kwa ˗zotakɔ shiʋ̈ˈˈ waa ˈwɔn yö ˗kɔ yaa ˗nu ˈwo ˗pɛn ˗sü ˈka Sɔtraan ˗bha ˈˈkpɔnŋtaadhɛ ˈö yö ˗an ˈgü bhë, ˗an ˗bha. ˈKwa Biblö ˗wo pö, ˈkwa˗ draanˈˈ ˗kplawo, ˈwɔn ˗së ˗nu ˗dho ˗da kwa zuʋ̈ˈˈ ˈˈpiʋ̈. ˗Dho ˗bhɔkwëë ˗nu ˗ta ˗sü waa ˗zlanwopösü ˗wo ˗dho kwa zuʋ̈ga ˗takpa. Zoova ˗ya ˈˈplüün ˗bho ꞊dhɛ ö ˈti ˗dho ˈˈwɩ ˗a ˗bha kö ˈgüdandhe ˈö ˈkwaa ˗mɔn ˗a bun ˗sü ˗bha, ˗yö nu kwa ˗ta. (1 Ko. 10:​12, 13) ˈKwa˗ pö ˈkwa ˈto ˗klu ˗sü ˈka Zoova ˗bha ˈˈtʋ̈ŋ ˗totaabhasü ˈö yö ˗a ˈgü, kwa dua ˗mü kö ˈkwa bhɛɛˈˈ ꞊dedewo. Zoova ˗ya ˈˈpiʋ̈ kö ‹ˈkwa kwa zuʋ̈ˈˈ ˈˈpʋ ö ˗dhɛ› bhɛɛsü ˈka. (Ps. 62:8) ˗Kwa Zoova ˈtɔ bhɔ, ˈkwa˗ ˈˈnuɛ bho pë ˈˈpɛpɛ ˈö˗ ˗kë kwa ˗dhɛ ˗a ˗wɔn ˈgü. ˗Kwaa pö ˗a ˗dhɛ ˗yö kwa ˗takun kö kwa ˈgü ˗yö kë ˈˈgbɩɩ˗ ˗zlanwopösü ˈgü. ˗Kwaa pö ˗a ˗dhɛ ˈzü ˗yö kwa ˗takun kö ˈkwa bɔ ˈwɔn ˈˈgbɩɩ˗ ˗nu ˈgü, ˈkwa ˗gban ˈgüdandhe ˗nu ˗gɔ. ˈKwa ˈdho kwa ꞊kwaa pë ˈbha ɛɛnˈˈ mɛn ˈbha ˗zü, kö ˗yö kwa ˈˈkan ˗bhɛɛ Zoova ˗dhɛ ˗sü ˈö yi ˈˈpɛpɛ ˈka, ˗a ˗bha. w23.05 7 § 17-18.

ˈMën ˗kë ˈkwa nu ˗bhɔkwëë ˗nu ˗ta? ˗A ˗gɛn ˗blɛɛsü ˈnën ˗tɔ kwa ˗nu kö ˈkwa Zoova ˈtɔ bhɔ. (Ps. 26:12; 111:1) Kwa nu ˈzü kö ˈkwa kwa ko ˗nu ꞊faan dɔ ˈˈtʋ̈ŋ ˈˈgbɩɩ˗ ˈö yö ˗a ˈgü. (1 Tes. 5:11) ˈKwa ˈwɔn ˗daakë ˗bhɔkwëë ˗nu ˗ta, kö pë ꞊plɛ ˈwo bhë kwa ˗an kë ˗ni ˈgü. ˈˈKɛɛ pë ˈbha ˗nu ꞊mɔɔn˗ ˗bha ˈwo kwa ˗kɔ kun ˈwɔn ˗daakë ˗sü ˗bha. ˈˈSuʋ̈ ꞊mɔɔn˗ ˗bha ˈö kwa ˗kë ɛɛnˈˈ kwa ꞊mɔɔn˗ ˗bha ˈkwa kwa ˗kɔ ˗luu ˈö ˈwaa wo ˗kɔ ˈˈyɛ kwa ˗bha. ˗Ya kë kwa ˈka ˈˈdhʋ̈, ˈmën ˈkwa ˗dho ˗a kë? Bɔmɛn Pɔdhö ˗ya ˗pö ꞊dhɛ kwa ˗dua ˗mü kö «ˈkwa kwa ˈko ˗nu faan dɔ.» ˈKwa˗ ˈwɔn dɔ ꞊dhɛ kwa ˗bha dhiaŋ ˗nu ꞊mɔɔn˗ ˗bha ˈwo mɛn ˈˈwɛɛ ˗nu ꞊faanmën, kwa ˗kɔ luuˈˈ ˗sü kö ˈkwa ˈwɔn ˗daa kë bhë, ˗a ˈˈsuʋ̈ ˈti ˗dho kwa kë. ˗Ya kë ˈzü ꞊dhɛ ˗wo ˈti wo ˗kɔ ˈˈyɛ kwa ˗bha ˈˈtʋ̈ŋ ˈbha ˈka, ˗yö ˗dho kë kwa ˗dhɛ ˗së ˈyö sü ꞊dhɛ mɛn ˈˈwɛɛ ˗nu ˗de ˈpö ˗an dua ˗mü kö ˗wo ˈwɔn ˗daakë.—1 Piɛ. 3:8. w23.04 20 § 1-3.

˗Gblüdë do ˗yö ö ˗wo ˗bho Zuifö ˗nu ˈö ˗wa ˗kwɛ 70 kë ˈˈgan ˈgü Babidhɔnö bhë ˗an ˗ta, ˈö˗ pö ˗an ˗dhɛ ˗wo ꞊mɔɔn˗ ˗bha ˗wo ˈdho wo ˗gɔ ˈˈsɛ ˈgü Izraɛdhö. (Esd. 1:​2-4) Zoova dosɛnŋ ˈnën ꞊mɔɔn˗ ˗bha kö ˗yö mɛn ˗blü ˈwɔn suu ˈö ˈˈdhʋ̈ ˗a kë ˗sü ˗bha. ˈYö sü ꞊dhɛ Babidhɔnömɛn ˗nu ˈwaa wo ꞊kwaa mɛn ˗nu ˈwo ˗an ˗gɔ ˈˈgan ˈgü ˗an ˗zü. (Is. 14:​4, 17) ˈˈKɛɛ ˗wo Babidhɔnö ˗dhɛ ˗kun, ˈö˗ ˗gblüdë ˗dɛɛ ˗ya pö Zuifö ˗nu ˗dhɛ ˗wo ꞊mɔɔn˗ ˗bha ˈwo dho. ˗A ˗dhɛ ˗kun ˗a ˗bha kö ˈkɔdë ˗nu ˈˈpɛpɛ ˈwo kun Zuifö ˈka ˗wo wo ˗zota, kö ꞊ya kë ꞊dhɛ ˗wo ˗dho ˈto ˈmü ɛɛnˈˈ ˗wo ˗dho ˗wo ꞊yɛɛ˗ kë wo ˗bha ˈˈsɛ ˈgü, ˗wo wo ˗kɔ ˈˈyɛ ˗a do ˗bha. ˈYaa kun ˈwɔn ˈˈplëëplë ˈka ˗an ˗gɔ. ˗A ˈˈtʋ̈ŋ ˈö bhë ˗a ˈka, kö ˗a mɛn ꞊vadhɛ ˗wa kë zii, ˈwaa ˗mɔn ˈˈta ꞊gblɛɛn ˈkpɔ ˗sü ˗bha ˈzü. ˗Ya ˈgo mü, ˗a mɛn ꞊vadhɛ ˗de ˈpö ˗wo ˗bhɔ Babidhɔnö, ˈwaa ˈˈsɛ ˈˈwɛɛ ˈbha dɔ. ˗An ˗bha ˈgü, Babidhɔnö ˗dhɛ ˈnën ˗tɔ wo ˗bha ˈˈsɛ, ˈyö Izraɛdhö ˗dhɛ ˗kë wo ˈˈbhɛman ˗nu ˗bha ˈka. ˗Ya ˈgo mü ˈzü, Zuifö ˗nu ꞊vadhɛ ˗kun ꞊nɔɔnmɛn ˗nu ˈka Babidhɔnö, ˈö ˈwaa kun ˗a ˈˈpiʋ̈ kö ˈwo wo ˗bha ˈkɔ ˗sɛŋbɔ ˗nu waa wo ˗bha yö ˗nu ˈto ˈwo ˈdho ˈˈsɛ ˈö ˈwaa˗ dɔ, ˗a ˈgü. w23.05 14 § 1-2.

˗Zlan ˈˈDhiwo ˗yö kwa ꞊faanmën kö ˈkwa zuʋ̈saadhɛ, mɛn ˗wëëzësü waa ˗dhɔ ˗an draanˈˈ ˗kplawo. Dhukö 21:19 ˗ya ˗pö: «꞊Ya ˈkun bho ka ˈgü, kö ˈkii bo n ˈka, ˈyö ˈka dho ˗da ꞊sii ˈö ˈyaa yën ˗a kë ˗dhɛ ˈgü.» Kodhɔsö 3:12 ˗ya ˗pö: «Mɛ ˈˈbhɩɩ˗ ˗nu ˗wëë ˗yö ka kë ꞊dedewo.» 1 Tesadhonikö 4:​9, 10 ˗ya ˗pö ˈpö: «˗A ˈdhɛ ˈkö ˗gban ka ˈko ˗dhɔ ˗bha ˈka ˈko kë ˗sü ˈö [˗Zlan] ˗bha zian ˗ta bha˗ ˗bha, [ . . . ] yöö ꞊dede ꞊ya ka ꞊klang kë yö ˗zë ˈka. [ . . . ] ˈˈKɛɛ ˈwɔn ˈö yi ˈˈpiʋ̈ ꞊dhɛ ˈyi˗ pö ka ˗dhɛ [ . . . ] yö ˗mü ꞊dhɛ kö ˗dhɔ ˈö ka ˗gɔ bha˗ ˈbha ꞊në ˗yö ˗da ˈgü kö ˗yö ˈdho˗ ˈka ˈˈdhiʋ̈ ˗kpɛawo.» ˗Wo ˗nu ˈwo bhë ˗wo ˗an ꞊gban ˗pö Yesu ˗bha gwëëˈˈ ˗nu ˈö zuʋ̈saadhɛ, mɛn ˗wëëzësü waa ˗dhɔ ˈdhö ˗an ˈgü ˈsaadhö, ˗an ˗dhɛ. ˈˈKɛɛ ˈkö ˗kë ˈˈdhʋ̈, ˗an dua ˗mü kö ˗wo ˈˈklʋʋsë ˗nu ˈwo bhë ˗an draanˈˈ ˗kplawo. Kwa dua ˗mü ˈpö ˈkwa˗ kë ˈˈdhʋ̈. ˗A ˗wɔn ˈgü, ˗kɔ ˈö kletiɛn ˗blɛɛsü ˗nu ˗wo ˈˈklʋʋsë ˗nu ˈwo ˈˈdhʋ̈ ˗an ˗zɔn ˗a ˈka kwa ˗dho kwa ˈˈtʋ̈ŋ kë ˗a ˈgü, kö ˗kɔ ˈö ˈkwa dho ˈto ˗a ˈka ˗an ˗bha ˈwɔnzuan ˈˈpiʋ̈ ˈkwa kwa ˗de baaˈˈ ˈˈklʋʋbhɔdhe ˈkpii˗ ˗bha, ˈkwa˗ dɔ. ˈKwa˗ kë ˈˈdhʋ̈, ˈˈklʋʋbhɔdhe ˈkpii˗ zü ˗ya dɔ ˈpë ˈkwa dho ˗a kë kwa ˗dho ˗a dɔ. w23.07 2-3 § 4, 8.

