Aseŋ Ka N Bare Lɔɔre Mɔmmo Bee Moto Zɔmmo Bee?

AMINEKAŊAŊ, ho de la yuomo yaga a mɔnɔ lɔɔre kyɛbee a zɔnnɔ moto. Kyɛ pampana, ho yuomo nyɛɛ nimitɔɔre gaabo. Azuŋ, ho booree deme neŋ ho zɔmenne zoree dabeɛ̃ ka bebiri kaŋa yelfaa kaŋa na baŋ pɔge boŋ a lɔɔre mɔmmo kyɛbee a moto zɔmmo poɔŋ. Kyɛ, hooŋ yɛŋ ba baŋ bon nanso a yɛlɛ naŋ fɛrɛ ba lɛ.

A yɛlɛ ŋa taa daaŋ pɔge boŋ bee? Ka hooŋ iri a noɔre ka ɛɛ, boŋ na baŋ soŋ bo ka ho peɛre ho meŋɛ velaa a nyɛ ka aseŋ ka ho naŋ kyɛnɛ mɔnɔ lɔɔre bee?

A yi paalonne mine poɔŋ, ka neɛŋ wa nyɛ yuomo mine a naŋ boɔrɔ ka o taa apoɔsori ka o naŋ mɔnɔ lɔɔre, aseŋ ka o gaa dɔkta zie ka o te peɛroo a pãã koo a sori. Kristabiiri naŋ be ana paalonne na poɔŋ seŋ ka ba de a paaloŋ bege ane sowuli tonɔ neŋ toma. (Uro. 13:1) Zie zaa ho naŋ be, kyɛ a sowuli ŋa na baŋ soŋ boŋ ka ho de gbɛ-soŋ a kyaare a yɛlɛ ŋa.

SOOREBIE MINE HOŊ NA BAŊ DE PEƐRE NEŊ HO MEŊƐ

Yelsɛgraa kaŋa naŋ maŋ kaara neŋnyaane laafeeloŋ yɛlɛ yeleeŋ ka, neŋnyaane na baŋ de la a soorebie ama peɛre neŋ ba menne a nyɛ:

A maŋ eɛ kpeɛŋaa ko ma ka N kanne sori zu sowuli, kyɛbee a nyɛrɛ zie velaa zisoɔree saŋa bee?
A maŋ eɛ kpeɛŋaa ko ma ka N leɛre N zu a kaa a kyaanaa, kyɛbee N puori bee?
A maŋ eɛ kpeɛŋaa ka N lonne wieoŋ a bare a gas a kyɛ neɛ a brake bee?
Lɛ na maŋ mɔnɔ a lɔɔre na maŋ vɛŋɛɛŋ aŋ e kpeɛŋaa ko noba naŋ tuuro ma ka ba nyɛ zie a gaa bee?
A maŋ kyɛrɛɛ fẽẽ ka N nyɛ accident, kyɛbee N maŋ de la a lɔɔre te va boma mine naŋ are?
Lɛ na maŋ mɔnɔ a lɔɔre na vɛŋɛɛŋ ka polisiri vɛŋ maŋ are baŋ peɛre ma yɛlɛ bee?
N daaŋ mɔnɛɛ a lɔɔre a kyɛ piili gbire bee?
N nyuuree teenɛɛ mine naŋ maŋ vɛŋ aŋ e kpeɛŋaa ko ma ka N mɔnɔ a lɔɔre bee?
N booree deme bee N zɔmenne yeleeŋ ka ba pulaa teɛrɛŋ neŋ lɛ na maŋ mɔnɔ a lɔɔre bee?

