Novanblö

˗Ya kë ꞊dhɛ ˈnën ˗nu ka ˗gɔ, ˗a mɛn ˗nu ˈwo ꞊kun ˈsɛɛn˗ bhë ˗ka ˗an takun kö ˗wo wo ˗de baaˈˈ ˈwɔn ˗daa ˗nu ˈwo dan ˗an ˈka ˗an ˗bha. ˈˈTʋ̈ŋ ˈbha ˗nu ˈka, ˈwɔn ˗gɔ ˗nu ˗wo ˗gban ˈkosümɛn ˗nu ɛɛnˈˈ ˈˈtakɔ ˈˈslʋ̈ʋ̈slʋ̈ ˗bha kwa ˗an ˗draan. ˈˈKɛɛ ˗ya kë ꞊shiöŋ, ˗wo ˗bhüöö kpö do ɛɛnˈˈ ꞊plɛ ˈö ˈnën ˗nu ꞊mɔɔn˗ ˗bha kö ˗wo ˈwɔn ˗daakë ˗an ˈgü, ˗wo ˗kë ˗an ˈgü. ˗Ka ka ˗bha ˈnën ˗nu ˗takun kö ˗wa yö ꞊dhɛ ˈˈtʋ̈ŋ ˈˈpɛpɛ ˈwo wo ˗kɔ ꞊luu ˗a ˈka, ˈyaa ˈnën ˈwo ˗dho wo ˗kɔ ˈˈyɛ ˗an ˗bha. ˈKa˗ kë ˈˈdhʋ̈, ˗waa ˗an ˈto ˗wa wo ˗kɔ ˈˈyɛ mɛn ˈˈwɛɛ ˗nu ˗bha, ˈyii ˗dho kë ˗an ˗dhɛ ˈya˗. (1 Tim. 6:18) Mɛn ˈˈpɛpɛ kwa ꞊mɔɔn˗ ˗bha kö ˈkwa kwa ˗de baaˈˈ ˗së ˈka ˈwɔn ˗daa ˗nu ˈwo ˗dho Zoova ˈtɔ bhɔ, ˈwo ˗dho kwa ꞊dhegblü ˗nu ꞊faanmën ˈpö ˗an ˗bha. (Prov. 25:11) ˈKö ˗kë ꞊dhɛ ˈˈtʋ̈ŋ ˈbha ˗nu ˈka, kwa ꞊mɔɔn˗ ˗bha ˈkwa ˈwɔn ˈdɛdɛ ˈö ˗gban kwa ˗bha ˗a blɛɛˈˈ, kwa dua ˈyaa ˗mü kö ˈkwa kwa ˗de ˗wɔn blɛɛˈˈ ˗kplawo kwa ˗bha ˈwɔn ˗daa ˗nu ˈgü. (Prov. 27:2; 2 Ko. 10:18) ˗Kwaa ˈˈslö mɛɛnˈˈ ꞊ʒiaan ˈkö ˈkwa Zoova, ˗a ˈˈDhiwo waa˗ ˗dhɔkëmɛn ˗nu ˗lokotasü ˗wɔn blɛɛˈˈ.—˗Dhɛ. 4:11. w23.04 24-25 § 17-18.

Pë do ˈö˗ ˗wɔn ˈdhö ˈˈgbɩɩ˗ ˈzü kö ˈkwa ˈto kwa ˈˈɲaan, ˈyö ˗tɔ ˗dhɔ. (Mat. 22:​37-39) ˗Zlan ˗dhɔ ˗ya kwa kë, ˈkö ˗kë ꞊dhɛ ˗zlanwopö mɛn ˗nu ˗dhɛ ˗sü ˗dho nu ˈwɔn ˈˈgbɩɩ˗ ˈka kwa ˗ta, kwa ˈgü ˈyaa ga ˗a ˈka. (2 Tim. 1:​7, 8) ˈDhɛ ˗kë ꞊dhɛ kwa ˗dhɔ ˗zɔn mɛn ˗nu ˈö ˈwaa Zoova gbamɛn ˗nu ˈka ˗an ˗dhɛ bhë, kwa ˗zlanwopö ˗kplawo ˗dhɛ ˈö ˈkwa˗ ˗bha ˗a ˈgü, ˈö ꞊ya kë ꞊shiöŋ ˈkwa bɔ ˗a ˈka telefɔnö ɛɛnˈˈ lɛtrö ˗nu ˗ta. Kwa kwa ˗zoyö ˗kplawo ꞊dhɛ mɛn ˗nu ꞊mɔɔn˗ ˗bha ˈwo wo ˈˈtakɔ ˗nu bho ˈˈgblʋʋ, ˈwo ˗ya ˈwɔn ˗së kë ˗sü ˗bha yi do ˈka. (Ézéch. 18:​27, 28) Kwa ꞊dhegblü ˗nu ˗dhɔ ˗yö kwa ˗kë ˈpö. ˗Dhɔ ˈö ˈˈdhʋ̈ kwa˗ ˗zɔn ‹kwa ˈko ˗nu ˗zʋ ˗gban ˗sü waa kwa ˈko ˗nu faan dɔ ˗sü ˈka.› (1 Tes. 5:11) ꞊Dhɛ ˈˈsɔdha ˗nu ˈwo wo ˈko ˈˈsuee ˗gblü ˈˈpiʋ̈ ˗an ˈdhö, kwa kwa ˈko ˗nu ꞊faan ˗mën. ˈKwaa˗ ˈˈpiʋ̈ toŋtoŋdhö kö ˈkwa pë ˈˈdhiʋ̈˗ kë kwa ꞊dhegblü ˗nu ˈka kwa ˗de ˈˈɲaan ɛɛnˈˈ kö ˈkwa ˈwɔn yaa ˈˈpɔ bho ˗an ˗gɔ ˈwɔn yaa ˈka. (1 Tes. 5:​13, 15) ˗Ya ˈgo mü ˈzü, kwa ꞊dhegblü ˗nu ˈwo ˈˈdhiʋ̈sü ˗ni ˈgü ˗zlanwokɔdhi ˈka ˈkwa ˗an ꞊bhlëë ˗ya, kö kwa˗ ˗zɔn ꞊dhɛ ˗an ˗dhɔ ˗yö kwa ˗kë.—1 Tes. 5:12. w23.06 10 § 6; 11 § 10-11.

Pë ˗nu ˈwo ˗dho kwa ˗bha ˗zoyödhe ˗gɛn ˗gban ˗a ˗blɛɛsü ˈnën ˗tɔ ˗zo ˗ta ˗gɔtadhɔpë ˗wɔn ˈgü ˗sü. ˗Ya ˗kë ˈö ga kwa ꞊dhɛ pë ˗nu ˈö ˗Zlan ˗yö ˗an ˈˈplüün bho, ˗wo ˗dho kë. ˈKwa kwa ˗zota ˗së ˈka ˈpë ˗kë ˈö kwa ˗gɔtadhɔ waa pë ˈö˗ nu kwa ˗gɔtadhɔpë ˈka ˗an ˈgü, kwa ˗bha ˗zoyödhe ˗gɛn ˗dho ˗gban ˈö ga kwa ˈgü ꞊dhɛ Zoova ˗dho ˗tosɛta ˈö ˈyaa ɲën ˈö˗ ˈˈplüün bho bhë, ˗a nu kwa ˗dhɛ ꞊bhɔɔ ˈˈsɛ ˗ta. ˈMën ˗kë ˈö ˈkwa˗ pö ˈˈdhʋ̈? Zoova ˗yö kwa ˗gɔ ˗ta ˗dhɔ ˗kɔ ˗kë ꞊dhɛ? ˗Yö ö Gbö ˗blɛɛsü ˈö˗ ˗dhɔ ˗ya ˗kë, ˈö ˗klu ˗a ˗bha bhë ˗a ˗bɔ ˈö go dhaŋ˗ ˈgü ˈö ˗kë mɛnbhɩɩdhe ˈˈslʋ̈ʋ̈slʋ̈ ˈka ˈˈkpɔnŋ ꞊taa. Kö Yesu ꞊kun ˈˈsɛ ˗ta yö, ˗yö ˗bɔ ˈwɔn ˈˈgbɩɩ˗ suu ˈˈpɛpɛ ˈgü. ˗Yö saanˈˈ ˗sü, ˈö dho ˈö ga ˈˈdhiʋ̈dhiʋ̈sü wo. Mɛn ˗gɔtadhɔpë ˈkpii˗ ˈbha ˈkö ˗dho ʒiö ˗a ˗dhɛ ˈö Zoova ˗ya nu bhë ˗a ˗ta, ˈyaa ˈdhö. ˗Tosɛta ˗së kë ˗sü ˈö ˈˈtʋ̈ŋ ˈdɛdɛ ˈˈpiʋ̈ ˗a ˗wɔn ˗mü ˗be, kö ˗dhɔkaa ˗Zlan ˈti ˗dho ö ꞊kwaa˗ ö Gbö ˗zü ˗yö saanˈˈ ˈˈsinman suu ˈö ˈˈdhʋ̈ ˗a ˈsü, ˗yö ga. (Zan 3:16; 1 Piɛ. 1:​18, 19) ˈDhɛ ˗kë ꞊dhɛ Zoova ˗yö ö Gbö ˈö˗ ˗wɔn ˈdhö˗ ˗gɔ ˈˈgbɩɩ˗ ˗a ˗nu kö ˈkwa dha bhë, ˗yö ˗dho pë ˈˈpɛpɛ kë kö ˈkwa ˗tosɛta ˈö ˈyaa ɲën ˗a kë ˈˈkpɔŋtaadhɛ ˗dɛɛ ˈgü. w23.04 27 § 8-9.

Zoova zuʋ̈ˈˈ ˈˈwɩ ˗sü ˈka˗ ˗bha kö ˈö mɛn ˗nu bho ga ˈgü ˗ee? ꞊Ii, ˗ya ˈˈpiʋ̈ ꞊dedewo. ˗Yö ˗bɔ Biblö ˗bɛnzëmɛn ˗nu ˗ta ˈö˗ pö ꞊dhɛ ö ˗dho mɛn ˗nu bho ˗ga ˈgü. (Is. 26:19; ˗Dhɛ. 20:​11-13) ˗Ya ˈgo mü ˈzü Zoova ˗ya ˈwɔn ˈbha ˈˈplüün bho, ˗ya ˗kë ˗kplawo. (Jos. 23:14) Mɛn ˗nu ˈö ˗wa ga, ˗an ˗bho ga ˈgü ˗sü ˗lele ˗ya ˗ta. ˈPë Zɔbö ˗ya pö, ˗kwaa ˗ga. ˗Yö ˗kun ˗a ˈˈɲaan ˈkpakpadhö ꞊dhɛ ˈkö ˗kë ꞊dhɛ ö ˗ga, Zoova zuʋ̈ˈˈ ˗yö ˈˈwɩ ˗sü ˈka˗ ˗bha kö ˗këdhösü ˗yö kë ö ˗gɔ ˈzü. (Job 14:​14, 15, ztw.) ˈWɔn do bhë ˈyö Zoova ˗zo ˈˈpiʋ̈ ö ˗dhɔkëmɛn ˗nu ˈö ˗wa ga ˗an ˗bha ˈka. ˗An ˗bho ga ˈgü ˗sü kö ˗wo kë wo ˈflëëgü zuʋ̈gblüdhi ˈgü bhë, ˗a ˗lele ˗ya ˗ta. Mɛn ˈˈmliya ꞊va ˈö ˈwii gagade ˈö ˗gban Zoova ˗bha ˗a dɔ ˈö ˈwo to ˈwo ga ꞊wɛ? Kwa ˗bha ˗dhɔkaa ˗Zlan ˗ya ˈˈpiʋ̈ kö ˈö ˗an bho ga ˈgü ˈpö. (Këw. 24:15) ˗Ya ˈˈpiʋ̈ ˗wo kë ö ˈˈtɔŋdë ˗nu ˈka kö ˗tosɛta ˈö ˈyaa ɲën ˗wa kë ˈˈsɛ ˗ta.—Zan 3:16. w23.04 9 § 5-6.