Kwa ˗kë ˈˈɲɔn ˗a ꞊troo ɛɛnˈˈ ‹˗tuëë ˈˈwɛɛ› ˗nu ˈka, mɛn ˈˈpɛpɛ kwa dua ˗mü kö ˈkwa ˈto «ˈˈSlʋ̈ʋ̈slʋ̈dhɛ ˗ʒian» ˈö bhë ˗a ˗ta, ˈyö sü ꞊dhɛ ˗yö ˗dho kwa ˗takun kö ˈkwa Zoova ˗dhɔkë ˗kplawo ꞊dɛɛ waa ˗dhɛkpaɔ dhiʋ̈ˈˈ ˈgü, kö ˗Zlan ˗bha ˗Gblüdëdhɛ ˗ya ˈˈkpɔnŋ ꞊taa ˗wɔn ˗nu ˈˈɲanbhɔ. (Zan 10:16) ˈÖ sü ˗kwɛ 1919 K.Y. ˗bha, gɔɔn˗ ˗nu, dhoo˗ ˗nu waa ˈnën ˗nu ˈˈmliɲɔn ꞊va ˗wo ˈgo ˗ni ˈgü Babidhɔnö ˗pö ˈkpii˗ ˈö ˗kë ꞊sua ˗zlanwo ˗nu ˗lokotasü ˈka bhë, ˗a ˈgü. ˗Wa ˗ya ˈˈtasü ˗sü ˗bha «ˈˈSlʋ̈ʋ̈slʋ̈dhɛ ˗ʒian» ˗ta. Zoova pë ꞊gban ˗kë kö Zuifö ˗nu ˗wa ˈgo Babidhɔnö, ʒiaanga ˈwo dho ˗a ˈsü bhë ˈwɔn ˈˈgbɩɩ˗ gbɛ˗ ˈya ˗dho ˗an ꞊slɔɔ ˗a ˗ta. (Is. 57:14) «ˈˈSlʋ̈ʋ̈slʋ̈dhɛ ˗ʒian» ˈö kwa ˗bha ˈˈtʋ̈ŋ ˈgü ꞊dɛɛ ˈpö bhë ꞊wɛ? Kö ˗kwɛ 1919 ˗yö ˈti ˗wo ꞊köŋ, Zoova ˗yö ö ˗kɔ ˗yɛ mɛn ˈbha ˗nu ˈwo˗ ꞊bhlëë ˗ya ꞊dedewo ˗an ˗bha, ˈö ˈwo mɛn ꞊vadhɛ ˗takun kö ˗wo ˈgo Babidhɔnö ˗pö ˈkpii˗ ˈgü. (Is. 40:3) ˗An ˗bha yö ˗nu ˈwo˗ ˗kë bhë ˗a ꞊tɛɛ˗ ˗kë ꞊dhɛ ʒiaan baaˈˈ ˗sü ˈdhö. ˗Wo zuʋ̈puumɛn ˗nu ˗takun kö ˗wo ˈgo ꞊sua ˗zlanwo ˗nu ˈgü, ˗wo ˗da Zoova ˗dhɔkëmɛn ˗nu ˈˈpiʋ̈ kö waa˗ ˗nu ˗wa ˗dhɔkë ˗kɔ ˈö˗ ˗zokun ˗a ˈka. w23.05 15-16 § 8-9.

Zoova ˗ya ˈˈpiʋ̈ kö ˈkwa ö ˗bha yö kë zuʋ̈niidadhe waa zuʋ̈ˈˈ ˈˈpuu ˈka. (2 Ko. 9:7) Zoova ˗bha yö ˈbha ˈö˗ kë ˗sü ˈˈdhia ˈyaa kwa ˈgü, kwa dua ˗mü ˈkwa˗ kë ˗ʒian mɛɛnˈˈ ˗kplawo ˗ee? ˗Kwa bɔmɛn Pɔdhö ˗bha ˈwɔnzuan ˗ga. ˗Ya ˗pö: «꞊Gbaɔn ꞊në ˈa˗ wo n ˗dɩ ˗ta, ˈyö ˈa n zuëˈˈ kun n ˗bha ˈwɔn ꞊gban ˗wɔn ꞊gban ˈgü.» (1 Ko. 9:​25-27) ˈKö ˗kë ꞊dhɛ pë ˈö Zoova ˗ya pö ˗a ˗dhɛ ˗ya kë, ˗a kë ˗sü ˈˈdhia ˈyaa kun Pɔdhö ˈgü, ˗yö ˈˈgbɩɩdhɛ ˗wɔ ö ˗de ˗ta, ˈö ˗an ˗kë. Pë ˗nu ˈö Pɔdhö ˗yö ˗an ˗kë ˗wo ˗kë Zoova ˗dhɛ ˗së ˗ee? ꞊Ii, Zoova ˗yö ˈdhuëë˗ ˗kpɔ ˗a ˗bha ˈgüdɔgbɩɩsü ˗bha. (2 Tim. 4:​7, 8) ˗Kɔ do bhë ˗a ˈgü, ˈkwa kwa ˈgü dɔ ˈgbɩɩ˗ kö pë ˈö kwa zuʋ̈ˈˈ ˈˈpiʋ̈ ˈkwa˗ kë, ˗yö Zoova zuʋ̈ˈˈ ꞊nii ˗da ꞊dedewo. Pë ˈö˗ zuʋ̈ˈˈ ꞊nii ˗da ˈyö ˗tɔ, ˈkö ˗kë ꞊dhɛ pë ˈö ˈkwa˗ kë ˗ni ˈgü ˈˈdhʋ̈ bhë ˗a ˗dhɔ ꞊dede ˈyaa kwa kë, ˗ya ˈwɔn ˗dɔ ꞊dhɛ kwa kwa ˈgü ˗dɔ ˈˈgbɩɩ˗ ˈö ˈkwa˗ ˗kë yö ˗zë ö ˗dhɔ ˗bha. ꞊Dhɛ ˗kɔ do ˈö Zoova ˗yö ˈdhuëë˗ kpɔ ˗a ˈka Pɔdhö ˗bha bhë ˗a ˈdhö, ˗yö ˗dho ˈdhuëë˗ ˈkpɔ kwa ˗bha ˈpö. (Ps. 126:5) Zoova ˗yö ˈdhuëë˗ ˗nu ˈkpɔ ˗ni ˈgü kwa ˗bha, ˗a ˗bha yökësü ˗dhɔ ˗dho ˗da kwa ˈgü. w23.05 29 § 9-10.

Bɔmɛn Pɔdhö ˗yö mɛn ˗nu ˈö wo ˈti ˗dho dha Zoova ˗bha ˗dhɛkpaɔyi ˗gɔ bhë, ˗an ˗zɔn mɛn ˗nu ˈwo yi zë ˗ni ˈgü ˗an ˈka. ˈWɔn ˗nu ˈwo kë ˗ni ˈgü ˗an ˗züzü ˈwaa ˗an ˈsuan˗ bho, ɛɛnˈˈ ˈwaa˗ yö ꞊dhɛ ˈˈtʋ̈ŋ ˗yö ʒiö ˗ni ˈgü. ˗A ˈwɔn ˈgü, ˗kɔ ˈö ˈˈkpɔnŋtaawɔn ˗nu ˈdhö ˈdho ˗ni ˈgü ˗a ˗bha ɛɛnˈˈ pë ˈö ˗an dua ˈdhö ˗mü ˗wa kë ˈwaa˗ dɔ. Mɛn ꞊vadhɛ ˈwo ꞊dɛɛ, ˗wo ꞊dhɛ mɛn ˗nu ˈwo yi ˈgü ˗an ˈdhö. (Wlɔ. 11:8) ˈWaa ˈdhaŋ˗ bho ꞊dhɛ kwa ‹ˈˈtʋ̈ŋ ˗totaabhasü ˈgü,› ˈˈklʋʋbhɔdhe ˈkpii˗ nu ˗yi ˈyaa mü ꞊gblɛɛn. (2 Piɛ. 3:​3, 4) ˈˈKɛɛ ˗dhɛkpaɔyi ˈˈpɛpɛ ˈka, kwa dua ˗mü ˈkwa˗ ˈwɔn dɔ ꞊dhɛ ˗a ˈˈtʋ̈ŋ ˈnën yö kö ˈkwa ˗ya kwa ˈˈɲaan. (1 Tes. 5:6) Kwa ˗dho kwa zuʋ̈ˈˈ kë ˗saa, kö ˈkwa ˈwɔn ˗së kë ˗kplawo? ˈMën ˗kë? ˈYö ˗tɔ ꞊dhɛ kwa˗ ˗kë ˈˈdhʋ̈ kö kwa ˗kɔ ˈya ˗dho ˗da ˈˈsɛkɔɔwɔn ˗nu ɛɛnˈˈ ˗gban ˈˈsɛgɔmɛn ˗nu ˗gɔ ˗sü ˈgü. Zoova ˗bha ˗dhɛkpaɔyi ˗ya yö ꞊klöö˗, ˗wo ˗dho ˈˈgbɩɩdhɛ wɔ kwa ˗ta kö ˈkwa kwa ˗kɔ ˗da ˈwɔn ˗nu ˈwo bhë ˗an ˈgü. ˈˈKɛɛ ˈˈsuʋ̈ ˈya ˗dho kwa kë. ˗Zlan ˗bha ˗zuu ˈˈslʋ̈ʋ̈slʋ̈ ꞊mɔɔn˗ ˗bha ˈö kwa ˗takun ˈö kwa zuʋ̈ˈˈ ˗yö ˗kë ˗saa, ˈö ˈkwa ˗da ˈwɔn ˗së ˗nu ˗ʒian ˗ta.—Dhu. 12:​11, 12. w23.06 10 § 6-7.

ˈTɔ ˈö ˗kë Sansɔn ˈka bhë ˈkwa˗ man, ˈde kwa ˗zo ˗da ˗a ˈˈpiʋ̈? ˈYaa za ˈgü ꞊dhɛ ˗yö kwa ˗zo ˗da mɛn do ˈbha ˈö˗ ꞊faan kun ꞊va ˈö Biblö ˗ya ˗wɔn ꞊blɛɛ, ˗a ˈˈpiʋ̈. Gagade ˗mü, kwa Sansɔn ˗dɔ ˗a ꞊faan ˗bha ˗kë ꞊va ˗sü ˗bha. ˈˈKɛɛ ˗yö ˗da ˈwɔn yaa ˗ʒian ˗ta ˈö˗ ˈgüwɔn yaa ꞊dede ꞊slɔɔ. ˈKö ˗kë ˈˈdhʋ̈ Zoova ˗ya ˗sü ꞊dhɛ ˈö ˗bha yökëmɛn ˗së ˈdhö, ˈö˗ ˗bha ˗klu ö ˗bha ˗sü ˈwɔnzuan ˗ya Biblö ˈgü kwa ˗bha ˈka. Zoova ˗bɔ Sansɔn ˗ta ˈö ˈˈdhabhliwɔn ˗nu ˗kë ö ˗bha ˈˈsɛgümɛn Izraɛdhömɛn ˗nu ˗dhɛ. ˈDhɛ Sansɔn ˗wɔn ˗yö ˗kë ˈö ˗kwɛ ˈˈgblü ꞊va ˗yö ˗ʒiö, Zoova ˗ya ˗pö bɔmɛn Pɔdhö ˗dhɛ ˗ya ˈtɔ ˗ya ö ˗dhɔkëmɛn ˗nu ˈwo ˗klu ö ˗bha ˗an ꞊zinŋgü. (Ebl. 11:​32-34) Sansɔn ˗bha ˈwɔnzuan ˗yö kwa ꞊faanmën. ˈKö ˗kë ˗ʒiaanwo ꞊dhɛ ˗yö ˗kun ˈwɔn ˈˈgbɩɩ˗ ˈgü, ˗yö ö ˗zoyö Zoova ˗dhɛ. Kwa ꞊mɔɔn˗ ˗bha ˈkwa ˗gleŋ sü Sansɔn ˗bha, ˈö˗ ˗bha ˈwɔnzuan ˗yö kwa ꞊faanmën. w23.09 2 § 1-2.