Ka hooŋ iri a soorebiri kaŋa, kyɛbee a soorebie ayi mine nɔɛ ka ɛɛ, a na somaŋ ka ho e leɛroo mine. Aŋa mannoo poɔŋ, ho na baŋ ŋmaaɛ lɛ na hoŋ mɔnɔ lɔɔre na bare. Maŋ peɛrɛ ho meŋɛ gbɛɛ yaga a nyɛ ka ho mɔnɛɛ a lɔɔre soŋ bee. Ho na baŋ soorɛɛ ho zɔmeŋɛ, kyɛbee ho booree neɛ kaŋa ka o wuli teɛroŋ na oŋ taa kyaare lɛ na hoŋ maŋ mɔnɔ lɔɔre. Ho na baŋ zannɛɛ yɛlɛ naŋ na baŋ soŋ bo ka ho maŋ mɔnɔ lɔɔre velaa. Kyɛ, ka hooŋ iri a soorebie kpoŋ zie zaa nɔɛ ka ɛɛ, lɛ yɛŋ, ana somaŋ ka ho bare lɔɔre mɔmmo, kyɛbee moto zɔmmo.a

SOBUO KA A BAABOLE NA BAŊ SOŊ BO KA HO DE GBƐ-SOŊ?

A na baŋ eɛ kpeɛŋaa ko bo ka ho nyɛ ka ho ba lɛ kyile yaga lɔɔre mɔmmoŋ. Azuŋ, ka neɛŋ yelko bo ka ho bare lɔɔre mɔmmo, ana baŋ eɛ kpeɛŋaa ko bo ka ho sage o yɛlɛ na. Azuŋ, bo Baabole sowuli la na baŋ soŋ bo ka ho taa teɛroŋ soŋ kyaare a yɛlɛ, ka lɛ vɛŋ ka ho toɔ̃ de gbɛ-soŋ? Te manne Baabole sowuli ayi mine yɛlɛ.

Baŋ ho e ta zie. (Yeng. 11:2) Saŋa na ho yuomo naŋ nyɛrɛ nimitɔɔre gaabo na, ho ba maŋ lɛ nyɛrɛ kyɛbee a wono yɛlɛ soŋ. Ho eŋdaa meŋ ba maŋ lɛ e kpeɛŋaa, ka ho faŋa meŋ baara. Aŋa mannoo poɔŋ, ka noba mineŋ wa nyɛ yuomo mine, ba ba maŋ lɛ derɛ ba menne eŋnɛ kɔɔ-dɛnne yɛlɛ mine poɔŋ, bonso ba maŋ baŋeŋ ka ba na toɔ̃ pereŋ. Te na baŋ deɛ a yɛlɛ ŋa manne neŋ lɔɔre mɔmmo. A na baŋ taɛ saŋa kaŋa ka neɛ kaŋa nyɛ ka lɛ na yɛlɛ naŋ kyɛnɛ na, aseŋ ka o bare lɔɔre mɔmmo o meŋɛ laafeeloŋ zuŋ. (Yeng. 22:3) Ka ba naŋ wa ko neɛ naŋ baŋ o e ta zie kawane a kyaare yelkaŋa, o soba maŋ kyɛlle woŋeŋ.—De manne neŋ 2 Saamiuel 21:15-17.

Kaara soŋ a ta wa iri neɛ kaŋa nyɔvore. (Dut. 22:8) Ka neɛŋ ba mɔnɔ lɔɔre soŋ, noba na baŋ kɔŋɛɛ ba nyɔvoɛ. Ka neɛŋ ba lɛ kyile lɔɔre mɔmmoŋ a kyɛ naŋ kpimare lɛ eebo, o na baŋ kɔŋɛɛ o nyɔvore, kyɛbee a vɛŋ ka noba kɔŋ ba nyɔvoɛ. Ka onaŋ vɛŋ ka accident kaŋa wa, o na baŋ di la zĩĩ sane.

Azuŋ, a eɛ kpeɛŋaa ko bo ka ho bare lɔɔre mɔmmo bee? Kyɛbee ho teɛrɛɛŋ ka ka hooŋ ba lɛ mɔnɔ lɔɔre, noba koŋ nyɛ bo ka ho eɛ neŋtegroŋ bee? Ka lɛ wa la, teɛre baŋ ka, gyog-sonne na hoŋ taa na aŋa sigrimennoŋ, nimimaaroŋ, ane lɛ na hoŋ baŋ ho e ta zie na zuŋ ka Jehoova nɔŋ ho yɛlɛ. Jehoova eŋɛɛ noɔre ka o naŋ na kaarɛɛ ho zu velaa, a diire ho sukyiri meŋ. (Aiz. 46:4) O daaŋ koŋ gyɛ bo bare zaa. Azuŋ, puore sɔre Jehoova ka o soŋ bo ka ho de yɛŋ naŋ e zuluŋ toŋ neŋ toma, ka lɛ vɛŋ ka ho de Baabole sowuli peɛre neŋ ho meŋɛ a nyɛ ka aseŋ ka ho naŋ mɔnɔ lɔɔre kyɛbee a zɔnnɔ moto bee.