Kwa ˗dho kwa ˗bha ˗zoyö ˗dhɛkpaɔ dhiʋ̈ˈˈ ˗së ˗dhɛ ˗sü ˗gɛn ˗gban ˗kɔ ˗kë ꞊dhɛ? ꞊Ya kë ꞊dhɛ kwa ˗dho ˗tosɛta ˈö ˈyaa ɲën ˗a kë ˈˈsɛ ˗ta yö, ˗kwa ˈpë Biblö ˗ya pö ˈö ˗gban ꞊bhɔɔ ˈˈsɛ ˗bha, ˗a ˗wo pö kö ˈkwa kwa ˗zota ˗a ˈgü. (Is. 25:8; 32:​16-18) ˗Kwa kwa ˗zota ˗kɔ ˈö ˗tosɛta dho kë ˗a ˈka ˈˈkpɔnŋtaadhɛ ˗dɛɛ ˈgü, ˗a ˈgü. ˗Kwa kwa ˗de yö mü. ˈKwa kwa ˗bha ˈˈtʋ̈ŋ ˈsü kö ˈkwa kwa ˗zota ˈˈkpɔnŋtadhɛ ˗dɛɛ ˈgü, kwa ˗bha ˈwɔn ˈˈgbɩɩ˗ ˗nu ‹ˈgü ˈti dho ꞊gwëë.› (2 Ko. 4:17) ˗Dhɛkpaɔ dhiʋ̈ˈˈ ˗së ˈö Zoova ˗ya ˈˈplüün bho kwa ˗dhɛ bhë, ˗yö ˗dho kwa gba ꞊faan ˈka, ˈkwa bɔ ˈwɔn ˈˈgbɩɩ˗ ˗nu ˈgü. ˈPë kwa ˗bhawɔn ˈdhö˗ ˗bha kö ꞊faan ˗yö kë kwa ˗gɔ Zoova ꞊yaa˗ nu kwa ˗dhɛ ˈsaadhö. Kwa ˗bhawɔn ˗ya yö ˗takundhe ˗bha kö yö ˈbha ˈwo˗ dɔ kwa ˗kɔ ˈka ˈkwa˗ kë ɛɛnˈˈ ˈkwa bɔ ˈwɔn ˈˈgbɩɩ˗ ˗nu ˈgü, ɛɛnˈˈ ˈzü zuʋ̈gblüdhi ˗yö kë kwa ˗gɔ ˗kplawo, ˗kwa bhɛɛˈˈ Zoova ˗dhɛ kwa zuʋˈˈ ꞊gban ˈka kö ˈkwa˗ ˗bha ˗dhioo ˗nu mɛɛnˈˈ Biblö ˗draan kwa ˗de ˈˈpiʋ̈ ˗sü ˈka. ˗Kwa ˈˈwɩ kwa ꞊dhegblü ˗nu ˗bha ˗takundhe ˗bha. ˗Kwa ˈˈtʋ̈ŋ ˈsü kö ˈkwa kwa ˗zota ˗dhɛkpaɔ ˈˈdhiʋ̈ ˗së ˈgü. ˈKwa˗ kë ˈˈdhʋ̈, ‹˗Zlan ˗dho kwa ꞊faan dɔ ˗kɔ ꞊gban ˈgü ˗a ˗bha ˈgügbɩɩdhɛ ˈö˗ ˈˈdhiʋ̈todhɛ ˈyaa ˈdhö bha˗ ˈka, kö ˈwɔn ˈˈgbɩɩ˗ ˗zian ꞊ya kë kwa ˈka, kwa zuëˈˈ ˗yö kë˗ ˈgü ˗sɛa.›—Kodh. 1:11. w23.10 17 § 19-20.

Pë ˗nu ˈkwa dho Zoova ˈˈnuɛ bho ˗an ˗wɔn ˈgü, ˗wo ꞊va. Kwa ꞊mɔɔn˗ ˗bha ˈkwa˗ ˈˈnuɛ bho pë ˗sɛŋbɔ ˗nu ˈˈpɛpɛ ˈwo kwa ˗gɔ ˗an ˈwɔn ˈgü, ˈyö sü ꞊dhɛ gbɔɔdhe ˗së ꞊gban ˗wo ˗go ˗a ˈˈpiʋ̈. (Zak. 1:17) Kwa ꞊mɔɔn ˗bha ˈkwa˗ ˈˈnuɛ bho ˈˈsɛ waa ö ˈgü ˗pë ˗sɛŋbɔ ˗nu ˈö ˗an ˗da ˗a ˗wɔn ˈgü, ɛɛnˈˈ ˈzü ˈö ˈkwa˗ ˈˈnuɛ bho kwa ˗bha ˈkɔdhigümɛn ˗nu, kwa ˈˈtɔŋdë ˗nu, ˗zoyö ˗dhɛkpaɔ dhiʋ̈ˈˈ ˗së ˗dhɛ ˗sü ˈö˗ nu kwa ˗dhɛ waa ˈˈtɔŋdëdhɛ ˗së ˈö˗ ˗da kwaa˗ ˗nu kwa ꞊zinŋgü, ˗an ˗wɔn ˈgü. ˗A ˈbha ˗ya kë kwa ˗bhawɔn ˗dho yö ˈgüdɔgbɩɩsü ˗bha kö pë ˗nu ˈö ˗an ˗wɔn ˈgü ˈkwa dho Zoova ˈˈnuɛ bho, kwa ꞊dede ˈkwa kwa ˗zota ˗an ˈgü. ˈMën ˗kë? ˈYö ˗tɔ ꞊dhɛ mɛn ꞊vadhɛ ˈwo ꞊dɛɛ ˗wa ˈwɔn ˗së kë ˗an ˗dhɛ, ˈwaa˗ dɔ. Pë ˈwo˗ ˈˈpiʋ̈ kö ˈwo˗ ꞊slɔɔ ˈnën ˈwo wo ˈˈtʋ̈ŋ ˗kë ˗a ˈgü dosɛnŋ, ˈwaa wo ˗zota ˈwɔn ˗së ˗nu ˈö mɛn ˗nu ꞊waa˗ kë ˗an ˗dhɛ ˈsaadhö ˗an ˈgü, kö ˗wo ˗an ˈˈnuɛ bho. ˈWɔn yö ˗kɔ suu ˈö bhë ˗ya kë kwa ˗gɔ, kwa ˗bha bhɛɛwo ˗nu ˗dho kë pë ˗gbadhɛ ˗sü ˈka dosɛnŋ. ˈKwa˗ pö ˈya ˗dho kë kwa ˈka ˈˈdhʋ̈, kwa dua ˗mü kö Zoova ˈˈnuɛ bho zuʋ̈ga ˗yö kë kwa ˗gɔ ˗kplawo ˈwɔn ˗së ˗nu ˈö ˗an ˗kë kwa ˗dhɛ ˗an ˈwɔn ˈgü.—Dhu. 6:45. w23.05 4 § 8-9.

Zoova kwa Dë ˈö kwa ˗dhɔ ˗ya ˗kë bhë, ˈyaa ˈˈpiʋ̈ kö ˈkwa saanˈˈ ˈsü. (Is. 63:9) ˈˈKɛɛ ˈyaa ˈwɔn ˈˈgbɩɩ˗ ˗nu ˈö ˈkwa ꞊mɔɔn˗ ˗bha kö ˈkwa ˗an ˗zɔn ˈˈyiga ɛɛnˈˈ ˈˈwo ˈnɛɛn˗ ˗nu ˈka bhë, ˗an bho kwa ˗bha. (Is. 43:2) ˗Ya ˈˈplüün ˗bho kwa ˗dhɛ ꞊ʒiaan ꞊dhɛ ö ˗dho ˗a kë ˈkwa «bɔ ˗an ˈgü.» ˈYaa ꞊mɔɔn˗ ˗bha ˈzü kö ˗yö kwa ˈto ˈwɔn ˈˈgbɩɩ˗ ˗nu ˈgü ˈˈtʋ̈ŋ ꞊gban ˈka. Zoova ˗yö kwa ˗gba o ˗bha ˗zuu ˈˈslʋ̈ʋ̈slʋ̈ ˈˈpiigbɩɩsü ˈka kö ˈkwa ˈwɔn ˈˈgbɩɩ˗ ˗nu ˈkun kwa ˗bha. (Dhu. 11:13; Fdh. 4:13) ˗A ˗wɔn ˈgü, ˗yö ꞊mɔɔn˗ ˗bha ˈö ga kwa ˈgü ꞊dhɛ pë ꞊dede ˈö kwa ˗bhawɔn ˈdhö˗ ˗bha kö ˈkwa kwa ˗bha ˈwɔn ˈˈgbɩɩ˗ ˗nu ˈkun kwa ˗bha, ˈkwa ˈto kwa ˗wo ˗ta Zoova ˗dho ˗a ˗nu kwa ˗dhɛ ˗kplawo. Zoova ˗ya ˈˈpiʋ̈ kö ˈkwa ˈdhaŋ˗ bho ö ˈˈdhiʋ̈. (Ebl. 11:6) ˈˈTʋ̈ŋ ˈbha ˗nu ˈka ˈwɔn ˈˈgbɩɩ˗ ˗nu ˗wa ˗nu kwa ˗ta, ˗yö ˗kë ꞊dhɛ ˈpë ˈkwaa ˗mɔn ˗bɔ ˗an ˈgü ˗sü ˗bha ˗a ˈdhö. Kwa zuʋ̈ˈˈ ꞊mɔɔn˗ ˗bha ˈö dɔ ˈdudhö ꞊dhɛ Zoova ˗dho kwa ˗takun. ˈˈKɛɛ Biblö ˗yö kwa ˗zogban ꞊dhɛ ˗Zlan ˗bha ꞊faan ˈˈsaa ˈgü, kwa ꞊mɔɔn˗ ˗bha ˈkwa «˗lö ˈˈkplʋʋ ˗zü.» (Ps. 18:29) ˈˈSanni kwa zuʋ̈ˈˈ ˗yö dɔ ˈdudhö, kwa dua mü kwa bhɛɛˈˈ ˗zoyödhe ˈka kö ˗yö ga kwa ˈgü ꞊dhɛ Zoova ˗yö kwa ˗bha bhɛɛwo ˗nu ˗daakë.—Zak. 1:6. w23.11 22 § 8-9.