ˈKwa bhɛɛˈˈ, ˈkwa kwa zuʋ̈ˈˈ ˈˈpʋ Zoova ˗dhɛ ˗kplawo, kwa ˗bha ˈwɔn ˈˈgbɩɩ˗ ˗nu ˗bun zuʋ̈saadhɛ ˈka ˗sü ˗gɛn ˗dho ˗gban ˈpö. (1 Tes. 5:17) ˗A ˈbha ˗ya kë kö ˈˈtʋ̈ŋ ˈö yö ˗a ˈgü, ˈwɔn ˈˈgbɩɩ˗ ꞊gbɔɔnsü ˈyaa kwa ˗bha. ˈˈKɛɛ ˈwɔn ˗ya ˗shiö kwa ˗dhɛ, ɛɛnˈˈ kwa zuʋ̈ˈˈ ˗ya ˈˈkaankwöö ɛɛnˈˈ ˈzü ˈpë ˈkwa dho ˗a kë ˈkwaa˗ dɔ ˗ni ˈgü, kwa˗ ˗pö Zoova ˗dhɛ ˗yö kwa ˗takun ˗ee? ˈWɔn ˈsɛɛn˗ ˗nu ˗wa nu kwa ˗ta ꞊dɛɛ ˈkwa ˗takundhe ˗dhɛ Zoova ˗gɔ, ˗a ˈˈgblʋ̈gblʋ̈ ˗nu ˗wa nu kwa ˗ta dhiʋ̈ˈˈ, ˗takundhe ˗dhɛ ˗a ˗gɔ ˗sü ˈti ˗dho kë kwa ˗kɔa ˈˈgbɩɩ˗. ˈKwa˗ kë ˈˈdhʋ̈, ˗yö ˗dho kë ga ˗sü ˈka kwa ˈgü ꞊dedewo ꞊dhɛ ˈˈtʋ̈ŋ waa ˗kɔ ˈö dho kwa bho ˗a ˈka ˈwɔn ˈˈgbɩɩ˗ ˗nu ˈgü, ˗ya ˗dɔ. (Ps. 27:​1, 3) ˈKwa ˈto ˗klü ˗sü ˈka Zoova ˗bha ˈwɔn ˈˈgbɩɩ˗ ˗nu ˈgü ꞊dɛɛ, kwa ˗dho ˗mɔn ˗bɔ ˈˈklʋʋbhɔdhe ˈkpii˗ ˈgü ˗sü ˗bha dhiʋ̈ˈˈ. (Wlɔ. 5:3) ˈMën ˗kë ˈkwa˗ pö ˈˈdhʋ̈? Kwa ꞊dhegblü ˗nu ꞊vadhɛ ˗wa ˗pö ꞊dhɛ ˈwɔn ˈˈgbɩɩ˗ ˗nu ˗wa nu wo ˗ta ˈwa ˗an bun, ˗ya ˗kë ˈö˗ ˈbha ˗nu ˗wa nu ꞊taabha ˈwo ˗mɔn ˗an bun ˗sü ˗bha ˈpö. ˈWɔn ˈˈgbɩɩ˗ ˗nu ˗bun zuʋ̈saadhɛ ˈka ˗sü ˗yö ˗an ˗bha ˗zoyödhe ˗gɛn ˗gban, ˈö ga ˗an ˈgü ꞊dhɛ Zoova ˗ya ˈˈpiʋ̈ kö ˈö wo ˗takun. ˗Zoyödhe ˈö ˈˈdhʋ̈, ˗yö ˗dho ˗a kë kö ˈwɔn ˈˈgbɩɩ˗ ˈˈwɛɛ ˈbha ˗ya nu ˗an ˗ta ˗wa ˈkun wo ˗bha.—Zak. 1:​2-4. w23.07 3 § 7-8.

Zoova ˗bha ˗dekëtɩtɩsü waa˗ ˗bha mɛn ˗nu ˗wëëzësü ˗wa ˗blü ˈö ˈwɔn ˈgüman. ˗A ˈwɔnzuan ˈnën ˗tɔ Zoova ˗ya ˗zɔn ꞊dhɛ ö ö ˗de ˗sü ˈˈtɩtɩ ˈˈtʋ̈ŋ ˈö kun ˗a ˈˈpiʋ̈ kö ˈö Sodɔmö ˗pö ˈgü shiʋ̈ˈˈ ˗a ˈka bhë, ˗a ˈgü. ˗Yö ö ˗bha ˈˈkiö ˗nu ˗bɔ kö ˗wa pö Lɔtö ˈö kun mɛn kpɛnŋdhö ˈka bhë ˗a ˗dhɛ ˗yö ˗duëë kö ˗yö ˈdho ˗tɔn ˈgü. ˈˈKɛɛ ˈyö ˗dho mü ˗sü ˈˈsuʋ̈ ˗kun Lɔtö ˈgü. ˗A ˗wɔn ˈgü, ˗ya ˗pö ˈˈkiö ˗nu ˗wo wo ꞊kwaa waa ö ˗bha ˈkɔɔmɛn ˗nu wo ˗zü kö ˈwo ˈdho Soa, ˈˈkwipö ˈnën ˈdɛdɛ ˈö Zoova kun ˗a ˈˈpiʋ̈ ˈpö kö ˈö˗ ˈgü shiʋ̈ˈˈ bhë, ˗a ˈgü. Zoova ꞊mɔɔn˗ ˗bha ˗be ˈö ˈˈgbɩɩdhɛ ˗wɔ Lɔtö ˗ta kö ˗yö ˈdho ˗tɔn ˈgü. ˈˈKɛɛ ˈyii˗ kë ˈˈdhʋ̈, ˗yö ˗wɩ ˗a ˗bha kö Lɔtö ˈdho Soa, ˈö ˈyii ˗a ˗dhɛ ˈˈwü. (ˈWun. 19:​18-22) ˈDhɛ ˗kwɛ këŋ ꞊va ˗yö ˗ʒiö, Zoova ˗yö Ninivömɛn ˗nu ˗wëëzë. ˗Yö ö ˗wodhiʋ̈lomɛn Ʒonasö ˗bɔ kö ˗yö ˗an ꞊kpɔɔ ꞊dhɛ ˗an ˗bha ˈwɔn yaa kë ˗sü ˗wɔn ˈgü, ö ˗dho ˗an ˈgü shiʋ̈ˈˈ. ˈˈKɛɛ ˈdhɛ Ninivömɛn ˗nu ˗wo go wo ˗bha ꞊sɔnŋ yaa ˈgü, ˗an ˗wëë ˗yö Zoova ˗kë ˈö ˈyii ˗an ˈgü shiʋ̈ˈˈ.—Jon. 3:​1, 10; 4:​10, 11. w23.07 21 § 5.

˗Gleŋ ˗mɛɛn ˈö ˈkwa˗ sü Ʒoasö ˗bha ˈwɔnzuan ˈgü? Ʒoasö ˗yö ˗kë ꞊dhɛ ˈˈdhü ˈö ɲun ˈti ˈˈsɛ ˈkun, ˈö ˈwo pë ˗gban ˗a ˗gɔ ˗a ˈdhö. ˈDhɛ Ʒoadö ˈö kun ˗a ˗takun ˗ni ˈgü ˈö ga, ˈyö Ʒoasö ˗yö ˗ya ö ˈˈtʋ ˈto ˗sü ˗bha ˗gban ˗Zlan ˗gɔ ˗mɛn ˗nu ˗bha. ˈWɔnzuan ˈö bhë ˗ya ˗zɔn kwa ˗dhɛ ꞊dhɛ kwa ˗bha ˈwɔn ˗man ˗Zlan ˗ta ˗sü dua ˈyaa ˗mü kö ˗yö ˗gban dosɛnŋ ˈwɔnzuan ˗së ˈö kwa ˗bha ˈkɔdhigümɛn ˗nu ɛɛnˈˈ ˗zlanwokɔdhigümɛn ˗nu ˗wa to kwa ˗gɔ ˗an ˗ta. ˈKwa˗ pö ˈkwa ˈto Zoova ˈˈsuee ˗kplawo, kwa dua ˗mü kö ˗a ˗dhɔ waa˗ ꞊bhlëë ˈö kwa ˈgü ˈkwa˗ ˗dadhiʋ̈ Biblö draanˈˈ ˗sü, kwa ˗zota ˗a ˈgü ˗sü, waa bhɛɛˈˈ ˗sü ˈka. (Jér. 17:​7, 8; Kodh. 2:​6, 7) Gagade ˈka, Zoova ˈyaa pë ꞊va ˗dhɛ kwa ˗gɔ. Pë dosɛnŋ ˈö˗ ˗dhɛ kwa ˗gɔ, ˗ya ˗zɔn Ecclésiaste 12:13 ˈgü ˈö˗ pö: «-Bhö ˈˈsuʋ̈ -Zlan ꞊dede -gɔ, kö ˈü- -bha ˈtɔŋ- -nu ꞊bhlëë -ya. -A -gɛn -mü ꞊dhɛ pë ˈö mɛnbhɩɩdhe dua ˈka ˈyö bhë.» ˈKwa ˈˈsuʋ̈ ˗Zlan ˗gɔ, ˈwɔn ˈˈgbɩɩ˗ ˗nu ˈwo dho nu kwa ˗ta ˗dhɛkpaɔ dhiʋ̈ˈˈ ˈgü bhë, kwa ˗dho bɔ ˗an ˈgü. Pë ˈbha ˈyii ˗dho ꞊mɔɔn˗ ˗bha kö ˗yö kwaa Zoova kwa ˗bha ˈˈtɔŋdëdhɛ shiʋ̈ˈˈ. w23.06 19 § 17-19.