Sori Ho Taaba Naŋ Na Baŋ Tu A Soŋ Bo

Booree deme la noba naŋ na baŋ soŋ ba dɔgreba naŋ e neŋnyaane a kyaare ba lɔɔre mɔmmo yɛlɛ. Ka hooŋ e a neŋnyaaŋaa zɔmeŋɛ a woŋ noba mine naŋ yele o lɔɔre mɔmmo yɛlɛ, aseŋ ka ho de yɛlɛ na baŋ yele na nimizeɛ. Ho na baŋ sɔrɛɛ o soba ka o de bo neŋ a lɔɔre ka ho meŋɛ nyɛ lɛ na yɛlɛ naŋ waa. Ana soŋ boŋ ka ho nyɛ ka yɛlɛ na noba naŋ yele na eɛ yelmeŋɛ bee. Ka anaŋ wa fɛre, ho neŋ o soba na baŋ di la dama kyaare a yɛlɛ. Wuluu nimimaaroŋ, kyɛ aseŋ ka ho yeli a yelmeŋɛ koo. Ta de ho teɛroŋ zaa eŋ o soba yuomo na eŋɛŋ, bonso yɛ diree dama a kyaare o lɔɔre mɔmmo yɛlɛ. Ana somaŋ ka ho maŋ yelka, “Ka hooŋ wa mɔnɔ lɔɔre, kyɛbee a zɔnnɔ moto, ho laafeeloŋ yɛlɛ maŋ fɛrɛ maŋ.” A koŋ soma ka ho yelka, “Ho ba lɛ kyile lɔɔre mɔmmo bee moto zɔmmoŋ.” Leɛteɛroo a Baabole sowuli naŋ be a zannoo ŋa poɔŋ na. Vɛŋ ka o baŋ ka ho sagooŋ di ka o na de aŋ toŋ neŋ toma o naŋ nɔŋ Jehoova zuŋ.

A ba maŋ e mɔlɔ ko neɛ ka o bare lɔɔre mɔmmo bee moto zɔmmo, azuŋ aseŋ ka te maŋ de te menne eŋ o soba gbɛbɔgriŋ a baŋ lɛ yɛlɛ naŋ waa ko a soba. O soba na baŋ piili teɛrɛŋ ka o yoŋ koŋ baŋ lɛ e yelzaa. Wala hoŋ na baŋ e a soŋ o soba? Wulo o soba nimimaaroŋ, a de sommo naŋ seŋ neŋ meŋ koroo. (Yeng. 17:17) Ta maŋ kyɛnlɛ ka o soba wa sɔrebo ka ho de o gaaneŋ zie kaŋa, bonso o na baŋ piili teɛrɛŋ ka o dɔɔnɔ boŋ. Ho ne o na baŋ zeŋeŋ a sɛgre yɛlɛ a kyaare bebie ane wagre na hoŋ na maŋ wa o zie a wa de o gaaneŋ ziiri mine aŋa, lammozie, naaŋ moɔloo, daa, ane asibiti. Vɛŋ ka o baŋ ka ho poɔ pɛlɛɛŋ yaga zaa ka ho maŋ be o zie a erɛ yɛlɛ sonnoo.—Uro. 1:11, 12.

a Ka hooŋ boɔrɔ ka ho zanne yɛlɛ yaga poɔ, ho na baŋ kannɛɛ “Automobile Accidents—Are You Safe?” O be la August 22, 2002, Awake! poɔŋ. (O be la Nansaalee kɔkɔre poɔŋ.)