Ho Eɛ Neŋtegroŋ Yaga Zaa Jehoova Nimitɔɔreŋ!

1-2. Boŋ na baŋ soŋ te ka te sagedi ka te eɛ neŋtegrɛ Jehoova nimitɔɔreŋ?

JEHOOVA nɔŋɛɛ o yelmeŋɛ puorebiiri yaga zaa. Kyɛ, a maŋ eɛ kpeɛŋaa ko ba mine ka ba sereŋ sagedi ka Jehoova nɔŋ baŋ. Aminekaŋaŋ, neɛ kaŋa e baŋ yɛlɛ naŋ ba seŋ neŋ, ka lɛ vɛŋ baŋ teɛre ka ba ba taa tɔnɔ zaa. A yɛlɛ ama taa daaŋ pɔge boŋ bee? Ka hooŋ iri a noɔre ka ɛɛ, lɛ yɛŋ, boŋ na baŋ soŋ bo ka ho wa sagedi ka Jehoova nɔŋ boŋ?

² Ka hooŋ kaa a Baabole poɔŋ, ho na nyɛŋ ka Jehoova maŋ boɔrɔŋ ka noba baŋ ka ba eɛ neŋtegrɛ koo. Azuŋ, ka hooŋ maŋ kannaa, ana soŋ boŋ. Jehoova Bidɔɔ Yezu da maŋ wulee noba emmo ane gyeremɛ. Lɛ vɛŋɛɛŋ teŋ baŋ ka, noba naŋ sigri ba menne, a teɛre ka ba ba taa tɔnɔ zaa eɛ neŋtegrɛ ko Jehoova neŋ o Bidɔɔ Yezu. (Gyn. 5:19; Hib. 1:3) A zannoo ŋa poɔŋ, te na zannɛɛ yelnimizeere ayi mine. A dɛndɛŋ soba, te na nyɛɛ lɛ na Yezu naŋ soŋ noba baŋ wa sagedi ka ba eɛ neŋtegrɛ Jehoova nimitɔɔreŋ. Ayi soba, te na nyɛɛ yɛlɛ naŋ na baŋ soŋ te ka te sereŋ sagedi ka te eɛ neŋtegrɛ Jehoova nimitɔɔreŋ.—Haag. 2:7.

LƐ YEZU NAŊ SOŊ NOBA BAŊ WA BAŊ KA BA EƐ NEŊTEGRƐ JEHOOVA NIMITƆƆREŊ

3. Saŋa na a Galili noba naŋ da wa Yezu zie na, bo yɛlɛ oŋ da e ko ba?

³ Saŋa na Yezu naŋ da tonɔ o naaŋ moɔloo toma Galili teŋɛ na, noba da yi la ziiri tɛɛtɛɛ a wa ka ba kyɛlle o yɛlɛ na, a kyɛ nyɛ baaloŋ saŋ meŋ. Yezu meŋɛ da nyɛɛŋ ka, “ba da be la woore poɔ kyɛ ba taa sonnɔ zaa, aŋa peere naŋ ba taa kyeenɛ.” (Mat. 9:36) Ba puoruu wedeɛreba na da maŋ de baŋ ka ba eɛ dambolo naŋ ba dɔgle bonzaa zuŋ. Ba gba da maŋ boɔle baŋ ka noba ba naŋ pɔ eŋ. (Gyn. 7:47-49) Kyɛ, Yezu da ba taa a teɛroŋ ŋa kyaare a noba, bonso, o da mãã la o meŋɛ a wuli ba Jehoova yɛlɛ, a saŋ ba baalonne meŋ. (Mat. 9:35) Ane meŋ, oŋ da boɔrɔ ka o soŋ neŋyaga zuŋ, o da deɛ wuluu naŋ seŋ neŋ ko o bitontonee na baŋ tonɔ a naaŋ moɔloo toma, a saŋna noba baalonne meŋ.—Mat. 10:​5-8.

4. Bo yɛlɛ teŋ zanne yi lɛ na Yezu naŋ da wuli emmo ko sigrimennoŋ deme naŋ da wa o zie na?

⁴ Lɛ na Yezu naŋ wuli noba naŋ da wa o zie emmo ane nimimaaroŋ na vɛŋɛɛŋ teŋ baŋ ka, o neŋ o Saa de la nensaaleba tegroŋ yaga zaa, haali noba na ba taaba naŋ ba de ba boɔle bonzaa na. Ka hooŋ e Jehoova puorebie a kyɛ maŋ teɛre ka ho ba taa tɔnɔ zaa ko Jehoova, leɛteɛre lɛ na Yezu naŋ wuli emmo ko sigrimennoŋ deme naŋ da wa o zie ka ba zanne yɛlɛ na. Lɛ na soŋ boŋ ka ho wa nyɛ ka ho eɛ neŋtegroŋ Jehoova nimitɔɔreŋ.