˗Dhɛkpaɔ dhiaˈˈ ˈsëëdhɛ 21:5 zü ˗yö ˗dɔ ‹ˈmɛ ˈö gun ˗ya ˗sü ˈka ˗gbloo ˈkpii˗ bha˗ ˗ta bha ˗ya ˗pö n ˗dhɛ› ˗ta. (˗Dhɛ. 21:5) ˗Wo ꞊bhlëësü ˗mü, ˈyö ˗tɔ ꞊dhɛ Zoova yö ꞊dede ˈnën pö ˗gɛnɲan ˈka ˗yaaga ˈsëëdhɛ ˗be ˈö ˗a ˈgü. ˗A ˗bha ˈˈkiö do ɛɛnˈˈ Yesu, ˈyaa ˗mü. ˗A ˗kë ˈˈdhʋ̈ ˗sü ˗ya ˗zɔn ˈˈpuu ˈka ꞊dhɛ kwa dua ˗mü kö ˈkwa kwa ˗zo yö ꞊dedewo dhiaŋ ˈö dho ˗a zë ꞊taabha ˗a ˗dhɛ. ˈMën ˗kë? ˗A ˗gɛn ˗mü ꞊dhɛ Zoova «ˈyaa ꞊sua kë.» (Tit. 1:2) ˈDhɛ ˈˈdhʋ̈, ˗wo ˗nu ˈwo ˗Dhɛkpaɔ dhiaˈˈ ˈsëëdhɛ 21:​5, 6 ˈgü bhë ˗wo ˗dho yö ˈko ˈˈdhiʋ̈. ˗Kwa kwa ˈˈtʋ̈ŋ kë ˗wo kpö ˈö ˗kë «˗dhɛ ˗ga» ˈka bhë ˗a ˈgü. Glɛkö ˗wo ˈwo˗ ꞊dhiëëta ˈö ˗kë «˗dhɛ ˗ga» ˈka bhë, ˗yö ˗Dhɛkpaɔ dhiaˈˈ ˈsëëdhɛ ˈgü ˗gɛnɲan ˈka ꞊va. ˈMën ˗Zlan ˗ya pö ꞊taabha? ˗Ya ˗pö: «ˈMa pë ꞊gban ˈˈpɛpɛ kë ˗dee.» Zoova ˗dho ˈwɔn ˗nu ˈwo bhë ˗an kë ˗dhɛkpaɔ dhiʋ̈ˈˈ ˈgü. ˈˈKɛɛ ˈdhɛ ˗kë ꞊dhɛ ˗yö ˗kun ga ˗sü ˈka ˗a ˈgü ꞊dhɛ ö ˗dho ˗a kë bhë, ˗ya ˗wɔn ˗blɛɛ ꞊dhɛ pë ˈö ꞊yaa˗ kë ˈsaadhö ˗a ˈdhö.—Is. 46:10. w23.11 3-4 § 7-8.

Bɔmɛn Piɛdhö ˗yö ˈkozë ö ˗bha ˈˈtëëtëdhɛ ˗nu ˈka. ˗Kwaa ˈwɔnzuan ˈbha ˗nu ˗ga. ˈDhɛ Yesu ˗ya pö ꞊dhɛ ö ˗dho saanˈˈ sü ˈö ga ꞊dhɛ ˗kɔ ˈö Biblö ˗ya pö˗ ˈka ˗a ˈdhö, Piɛdhö ˗yö ˗dɔn ˗bho ˗a ˈka. (Mak. 8:​31-33) Piɛdhö waa Yesu ˗bha bɔmɛn ˗nu ˈwo ˈto ˗wo ˗duɛɛ ˈkpii˗ ˗dhɛ ˗takɔɔ. (Mak. 9:​33, 34) Gbeŋ ˗totaabhasü ˈö Yesu ˗ya ˗kë kö ˗yö ꞊kun ga bhë ˗a ˈgü, Piɛdhö ˗yö gɔndënën do ˈˈtʋ kpö ˗bho mü. (Zan 18:10) Gbeŋ ˈö ˈˈdhʋ̈ ˗a ˈgü, Piɛdhö ˗yö ˗suʋ̈ mɛnbhɩɩdhe ˗nu ˗gɔ ˈö˗ pö ˗gɛnɲan ˈka ˗yaaga ꞊dhɛ ˈyaa Yesu dɔ. (Mak. 14:​66-72) ˗A ˗wɔn ˈgü, Piɛdhö ˗yö ˈˈgbʋ ˗bɔ ꞊dedewo. Yesu ˈti ˈˈkan ö ˗bha bɔmɛn ˈö ˈgü ˗ya ga bhë, ˗a ˗bha. ˈDhɛ Yesu ˗go ga ˈgü, ˗ya ˗zɔn Piɛdhö ˗dhɛ ꞊dhɛ ˗a ˗dhɔ ˗yö ö ˗kë ˗kplawo. Yesu ˗ya ˗pö ˗a ˗dhɛ ˗yö ö ˗de kë ˈˈtɩtɩ kö ˗yö ö ˗zokë ö ˗bha ˗tuëë ˗nu ˈˈpiʋ̈. (Zan 21:​15-17) Piɛdhö ˗yö ˗wɩ ˗a ˗bha. ˗A ˗de ˗ʒiaan ˗yö ˗kun Zedhizadhɛmö Pantekɔtö yi ˈka, ˈö ˗zuu ˈˈslʋ̈ʋ̈slʋ̈ ˗yö nu ˗a ˗ta ˈpö ꞊dhɛ Yesu ˗bha gwëëˈˈ ˗blɛɛsü ˗nu ˈwo to ˗an ˈdhö. w23.09 22 § 6-7.

Bɔmɛn Piɛdhö ˗ya ˗pö mɛn zii ˗nu ˗dhɛ: ‹˗Ka ka ˗zʋ kë ˗Zlan ˗bha ˈnën ˗nu ˈgü ꞊dhɛ ˗kɔ ˈö ˗tuʋ̈ ˗maakëmɛ ˗yö ö ˗zʋ ˗kë ˈka ˗tuʋ̈ ˈˈpiʋ̈ ˗a ˈdhö.› (1 Piɛ. 5:​1-4) ꞊Ya kë ꞊dhɛ ka mɛn zii ˈka, kö yi˗ ˈwɔn ˗dɔ ꞊dhɛ ka ꞊dhegblü ˗nu ˗dhɔ ˗yö ka ˗kë ˈö ˈka˗ ˈˈpiʋ̈ kö ˈka ka ˗zokë ˗an ˈˈpiʋ̈. ˈˈKɛɛ ˗yö ꞊mɔɔn˗ ˗bha ˈö ˗kë ka ˈgü ꞊shiöŋ ꞊dhɛ yö ka ˗kɔ ˗ta ꞊va ɛɛnˈˈ ka sëë ˗ya bho ˈgbɛ, ˈkaa ˗mɔn ˗a ˗kë ˈˈdhʋ̈ ˗sü ˗bha. ˗Ya kë ka ˈka ˈˈdhʋ̈, ˈmën ˈka dho ˗a kë? ˗Ka ka zuʋ̈ˈˈ ˈˈpʋ Zoova ˗dhɛ. Piɛdhö ˗ya ˗pö: «ˈMɛ ˈö [˗Zlan] ˗bha dhiangzëmɛ ˈka ˗ya kë ö kë ˗kɔ ˗ta, [ . . . ] ˗ya kë faan ˈö˗ nu˗ ˗dhɛ bha˗ ˈka.» (1 Piɛ. 4:11) Ka ꞊dhegblü ˗nu ˗wo bɔ ˗ni ˈgü ˈwɔn ˈˈgbɩɩ˗ ˗nu ˈö ˈwaa ˗mɔn ˗an ˈˈɲan bhɔ ˗sü ˗bha ˈˈkpɔnŋtaadhɛ yaa ˈö yö ˗a ˈgü bhë, ˗an gü. Ka ˗zo ˈya ˗dho bhɔ ꞊dhɛ ‹˗tuʋ̈ ˗maakëmɛ ˈkpii˗› ˈö ˗kë Yesu ˈka bhë, ˗yö ꞊mɔɔn˗ ˗bha ˈö ˗an ˗takun ꞊dedewo ˈö ˗ʒiö ˗a ˈka ka ˗ta. ˗Yö ˗dho ˗a kë ˈˈdhʋ̈ ꞊dɛɛ, ˈö˗ ˗kë ˈˈdhʋ̈ ˈzü ˈˈkpɔnŋtaadhɛ ˗dɛɛ ˈgü. ˗Zlan ˗ya ˈˈpiʋ̈ kö mɛn zii ˗nu ˗wo ˗dhɔ ˗zɔn wo ꞊dhegblü ˗nu ˗dhɛ, ˗wo wo ˗zokë ˗an ˈˈpiʋ kö ˗wo kë ‹ˈwɔnzuan ˈka› ˗an ˗bha ˈka. w23.09 29-30 § 13-14.

Kwa dua -mü kö ˈkwa ˈˈkan mɛnbhɩɩdhe ˗nu ˗bha ˈwɔn yö ˗kɔ ˗bha. Kwa ˈwɔn yö ˗kɔ ˗nu ˗wa kë ꞊dhɛ mɛnbhɩɩdhe ˗nu ˗bha ˈdhö, kwa ˗zo ˗dho bhɔ Zoova waa ö ˗bha ˈtɔŋ˗ ˗nu ˗an ˈka. (1 Ko. 3:19) «꞊Kpɔɔdhɛ ˈö ˈˈkpɔnŋ ꞊taa yö» ˗yö mɛn ˗nu ˗blü kö ˗wo ˗Zlan ˗bha ˈtɔŋ˗ ˗nu ˗lögü. Kletiɛn ˈbha ˗nu ˈwo kun Pɛɛgamö waa Tiatii ˗pö ˈgü, ˗wo ˗kun ˈto ˗ni ˈgü ˈwo këyɔɔ ˗nu ˗bha ˈˈɲangüyaa waa ˗an ˗bha ꞊geebɔ gba ˗sü ˈˈpiʋ̈. Yesu ˗yö ˗dhioo ˗dɔ ˗an ˗ta ˈö˗ pö ꞊dhɛ ˗an dua ˈyaa ˗mü kö ˗wo wo ˈˈɲan ta mɛn ˗nu ˗bha ˈˈɲangüyaakësü ˗zü. (˗Dhɛ. 2:​14, 20) ꞊Dɛɛ, kwa këyɔɔ ˗nu ˗wa ˈˈpiʋ̈ ˈpö kö ˈwɔn yö ˗kɔ yaa ˗nu ˈwo bhë, ˗wo kë kwa ˗gɔ. Kwa ˗bha ˈkɔdhigümɛn ˗nu waa kwa dɔmɛn ˗nu ˗wo ꞊mɔɔn˗ ˗bha ˈwo˗ pö ꞊dhɛ kwa ˗bha ˈtɔŋ˗ ˗nu ˗wo ˈˈgbɩɩ˗, kë ˈˈdhʋ̈ kö ˈwo kwa ˗blü Zoova ˗bha ˈtɔŋ˗ ˗nu ˗lögü ˗sü ˗bha. ˗Wo ꞊mɔɔn˗ ˗bha ˈwo˗ pö ꞊dhɛ ö ˗de ˗kun ˈˈɲangüyaa ˗gɔ ˗sü ˈyaa ˗së ɛɛnˈˈ Biblö ˗bha ˈtɔŋ˗ ˗nu ˈˈtʋ̈ŋ ˗ya ʒiö. ˈˈTʋ̈ŋ ˈbha ˗nu ˈka, ˗yö ꞊mɔɔn˗ ˗bha ˈö ˗kë kwa ˈgü ꞊dhɛ ˈpë Zoova ˗bha ˗dhioo ˈbha ˗nu ˈwaa ˗së ˗a ˈdhö. Kwa ꞊mɔɔn˗ ˗bha ˗ʒiaanwo ˈkwa ‹˗ziö ˗wʋ ˈö ˗bɛn zë ˗sü ˈka [˗Zlan] ˗bha ˈsëëdhɛ ˈgü, ˗a ˗ta.›—1 Ko. 4:6. w23.07 16 § 10-11.