Pë ˈwo˗ ˗dhɛ ˗dhɔ ꞊dede ˈyaa ˈnën bhë ˗ee? ˗Wo ˗nu ˈwo bhë ˗wo ˈkosümɛn ˗nu ˗zogban ꞊dhɛ ˗dhɔ ˈö ˗an ꞊zinŋgü ˗yö ꞊mɔɔn˗ ˗bha ˈö to ˈˈgbɩɩ˗ ˗kplawo, ˈö pë gbɛ˗ ˗kɔ ˈyaa ˗mɔn ˗a shiʋ̈ˈˈ ˗sü ˗bha. ˈKosümɛn ˗nu ꞊waa˗ pö wo ˗bha ˗dhɔ ˗yö ˈto ˈˈgbɩɩ˗ kö ˗yö ˈdho ˗yö yö ˗a ˈka wo ga ˗yi ˗bha, ˗an dua ˗mü kö ˗wo wo ˈgü dɔ ˈˈgbɩɩ˗. ˗A ˈwɔnzuan ˈnën ˗tɔ mɛn ˈö˗ ˈˈpiʋ̈ kö ö ˗bha ˈˈshiʋ̈ ˗yö ˈto ˈpun ˗sü ˈka, ˗a dua ˗mü kö ˗yö ˈˈwo ˈˈgbanga ˗nu ˗ya ˗a ˗bha ˗kplawo. Yö ˈti˗ kë ˈˈdhʋ̈, ˗a ˗bha ˈˈshiʋ̈ ˗dho dhuuˈˈ. ˗Kɔ do ˈö bhë ˗a ˈka, ˈkosümɛn ˗nu ˗wa ˗dhɔ ˈö ˗an ꞊zinŋgü ˗a ˗gɛn ˗gban ˈˈtʋ̈ŋ ꞊gban ˈka, ˗yö ˗dho ˈto ˈˈgbɩɩ˗ ˗kplawo. ˈˈKɛɛ ˈˈtʋ̈ŋ ˈbha ˗nu ˈka, ˈwɔn ˈˈgbɩɩ˗ ˗nu ˈwo ˗kë ꞊dhɛ ˈwëëga ˗wɔn, ˈˈyua ɛɛnˈˈ ˈnën ˗nu ˗to ˗sü zuʋ̈dhiʋ̈tɛ ˈdhö bhë, ˗wo ꞊mɔɔn˗ ˗bha ˈwo ˈkosümɛn ˗nu ˗bha ˗dhɔ ˈbhü ꞊ɲɔɔn ˈˈshia˗. ˈDhɛ ˈˈdhʋ̈, ˈkosümɛn ˗nu ꞊waa˗ pö «Zoova ˗bha ˈˈshiʋ̈ ˈnɛɛn˗» ˗yö ˈto ˈpun ˗sü ˈka wo ꞊zinŋgü, ˗a mɛn ˗dhɛ ˈö ˈdhö ˗a dua ˗mü kö ˗yö ˗mlɛɛn ˈö waa Zoova ˗an ꞊zinŋgü ˗a ˗gɛn ˗gban. w23.05 20-21 § 1-3.

ˈKwa˗ pö kwa ˈgü kë ˈˈgbɩɩ˗, ˗mën ˈö kwa ˗bhawɔn ˈdhö˗ ˗bha? Kwa ˗mɛn ˗nu ꞊mɔɔn˗ ˗bha ˈwo˗ pö kwa ˗dhɛ ꞊dhɛ kwa ˈgü ˗yö kë ˈˈgbɩɩ˗, ˈˈkɛɛ ˈwaa ˗mɔn ˗a ˗nu kwa ˗dhɛ ˗sü ˗bha ꞊dhɛ ˈkɛnŋpë ˈdhö. ˈGüdɔgbɩɩsü draansü ˗kë ꞊dhɛ pë ˗dɛɛ draansü ˈdhö. ˗A draanˈˈ ˗kɔ do ˈnën ˗tɔ mɛn ˈö kwa ꞊klaŋkë ˗ni ˈgü ˗a ˈka bhë, ˗a ˗ga ˗sü waa ˗to ˗a ˗bha ˈwɔnzuan ˈˈpiʋ̈ ˗sü. ˗Kɔ do ˈö bhë ˗a ˈka, kwa ˈgüdɔgbɩɩsü ˗draan mɛn ˈˈwɛɛ ˗nu ˈwo˗ ˗zɔn ˗ni ˈgü bhë ˗a ˗ga ˗sü waa ˗to ˗an ˗bha ˈwɔnzuan ˈˈpiʋ̈ ˗sü ˈka. ꞊Dhɛ Daniɛdhö ˈdhö, kwa dua ˗mü kö ˈkwa ˗Zlan ˈˈDhiwo dɔ ˗së ˈka, ˈkwa ꞊ɲɔɔn Zoova ˈˈsuee ˗bhɛɛ ˗a ˗dhɛ ˗sü ˈka ˈö ˈkwa kwa zuʋ̈ˈˈ ˗pʋ ˗a ˗dhɛ ˈˈtʋ̈ŋ ꞊gban ˈka. Kwa dua ˗mü ˈzü kö ˈkwa ˈdhaŋ˗ bho ˗a ˈˈdhiʋ̈, kö ˗yö ga kwa ˈgü ꞊dhɛ ˗yö kwa ˈˈpiʋ̈ ˗kplawo. ˈKwa˗ kë ˈˈdhʋ̈ kwa ˗bha ˗zoyödhe ˗ya ˗da ˈgüdandhe ˈgü, kwa ˈgü ˗dho kë ˈˈgbɩɩ˗. ˈKwa kwa ˈgü dɔ ˈˈgbɩɩ˗, mɛn ˈˈwɛɛ ˗nu ˗dho kwa ꞊bhlëë ˗ya ˈö ˈkwa ˗mɔn ˗an ˗ɲɔɔn Zoova ˗bha ˗sü ˗bha. Gagade ˈka, ˗a ˗dhɛ ˗mü kö ˈkwa ˈgüdɔgbɩɩsü draanˈˈ. w23.08 2 § 2; 4 § 8-9.

Glɛkö ˗wo kpö ˈwo˗ ꞊dhiëëta ˈö ˗kë «˗ga ˈkpakpadhö» ˈka bhë, ˗yö ˗gban ˈˈsënŋ ɛɛnˈˈ zën ˗ga ˗sü ˗bha kö ˗ya kë ꞊dhɛ ˗a ꞊dede ˗mü ˗wa ˈwɔn dɔ. ˗Dhɛ ˈö ˈˈdhʋ̈, ˈkwa pë ˈbha man ɛɛnˈˈ ˈkwa˗ ˗wo pö, kwa dua ˗mü kö ꞊ya kë ꞊dhɛ gagade ɛɛnˈˈ ꞊sua ˗mü, ˈkwa˗ ˈwɔn dɔ ˗ʒian mɛɛnˈˈ. ˗A ˗dhɛ ˗ya ˗bha kö ˈkwa˗ kë ˈˈdhʋ̈, ˈyö sü ꞊dhɛ ˈˈklʋʋbhɔdhe ˈkpii˗ ˗ya yö ꞊klöö˗. ˈˈSanni ˈkwa ˈdhaŋ˗ bho mɛn ˈˈwɛɛ ˗nu ˗wo ˈˈdhiʋ̈, pë ˗nu ˈö ˈkwa ˗an ˗wo pö ɛɛnˈˈ ˈkwa ˗an man waa˗ ˗dhɛ ˗nu ˈö Biblö ɛɛnˈˈ Zoova ˗bha ˗kɔlokota ˗yö ˗an pö ˗kwa kwa ˗zota ˗an ˈgü, ˈkwa ˗an dan ˈkwöö. ˈKwa˗ kë ˈˈdhʋ̈, ˗zuu yaa ˗nu ˗bha ˈˈkpënŋ˗ ˗kɔ ˈti ˗dho ˗mɔn kwa ˗bha. (Prov. 14:15; 1 Tim. 4:1) Kwa˗ ˈwɔn ˗dɔ ꞊dhɛ Zoova ˗dhɔkëmɛn ˗nu ˗dho dha ˈˈklʋʋbhɔdhe ˈkpii˗ ˗gɔ. ˈˈKɛɛ ˗kɔ ˈö ˈkwa˗ ˗bha do do ˈka, ˈwɔn ˈö dho kë kwa ˈka ˗dhɛkpaɔ dhiʋ̈ˈˈ ˈgü, ˈkwaa˗ dɔ. (Zak. 4:14) ˈKö ˗kë ꞊dhɛ kwa ˗bɔ ˈˈklʋʋbhɔdhe ˈkpii˗ ˈgü ɛɛnˈˈ kwa˗ nu ˗yi ˗to ˈˈdhiʋ̈ ˈkwa ga, ˈkwa ˈto ˗klu ˗sü ˈka ˗Zlan ˗bha, ˗yö ˗dho ˗tosɛta ˈö ˈyaa ɲën ˗a nu kwa ˗dhɛ. Mɛn ˈˈpɛpɛ ˗kwa kwa ˈˈɲan ˗klu kwa ˗bha ˗dhɛkpaɔ dhiʋ̈ˈˈ ˗së ˈö bhë ˗a ˗bha, kö ˈkwa kë baasü ˈka Zoova ˗bha ˗dhɛkpaɔyi ˗bha. w23.06 13 § 15-16.

ˈWɔn ˈbha ˗nu ˈö Biblö ˗yö ˗an to ˈˈdhiʋ̈ ˈö˗ pö, ˈkwaa ˗an ˗yökodhiʋ̈ ˗kɔ dɔ. (Dan. 12:​8, 9) Kwa ˈti Biblö ˗wo ˈbha ˗yökodhiʋ̈ ˗kɔ dɔ, ˗a ˗gɛn ˈnën ˗tɔ ꞊dhɛ ˗yö ˈti ˗dho ˗yö ˈko ˈˈdhiʋ̈ ˗ee? ˗Abin. ˗Yö ꞊mɔɔn˗ ˗bha ˈö ga kwa ˈgü ꞊dhɛ Zoova ˗dho kwa ˗takun kö ˈkwa˗ ˈgüman ö ˈˈtʋ̈ŋ ˗së ˗bha ꞊dhɛ ˗kɔ ˈö˗ ˗kë ˗a ˈka ˗kwɛŋzü, ˗a dhö. Mɛn ˗nu ˗dho ˗a ˗pö: «ˈAa ˈˈsɛ ꞊ya ˈwaanu, ˈkwa ˗ya kwa ˗dɩ ˈflëë˗ ˈgu.» (1 Tes. 5:3) ˗A ˈˈtʋ̈ŋ ˈyaa ꞊gblɛɛn ˈzü kö ˈˈsɛkɔɔnmɛn ˗nu ˈwo ˈˈkpɔnŋ ꞊taa yö, ˗wo ꞊sua ˗zlanwo ˗nu ˈgü shiʋ̈ˈˈ. (˗Dhɛ. 17:​16, 17) ˗Wa wo bo, ˗wo ˗dho nu Zoova ˗dhɔkëmɛn ˗nu ˗gɔ ˈpö. (Ézéch. 38:​18, 19) ˈWɔn ˗nu ˈwo ˈˈdhʋ̈, ˗an ˈˈdhiʋ̈ ˗dho ˈto ˗gblü ˗totaabhasü ˈö ˗kë Aamagedɔn ˈka bhë, ˗a ˗ta. (˗Dhɛ. 16:​14, 16) ˗Yö ꞊mɔɔn˗ ˗bha ˈö ga kwa ˈgü ꞊dhɛ ˗a ˈˈtʋ̈ŋ ˗ya ˈto ꞊klöö˗. ˈˈSanni ˈˈtʋ̈ŋ ˈö ˈˈdhʋ̈ ˗yö ˗lo, ˗kwa kwa Dë ˈö dhaŋ˗ ˈgü ˗a ˈˈnuɛ bho kö ˈkwa kwa ˈˈtʋ̈ŋ kë ˈwɔn ˗nu ˈö Biblö ˗yö ˗an to ˈˈdhiʋ̈ ˈö˗ pö, ˗an ˈgü. ˗Ya ˈgo mü, kö ˈkwa mɛn ˈˈwɛɛ ˗nu ˗takun ˗a ˗kë ˈˈdhʋ̈ ˗sü ˗bha. w23.08 13 § 19-20.