5. Wala ka zemmo da waa ko a Galili pɔge na naŋ da wa Yezu zie na?

⁵ Yezu da maŋ wulee a nembeɛoŋ naŋ maŋ wa o zie na. Kyɛ, o da maŋ lɛ taaɛ wagre meŋ ko ba. Aŋa mannoo poɔŋ, saŋa na oŋ da tonɔ a naaŋ moɔloo toma Galili teŋɛ na, pɔge kaŋa naŋ da taa pɔg-pɛge baaloŋ yuomo 12 da wa la Yezu zie. (Mak. 5:25) A Moosis Bege da wuleeŋ ka, ka neɛŋ taa a baaloŋ ŋa, o ba pɛgeyi. Neɛzaa meŋ naŋ seenoo koŋ pɛgeyi. Lɛ wuleeŋ ka a pɔge ŋa koŋ baŋ laŋ noba poɔŋ. Ka a Izerayɛl biiriŋ te laŋ zie kaŋa ka ba di ba tige mine, a pɔge ŋa koŋ baŋ gaa be. (Liiv. 15:19, 25) Ho ba nyɛ ka a baaloŋ ŋa da dɔɔnɛɛ a pɔge, a kyɛ kyɛrɛ o sukyiri meŋ bee?—Mak. 5:26.

6. Sobuo ka a pɔge naŋ da taa pɔg-pɛge baaloŋ na da nyɛ baaloŋ saŋ?

⁶ A pɔg-baala ŋa da boɔrɔŋ ka Yezu saŋ o baaloŋ na. Kyɛ, o da ba gaa Yezu nimitɔɔre daadaalɛ. Ananso la wala? Aminekaŋaŋ, nyaaba da kpɛ oŋ o baaloŋ na yɛlɛ. Kyɛbee o da zoree dabeɛ̃ ka Yezu na digooŋ bare o naŋ ba pɛgeyi a kyɛ kpɛ a gyamaa poɔ a wa o zie zuŋ. Azuŋ, o da sɔgle wa seenɛɛ Yezu kpar-kpoŋ. O da taaɛ sagediibu ka lɛ eebo na vɛŋeŋ ka o nyɛ laafeɛ. (Mak. 5:​27, 28) O da nyɛɛ laafeɛ meŋ o sagediibu na zuŋ. Beŋ la ka Yezu leɛ o puori a soorɔ ka o baŋ neɛ naŋ seenoo. A pɔge da wa le la Yezu gbɛɛŋ a manne a yɛlɛ zaa koo. Wala ka Yezu na e a pɔge ŋa?

7. Wala ka Yezu da e a pɔg-baala? (Marko 5:34)

⁷ Yezu da wulee a pɔge ŋa gyeremɛ ane nimimaaroŋ. A pɔge da wa le la Yezu gbɛɛŋ ne “dabeɛ̃ a miine o zaa.” (Mak. 5:33) Yezu da nyɛɛ lɛ na a pɔge eŋɛ naŋ miine na, azuŋ o da de la kɔkɔbaaloŋ yeli yɛlɛ koo. Yezu da boɔlooŋ ka N “pɔgeyaa.” Yezu da boɔrɔŋ ka a pɔge baŋ ka o nɔŋɛɛ o yɛlɛ. Azuŋ oŋ da boɔloo lɛ. Kyɛ, a ba e ka gyeremɛ oŋ da boɔrɔ ka o wuluu zuŋ la. (Kanne Marko 5:34.) Ka hooŋ kaa a Baabole poɔŋ, a zie ŋa yoŋ la ka Yezu boɔle pɔge kaŋa ka o pɔgeyaa. Ŋmaa foto ho teɛroŋ poɔŋ, a nyɛ lɛ na a yɛlɛ ŋa naŋ da tɔ a pɔge sukyiri aseŋ. Ka Yezuŋ da ba de kɔkɔbaaloŋ a yeli neŋ yɛlɛ ko a pɔge, a da naŋ vɛŋeŋ ka a pɔge sukyiri kyɛre aneazaa ka o nyɛɛ baaloŋ saŋ. A pɔge da naŋ korɛɛ o meŋɛ sããnaa o naŋ ba pɛgeyi kyɛ be noba poɔŋ. Kyɛ, Yezu da vɛŋɛɛŋ ka a pɔge baŋ ka o eɛ neŋtegroŋ Jehoova nimitɔɔreŋ. Ɛɛ, a pɔge sereŋ eɛ neŋtegroŋ Jehoova nimitɔɔreŋ.