Madhi ˈö kun Yesu dhö ˈka bhë, ˗a ˗bhawɔn ˗kun ˈgüdɔgbɩɩsü ˗bha. ˈYaa kun gwaan˗, ˈˈkɛɛ ˗yö ˈgwü ˗sü. Madhi ˈti ˈnën ˗to do ö ˗bha ˗tosɛta ˈgü ˈˈdhiʋ̈ ˗be. ˈˈKɛɛ ˗a dua ˗mü kö ˗yö ö ˗zokë ˈnën ˈö dho kë Mesi ˈka ˗a ˈˈpiʋ̈. ˈDhɛ ˗kë ꞊dhɛ Madhi ˈyaa gɔɔn˗ ˗wɔn dɔ, ˗yö ˗dho ˗a blɛɛˈˈ Zozɛfö ˗dhɛ ˗kɔ ˗kë ꞊dhɛ? (Dhu. 1:​26-33) Madhi ˗yö ˗takundhe ˗slɔɔ ˈˈmɛn? ˗A ˈwɔnzuan ˈnën ˗tɔ ˗ya ˗pö Gabliɛ ˗dhɛ ꞊dhɛ ˈwɔn ˈbha ˗nu ˈwo ˗gban ö ˗bha yö ˈö bhë ˗a ˗bha ˗ya pö ö ˗dhɛ. (Dhu. 1:34) ˈDhɛ ˈˈtʋ̈ŋ ˈbha ˗yö ˗ʒiö, Madhi ˗yö ˗dho Zuda ˗pö do ˈö ˗ya ˗sü ˈka «˗tɔn ˗gbeng ˈgü» ˗a ˈgü kö ˈö ˗wo Dhizabɛtö ˗dhɛ. Dhizabɛtö ˗yö Madhi ˈˈnuɛ ˗bho, ˈö Zoova ˗yö ˗bɔ ˗a ˗ta kö ˈwɔn ˈö dho kë ˗dhɛkpaɔ dhiʋ̈ˈˈ ˈgü ˈö ˗gban ˈnën gɔɔn˗ ˈö dho bhɔ bhë ˗a ˗bha, ˗a blɛɛ Madhi ˗dhɛ. (Dhu. 1:​39-45) Madhi ˗ya ˗pö ꞊dhɛ Zoova «꞊në ˈwɔn ˈˈgblʋ̈gblʋ̈ ˗nu ˗kë ö ˗kɔ ˈka.» (Dhu. 1:​46-51) Zoova ˗yö ˗bɔ Gabliɛ waa Dhizabɛtö ˗an ˗ta kö ˈö Madhi ˈgü kë ˈˈgbɩɩ. w23.10 14-15 § 10-12.

˗Zuu ˈˈslʋ̈ʋ̈slʋ̈ ˗yö ˗nu Yesu ˗bha gwëëˈˈ ˈbha ˗nu ˗ta ˈwo ˗kë ˈˈɲɔn ˗a ꞊troo ˗nu ˈka, ˈö ˗mlɛɛn ˗detasü ˗da waa Zoova ˗nu ˗an ꞊zinŋgü. Mɛn ˗nu ˈwo ˈˈdhʋ̈ ˗wo 144.000. Waa Yesu ˗nu ˗wo ˗dho kë ˈˈsaabhomɛn ˗nu ˈka dhaŋ˗ ˈgü. (˗Dhɛ. 14:1) ˗Zlan ˗dhɔkë ˗a ˈgü sɔ ˈkɔ ˗dhɛ ˈˈslʋ̈ʋ̈slʋ̈ ˈnën ˗tɔ ˗an ˗bha ˗kë ˗Zlan gbö ˗nu ˈka ˗sü kö ˗wo kun ˈˈkpɔnŋ ꞊taa yö. (Wlɔ. 8:​15-17) ˗A ˗dhɛ ˈö ˈˈslʋ̈ʋ̈slʋ̈ ꞊dedewo ˈnën ˗tɔ ˈpö dhaŋgüdhɛ ˈö Zoova ˗yɛɛbhaadhɛ ˈka. «Sɔ ˈˈpɛn ꞊gblɛɛn» ˈö ˗dhɛ ˈˈslʋ̈ʋ̈slʋ̈ waa ˗dhɛ ˈö ˈˈslʋ̈ʋ̈slʋ̈ ꞊dedewo ˗an ˈˈpɛkoo bhë ˈnën ˗tɔ Yesu kwi. Yesu ˗ya ˈto mɛnbhɩɩdhe ˗kwi ˈgü, ˈyaa ꞊mɔɔn˗ ˗bha kö ˗yö ˈdho dhaŋ˗ ˈgü ˗yö kë ˈˈSaabhomɛn ˈKpii˗ ˈka ˗zlandhɔkëgükɔ ˈkpii˗ ˗dɛɛ ˈgü. ˈˈKɛɛ ˈdhɛ Yesu ˗yö ö kwi ˗nu ˈˈsaa˗ ˈka kwa ˗wɔn ˈgü, ˈyö dhaŋgüdhɛ ˈˈdhi ˗pʋ ˈˈɲɔn ˗a ꞊troo ˗nu ˗gɔ. ˗An dua ˗mü ˈpö kö ˗wo wo mɛnbhɩɩdhe ˗kwi ˈto kö ˗wo ꞊kun ˈdho dhaŋ˗ ˈgü.—Ebl. 10:​19, 20; 1 Ko. 15:50. w23.10 28 § 13.

˗Dhɛ ˈö Eflaimömɛn ˗nu ˗wa pö ˈyii ˈwɔn ˈbha kë ˗së, Ʒedeɔn ö zuʋ̈ˈˈ ˗kë ˗saa. (Juges 8:​1-3) ˗Yö ˈti˗ ˗daakë ˗an ˗gɔ ˗naandhe ˈka. ˗Ya ˗zɔn ꞊dhɛ ö ö ˗de ˗kë ˈˈtɩtɩ, ˈö ö ˈˈtʋ to ˗an ˗bha, ˈö˗ ˗daakë ˗an ˗gɔ ˗së ˈka. ˗Ya ˗kë ˈö ˗an zuʋ̈ˈˈ ˗yö dho ˈˈshia˗. Mɛn zii ˗nu ˈwo ꞊kpɔɔsü ˗wo ˗to Ʒedeɔn ˗bha ˈwɔnzuan ˈˈpiʋ̈. Mɛn ˗nu ꞊waa ˗an ˈwɔn kë ˗kɔ ˗nu ˗zëpiʋ̈dhɛ yö ˗wa blɛɛˈˈ ˗ni ˈgü, ˗wo wo ˈˈtʋ ˗to ˗së ˈka, ˈö ˈwo˗ ˗daakë dhɔŋdhɔŋsü ˈka. (Zak. 3:13) ˗A ˗kë ˈˈdhʋ̈ ˗sü ˗yö ˗nu ˗dhikodhɛ ˈka ˗zlanwokɔdhi ˈgü. ˈDhɛ Ʒedeɔn ˗kɔ ˗yö ˗ʒiö Madianmɛn ˗nu ˗gɔ, ˈö mɛn ˗nu ˗wo ˗ya ˗a ˈtɔ bhɔ ˗sü ˗bha, ˗ya ˗zɔn ˗an ˗dhɛ ꞊dhɛ Zoova ˈnën ˗an dua ˈdhö ˗mü kö ˗wa ˈtɔ bhɔ. (Juges 8:​22, 23) Mɛn zii ˗nu ˗dho ˈto ˗a ˗bha ˈwɔnzuan ˈˈpiʋ̈ ˗kɔ ˗kë ꞊dhɛ? ˗An dua ˗mü kö ˗wo Zoova ˈtɔ bhɔ yö ˈˈpɛpɛ ˈwo˗ ˗kë ˗an ˗wɔn ˈgü. (1 Ko. 4:​6, 7) ˗A ˈwɔnzuan do ˈnën ˗tɔ, ꞊ya kë ꞊dhɛ ˗wa mɛn zii ˈbha ˈˈnuɛ bho ˗a ˗bha mɛn ꞊klaŋkë ˗së ˈka ˗sü ˗bha, ˗a dua ˗mü kö ˗ya ˗zɔn ꞊dhɛ ö˗ ˗sü ˗Zlan ˗Wo ˈgü, ɛɛnˈˈ ˈzü ˗ya pö ꞊dhɛ Zoova ˗bha ˗kɔlokota ˈnën mɛn ꞊gban kwa ˗kian. Mɛn zii ˗nu dua ˗mü kö ꞊ya kë ꞊dhɛ ˗an ˗bha mɛn ꞊klaŋkë ˗kɔ ˗yö Zoova ˈtɔ ˗bhɔ ɛɛnˈˈ ˗yö mɛn ˗nu ˈˈɲan ˗bɔ wo ˗zë ˗an ˗ta, ˗wo wo ˗zota ˗a ˈgü. w23.06 4 § 7-8.

ˈPë ˈkwa ꞊bhɛɛ ˗a ˗wɔn ˈgü ˈkwa ˈti˗ ꞊slɔɔ, kwa ꞊mɔɔn˗ ˗bha ˈkwa dhɛɛˈˈ ˈkpɔ kwa ˗de ˗gɔ ˈkwa˗ pö ‹pë ˈö ˗së n ˗man ˈka ˈnën ˗a ꞊bhɛɛ ˗a ˈwɔn ˈgü ˗ee?› ˗Ya kë ꞊shiöŋ kwa˗ ˗pö kwa ˗de ˗dhɛ ꞊dhɛ pë ˈö ˗së kwa ˗bha ˈka, kwa˗ ˗dɔ. ˈˈKɛɛ kö ˗a ˈbha ˗ya kë pë ˗nu ˈkwa ˗an ˗dhɛ ˈˈdhʋ̈, ˈwaa ˗së kwa ˗bha ˈka. Kwa bhɛɛˈˈ ˗ni ˈgü ˈwɔn ˈbha ˈˈɲan bhɔ ˗kɔ ˈgü, ˗a ˈbha ˗ya kë kö ˗a ˈˈɲan bhɔ ˗kɔ ˗së ˈö ˗ʒiö kwa ˗bha ˗ta ˗yö ˗dhö. ˗Ya ˈgo mü, pë ˗nu ˈö ˈkwa ꞊bhɛɛ ˗an ˗wɔn ˈgü, ˈwaa ˗bɛ Zoova dhɔɔbhaawɔn ˗bha. (1 Zn. 5:14) ˗A ˈwɔnzuan ˈnën ˗tɔ ˈnënmɛn ˗nu ꞊mɔɔn˗ ˗bha ˗wa po Zoova ˗dhɛ ˗ya kë kö ˗wo ˗bha ˈnën ˗yö ˈto gagade ˗ʒiaan ˗ta. Bhɛɛˈˈ ˗kɔ ˗së ꞊dede ˗mü, ˈˈkɛɛ Zoova ˈyaa ˈˈgbɩɩdhɛ wɔ mɛn ˈbha ˗ta kö ˗yö ö ˗dhɔkë. ˗Ya ˈˈpiʋ̈ kö mɛn ˈˈpɛpɛ ˈö dho ˈö yö ˗a ˈka kwa ˗bha ˈnën ˗nu ˗ta, ˈkwa kwa ˗kɔ ˈˈyɛ ö ˗dhɔkësü ˗bha. (Deut. 10:​12, 13; 30:​19, 20) ˈDhɛ ˈˈdhʋ̈, ˈnënmɛn ˗nu ꞊mɔɔn˗ ˗bha ˈwo ꞊bhɛɛ Zoova ˗dhɛ kö ˗yö ˈwo ˗takun ˈwo ˈpa ˈwo ˗bha ˈnën ˗nu zuʋ̈ˈˈ ˈka, kë ˈˈdhʋ̈ kö Zoova ˗dhɔ ˗yö ˗da ˗a zuʋ̈ˈˈ ˈgü kö ˗wo kë ˗a ˈˈtɔŋdë ˗nu ˈka.—Prov. 22:6; Efɛ. 6:4. w23.11 21 § 5; 23 § 12.