ˈDhɛ bɔmɛn Pɔdhö kun ˈdhaŋ˗ ˗bho ˗Zlan ˈˈdhiʋ̈ ˗sü, ˗zo ˗gɔn ˗Zlan ˗wɔn ˈka ˗sü waa ˗dhɔ ˗an ˗wɔn blɛɛˈˈ ˗ni ˈgü, ˗ya ˗pö ꞊dhɛ «˗a ˗gɔ ˈö˗ ˈgü yö ˗mü ˗dhɔ ꞊në˗ ˈka.» (1 Ko. 13:13) ˈMën ˗kë ˈö˗ pö ˈˈdhʋ̈? ˗Dhɛkpaɔ dhiʋ̈ˈˈ ˈgü, kwa ˈti ˗dho pë ˗nu ˈö ˗Zlan ˗yö ˗an ˈˈplüün bho kwa ˗dhɛ ˗an ˈˈdhiʋ̈ ˈˈgan ˈzü, ˈyö sü ꞊dhɛ ˗wo ˗dho kë kwa ˗gɔ. ˈˈKɛɛ kwa ˗bhawɔn ˗dho yö Zoova waa mɛnbhɩɩdhe ˗nu ˗dhɔ ˗bha kwa kë ˗sü ˗bha. ˗A ˗de ˗ʒian ˗an ˗dhɔ ˈö ˈˈdhʋ̈, ˗yö ˗dho ˗dadhiʋ̈ ˗kplawo. Kwa ˗dhɔ ˗ya kwa ˈko kë ˈzü ko kwa˗ ˗zɔn ꞊dhɛ kletiɛn ꞊dede ˗nu ˗mü kwa ˈka. Yesu ˗ya ˗pö ö ˗bha gwëëˈˈ ˗nu ˗dhɛ: «Ka ˗dhɔ ꞊në ꞊ya ka ˈko kë ꞊dhɛ ˗kɔ bha˗ ˈdhö, ˈyö mɛ ꞊gban˗ dho˗ ˈwɔn dɔ ꞊dhɛ ma ꞊klang ˗nu ˗mü ka ˈka.» (Zan 13:35) ˗Ya ˈgo mü ˈzü kwa ˗dhɔ ˗ya kwa ˈko kë, kwa ˗kɔ ˗dho kë ˈwɔn do ˗bha. Pɔdhö ˗ya ˗pö ꞊dhɛ ˗dhɔ ˗yö mɛn ˗nu «˗klu ˈkuë˗ ˈkpëdhö.» (Kodh. 3:​14, NTBL). Bɔmɛn Zan ˗ya ˗pö kletiɛn ˗nu ˗dhɛ: «Mɛ ˈˈüü mɛ ˈö [˗Zlan] ˗dhɔ ˗ya ˗kë, ˗a ˗dhɛa ˗bha ˈpö ꞊dhɛ ˗a dheebhang ˗dhɔ ˗ya kë.» (1 Zn. 4:21) ˈKwa ˗dhɔ ˗zɔn kwa ˈko ˗dhɛ, kö kwa˗ ˗zɔn ꞊dhɛ ˗Zlan ˗dhɔ ˗yö kwa ˗kë. w23.11 8 § 1, 3.

Biblö ˗yö kletiɛn ˗nu ˗bha ˗tosɛta ˗zɔn ˗bialösü ˈka. Mɛn ˈö ˗ya yö ˗a ˈˈdhiʋ̈todhɛ ˗bha, ˗yö ˗dho ˗tosɛta ˈö ˈyaa ɲën ˗a ꞊slɔɔ. (2 Tim. 4:​7, 8) Kwa dua ˗mü kö ˈkwa kwa ˈgü dɔ ˈˈgbɩɩ˗ kö ˗bia ˈö bhë ˈkwa˗ ˗lö ˗kplawo, ˈyö sü ꞊dhɛ ˗a ˈˈdiʋ̈todhɛ ˈyaa mü ꞊gblɛɛn ˈzü. Bɔmɛn Pɔdhö ˗yö pë ˈö dho kwa ˗takun kö ˈkwa˗ kë ꞊dhɛ ˗a ˈdhö, ˗a ˗zɔn. ˗Ya ˗pö ꞊dhɛ ‹pë ˈˈpɛpɛ ˈö ꞊dhɛ ꞊kwɛɛ ˈgbinŋ˗ ˈdhö [ . . . ] ˗ka ˈˈkan˗ ˗bha, kö ˗bɛang ˈö ˗Zlan ˗ya yi kpɔ ka ˗gɔ bha ˈka˗ ˈsü ka ˗sɔbhɛɛ ˈka.› Pɔdhö ˗kun ˗a pö ˗ni ˈgü ꞊dhɛ ꞊kwɛɛ˗ ˈˈwɛɛ ˈbha ˈyaa ˈdhö kletiɛn ˗nu ˗bha ˈka ˗ee? ˗Abin. ˗Yö ˗wɩ ꞊ʒiaan ꞊kwɛɛ˗ ˗nu ˈö kwa ˗bhawɔn ˈyaa ˗an ˗bha ˗an ˈka. ˗A ꞊kwɛɛ˗ ˗nu ˈwo ˈˈdhʋ̈ ˗wo ꞊mɔɔn˗ ˗bha ˈwo ꞊faan bho kwa ˗bha, ˈkwa to ꞊zlöö. ˈDhɛ ˈˈdhʋ̈ ˈkwa˗ pö ˈkwa ˗bia ga ˈsü, ˗kwa ꞊kwɛɛ˗ ˗nu ˈwo bhë ˗an dɔ ˗së ˈka kö ˈkwa ˗an ˗zuö ˈˈblü. ˈˈKɛɛ ˈkwaa ˈˈpiʋ̈ ˈpö kö ꞊kwɛɛ˗ ˗nu ˈwo kwa dua ˈka, ˈkwa ˗an ˗zuö ˈˈblü. ˈKwa˗ kë ˈˈdhʋ̈, kwa ˗dho kwa ˗de bho ˗bialömɛn ˗nu ˈˈpiʋ̈.—2 Tim. 2:5. w23.08 26 § 1-2.

ˈWɔngümansü ˗ya kë kwa ˗gɔ, kwa mɛn ˈˈwɛɛ ˗nu ˗bha ˈwɔn yö ˗kɔ ꞊bhlëë ˗ya. ˗A ˈwɔnzuan ˈnën ˗tɔ kwa ꞊dhegblüdhe ˈbha ˗nu ˗wo ˈklëë˗ ˗kpɔ wo ˈˈɲan gɛnŋdhö, ˈˈkɛɛ ˈyö˗ mɛn ˈbha ˗nu ˗zë ˈwaa ˈˈwɩ ˗a ˗kë ˈˈdhʋ̈ ˗sü ˗bha. Kletiɛn ˈbha ˗nu ˗wo we ˗mü, ˈö˗ mɛn ˈbha ˗nu ˗de ˈpö ˈwaa˗ mü. Kletiɛn ˗nu ˈˈpɛpɛ ˗wa ˈˈpiʋ̈ kö ˈwo kë wo ˈflëëgü, ˈˈkɛɛ ˈˈyua ꞊yaa˗ ˗an ˈkun, mën ˈö ˗dhö ˈnën ö ˗kɔ ˗yɛ ö ˈˈdhɛkë ˗kɔ ˗bha. ˈKwa˗ pö kwa ˗de ˗dhɛ ꞊dhɛ pë ˗nu ˈö ˈkwa kwa ˗kɔ ˗yɛ ˗an ˗bha ˈnën ˈwo ˗tɔ ˗a ˗së, ˈkwa kwa ꞊dhegblü ˗nu ˗blü kö ˗wo ˈwɔn yö ꞊dhɛ kwa ˈdhö, ˗yö ˗dho ˗kankwëëdhe ˗da ˗zlanwokɔdhi ˈgü. (1 Ko. 8:9; 10:​23, 24) Sɔ suu ˗nu ˈkwa dho ˗an ˗da, Zoova ˈti˗ pö kwa ˗dhɛ. ˈˈKɛɛ ˈtɔŋ˗ ˗gɛngbandhɛ ˗nu ˈkwa dho ˈto ˗an ˈˈpiʋ̈ ˗yö ˗an ˗nu kwa ˗dhɛ. Kwa ˗da ˗sɔ ˗nu dua ˗mü kö ˗wo ˗Zlan ˈtɔ bhɔ, ˗wa ˗zɔn ꞊dhɛ ˈwɔngümanmɛn ˗nu ˗mü kwa ˈka ˈö ˈkwaa kwa ˗de ˈsü ꞊va, ‹ˈwɔnbhokoodɔsü ˗yö kwa ˗gɔ.› (1 Tim. 2:​9, 10) ˈDhɛ ˈˈdhʋ̈, ˈkwaa˗ ˈˈpiʋ̈ kö kwa ˗da ˗sɔ ˗nu ˗wo mɛn ˗nu ˈˈɲan bɔ kwa ˗ta. Biblö ˗bha ˈtɔŋ˗ ˗gɛngbandhɛ ˗nu ˗dho mɛn zii ˗nu ˗takun kö ˈwa ˗dho wo ˗de ˗bha ˈtɔŋ˗ ˗nu ˈwo ˗gban sɔ ˗da ˗kɔ waa wun ˗pëkë ˗kɔ ˗bha, ˗an dɔ. w23.07 23-24 § 13-14.