8. Bo yelkpeɛne ka te yɔɔpɔge kaŋa naŋ be Brazil paaloŋ tuoro?

⁸ Zenɛ ŋa meŋ, Naaŋmen puorebiiri mine taaɛ baalonne mine naŋ maŋ vɛŋ baŋ taa sukyiri dɔŋ. Te yɔɔpɔge Mariaa eɛ regular paaneɛ naŋ be Brazil paaloŋ. Saŋa na baŋ wa dɔgoo na, o ba taa gbɛɛ ane o nu-gɔɔ. O yeleeŋ ka: “N baaloŋ na zuŋ, N taaba da maŋ erɛ maŋ potu-yɛlɛ sakuuŋ. Ba da maŋ de la yoe naŋ ba seŋ neŋ boɔlɔ ne ma. Saŋa kaŋa, N booree deme gba da maŋ vɛŋeŋ maŋ teɛre ka N ba taa tɔnɔ zaa.”

9. Boŋ soŋ Maria oŋ wa nyɛ ka o eɛ neŋtegroŋ Jehoova nimitɔɔreŋ?

⁹ Boŋ toɔ̃ soŋ Maria? Saŋa na oŋ wa e Jehoova Sieree Deme kaŋa na, o Kristabitaaba dii la o sukyiri, a lɛ somoo oŋ wa nyɛ ka o eɛ neŋtegroŋ Jehoova nimitɔɔreŋ. O yeleeŋ ka: “N yɔɔmine yaga soŋ maŋ haali, wagre kyebe maŋ na toɔ̃ boɔle ba zaa yoe. N yi la N sukyiriŋ a puore Jehoova bareka o naŋ ko ma N Kristabitaaba ŋa.” Maria Kristabitaaba somooŋ oŋ wa nyɛ ka o eɛ neŋtegroŋ Jehoova nimitɔɔreŋ.

10. Bo yelwonii poɔŋ la ka Mareya Magdalina da be? (Kaa a fotori.)

¹⁰ Te manne Mareya Magdalina meŋ yɛlɛ. Yezu da soŋɛɛ o meŋ. Sefaare ayɔpoi da dɔɔnooŋ. (Luk. 8:2) Aminekaŋaŋ, a yɛlɛ ŋa da vɛŋɛɛŋ ka Mareya Magdalina da maŋ erɛ yɛlɛ naŋ ba taa nimiri wagre mineŋ. Azuŋ, noba da ba maŋ nɔŋ ka ba peɛloo. Ana saŋa na, Mareya Magdalina da na teɛreŋ ka neɛzaa ba nɔŋ o yɛlɛ, ka teɛretɔ zaa meŋ ba kyebe a koo. Aminekaŋaŋ, Yezu la da digi a sefaare naŋ da dɔɔnoo na bare. A puoriŋ, Mareya Magdalina da wa leɛ la Yezu potuuro. Bo yɛlɛ ka Yezu da lɛ e ko Mareya Magdalina ka lɛ vɛŋ oŋ baŋ ka o eɛ neŋtegroŋ Jehoova nimitɔɔreŋ?

11. Wala ka Yezu da e a de soŋ Mareya Magdalina oŋ baŋ ka o eɛ neŋtegroŋ ko Jehoova? (Kaa a fotori.)

¹¹ Yezu da toŋboɔlɛɛ Mareya Magdalina ka o wa poɔ o eŋɛŋ ka ba zaa tonɔ a naaŋ moɔloo toma.b Lɛ da vɛŋɛɛŋ oŋ wono yɛlɛ na Yezu naŋ da maŋ wulo noba na. Bebiri na Yezu naŋ iri yi kũũni poɔŋ na, o da iree o meŋɛ wuli Mareya Magdalina. O da poɔ la o dɛndɛŋ potuuribo na oŋ yeli yɛlɛ ko ana bebiri na. Yezu gba da tomooŋ ka o te yelko o bitontonee na ka o iri yi la kũũni poɔŋ. Nyɛ sieree naŋ seŋ lɛ a wulo ka Mareya Magdalina sereŋ da eɛ neŋtegroŋ Jehoova nimitɔɔreŋ.—Gyn. 20:​11-18.