ˈMën ˗kë ˈö˗ ˗wɔn ˈdhö ˈˈgbɩɩ˗ kö ˈkwa ˗dhɔ ˗zɔn mɛn ˈˈwɛɛ ˗nu ˗dhɛ ˗an ˗zogban ˗sü ˈka? ˗Wo ˈö Pɔdhö ˗ya ˗pö ˈö ˗kë mɛn «˗zogban» ˗sü ˈka bhë, Biblö ˈgüpʋmɛn do ˗ya ˗pö ˗a ˗gɛn ˈnën ˗tɔ ꞊dhɛ «˗kë mɛn ˈbha ˈö bɔ ˗ni ˈgü ˈwɔn ˈˈgbɩɩ˗ ˈgü ˗a ˈˈpiʋ̈ ˗sü kö ˈkwa˗ ꞊faanmën.» ˈDhɛ ˈˈdhʋ̈ kwa ꞊dhegblü ˈbha ˗yö bɔ ˗ni ˈgü ˈwɔn ˈˈgbɩɩ˗ ˈgü, ˗kwaa ꞊faanmën kö ˗yö ˈdho Zoova ˗dhɔkë ˗sü ˈka ˈˈdhiʋ̈. ˈˈTʋ̈ŋ ˈˈpɛpɛ ˈö ˈkwa kwa ꞊dhegblü do ˗zogban ˗a ˈka, kö kwa˗ ˗zɔn ˗ni ˈgü ˗a ˗dhɛ ꞊dhɛ ˗a ˗dhɔ ˗yö kwa ˗kë. (2 Ko. 7:​6, 7, 13) Mɛn ˗wëëzësü waa mɛn ˗zogbansü ˗wo ˗gban ˈkwëë˗ ˗kɔ ˗kë ꞊dhɛ? Mɛn ˈö mɛn ˗wëë ˗ya ˗kë ˗ya ˈˈslö ˗mɛɛn kö ˈö˗ ˗zogban, ˈgo mü kö ˈö˗ ˗takun ˗a ˗bha ˈwɔn ˈˈgbɩɩ˗ ˗nu ˈgü. ˈDhɛ ˈˈdhʋ̈ mɛn ˗nu ˗wëë ˗ya kwa kë, ˗yö kwa ˗blü kö ˈkwa ˗an ˗takun. Pɔdhö ˗ya ˗pö ꞊dhɛ Zoova ˗bha mɛn ˗wëëzësü ˈnën ˗blü kwa ˗takun ˗sü ˗bha. Pɔdhö ˗ya ˗pö ˈzü ꞊dhɛ ‹mɛ ˈˈbhɩɩ˗ ˗nu ˗wëë ˗yö Zoova ˗kë ˗ziiziisü ˈka, ˈö mɛ ˗zʋ ˗gban ˗kɔ ꞊gban ˗kɔ ꞊gban ˈgü.›—2 Ko. 1:3. w23.11 9-10 § 8-10.

Gagade ˈka, ˈˈklʋʋbhɔdhe ꞊mɔɔn˗ ˗bha ˈö nu Yesu ˗bha gwëëˈˈ ˗nu ˈˈpɛpɛ ˗ta. ˗Kwa bɔmɛn Pɔdhö ˗bha ˈwɔnzuan ˗ga. ˗Ya ˗pö Tesadhonikömɛn ˗nu ˗dhɛ: «Ka˗ ˈwɔn ˗dɔ ꞊dhɛ ˈˈtʋ̈ng ˈyi gun˗ ˈka ka ˈˈpiʋ̈ mü bha, ˈyii ˈwɔn bha˗ ˈbha ˗bin ka ˗gɔ. ˈYi˗ ˗to ˈˈdhiʋ̈ ˈyi˗ pö ka ˗dhɛ ꞊dhɛ ˈwɔn˗ ˗dho ꞊gbaɔn kwa ˗ta, ˈö ˈkwa sëë bho ꞊dhɛ ˗kɔ ꞊dede ˈö kë sië˗ ˈka bha˗ ˈdhö.» (1 Tes. 3:4) ˗Ya ˗pö ˈzü Kodhɛngtömɛn ˗nu ˗dhɛ: «N dheebhang ˗nu ˈyaa yi ˈˈpiʋ̈ tongtongdhö ꞊dhɛ sëë ˗ziisü ˈyi˗ bho [ . . . ] bha ˈka kë˗ ˈgü ka tii ˗bha. [ . . . ] ˈÖ dɔ mü kö yi dha ˗wɔn ˗zian ˈyaa yi ˈˈyaan ˈzu.» (2 Ko. 1:8; 11:​23-27) ˈWɔn ˈˈgbɩɩ˗ suu do ˈö bhë ˗yö ꞊mɔɔn˗ ˗bha ˈö nu kletiɛn ˗nu ˗ta ꞊dɛɛ. (2 Tim. 3:12) ˈDhɛ ˈka ˗ya ˗zoyö Yesu ˗dhɛ ˗sü waa ˗ʒiö ˗a ˈˈpiʋ̈ ˗sü ˗bha, ˗a ˈbha ˗ya kë kö ka ˈˈtɛɛbɔ ˗nu waa ka ˗bha ˈkɔdhigümɛn ˗nu ˗wo pë ˈˈdhiʋ̈˗ ˗kë ka ˈka. Ɛɛnˈˈ ˗a ˈbha ˗ya kë, ka ˗bha ˗kë kpɛnŋdhösü ˗wɔn ˈgü, ka ˗gɔmɛn ɛɛnˈˈ ka yökëyoo ˗nu ˗wo ˈwɔn ˈˈgbɩɩ˗ ˗wɔ ka ˗ta yö ˈˈdhiʋ̈. (Ebl. 13:18) Ka ˗bha ˗zoyödhe ˗wɔn ˗blɛɛ mɛn ˈˈwɛɛ ˗nu ˗dhɛ ˗sü ˗wɔn ˈgü, ˈˈsɛgɔdhiʋ̈mɛn ˗nu ˗wo ˗gban ka ˗gɔ ˗ee? ˈWɔn ˈˈgbɩɩ˗ suu ˈˈoo ˗su ˈö nu kwa ˗ta, Pɔdhö ˗ya ˗pö ꞊dhɛ kwa dua ˗mü kö kwa zuʋ̈ˈˈ ˈˈgblü ˗yö dhi ˗an ˈgü. w23.12 10-11 § 9-10.

Zakɔbö ˗bɔ ˈwɔn ˈˈgbɩɩ˗ ꞊va ˗nu ˈgü. ˗A gbö ˗nu ꞊plɛ, Simeɔn waa Dhevi ˗wo ˈlëë˗ ˗dɔ wo ˗bha ˈkɔdhigümɛn ˗nu ˗bha ˈwo Zoova ˈtɔ zë. ˗Ya ˈgo mü ˈzü Zakɔbö ˗bha ꞊dhɔɔdhe Dhasɛdhö ˗wɔn ˗yö ˗kë kö ˗yö ö ˗bha ˈnën ꞊plɛ ˗bha ˗naan ˈkpɔ ˗ni ˈgü. Din ˈö ˗da ˗a ˗wɔn ˈgü, Zakɔbö ˗yö ˗go ö ˗gɔ ˈˈsɛ ˈgü ˈö dho Ezitö kö ˗ya kë zii. (ˈWun. 35:​16-19; 37:28; 45:​9-11, 28) Zakɔbö ˗bha ˗zoyö Zoova waa pë ˗nu ˈö ˗an ˈˈplüün bho ˗an ˗dhɛ ˗sü ˈyii ˈˈkan ˈˈpiʋ̈ toŋtoŋdhö. ˗A ˗wɔn ˈgü, Zoova ˗ya ˗zɔn ˗a ˗dhɛ ꞊dhɛ ˗a ˈˈdhiaa ˗yö ö ˈgü. ˗A ˈwɔnzuan ˈnën ˗tɔ, Zoova ˗yö ˈdhuëë˗ ˗kpɔ Zakɔbö ˗bha ˈö˗ ꞊slɔɔpë ˗nu ˗kë ꞊va. ˈYaa za ˈgü ꞊dhɛ Zakɔbö ˗yö Zoova ˈˈnuɛ ˗bho ꞊dedewo ˗kpan Zozɛfö ˗bha ˗sü ˗wɔn ˈgü, ˈˈkɛɛ kö ˗a ˗bha ˈgü ˗be Zozɛfö ˗ya ˗ga ˗a yi ˗ya ꞊gwëë. ˈˈTɔŋdëdhɛ ˗së ˈö kun waa Zoova ˗an ꞊zinŋgü ˗ya ˗kë ˈö Zakɔbö ˗yö bɔ ˈwɔn ˈˈgbɩɩ˗ ˗nu ˈgü. (ˈWun. 30:43; 32:​9, 10; 46:​28-30) ˈˈTɔŋdëdhɛ ˈö kwaa Zoova kwa ꞊zinŋgü ˈkwa ˗gɛn ˗gban, ˈwɔn ˈˈgbɩɩ˗ ˗nu ˗wa ˈˈkan kwa ˈgü, kwa ˗dho bɔ ˗an ˈgü ˈpö. w23.04 15 § 6-7.

Psaume 23 ˗yö ˈˈtan do ˈö˗ ˗zɔn ꞊dhɛ kwa ˗dhɔ ˗yö Zoova ˗kë ˈö ö ˗zokë kwa ˈˈpiʋ̈ ꞊dedewo, ˗a ˈka. ˗A ˗wɔn ˈgü, Davi ˗yö ˗mlɛɛn ꞊dede ˈö kun waa ö ˗Maankëmɛn Zoova wo ꞊zinŋgü ˗a ˗wɔn ˗blɛɛ. Zoova ˗bha ˈˈdhiʋ̈süsü ˗yö Davi zuʋ̈ˈˈ ˗kë ˗saa, ˈö Davi ˗ya ˗zɔn ˈpö ꞊dhɛ ö ö ˗zoyö ˗a ˗dhɛ ˈwɔn ˈˈpɛpɛ ˈgü. Davi ˗ya ˈwɔn ˗dɔ ˈzü ꞊dhɛ Zoova ˗dho ˗dhɔ ˗zɔn ö ˗dhɛ yi ˈˈpɛpɛ ˈka, ö ˗bha ˗tosɛta ꞊gban ˈgü. ˈMën Davi ˗blü ˈdhaŋ˗ ˗dho Zoova ˈˈdhiʋ̈ ˗sü ˗bha? Davi ˗yö ˗kë ö ˗de ˈgü ˗së, ˈyö sü ꞊dhɛ Zoova ˗ya ˗bhawɔnyëëpë ˗nu ˈˈɲan ˗bhɔ ˗kplawo. Davi ˗ya ˗yö ˈzü ꞊dhɛ Zoova ˈˈtɔŋdë ˗mü ö ˈka ˈö ö ˈˈdhiaa ˈdhö˗ ˈgü. ˗A ˗wɔn ˈgü, ˗yö ˗kun ga ˗sü ˈka ˗a ˈgü ꞊dhɛ ˈwɔn suu ˈˈoo ˗sü ˈö dho nu ö ˗ta ˗dhɛkpaɔ dhiʋ̈ˈˈ ˈgü, Zoova ˗dho ö ˗zokë ö ˈˈpiʋ̈ ˗kplawo. ˗Yö ˗kun ga ˗sü ˈka ˗a ˈgü ˈzü ꞊dhɛ Zoova ˗bha ˗dhɔ ˈˈpii ˗yö ˈˈgbɩɩ˗ ˈö ˗ʒiö ˗a ˈka ö ˗bha zuʋ̈dhiʋ̈tɛwɔn ˗nu ˗ta. ˗A ˈwɔn ˗dɔ ˗sü ˈö ˈˈdhʋ̈ ˗ya ˗takun ˈö zuʋ̈ˈˈ ˈˈgblü ˗yö ˗dhi.—Ps. 16:11. w24.01 28-29 § 12-13.