Zoova ˗yö pë ˈö dho kwa ˗bha ˗dhɛkpaɔ dhiʋ̈ˈˈ kë ˗së, ˗a ˗zɔn kwa ˗dhɛ. Mɛn ˗nu ˈwo dho «dhebɔ ˈˈblɔɔnsü» ˗wo ˗bha, ˗wa ˈˈslö ˗mɛɛn kö ˈwo zuʋ̈gblüdhi ꞊slɔɔ ˈˈɲangüyaakësü ˈgü. ˗An ˈˈdhiʋ̈ ˗dho ˈto «Ga ˗gblü ˈgü.» (Prov. 9:​13, 17, 18) Mɛn ˗nu ˈwo dho «꞊kpɔɔdhɛ ꞊dede» ˗wo ˗bha, wo ˗zë ˗an ˗bha ˗dhɛkpaɔ dhiʋ̈ˈˈ ˈti ˗dho kë ˈˈdhʋ̈. (Prov. 9:1) Kwa˗ ˈˈslö mɛɛnˈˈ ˗ni ˈgü kö pë ˈö˗ ˗dhɔ Zoova ˗kë ˗a ˗dhɔ ˗yö kwa kë, kö ˗a ˗dhɛ ˈö˗ ˗san ˗ya ˗kë, ˗a ˗san ˗yö kwa kë ˈpö. (Ps. 97:10) Kwa zuʋ̈ˈˈ ˈˈgblü ˗yö dhi ˗sü ˈka ˈyö ˗tɔ ꞊dhɛ kwa mɛn ˈˈwɛɛ ˗nu ˗dhɛ kö ˗wo «꞊kpɔɔdhɛ ꞊dede» ꞊slɔɔ. Kwa kë ˗sü ˈka ꞊dhɛ yökëmɛn ˈö «dɔ ˗sü ˈka ˈˈkwipö ˈˈkplʋʋ ˗ta ˈˈdhuŋ, ˈö˗ pö ˗ni ˈgü mɛn ˗nu ˗dhɛ: ‹Mɛn ˈö ˈwɔndɔdhe ˈyaa ˗gɔ, ˗yö nu yö›» ˗a ˈdhö. ˈWɔn ˗së ˗nu ˈö kwaa mɛn ˗nu ˈwo wo ˈˈtʋ to kwa ˗bha ˈkwa dho ˗an ꞊slɔɔ, ˗an ˈˈdhiʋ̈ ˈyii ˗dho ˈto ꞊dɛɛ. ˗Wo ˗dho ˈto kwa ˗gɔ ˗tokpa ˈka, ˈö ˈkwa ‹˗tosɛta› ˈö ˈyaa ɲën ˗a ˗kë «ˈˈtasü ˈwɔndɔdhe ˗ʒian ˗ta» ˗sü ˈka ˗toëpë ˈka.—Prov. 9:​3, 4, 6. w23.06 24 § 17-18.

Kwa yökëyɔɔ ɛɛnˈˈ kwa ˈˈtɛɛdo ˈö ꞊klaŋplöö ˗ya kwa dhɛɛˈˈ ˈkpɔ kwa ˗bha ˗zoyödhe ˗wɔn ˈka, kwa ˗kë kwa ˗de ˈgü ꞊dhɛ? ˈPë ˈkwa dho ˗a pö, ˈkwaa˗ dɔ ˗ee? Kwa do ˈyaa ˈnën ˗kë kwa ˈka ˈˈdhʋ̈. ˈˈKɛɛ dhɛɛˈˈ suu ˈö bhë ü ꞊mɔɔn˗ ˗bha ˈü bɔ ˗a ˗ta kö pë ˈö˗ ˗mɛn ˗zo ˈˈpiʋ̈ ɛɛnˈˈ ˈü˗ ˗bha ˗zoyödhe dɔ, kë ˈˈdhʋ̈ kö ˈü nɔɔn˗ ˗së pö ˗a ˗dhɛ. ˗Ya kë ꞊shiöŋ mɛn ˈbha ˗nu ˗wo ˗de ˈˈɲaan dhɛɛˈˈ ˗kpɔ kwa ˗gɔ kö ˈwo zɔɔdhe ˗man kwa ˈka. ˗A ˈwɔn dua ˈyaa ˗mü kö ˗yö kwa ˈkun, ˈyö ˗tɔ ꞊dhɛ ˗wa ꞊suawɔn blɛɛˈˈ ˗an ˗dhɛ kwa ˗bha ˗zoyödhe ˗wɔn ˈgü. (Këw. 28:22). ˗Ya ˈgo mü ˈzü, kwa ‹ˈˈtʋ̈ŋ ˗totaabhasü ˗nu› ˈö mɛn ꞊vadhɛ «ˈwii ˈdho ˈwɩ mɛn ˈbha ˗bha ˗bha,» ˈö ˗an ‹꞊naan dho kë ꞊klöö˗› ˗an ˈgü. (2 Tim. 3:​1, 3) Mɛn ˈbha ˗ya kwa ˗bha ˗zoyödhe ˗wɔn yaa blɛɛˈˈ, kwa ˗dho ˗a ˗daa ˗së kë ˗a ˗gɔ ˗kɔ ˗kë ꞊dhɛ? ˈMën dho kwa ˗takun? ˗Kë dhɔŋsüsü ˗mü. Mɛn ˈö dhɔŋsü ꞊waa˗ woo mɛɛnˈˈ ɛɛnˈˈ ˈwɔn ˈö dho ˗a blɛɛˈˈ ˈyaa dɔ, ˗yö ö zuʋ̈ˈˈ ˗kë ˗saa. w23.09 14 § 1-2.

˗Ya kë ꞊shiöŋ, Zoova ˗bha ˗kɔlokota ˗yö ˗dhioo ˗nu ˈwo dho kwa ˗takun kö ˈkwa ˈˈkan ꞊nɔɔn ˗dhɔ waa ˗Zlan ˗bha ˈtɔŋ˗ ˗nu ˗lögü ˗sü ˗bha, ˗an ˗dɔ kwa ˗ta. ˗Dhioo ˗nu ˈwo ˈˈdhʋ̈ ˈkwa ˗an ˗ya ꞊bhlëë ˈgü, ˗wo ˈwɔn ˗së ˗kë kwa ˗dhɛ. (Is. 48:​17, 18; 1 Tim. 6:​9, 10) ˈYaa za ˈgü ꞊dhɛ Zoova ˗dho bɔ mɛnbhɩɩdhe ˗nu ˗ta ˈö ˈˈdhiʋ̈sü kwa ˈka ˈˈklʋʋbhɔdhe ˈkpii˗ ˈˈtʋ̈ŋ waa Yesu ˗bha ˗kwɛ ˈˈgblü do ˗Gblüdëdhɛ kë ˈˈtʋ̈ŋ ˈgü. Kwa ˗dho ˈˈwɩ ˗a ˗bha kö Zoova ˗yö ˈˈdhiʋ̈sü kwa ˈka ˗ee? ˈKwa˗ pö ˗yö kë kwa ˗kɔa ˈˈplëëplë, kwa dua ˗mü kö ˈkwa˗ kë ˈˈdhʋ̈ ꞊dɛɛ. ˈDhɛ ˈˈdhʋ̈, ˗kwa ˈˈwɩ Zoova ˗bha ˗bɔ ö ˗bha ˗yamɛn ˗nu ˗ta ˗sü kö ˗yö ˈˈdhiʋ̈sü kwa ˈka bhë ˗a ˗bha ˗kplawo. (Is. 32:​1, 2; Ebl. 13:17) Kwa ꞊mɔɔn˗ ˗bha ˈkwa to ˈˈDhiʋ̈sü kwa ˈka ˗mɛn Zoova ˈˈpiʋ̈, ˈdhaŋ˗ ˗bho ˗a ˈˈdhiʋ̈ ˗sü ꞊dede ˈka ˈyö sü ꞊dhɛ ˗yö kwa ˗kan pë ˗nu ˈwo dho kwaa˗ ˗nu kwa ˗bha ˈˈtɔŋdëdhɛ shiʋ̈ˈˈ ˗an ˗bha, ˈö dho kwa ˈka ˗tosɛta ˈö ˈyaa ɲën ˗a kë ˗dhɛ ˈgü ˈˈkpɔnŋtaadhɛ ˗dɛɛ ˈgü. w24.02 25 § 17-18.

Bɔmɛn Pɔdhö zuʋ̈ˈˈ ˈˈgblü ˗kun dhi ˗sü ˈka Zoova ˗dhɔkësü ˈgü. ˈˈKɛɛ ˈyaa kun ˈˈplëëplë ˈˈtʋ̈ŋ ꞊gban ˈka. Pɔdhö ˗kun ˈˈtakpɔ ˗ni ˈgü ʒian ꞊gblɛɛn ˗nu ˈˈpiʋ̈, ˈö kun ˈˈgbɩɩ˗ ꞊dedewo ˈˈtʋ̈ŋ ˈö ˈˈdhʋ̈ ˗a ˈgü. ˗Ya kë ꞊shöŋ ˗yö ˗dha «ˈˈyi ˗gɔ ꞊gwaan ˗ta,» ˈö dha ˈzü ‹꞊kwaanmɛn ˗nu ˗gɔ›. ˈˈTʋ̈ŋ ˈbha ˗nu ˈka ˈzü, ˗a ˈyɔɔ˗ ˗nu ˗wa ˗man. (2 Ko. 11:​23-27) ˗A ˗de ꞊dhegblü kletiɛn ˗nu ˈwaa ˗a ˗bha ö ˈgü ˗dɔ ˈˈgbɩɩ˗ ˗sü kö ˗yö ˗an ˗takun bhë ˗a yö ꞊dhɛ pë ˗së ˈdhö. (2 Ko. 10:10; Fdh. 4:15) ˈMën Pɔdhö ˗takun kö ˗yö Zoova ˗dhɔkë ˗kplawo? ˗Yö ˗bɔ ˗Zlan ˈˈDhiwo waa ˈwɔn ˗nu ˈö yö ꞊dede ˈö bɔ ˗an ˈgü ˗an ˗ta ˈö Zoova ˗bha ˈˈklʋʋsë ˗nu ˗draan ˗së ˈka. ˗Yö ˗kun ga ˗sü ˈka ˗a ˈgü ꞊dhɛ ö ˗dhɔ ˗yö Zoova ˗kë. (Wlɔ. 8:​38, 39; Efɛ. 2:​4, 5) ˗A ˗wɔn ˈgü, Zoova ˗dhɔ ˗kun ˗a kë ˗ni ˈgü ꞊dedewo ˈpö. Pɔdhö ˗yö ˗dhɔ ˈö ˈˈdhʋ̈ ˗a ˗zɔn ‹ˈwɔn ˗së ˗nu ˗kë zoova ˗bha mɛ ˗nu ˗dhɛ› ˗sü ˈka ˗kplawo.—Ebl. 6:10. w23.07 9 § 5-6.

