Mɛn ˗nu ˈwo wo ˗de ˈgü wo duuˈˈ ˈka ˗wo ˗da ˗ni ˈgü ˈˈdhiʋ̈: ˈMën Biblö ˗ya pö?

꞊Klaŋ ˈbha ˈwo˗ ˗kë ˈö˗ yi ˈyii ꞊gwëë ꞊köŋ,a ˗ya ˗pö ꞊dhɛ ˈˈkpɔnŋtaadhɛ ˗todhʋ̈sü ˈgü, ˗wa mɛn ˗yiishiö ˈsü, ˗a mɛn do ˗yö ö ˗de ˈgü ö duuˈˈ ˈka.

• «˗Yö ˗kë wlüünën ɛɛnˈˈ mɛn zii ˈka, ˈgo mü ˈzü kwa kë ˗dhɛ ˈˈʋʋ ˗dhɛ ˈgü, mɛn ꞊gban ˈˈpɛpɛ kwa ꞊mɔɔn˗ ˗bha ˈkwa ˗kë kwa ˗de ˈgü kwa duuˈˈ ˈka.»—Shido Npɛmba, Mɛn ˈˈdhɛkësü ˗kɔlokota ˈö ˈˈkpɔnŋtaadhɛ ˗todhʋ̈sü ˈgü ˈwo˗ ˗dhɛ OMS ˗a mɛn do.

˗Mɛn ꞊vadhɛ ˈbhaa ˈgü, mɛn ˗nu ˈö ˗wa kë zii ɛɛnˈˈ ˈö mɛn ˈbha ˈyaa ˗an ˈˈsɔɔ ꞊nën ˗wo ˗kë wo ˗de ˈgü wo duuˈˈ ˈka. ˈˈKɛɛ ˈyaa ˈˈdhʋ̈! Mɛn ˗nu ˈwo wo ˈflëë˗ ˈgü, wlüünën ˗nu, mɛn ˗nu ˈö ꞊nɔɔn ˈdhö˗ ˗an ˗gɔ waa ˈkosümɛn ˗nu ˗de ˈpö, ˗wo ˗kë wo ˗de ˈgü wo duuˈˈ ˈka ꞊shiöŋ. ˗To ö do ˈka ˗sü waa ˗kë ö duuˈˈ ˈka ˗sü ꞊mɔɔn˗ ˗bha ˈwo ˈwɔn yaa ꞊dede ˗kë mɛn ˈbha ˈka, ˈwo ˈˈyua ˗ya ˗a ˗bha ɛɛnˈˈ ˈwo˗ ˗gɔ ˈgü dɔ ˗gbɔudhö.

• ꞊Dhɔtrɔɔmi do ˈwo˗ ˗dhɛ Vivɛkö Mëëti ˗ya ˗pö ꞊dhɛ: «˗Kë mɛn duuˈˈ ˈka ˗sü ˈö bhë, ˈyaa ˈwɔn ˈbha ˈö ˗da mɛn zuʋ̈ˈˈ ˈˈpiʋ̈ dosɛnŋ ˗a ˈka. ˗To ö do ˈka ˗sü ɛɛnˈˈ ˗kë ö duuˈˈ ˈka ˗sü ꞊mɔɔn˗ ˗bha ˈö mɛn zë ꞊dhɛ ˗kɔ do ˈö ꞊shiɛti ga 15 ˈmü ˗sü ˈö ˗dhɛkpaɔyi do ˈgü ˈö ꞊mɔɔn˗ ˗bha kö ˗yö mɛn zë˗ ˈka ˗a ˈdhö.»

ˈMën Biblö ˗ya pö?

Kwa ˗Damɛn ˈyaa˗ ˈˈpiʋ̈ kö ˈkwa ˈto kwa do ˈka. ˗Zlan ˗zopiʋ̈wɔn ˈö ˈdhö ˈˈtʋ̈ŋ ꞊gban ˈgü ˈyö ˗tɔ kö mɛnbhɩɩdhe ˗nu ˗wo kë wo ˈko ꞊bhaa ˗së ˈka, zuʋ̈gblüdhi ˈgü.

• Biblö ˗bha ˈtɔŋ˗ ˗gɛngbandhɛ: «ˈYö ˗Zlan ˗ya pö ö ˗de ˗dhɛ ꞊dhɛ ˈyaa ˗së kö gɔɔn˗ yöö dosɛng ˗yö ˗tosɛa kë, a ˗dho ˗a ˗ta ˈkun ˗mɛ ˈö bhɔ˗ ˗bha ˈpö ˗a kë˗.»—ˈWunzüdɔdhɛ 2:18.

˗Zlan ˗ya ˈˈpiʋ̈ kö ˈkwa ꞊ɲɔɔn ö ˈˈsɔɔ ˈkwa kë ˗a ˈˈtɔŋdë ˈka. ˗Ya pö ꞊ya kë ꞊dhɛ ˈkwa kwa ˈgü dɔ ˈˈgbɩɩ˗ ˈkwa ꞊ɲɔɔn ˗a ˗bha, yöö ˗de ˈpö ˗yö ˗dho ꞊ɲɔɔn kwa ˈˈsɔɔ.—Zakö 4:8.

• Biblö ˗bha ˈtɔŋ˗ ˗gɛngbandhɛ: «Mɛn ˗nu ˈö ˈwo˗ ˈwɔn dɔ ꞊dhɛ wo ˗bhawɔn ˗yö ˗Zlan ˗bha ˗an ˗bha ˗yö ˗së, ˈyö sü ꞊dhɛ ˗Gblüdëdhɛ ˈö dhaŋ˗ ˈgü ˗yö ˗an ˗bha ˈka.»—Matiö 5:3.

˗Zlan ˗ya ˈˈpiʋ̈ kö ˈkwa kpa mɛn ˈˈwɛɛ ˗nu ˗bha kö ˈkwa˗ ˗dhɔkë. ˈKwa˗ kë ˈˈdhʋ̈ ˗yö kwa ˗takun ˈö ˈkwa go kwa duuˈˈ ˈka.

• Biblö ˗bha ˈtɔŋ˗ ˗gɛngbandhɛ: «˗Ka ˗kwa kwa ˈˈtʋ̈ng kë kwa ˈko ˈgü kö ˈkwa kwa ˈko ˗nu faan dɔ, kö mɛ ꞊gban ˗dhɔ ˗yö kwa kë kö kwa zuëˈˈ ˗yö bhɔ ˈwɔn ˗së kë ˗sü ꞊në˗ bha. [...] ˈˈkɛɛ kwa ˗zë ˗ka ˗kwa ˗ya ˗dhɛ do ˈgü kö ˈkwa kwa ˈko ˗nu faan dɔ ˗to ˈˈpiʋ̈ ˗sü ˗bha ˗kpɛawo.»—Eblö 10:24, 25.

ˈPë ˗kë ˈö ˈkwa ˗dho kwa ˈgü dɔ ˈˈgbɩɩ˗ kö ˈkwa ˈdho ˈto kwa do ˈka, ˈbha˗ pö ˈü˗ ˈbha dɔ, ˗bhö ˈwɔn ˗gɔ « La solitude à l’ère de la communication » ˗wo pö.