ˈÖ sü ˈˈLüman ˗gblü ˈˈtʋ̈ŋ ˗bha ˈö yö˗ ˈka ꞊dɛɛ ˗bha ˈˈsɛ ꞊vadhɛ ˈgü, ˗potaadhe ˗yö Zoova ˗dhɔkëmɛn ˗nu ˗gɔ kö ˗wo ˗zlanwopö. Mɛn ꞊vadhɛ ˗wa bɔ ˗a ˗ta ˗wa Zoova dɔ. ꞊Dɛɛ, kwa ˈˈdhiʋ̈ʒiöwomɛn ˗nu ˗wo ˗bɔ Yesu ˗bha ˗takundhe ˗ta ˈwo ˈˈdhiʋ̈sü kwa ˈka. ˗Wa ˈˈpiʋ̈ kö ˗dhioo ˗nu ˈwo ˗an dɔ kwa ˗ta bhë, ˗wo kë ˈwɔn yö ˗kɔ ˈö go dhaŋ˗ ˈgü ˗a ˈka. ˗Dhioo ˗nu ˈwo ˈˈdhʋ̈ ˗wo ˗an ˗nu ˈˈpian do ˈˈpiʋ̈ ˗maankëmɛn ˗nu waa mɛn zii ˗nu ˗dhɛ kö ˗wo ˗zlanwokɔdhigümɛn ˗nu ˗takun ˗an ˈka. Mɛn zii ˗nu ˈwo ˈˈɲɔn ˗a ꞊troo ˗nu ˈka bhë, ˗wo Klito «˗kɔ ˗së ˈgü.» (˗Dhɛ. 2:1) ˈˈKɛɛ mɛn zii ˗nu ˈwo ˈˈdhʋ̈ ˈwɔn yaa kë ˗dhii ˗yö ˗an ˗bha ˈö ˈwɔn ˗nu ˗wo zë ˗an ˗gɔ. ˈˈTʋ̈ŋ ˈbha ˗nu ˈka ˈwɔn ˗nu ˗wo ˗zë Moizö waa Ʒozue ˗an ˗gɔ, ˈö ˗kë ˈˈdhʋ̈ ˈpö bɔmɛn ˗nu ˈka. (Nomb. 20:12; Jos. 9:​14, 15; Wlɔ. 3:23) ˈˈKɛɛ kwa˗ ˗yö ˈˈpuu ˈka ꞊dhɛ Klito ˗yö ˈˈdhiʋ̈sü ˗ni ˈgü gwëëmi ˗towotasü waa mɛn zii ˗nu ˗an ˈka, ˈö dho ˗a kë ˈˈdhʋ̈ ˗kplawo. ˗A ˗wɔn ˈgü, ˗a ˗dhɛ ˗mü kö ˈkwa ˈdhaŋ˗ bho ˗a ˗bha ˈˈdhiʋ̈sü kwa ˈka ˗sü ˈö bɔ ˗a ˈka ˗an ˗ta bhë, ˗a ˈˈdhiʋ̈. w24.02 23-24 § 13-14.

꞊Dɛɛ, ˗wɔn ˗së ˗nu ˈö Zoova ˗yö ˗an ˗kë kwa ˗dhɛ waa ˗a ˗dhɔ ˈö kwa ˈgü kwa˗ ˗wɔn blɛɛˈˈ ˗ni ˈgü mɛn ˗nu ˗dhɛ, kwa ˈˈdhiaa ˗yö ˗da ˗a ˈgü. Kwa ˗zlanwopö ˗ni ˈgü, kwa˗ ˈˈpiʋ̈ kö mɛn ˗nu ˗wo ꞊ɲɔɔn Zoova ˈˈsuee kö ˗wo kwa Dë dhɔɔbhaasü ˈö bhë ˗a dɔ. (Zak. 4:8) ˗Kɔ ˈö Biblö ˗yö Zoova ˗bha ˈˈklʋʋsë ˗nu ˈwo ˗kë ꞊dhɛ ˗dhɔ, kpɛnŋdhödhɛ, ꞊kpɔɔdhɛ, ˈˈpiigbɩɩdhɛ waa˗ ˈˈwɛɛ ˈbha ˗nu ˈdhö ˗an ˗wɔn ˗blɛɛ ˗a ˈka bhë, ˗a ˗zɔn mɛn ˈˈwɛɛ ˗nu ˗dhɛ ˗sü ˗yö kwa zuʋ̈ˈˈ ˈˈgblü ˗dhi ꞊dedewo. ˈKwa kwa ˈgü dɔ ˈˈgbɩɩ˗ kö ˈkwa ˈto Zoova ˗bha ˈwɔnzuan ˈˈpiʋ̈, kwa˗ ˈtɔ ˗bhɔ ˈö kwa ˈˈdhiaa ˗yö ˗da ˗a ˈgü. ˈKwa˗ kë ˈˈdhʋ̈, mɛn ˈˈwɛɛ ˗nu ˗wa ˗yö ꞊dhɛ kwaa ˈwɔnyaakëmɛn ˗nu ˈwo ˈˈkpɔnŋ ꞊taa yö ˈkwaa do, ˈö˗ ˈwɔn ˗yö ˗an kun. (Mat. 5:​14-16) Kwaa˗ ˗nu ˈkwa kë ˗dhɛ do ˈgü, kwa ꞊mɔɔn˗ ˗bha kö ˈpë ˗kë ˈkwaa ˈwɔn ˗nu kë ꞊dhɛ ˗an ˈdhö bhë, ˈkwa˗ ˈgü ˈˈpʋ̈ ˗an ˗dhɛ. ˗A ˗kë ˈˈdhʋ̈ ˗sü ˗dho zuʋ̈puumɛn ˗nu ꞊ɲɔɔn Zoova ˈˈsuee. Kwa Zoova ˈtɔ bhɔ ˗ni ˈgü ꞊dhɛ ˗kɔ ˈö bhë ˗a ˈdhö, ˗yö ˗kë ˗a ˗dhɛ ˗së ꞊dedewo.—1 Tim. 2:​3, 4. w24.02 10 § 7.

Wlüünën gɔɔn˗ ˗nu, ˈka˗ pö ˈka kë kletiɛn ˗kiansü ˗nu ˈka, ka dua ˗mü kö ˈka yö ˈbha ˗nu kë ˗sü draanˈˈ. ˈKa˗ kë ˈˈdhʋ̈, ˗yö ˗dho ka ˗takun kö ˈka ˈˈwɩ yö ˗nu kë ˗sü ˗bha ˗zlanwokɔdhi ˈgü, kö yö ˗nu ˈwo dho ˗a kë kö ˈka ka ˗zokë ka ˗de waa ka ˗bha ˈkɔdhigümɛn ˗nu ˈˈpiʋ̈, ˈka ˗an kë ˈpö. ˗Ya ˈgo mü, kö ˗mlɛɛn ˗së ˗yö kë kaa mɛn ˈˈwɛɛ ˗nu ka ꞊zinŋgü. ˗A ˈwɔnzuan ˈnën ˗tɔ ˗ka pë ˗wopösü waa˗ ˗ya ˗sü draanˈˈ ˗së ˈka. Biblö ˗ya ˗pö ꞊dhɛ mɛn ˈö ˗Zlan ˈˈDhiwo ˗wo pö ˗dhɛkpaɔyi ˈˈpɛpɛ ˈka ˈö ö ˗zota ˗a ˈgü, ˗a ˗bha ˗yö ˗së ˈö ˈwɔn ˗nu ˗wo ˗dhi ˗a ˗gɔ. (Ps. 1:​1-3) ˗A ˗mɛn ˗ya Biblö ˗wo pö ˗dhɛkpaɔyi ˈˈpɛpɛ ˈka, ˗yö ˗dho Zoova ˗zotakɔ dɔ ˈö˗ ˗takun ˈö ˗zotakɔ ˗së ˗kë ˗a ˗gɔ ˈpö, ˈö ˈwɔn ˗nu yö ˈko ˈˈdhiʋ̈ ˗së ˈka. (Prov. 1:​3, 4) Kwa ꞊dhegblü ˗nu ˗bhawɔn ˗yö gɔɔn˗ ˗nu ˈwo dho mɛn ˗nu ꞊klaŋkë, ˈwo dho ˗dhioo dɔ mɛn ˗nu ˗ta Biblö ˈka, ˗an ˗bha. Kö ˈka pë ˗wopösü waa˗ ˗ya ˗sü dɔ ˗së ˈka, ka ˗bha ˈˈdhɛɛtadhiaŋ˗ waa ˈwɔn ˗daa ˗nu ˗wo ˗dho ˈwɔn ˗së kë mɛn ˈˈwɛɛ ˗nu ˗dhɛ ˈö ˗an ˗bha ˗zoyödhe ˗gɛn ˗yö ˗gban. ˗Wo ꞊mɔɔn˗ ˗bha ˈwo ka ꞊dede ka ˗bha ˗zoyödhe ˗gɛn ˗gban ˈpö, ˈwo mɛn ˈˈwɛɛ ˗nu ꞊faanmën. w23.12 26-27 § 9-11.