Mɛn ꞊vadhɛ ˗wa ˈwɔn ˗dɔ ꞊dhɛ kwa ˗bhawɔn ˗yö «ˈˈsɛgɔdhiʋ̈mɛ ˗nu» ˗bha, ˈö kwa dua ˈdhö ˗mü kö ˈkwa ˗an ˗bha ˈtɔŋ˗ ˈbha ˗nu ꞊bhlëë ˗ya. ˈˈKɛɛ ˈwaa ˈˈwɩ ˗a ˗bha kö ˗an ˗bha ˈtɔŋ˗ ˗nu ˈö ˈwaa ˗an ˗dhɛ ˗së ˈwo ˗an ˗ya ꞊bhlëë ˈgü. Biblö ˗ya ˗pö ꞊dhɛ ˈˈsɛgɔdhiʋ̈mɛn ˗nu ˈwo Sɔtraan ˗kɔ ꞊löö ˗wo saanˈˈ ˗wɔ mɛn ˗nu ˗ta, ˈö go mü ˗an ˈgü shiʋ̈ˈˈ ˗yi ˈyaa ꞊gblɛɛn ˈzü. (Ps. 110:​5, 6; Eccl. 8:9; Dhu. 4:​5, 6) Biblö ˗ya ˗pö ˈzü ꞊dhɛ «mɛ ˈˈʋʋ mɛ ˈö gɔɔgbɩɩdhɛ ˗kë mɛdhɛkëmɛ ˗nu ˗gɔ, kö ˗yö gɔɔgbɩɩdhɛ ˗kë [˗Zlan] ꞊në˗ ˗gɔ bha.» ꞊Dɛɛ, Zoova ˗yö ö ˗kwaa ˈˈsɛgɔdhiʋ̈mɛn ˗nu ˈzü kö ˗wo kwa ꞊kɔɔn, kë ˈˈdhʋ̈ kö ˗wo ˈwɔn ˗nu ˗mɔnkwëë˗. ˗A ˗wɔn ˈgü, ˗ya ˈˈpiʋ̈ kö ˈkwa ˈwɔnman ˗an ˗ta. ˈDhɛ ˈˈdhʋ̈,«˗a mɛ ˈdhɛ ˗a ˗bha ˈwɔn ꞊ya kë k[w]a ˗bha, ˗k[w]aa bho k[w]a ˗bha.» ˗Yö ꞊mɔɔn˗ ˗bha ˈö ˗kë ˈnii˗ ꞊sɔnŋ bho ˗sü, ꞊bhlëë ˗ya ˗an ˗bha ˗sü waa ˈwɔn ˗man ˗an ˗ta ˗sü ˈka. (Wlɔ. 13:​1-7) ˗An ˗bha ˈtɔŋ˗ ˈbha ꞊mɔɔn˗ ˗bha ˈö ˗kë kwa ˈgü ꞊dhɛ mɛn ˈˈtʋ̈ŋ ˈsü ˗pë, ɛɛnˈˈ pë ˈö ˈyaa kpɛnŋdhö, ɛɛnˈˈ ˈzü pë ˈö˗ ˗ya ꞊bhlëë ˈgü ˗sü ˈdhö ˈˈgbɩɩ˗ ˗a ˈdhö. ˈˈKɛɛ ˈkö ˗kë ˈˈdhʋ̈ kwa ˈwɔnman ˈˈsɛgɔdhiʋ̈mɛn ˗nu ˗ta, ˈyö sü ꞊dhɛ Zoova ˈnën˗ pö ˈkwa˗ kë ˈˈdhʋ̈. Kö ˗wa pö ˈkwa ˈwɔn ˈbha ˈö ˈyaa Zoova ˗bha ˈtɔŋ˗ ˗lögü ˗a kë, kwa dua ˗mü ˈkwa˗ ˈwɔnman ˗an ˗ta.—Këw. 5:29. w23.10 8 § 9-10.

ˈˈTʋ̈ŋ ˈö Sansɔn ˗yö bhɔ ˗a ˈka, kö Fidhitɛn ˗nu ˗wo Izraɛdhömɛn ˗nu ˗gɔ ˈˈdhiʋ̈. ˗Wo ˗kun ˗an ˈˈklʋʋbhɔ ˗ni ˈgü. (Juges 13:1) Izraɛdhömɛn ˗nu ˗kun saanˈˈ ꞊dede ˈgü, ˈyö sü ꞊dhɛ Fidhitɛn ˗nu zuʋ̈ˈˈ ˗kun ˈya˗. Zoova ˗yö ö ˗kɔ ˗yɛ Sansɔn ˗bha «kö ˗yö ˈˈdhiʋ̈sü Izraɛdhömɛn ˗nu ˈka, ˗yö ˗an dha Fidhitɛn ˗nu ˗gɔ.» (Juges 13:5) Sansɔn ꞊yaa˗ pö ˈö ˗mɔn ˗a kë ˈˈdhʋ̈ ˗sü ˗bha, ˗a ˗bhawɔn ˗kun ˗zoyö Zoova ˗dhɛ ˗sü ˗bha. ˗Dhɛkpaɔyi do ˈka, Fidhitɛn ˈˈsɔdha ˗nu ˗wo ˗nu kö ˈwo Sansɔn ˈkun Dhei, Zuda ˗sɛ ˈgü. ˈˈSuʋ̈ ˗yö ˗da Izraɛdhömɛn ˗nu ˈgü, ˈwo Sansɔn nu ˗a ˈyɔɔ˗ ˗nu ˗dhɛ. Sansɔn ˗de ˗bha ˈˈsɛgümɛn ˗nu ˗wa ˗klu ˈˈbhüʋ̈ga ꞊dɛɛ ꞊plɛ ˈka, ˈwo˗ nu Fidhitɛn ˗nu ˗dhɛ. (Juges 15:​9-13) ˈˈKɛɛ «Zoova ˗bha ˗zuu ˗yö ꞊faan ˗nu» Sansɔn ˗dhɛ ˈö ˈˈbhüʋ̈ ˗kan ö ˗de ˗bha. ˗Yö «˗kpan ꞊sofaŋ ˈˈkpɛnŋga ˗bha,» ˈö˗ sü ˈö Fidhitɛn gɔɔn˗ ˗nu 1.000 zë ˗a ˈka!—Juges 15:​14-16. w23.09 2-3 § 3-4.

ˈWɔn ˗së ˈö mü ˈyö ˗tɔ ‹pë ˈö Zoova ˗ya ˗yö ˈko ˈdhiö ˗kë ö ꞊zuöˈ ˈpiö ꞊toëpö ˈka› bhë ˗ya ˗zɔn Biblö ˈgü ˈˈdhiʋ̈ ˈˈdhiʋ̈. Zoova ꞊mɔɔn˗ ˗bha ˈö bɔ pë ꞊va ˗ta ˈö ö dhɔɔbhaawɔn ˗kë. ˈWɔn ˗nu ˗wo ˗dhi ˗a ˗gɔ ˗kplawo, ˈyö sü ꞊dhɛ «˗yö pë ˈˈpɛpɛ ˗kë kö ö dhɔɔbhaawɔn ˗yö kë.» (Prov. 16:4) Pë ˗nu ˈö Zoova ˗yö ˗an ˗kë ˗wo ˗dho ꞊gwëë ˗töëpö ˈka. ˈMën ˗tɔ Zoova dhɔɔbhaawɔn? ˈYö ˗mën ˗nu ˈö ˗an ˗kë kö ö dhɔɔbhaawɔn ˗nu ˗wo yöködhiʋ̈? ˗Zlan ˗yö ö dhɔɔbhaawɔn ˗zɔn mɛnbhɩɩdhe ˗blɛɛsü ˗nu ˗dhɛ. ˗An dua ˗mü kö ‹ˈkpɔ ˗sü ˗yö dhi ˗an ˗gɔ ˗wo pa, ˗wo ˈˈkpʋngtaadhɛ bho, ˗wa ˗yë kë, kö ˗wo wo ˗zokë pëbhɩɩ˗ ˈˈpɛpɛ ˈˈpiʋ̈›. (ˈWun. 1:28) ˈˈKɛɛ ˈdhɛ Adan waa Ɛvö ˈwo ˗gban ˗Zlan ˗gɔ, ˈwo nu ˈwɔn yaa ˗kë ˗sü ˈka mɛnbhɩɩdhe ˗nu ˗ta bhë, ˗yö ˈti Zoova ˗kɔ ˈˈkan ö dhɔɔbhaawɔn kë ˗sü ˗bha. Pë ˈö˗ ˗kë ꞊ʒiaan ˈyö ˗tɔ ˗yö ˗bɔ ˈˈslö ˈˈwɛɛ ˈbha ˗ta kö ˈö ö dhɔɔbhaawɔn kë. ˗Yö ˗to mü ˈö˗ pö ö ˗dho ö ˗bha ˗Gblüdëdhɛ ˗ya dhaŋ˗ ˈgü, kö ˗yö ö dhɔɔbhaawɔn ˈö ˗gban mɛnbhɩɩdhe ˗nu waa ˈˈsɛ ˗an ˗bha bhë, ˗a kë.—Mat. 25:34. w23.10 19-20 § 6-7.

Zoova ꞊mɔɔn˗ ˗bha ˈö kwa ˗takun ˈkwa˗ ˗dhɔkë ˗kplawo. ˈˈKɛɛ kwa ˈkozë ˗ni ˈgü kwa ˗bha ˈˈtëëtëdhɛ ˈbha ˈka ˗a yi ˗ya ꞊gwëë, ˗to ö ˗wo ˗ta ˗sü ꞊mɔɔn˗ ˗bha ˈö ˗kë kwa ˗kɔa ˈˈgbɩɩ˗. ˈˈTʋ̈ŋ ˈbha ˗nu ˈka, ˗yö ꞊mɔɔn˗ ˗bha ˈö ˗kë kwa ˈgü ꞊dhɛ ˗kan kwa ˗bha ˈˈtëëtëdhɛ ˗nu ˗bha ˗sü ˗yö ˈˈgbɩɩ˗ ˈö ˗ʒiö ˗a ˈka bɔmɛn Piɛdhö ˗bha ˗ta. ˈˈKɛɛ Zoova ꞊mɔɔn˗ ˗bha ˈö kwa ˈgü ˗kë ˈˈgbɩɩ˗, ˈkwa˗ ˗dhɔkë ˗kplawo. (Ps. 94:​18, 19) ˗A ˈwɔnzuan do ˈnën ˗tɔ ˈˈsanni kwa ꞊dhegblü gɔɔn˗ do ˗yö gagade dɔ, waa gɔɔn˗ ˗nu ˗an ˗bha sɛɛˈˈ ˗kë do. ˗Yö ˗kan ˈˈtakɔ yaa ˈö bhë ˗a ˗bha. ˈˈKɛɛ ˈˈtʋ̈ŋ ˈbha ˈˈpiʋ̈, ˗a ˗dhɛ ˗kun ˗a ˗bha kö ˗yö ˈkozë ˗zotakɔ yaa ˗nu ˈka. ˈMën ˗takun? ˗Ya ˗pö: «Zoova ˗yö ꞊faan ˗nu n ˗dhɛ. ˗A ˗bha ˗zuu ˈˈslʋ̈ʋ̈slʋ̈ ˈsaa˗ ˈgü, ˈman˗ yö ꞊dhɛ a ꞊mɔɔn˗ ˗bha kö ˈa ˗tosɛta kë ꞊dhɛ ˗kɔ ˈö˗ ˈˈpiʋ̈ ˗a ˈdhö. Zoova ˗yö ˗bɔ n ˗ta ˈö ö dhɔɔbhaawɔn ˗nu ˗kë. ˈKö ˗kë ꞊dhɛ ˈwɔn yaa kë ˗dhii ˗yö n ˗man, Zoova ˗yö ꞊faan ˗nu n ˗dhɛ ˗kplawo.» w23.09 23 § 12.

Yi ꞊dhegblü wlüünën gɔɔn˗ ˗nu, ˈwaa ˈgo ˗de ˈwaa kë kletiɛn ˗kiansü ˈka. Ka ˗bhawɔn ˗yö mɛn ˗nu ˈwo ˈwɔnzuan ˗së ˈka bhë ˗to ˗an ˈˈpiʋ̈ ˗sü ˗bha kö ˈka ˈwɔnbhokoodɔsü draanˈˈ, ˈka kë ˈdhaŋ˗ ˗bho ˗a ˈˈdhiʋ̈ ˗mɛn ˗nu ˈka, kö ˈka yö ˈbha ˗nu draanˈˈ ka ˗bha ˗tosɛta ˈgü. ˗Ya ˈgo mü, ˗ka ka ˗de baaˈˈ yö ˗nu ˈwo dho dɔ ka ˗kɔ ˈka ˗dhɛkpaɔ dhiʋ̈ˈˈ ˈgü ˗an ˗bha. ˈKa ka ˗zota pë ˗nu ˈö ka ˗bhawɔn ˈdhö ˗an draanˈˈ ˗sü ˗bha ˗an ˈgü, ˗yö ꞊mɔɔn˗ ˗bha ˈö ˗kë ka ˈgü ꞊dhɛ ˗wo ˈˈgbɩɩ˗ ꞊dedewo. ˈˈKɛɛ ka ˗kɔ ˗dho ˗mɔn ˗an kë ˗sü ˗bha. Ka ˗zo ˈya ˗dho bhɔ ꞊dhɛ Zoova ˗ya ˈˈpiʋ̈ kö ˈö ka ˗takun. (Is. 41:​10, 13) ˗Ya ˈgo mü ka ꞊dhegblü ˗nu ˈwo ˗zlanwokɔdhi ˈgü bhë, ˗wa ˈˈpiʋ̈ ˈpö kö ˈwo ka ˗takun. ˈKa kë kletiɛn ˗kiansü ˗nu ˈka, ka ˗bha ˗tosɛta ˗dho kë ˗së ꞊dedewo ˈö ka ˗zokun. Yi ꞊dhegblü wlüünën gɔɔn˗ ˗nu, ka ˗dhɔ ˗yö yi ˗kë! Ka ˈgü ˈö ˈka˗ dɔ ˗ni ˈgü ˈˈgbɩɩ˗ kö ˈka kë kletiɛn ˗kiansü ˗nu ˈka bhë, Zoova ˗dho ˈdhuëë˗ ꞊dede ˈkpɔ ka ˗bha. w23.12 29 § 19-20.

˗Kwa kwa ˗zota kö kwaa kwa ꞊dhegblü ˗nu kwa ˈwlaan˗ ˗ta ˗dhɛ do ˈgü, ˈkwa mɛn ꞊gban foto ˈsü. ˈˈKɛɛ ˈyö ˈkwa go mü ˈzü ˈkwa foto ꞊plɛ ˈwɛɛ sü, kë ˈˈdhʋ̈ kö ˗a do ˈti kë ˗së, ˈkwa˗ bho mü. ˗Ya kë ˈˈdhʋ̈ kö foto ˗yaaga ˈnën kwa ˗gɔ. Foto ˗nu ˈwo ˈˈdhʋ̈ ˗a do ˈgü, kwa˗ ˗yö ꞊dhɛ kwa ꞊dhegblü do ˈyaa ˈˈyɩɩ ˈto ˗ni ˈgü mü. ˗A ˗wɔn ˈgü kwa ˗dho ˗a shiʋ̈ˈˈ, ˈyö sü ꞊dhɛ ˗a ꞊plɛ ˈwo to mɛn ˈˈpɛpɛ ˈö dho ˈö yö˗ ˈka kwa ꞊dhegblü ˈö bhë ˗a ˗bha, ˗an ˈˈdhi ˗yö ˈˈyɩɩ ˈka mü. Kwaa kwa ꞊dhegblü ˗nu ˈkwa ˈˈtʋ̈ŋ kë kwa ˈkwëë˗, ˈwɔn ˗së ˗nu ˈwo ˗an ˗kë ˈnën ˈwo to kwa ˈˈɲaan. ˈˈKɛɛ kö ˈˈtʋ̈ŋ ˈö bhë ˗a ˈka, kwa ꞊dhegblü do ˗yö ˈwɔn ˈbha ˈö ˈyaa ˗së ˗a kë ɛɛnˈˈ ˗a pö, ˈmën dho ˈto kwa ˈˈɲaan? Kwa dua ˗mü kö kwa ˗zo ˗yö ˈgo ˗a ˈˈpiʋ̈ ꞊dhɛ ˗kɔ ˈö ˈkwa foto yaa ꞊shiʋ̈ ˗a ˈka bhë, ˗a ˈdhö. (Efɛ. 4:32) Kwa ˗dho ˗mɔn ˗a ˗kë ˈˈdhʋ̈ ˗sü ˗bha, ˈyö sü ꞊dhɛ kwa ˗zo ˗yö ˈˈtʋ̈ŋ ˗së ꞊va ˈkwa˗ ˗kë kwa ˈkwëë˗ ˗a ˈˈpiʋ̈. Pë ˗nu ˈö ˈkwa ˗an ˈˈpiʋ̈ kö ˗wo ˈto kwa ˈˈɲaan, ˗wo kë kwa ˗dhɛ ˗së ˈnën ˈwo bhë. w23.11 12-13 § 16-17.

Glɛkö ˗wo ˈwo˗ ꞊dhiëëta bhë ˗a ˗gɛn ˈnën ˗tɔ kletiɛn dhebɔ ˗nu ˗bha sɔ ˗da ˗kɔ ˗wɔn ˈgü mɛn ˗nu ˗wo ˗an ꞊bhlëë ˗ya, ˈö ˈwaa mɛn ˈˈwɛɛ ˗nu ˈˈtʋ̈ŋ ˈsü. Kwa ꞊dhegblüdhe ˗nu ˈö ˗wa ˗kian bhë ˗an ˗bha sɔ ˗da ˗kɔ ˗yö kwa ˗dhɛ ˗së ꞊dedewo! ˈWɔnbokoodɔsü ˈö bhë ˈˈklʋʋsë ˗nu ˈö kletiɛn dhebɔ ˗nu ˈö ˗wa ˗kian ˈö ˗an ˗bhawɔn ˈdhö˗ ˗bha ˗a do ˗mü. ˈMën ˗tɔ ˈwɔnbokoodɔsü? Yö ˈnën ˗tɔ ˈwɔn ˗së waa ˈwɔn yaa ˗an ˗bho ˈkoo dɔ ˗sü ˈwo wo ˗kɔ ˗yɛ ˗a ˗dhɛ ˈö ˗së ˗a ˗bha. ˗Kwa Abigaidhö ˗bha ˈwɔnzuan ˗ga. ˗A ꞊gɔn ˗yö ˈwɔn yaa ˈö dho pë ˈˈdhiʋ̈˗ kë waa ö ˗bha ˈkɔdhigümɛn ˗nu ˗todhʋ̈sü ˗an ˈka, ˗a ˗kë. ˈˈKɛɛ Abigaidhö ˗yö ˗to mü ˈö ˈwɔn ˈbha ˗kë ˈpö. ˗A ˗bha ˈwɔnbhokoodɔsü ˗yö mɛn ꞊va ˗dha. (1 Sam. 25:​14-23, 32-35) ˈWɔnbhokoodɔsü ˗yö kwa ˗takun ˈpö kö ˈˈtʋ̈ŋ ˈkwa dho dhiaŋzë ɛɛnˈˈ dɔ ˗a ˈka kwa ˈˈdhi ˈˈtun, ˈkwa˗ dɔ. ˗Yö kwa ˗takun ˈzü ˈö ˈkwa kwa ˈˈtʋ̈ŋ ˗kë mɛn ˈˈwɛɛ ˗nu ˈgü, ˈö ˈkwaa ˗an ˈˈtʋ̈ŋ ˈsü ˗wɔn ˗nu kë.—1 Tes. 4:11. w23.12 20 § 8-9.

Bɔmɛn Pɔdhö ˗yö ˗wo ˈö bhë ˗a ˗pö ˗zlanwokɔdhi ˈö kun Wlɔmö ˗a ˗dhɛ. Mɛn ˗nu ˈwo kun mü -wo ˈwɔn ˈö ˗gban Zoova waa Yesu ˗an ˗bha ˗a -draan ˈwo ˈdhaŋ˗ bho ˗a ˈˈdhiʋ̈, ˈwo ˗kë kletiɛn ˗nu ˈka. ‹˗An ˗bha ˈdhang ˗bho ˗a ˈˈdhiʋ̈ ˗sü bha˗ ˗wɔn ˈgü, ˗Zlan ꞊ya ˗an kë ˈmɛ ˈö pö ˈaa˗ ˗bha ˗an ˈka,› ˈö ö ˗bha ˗zuu ˈˈslʋ̈ʋ̈slʋ̈ nu ˗an ˗dhɛ. (Wlɔ. 5:1) ꞊Ii, ˗wo ˗kun wo ˈˈɲan ˈto ˗ni ˈgü ˗dhɛkpaɔ dhiʋ̈ˈˈ ˗së ꞊dede ˗gɔ. ꞊Taabha, Pɔdhö ˗yö ˈsëëdhɛ ˗bɔ ˈˈɲɔn ˗a ꞊troo ˗nu ˈwo kun Efɛzö ˗an ˗dhɛ, ˈö ˗an ˗bha ˗dhɛkpaɔ dhiʋ̈ˈˈ ꞊saan ˗wɔn ꞊blɛɛ ˗a ˈgü. ˗Ya ˗pö ꞊dhɛ ˗wo ˗dho «ˈkɛnŋpë ˈö ˗ya ˗sü ˈka mɛn ˈˈslʋ̈ʋ̈slʋ̈ ˗nu ˗gɔ,» ˗a ꞊slɔɔ. (Efɛ. 1:​18, NWT) Pɔdhö ˗yö ˗go mü ˈzü ˈö˗ pö Kodhɔsömɛn ˗nu ˗bha «˗dhɛkpaɔ dhiaˈˈ saan [˗yö] ˗ya ˗sü ˈka ˈdhang˗ ˈgü.» (Kodh. 1:​4, 5) ˈˈƝɔn ˗a ꞊troo ˗nu ˗dho ˈgo ga ˈgü kö waa Yesu ˗nu ˗wo ˗Gblüdëdhɛ kë dhaŋ˗ ˈgü.—1 Tes. 4:​13-17; ˗Dhɛ. 20:6. w23.12 9 § 4-5.