ˈˈSuʋ̈ ˗yö kwa kë ˗ni ˈgü, ˗kwa kwa ˗zota pë ˗nu ˈö Zoova dho ˗an kë ˗dhɛkpaɔ dhiʋ̈ˈˈ ˈgü kö Sɔtraan ˈgü ˗ya shiʋ̈ˈˈ bhë ˗an ˈgü. ˈˈSlözɔndhe do ˈö kun ˗kwɛ 2014 ˗bha ˗bhɔkwëë ˈkpii˗ ploglamö ˈgü ˗a ˈgü, ˈkɔdë do waa ö ˗bha ˈkɔdhigümɛn ˗nu ˗wo ˗kun 2 Timote 3:​1-5 ˗wɔn blɛɛˈˈ ˗ni ˈgü, ˈwo˗ pö ꞊dhɛ Biblö ˈˈɲan ˈö bhë ˗yö ˗gban ꞊bhɔɔ ˈˈsɛ ˗bha ˗be ˗yö ˗dho ˗a pö: «Zuʋ̈gblüdhi ꞊dede ˗dho kë ˈˈkpɔnŋtaadhɛ ˗dɛɛ ˈgü. ˗A ˗gɛn ˗mü ꞊dhɛ ˗a ˈˈtʋ̈ng bhë˗ ˈgü, ˗dhɔkaadhe ˗dho kë mɛn ˗nu ꞊zinŋgü, ˈö gagade ˗dhɔ ˗yö ˗an ˗kë. Mɛn ˗nu ˗dho wo ˗de ˗naan dɔ ˈwo wo ˗de sü ˈˈtɩtɩ, ˈwo ˗Zlan ˈtɔ bhɔ. ˈNën ˗nu ˗dho ˈwɔnman wo ˈkpɔmɛn ˗nu ˗ta. Mɛn ˗nu ˗dho ˈwɔn ˗së ˈwo˗ ˗kë ˗an ˗dhɛ ˗a dɔ, ˈwo to wo ˗wo ˗ta, ˈö ˗an ˗bha ˈkɔdhigümɛn ˗nu ˗dhɔ ˗yö ˗an ˗kë, ˈö ˈkowogümandhe ˗yö ˗kë ˗an ꞊zinŋgü. ˗Wo ˗dho ˈwɔn ˗së blɛɛˈˈ wo ˈko ˗nu ˗bha, ˈwɔn ˗së ˗dhɔ ˗dho ˗an kë, ˈwo ˗kë ˈdhaŋ˗ ˗bho ˗a ˈˈdhiʋ̈ ˗mɛn ˗nu ˈka. ˗Wo ˗dho kë ˈzü ꞊dhɔŋsü, ˗Zlan ˗dhɔ ˗dhö ˗an kë ˈö ˗ʒiö ˗niidadhe kë ˗sü ˗ta. ˗Bhö ꞊nënŋ mɛn ˈwo bhë ˗an ˗bha.» ˗Ya kë ꞊shiöŋ, kwaa kwa ˗bha ˈkɔdhigümɛn ˗nu ɛɛnˈˈ kwa ꞊dhegblü ˗nu kwa ˈˈkpɔnŋtaadhɛ ˗dɛɛ ˗wɔn ˗blɛɛ ˗ee? w24.01 6 § 13-14.

˗A ˈwɔn dɔ ˗sü ˈö ꞊dhɛ Zoova ˗dhɔkëmɛn ˗nu ˗lokotasü ˈˈdhiaa ˗ya ˈgü bhë, ˗yö kwa ˗zogban ꞊dedewo! Biblö ˗ya ˗pö: «Zoova ˗bha ˈˈsɛgümɛn ˗nu ˈˈdhiaa ˗ya ˈgü.» (Ps. 149:4) ˈˈKɛɛ ˗ya kë ꞊shiöŋ, mɛn ˈbha ˗nu ˈgü ˗yö ˗ga ˈwo wo ˗de dhɛɛˈˈ kpɔ ˈwo˗ pö: «N ˈˈdhiaa ˗yö Zoova ˈgü ꞊dedewo ˗ee?» Biblö ˗yö Zoova ˗dhɔkëmɛn ˗nu ꞊vadhɛ ˈwo ˗klu ˗a ˗bha ˗an ˗wɔn ˗blɛɛ. ˈˈKɛɛ ˈˈtʋ̈ŋ ˈbha ˗nu ˈka mɛn ˗nu ˈwo ˈˈdhʋ̈ ˗an ˈgü ˗yö ˗ga, ˈyö sü ꞊dhɛ ˗an ˗bha ˈgü wo ˈˈdhiaa ˈyaa Zoova ˈgü. (1 Sam. 1:​6-10; Job 29:​2, 4; Ps. 51:11) Biblö ˗ya ˗zɔn ˈˈpuu ˈka ꞊dhɛ mɛnbhɩɩdhe ˗nu ˈö ˈwɔn yaa kë ˗dhii ˈdhö ˗an ˗bha bhë, ˗an ˈˈdhiaa ꞊mɔɔn˗ ˗bha ˈö ˗kë Zoova ˈgü. ˗Kɔ ˗kë ꞊dhɛ? Kwa dua ˗mü kö ˈkwa kwa ˗zoyö Yesu ˗dhɛ, ˈkwa bɔ ˈˈyi ꞊bhaa. (Zan 3:16) ˈKwa˗ kë ˈˈdhʋ̈ kö ˈkwa˗ ˗zɔn mɛn ˈˈwɛɛ ˗nu ˗dhɛ ꞊dhɛ ˈkwa ˈgo kwa ˗bha ꞊sɔnŋ yaa ˈgü, ˈkwa kwa ˗wo ˗bhö ˗Zlan ˗dhɛ ꞊dhɛ kwa ˗dho ˗a dhɔɔbhaawɔn kë. (Këw. 2:38; 3:19) ˈWɔn ˗nu ˈwo bhë ˈkwa ˗an kë, kë ˈˈdhʋ̈ kö ˈkwa kë Zoova ˈtɔŋdë ˗nu ˈka, ˗yö ˗kë ˗a ˗dhɛ ˗së ꞊dedewo. ˈKwa kwa ˈgü dɔ ˈˈgbɩɩ˗ kö ˈkwa ˈto kwa ˗wo ˈkwa˗ ˗bhö ˗a ˗ta, kwa ˈˈdhiaa ˗yö ˗kë Zoova ˈgü ˈö kwa sü ꞊dhɛ ö ˈtɔŋdë ˗tiaandhö ˗nu ˈdhö.—Ps. 25:14. w24.03 26 § 1-2.

ˈKö ˗kë ꞊dhɛ ˈˈsɛkɔɔnmɛn ˗nu ˗wo kwa ˗bha yö ꞊kɛɛ˗ ˗kan, kwa ꞊mɔɔn˗ ˗bha ˈkwa to Yesu ˗bha gwëëˈˈ ˗nu ˗bha ˈwɔnzuan ˈˈpiʋ̈ ˗zlanwopösü ˈka ˗kplawo. Kwa ˗de ˈpö ˗yö ꞊mɔɔn˗ ˗bha ˈö ga kwa ˈgü ꞊dhɛ Zoova ˗dho kwa ˗takun kö ˈkwa ˗zlanwopö. Kwa ꞊mɔɔn˗ ˗bha ˈkwa ꞊bhɛɛ ˗a ˗dhɛ kö ˗yö kwa gba ˈgüdɔgbɩɩsü waa ꞊kpɔɔdhɛ ˗an ˈka.˗Kwaa pö Zoova ˗dhɛ ˗yö kwa ˗takun kö ˈkwa bɔ kwa ˗bha ˈwɔn ˈˈgbɩɩ˗ ˗nu ˈgü. Kwa ꞊dhegblü ˗nu ꞊vadhɛ ˈwaa wo ˈflëëgü, ɛɛnˈˈ ˈwaa wo ˗de ˈgü ˗së. ˗A mɛn ˈbha ˗nu dhɔɔbhaamɛn ˗wɔn ˗ya kë, ɛɛnˈˈ ˈwɔn ˈˈgbɩɩ˗ ˗nu ˗wo ˗an ˗bha ˈkɔdhi ˈgü. Mɛn ˈbha ˗nu ˗de ˈpö ˈˈklʋʋbhɔdhe ɛɛnˈˈ ˈwɔn ˈˈwɛɛ ˈbha ˗nu ˗wo ˗an ˗bha. Pë ˗nu ˈwo ˗kë ꞊dhɛ kolona virisö ɛɛnˈˈ ˗gblü ˗nu ˈdhö, ˗wa ˈwɔn ˈˈgbɩɩ˗ ˗nu ˗dadhiʋ̈ ˈzü ꞊dedewo. ˗Ya kë kwa ˈka ˈˈdhʋ̈, ˗kwa kwa zuʋ̈ˈˈ ˈˈpʋ Zoova ˗dhɛ. ˈWɔn ˈö ˈkwa˗ ˈgü ˗kwaa blɛɛˈˈ ˗a ˗dhɛ ꞊dhɛ mɛn pë ꞊blɛɛ ö ˈˈtɔŋdë ˈˈgbɩɩ˗ ˗dhɛ. ˗Yö ga kwa ˈgü ꞊dhɛ Zoova «˗dho ˈwɔn ˗së kë kwa ˗dhɛ.» (Ps. 37:​3, 5) Kwa ˈgü ˈyii ga ˗bhɛɛ ˗Zlan ˗dhɛ ˗sü ˈka, ˈkö˗ ˗de ˈö ‹kwa ˗wëëdhɛ ˗yö bho ˗kɔ ˈˈʋʋ ˗kɔ ˈö˗ ˈgü, kwa zueˈˈ ˗dho kë ˗sɛa ˈö ˈkwa˗ kun ˈkwa ˗bha.› (Wlɔ. 12:12) ˈWɔn ˗nu ˈö˗ ˗dhɔkëmɛn ˗nu ˗wo bɔ ˗an ˈgü Zoova ˗yö ˗an ˗yö, ˈö «˗wa ˗takundhe ˗dhɛ ˗a ˗gɔ ˈö ˗an ˗wo man.»—Ps. 145:​18, 19 w23.05 5-6 § 12-15.

Pë ˈbha ˈö˗ ˗wɔn ˈdhö ˈˈgbɩɩ˗ ˈkwa˗ pö ˈkwa˗ kë, kwa dua ˗mü kö ˈkwa ‹Zoova ˗dhidhɛwɔn› dɔ, kë ˈˈdhʋ̈ kö ˈkwa kwa ˗bha ˈwɔn kë ˗kɔ ˗bɛ ˗a ˗bha. (Efɛ. 5:17) ˈKwa ˗kpan Biblö ˗bha ˈtɔŋ˗ ˗gɛngbandhɛ ˗nu ˈwo ˗bɛ ˈwɔn ˈkwa˗ ˈgü ˗a ˗bha, ˗yö kë kwa ˈˈɲaan ꞊dhɛ ˈpë Zoova ˈdhö˗ ˈˈpiʋ̈ kö ˈkwa˗ kë ˈnën ˈkwa ˗kpan ˗a ˗bha bhë. ˈTɔŋ˗ ˗gɛngbandhɛ ˗nu ˈwo ˈˈdhʋ̈ ˈkwa ˗an ˗ya ꞊bhlëë ˈgü, kwa ˗dho ˗da ˈwɔn ˗së ˗nu ˗ʒian ˗ta. Kwa ˈyɔɔ˗ Sɔtraan ˈö ˗kë «këpëyaamɛ» ˈka bhë, ˗ya ˈˈpiʋ̈ kö kwa ˗kɔ ˗yö kë ˈˈkpɔnŋ ꞊taa ˗wɔn ˗nu ˈgü ꞊dedewo, kë ˈˈdhʋ̈ kö ˈˈtʋ̈ŋ ˈya ˗dho kë kwa ˗gɔ ˈkwa ˗Zlan ˗bha yökë. (1 Zn. 5:​19, NTBL) Kletiɛn ˈbha ꞊mɔɔn˗ ˗bha ˈö ö ˈˈɲan ˗klu ꞊nɔɔnpë ˗nu mɛɛnˈˈ ˗sü, ꞊klaŋ ꞊gblɛɛn kë ˗sü ɛɛnˈˈ ˗yö kë ˗sü ˗bha ˈö ö ˈˈɲan bho Zoova ˗bha yö ꞊va kë ˗sü ˈˈpiʋ̈. ˗A ˗kë ˈˈdhʋ̈ ˗sü ˗ya ˗zɔn ꞊dhɛ ˈˈkpɔnŋtaamɛn ˗nu ˗zotakɔ ˗ya ˗mɛn zuʋ̈ˈˈ ˈsü ˗ni ˈgü. Pë ˗nu ˈwo bhë, ˈwaa ˈya˗. ˈˈKɛɛ ˗an dua ˈyaa ˗mü kö ˗wo bɔ ˈˈdhiʋ̈ kwa ˗bha ˗tosɛta ˈgü. w24.03 24 § 16-17.