˗Wo ˈö ˗kë ‹˗takpa ˈka› bhë, ˗yö ˗gban ˈˈsɔdha ˗nu ˈwo wo ˈˈɲan ˈto ˗ni ˈgü ˈˈkwipö ˈbha ˗bha kë ˈˈdhʋ̈ kö mɛn ˈya ˗dho ˗nu ˗a ˗gɔ, ˗an ˗bha. Mɛn ˗nu ˈwo ˈˈkwipö ˈö ˈˈdhʋ̈ ˗a ˈgü ˗wo yi ˗zë wo ˈflëëgü, ˈyö ˗sü ꞊dhɛ ˗wa ˈwɔn ˗dɔ ꞊dhɛ ˈˈsɔdha ˗nu ˗wo ˈˈkwipö ˗takpa ˗ni ˈgü. ˗Kɔ do ˈö bhë ˗a ˈka zuʋ̈waannsü ˈö go ˗Zlan ˈˈpiʋ̈ ˗ya kë kwa ˗gɔ, kwa zuʋ̈ˈˈ ˗yö ˗kë ˗saa ˈyö sü ꞊dhɛ kwa˗ ˈwɔn ˗dɔ ꞊dhɛ ˗yö kwa ˗takpa ˗ni ˈgü. (Ps. 4:8) ꞊Dhɛ Anö ˈdhö, ˈkö ˗kë ꞊dhɛ ˈwɔn ˈö ˈkwa˗ ˈgü ˈyii ˈgo ˈˈgblʋʋ ꞊köŋ, kwa zuʋ̈ˈˈ ꞊mɔɔn˗ ˗bha ˈö ˗kë ˗saa. (1 Sam. 1:​16-18) Kwa zuʋ̈ˈˈ ˗ya kë ˗saa, ˗zotakɔ ˗së ˗dho kë kwa ˗gɔ ˈö ˈkwa ˗da ˈwɔn ˗nu ˗ʒian ˗ta ꞊kpɔɔdhɛ ˈka. ˈMën ˈkwa ꞊mɔɔn˗ ˗bha ˈkwa˗ kë? ˈWɔn ˈˈgbɩɩ˗ ˗nu ˗wa nu kwa ˗ta, ˗kwa Zoova ˗dhɛ kö ˗yö nu kwa ˗dhɛ. ˗Kɔ ˗kë ꞊dhɛ? ˗Kwa bhɛɛˈˈ kö ˗yö ˈdho ˗yö yo˗ ˈka Zoova ˗bha zuʋ̈waannusü ˗nu kwa ˗dhɛ ˗sü ˗bha. (Dhu. 11:9; 1 Tes. 5:17) Kwa bɔ ˗ni ˈgü ˈwɔn ˈˈgbɩɩ˗ ˈgü ˈkwa bhɛɛˈˈ ˗kplawo, zuʋ̈waannusü ˈö go Zoova ˈˈpiʋ̈ kwa ˗dho ˗a ꞊slɔɔ.—Wlɔ. 12:12. w24.01 21-22 § 5-6.

Yesu ˗bha ö Dë ˈtɔ ˗kë ˈˈslʋ̈ʋ̈slʋ̈ ˗sü ˈwɔn ˈgü, ˗wo pë ˈˈdhiʋ̈˗ ˗kë ˗a ˈka, ˈwo ˈˈsi bho ˗a ˗gɔ, ˈwo ꞊suawɔn dɔ ˗a ˗bha. ˗Ya ˈwɔn ˗dɔ ꞊dhɛ ö ö ˗gɔ ˗dho ö Dë ˗dhɛ ˈˈshia˗ ˈwɔn ꞊gban ˈgü. ˗A ˗wɔn ˈgü, ˈlëë˗ ˈti˗ kë pë gbɛ˗ ˗dhɛ. (Ebl. 12:2) ˗Yö ˗kun ˗a ˈwɔn dɔ ˗ni ˈgü ˈzü ꞊dhɛ Sɔtraan ˗kun nu ˗ni ˈgü ö ˗gɔ vɛɛdhö ˈˈtʋ̈ŋ ˈˈgbɩɩ˗ ˈö bhë ˗a ˈgü. (Dhu. 22:​2-4; 23:​33, 34) Sɔtraan ˗kun ˗a ˈˈpiʋ̈ kö ˈö Yesu ˗bha ˗towotasü shiʋ̈ˈˈ, ˈˈkɛɛ ˗a ˗kɔ ˈti ˗mɔn ˗a ˗bha. Yesu ˗ya ˗zɔn ꞊dhɛ ꞊suamɛn ˗mü Sɔtraan ˈka, ˈö˗ ˗zɔn ˈzü ꞊dhɛ Zoova ˗dhɔkëmɛn ˗nu ˈwo ˗klu ˗a ˗bha bhë ˈkö ˗kë ꞊dhɛ ˈwɔn ˈˈgbɩɩ˗ ˗nu ˗an ˗ta, ˗wo ˗to wo ˗wo ˗ta. Kwa˗ ˈˈpiʋ̈ kö kwa ˈˈdhiaa ˗yö kë kwa ˗bha ˗Gblüdë ˈgü ˗ee? ˗Kwa Zoova ˈtɔ bhɔ ˗kplawo kö ˈkwa mɛn ˈˈwɛɛ ˗nu ˗takun ˗wa ˗bha ˈˈklʋʋsë ˗nu dɔ. ˈKwa˗ kë ˈˈdhʋ̈, kö kwa ˈto ˗ni ˈgü Yesu ˗bha ˈwɔnzuan ˈˈpiʋ̈. (1 Piɛ. 2:21) ꞊Dhɛ Yesu ˈdhö, kwa ˗dho Zoova zuʋ̈ˈˈ ˈˈgblü dhi, ˈkwa˗ ˗zɔn ꞊dhɛ ˗A ˈyɔɔ˗ Sɔtraan ˈö bhë ꞊suamɛn ˈö ˈlëë˗ ˈyaa kë yö ˗mü. w24.02 11 § 11-13.

˗Kwɛ ˈˈsoodhu ˈwo ˗ʒiö yö ˗an ˈgü, mɛn ˗nu ˈwo ˗mɔn ˈˈmliɲɔn do ˗bha ˗wo ˗bɔ ˈˈyi ꞊bhaa ˈwo ˗kë Zoova ˗bha ꞊Gbɛkiö ˗nu ˈka. ˈBha ü ˗de nu Zoova ˗dhɛ kö ˗bha ˈˈwɩ ˗kë Yesu ˗bha gwëëˈˈ ˈka ˗sü ˗bha. Ü ˗Zlan dhɔɔbhaawɔn kë ˗sü ˗sü ꞊dhɛ pë ˗wɔngbɩɩsü ꞊dede ˈdhö ü ˗bha ˗tosɛta ˈgü. ˗Kɔ ˗kë ꞊dhɛ? Yesu ˗ya ˗pö: «Mɛ ˈˈʋʋ mɛ ˈö˗ ˈˈpiʋ̈ ꞊dhɛ ˈö ziö n ꞊keng˗, ˗a ˗mɛ ˗yö bo ˗ya ö ˗dɩ ˗wɔn zuën ˗ta ˗sü ˈka.» (Mat. 16:24) Glɛkö ˗wo ˈwo˗ ꞊dhiëëta ˈö ˗kë «˗yö bo ˗ya ö ˗dɩ ˗wɔn zuën ˗ta ˗sü ˈka» bhë, ˗yö ꞊mɔɔn˗ ˗bha ˈö ˗kë «ˈya ˗dho ö ˗de ˗dhidhɛwɔn kë ˈzü» ˈka. ˈBha ü ˗de nu Zoova ˗dhɛ kö ü dua ˗mü ˈü ü ˗kɔ bho pë ˈˈoo ˗pë ˈö ˈyaa˗ ˗dhɛ ˗së ˗a ˈgü. (2 Ko. 5:​14, 15) ˗A ˗gɛn ˈnën ˗tɔ ü ˗dho ˈˈkan «˗dɩ ˗dhidhɛwɔn ˗nu» ˈö˗ do ˗kë ˈˈɲangüyaa ˈka, ˗a ˗bha. (Ga. 5:​19-21; 1 Ko. 6:18) ˈÜ ˗dho ˗mɔn ˈtɔŋ˗ ˗nu ˈwo bhë ˗an ˗ya ꞊bhlëë ˈgü ˗sü ˗bha ˗ee? ꞊Ii. Zoova ˗dhɔ ˗ya ü kë, ˗ya ga ü ˈgü ꞊dhɛ ˗a ˗bha ˈtɔŋ˗ ˗nu ˗ya ꞊bhlëë ˈgü ˗sü ˗yö ˗së, ü ˗dho ˗mɔn ˗a ˗bha.—Ps. 119:97; Is. 48:​17, 18. w24.03 2 § 1; 3 § 4.

Mɛn ˗nu ˈö ˗an ˈˈdhiaa ˈdhö Zoova ˈgü bhë ˗yö ö ˗bha ˗zuu ˈˈslʋ̈ʋ̈slʋ̈ ˗nu ˗an ˗dhɛ. (Mat. 12:18) Kwa ꞊mɔɔn˗ ˗bha ˈkwa kwa ˗de dhɛɛˈˈ kpɔ, ˈkwa˗ pö: «A ˗zuu ˈˈslʋ̈ʋ̈slʋ̈ këyö ˈbha ˗nu ˗zɔn n ˗man ˗tosɛta ˈgü ˗ee?» Ka˗ ˗yö ꞊dhɛ ka zuʋ̈ˈˈ ˗ya kë ˗saa ˗ya ʒiö ˗a ˈka ˈˈtʋ̈ŋ ˈö ˈkaa kun Zoova dɔ ˗ni ˈgü ˗a ˈka bhë, ˗a ˗ta ˗ee? ˗Zuu ˈˈslʋ̈ʋ̈slʋ̈ këyö ˗nu ˗wo kë ˗ni ˈgü kwa ˗gɔ, ˗yö ˗dho ga kwa ˈgü ꞊dhɛ kwa ˈˈdhiaa ˗yö Zoova ˈgü. Zoova ˗yö ˗gɔtadhɔpë ˗nu mɛn ˗nu ˈö ˗an ˈˈdhiaa ˈdhö ö ˈgü ˗an ˗bha ˈka. (1 Tim. 2:​5, 6) ˈˈKɛɛ ˈkö ˗kë ˗ʒiaanwo ꞊dhɛ kwa kwa ˗zoyö ˗gɔtadhɔpë ˗dhɛ ˈö ˈkwa bɔ ˈˈyi ꞊bhaa, kwa zuʋ̈ˈˈ ˈyaa ˈˈwɩ ˗ni ˈgü ˗a ˗bha ꞊dhɛ kwa ˈˈdhiaa ˗yö Zoova ˈgü, ˈmën ˈkwa dho ˗a kë? ˗Yö kë kwa ˈˈɲaan ꞊dhɛ ˈkwaa ꞊mɔɔn˗ ˗bha kö ˈkwa ˈdhaŋ˗ bho kwa ˗de ˗bha ˈwɔn yö ˗kɔ ˈˈdhiʋ̈ ˗kplawo, ˈˈkɛɛ kwa dua ˗mü ꞊ʒiaan ˈkwa ˈdhaŋ˗ bho Zoova ˈˈdhiʋ̈. Mɛn ˗nu ˈwo wo ˗zo yö ˗gɔtadhɔpë ˗dhɛ bhë ˗wo kpɛnŋdhö ˗a ˈˈɲan ˈˈdhiʋ̈, ˈö˗ pö ꞊dhɛ ö ˗dho ˈdhuëë˗ ˈkpɔ ˗an ˗bha.—Ps. 5:12; Wlɔ. 3:26. w24.03 30 § 15; 31 § 17.