12. Bo yɛlɛŋ vɛŋ ka Lidia maŋ teɛre ka o eɛ neŋ-laanii?

¹² Aŋa lɛ na aŋ da waa ko Mareya Magdalina na, zenɛ ŋa meŋ, noba yaga maŋ teɛreŋ ka ba ba taa tɔnɔ zaa. Te yɔɔpɔge Lidia naŋ be Spain paaloŋ yeleeŋ ka, saŋa na o ma naŋ taa o poɔ na, o da boɔrɔŋ ka o iri a poɔ bare. O teɛrɛɛ lɛ na o ma naŋ da ba kaara o zu velaa saŋa na oŋ wa vuuro na, ane lɛ na oŋ da maŋ yele potu-yɛlɛ koroo. O lɛ yeleeŋ ka: “Yɛlɛ maŋ da boɔrɔ N zemmo poɔ zaa la ka noba nɔŋ N yɛlɛ. N da zoree dabeɛ̃ ka lɛ zaa maŋ erɛ kyɛ noba koŋ nɔŋ N yɛlɛ, bonso yɛlɛ na N ma naŋ e ma na vɛŋɛɛŋ maŋ sagedi ka neŋ-laanii la ma.”

13. Boŋ soŋ Lidia oŋ wa nyɛ ka o eɛ neŋtegroŋ Jehoova nimitɔɔreŋ?

¹³ Saŋa na Lidia naŋ wa leɛ Jehoova puorebie na, o meŋɛ boma zannoo, puore sɔroo, ane nimimaaroŋ neŋ yelsonne o Kristabitaaba naŋ erɛ koroo somooŋ yaga zaa oŋ wa nyɛ ka o eɛ neŋtegroŋ Jehoova nimitɔɔreŋ. O yeleeŋ ka: “Gbɛɛ yaga, N serɛ maŋ yelko maŋ ka o nɔnɔ maŋ. Wagre zaa, o maŋ teɛrɛ maŋ N gyog-sonne yɛlɛ. Lɛ neŋ o zu ka N zɔmenne meŋ erɛ korɔ ma.” Ho baŋɛɛ neɛ kaŋa naŋ boɔrɔ sommo ka o sagedi ka o eɛ neŋtegroŋ Jehoova nimitɔɔreŋ bee?

YƐLƐ NAŊ NA TOƆ̃ SOŊ BO KA HO TAA TEƐROŊ NA JEHOOVA NAŊ TAA KYAARE BO NA

14. Sobuo ka yɛlɛ naŋ be 1 Saamiuel 16:7 na soŋ te teŋ baŋ teɛroŋ na Jehoova naŋ taa kyaare noba? (Kaa a daga, “Bonso Ka Jehoova Ba Deɛnɛ Neŋ O Puorebiiri Yɛlɛ?”)

¹⁴ Teɛroŋ na Jehoova naŋ taa kyaare bo na naane ka a donɛɛ noba taa. (Kanne 1 Saamiuel 16:7.) Ho waaloŋ, arezie, kyɛbee gaŋ baŋ naaneŋ maŋ wuli ka ho eɛ neŋtegroŋ Jehoova nimitɔɔreŋ. (Aiz. 55:​8, 9) Azuŋ, ta de yɛlɛ na a donɛɛ noba naŋ de ka a eɛ yeltegrɛ na manna neŋ ho meŋɛ a boɔrɔ ka ho baŋ lɛ hoŋ e tegroŋ aseŋ. Mɔɔrɔ ka ho taa teɛroŋ na Jehoova naŋ taa kyaare bo na. Ka hooŋ kaa a Baabole poɔŋ, ho na nyɛŋ ka saŋa kaŋa Jehoova puorebiiri mine da maŋ teɛreŋ ka ba ba taa tɔnɔ zaa. Ba mine la Elaagya, Nawomi, ane Haana. Ho na baŋ kannɛɛ ba yɛlɛ. Ho na baŋ sɛgɛɛ ho meŋɛ zemmo yɛlɛ mine naŋ vɛŋ hoŋ sagedi ka Jehoova sereŋ nɔŋ boŋ, a de bo tegroŋ meŋ biŋ. Ane meŋ, ho na baŋ zannɛɛ yɛlɛ yaga a kyaare a yɛlɛ ŋa te gama na poɔŋ.

15. Bonso ka a maleke da yelka Daaniel eɛ neŋtegroŋ Jehoova nimitɔɔreŋ? (Daaniel 9:23)

¹⁵ Maŋ teɛrɛ ho meŋɛ wagre zaa ka yelmennoŋ na hoŋ dire korɔ Jehoova na vɛŋɛɛŋ hoŋ e neŋtegroŋ o nimitɔɔreŋ. Saŋa na Daaniel naŋ wa nyɛ yuomo naŋ pare 90 na, a da wa taɛ saŋa kaŋa ka o eŋɛ zaa kyoɔre. (Daan. 9:​20, 21) Sobuo ka Jehoova da tu a emoo faŋa? Naaŋmen da toŋɛɛ maleke na baŋ boɔlɔ Gabereyɛl oŋ wa Daaniel zie. A maleke da vɛŋɛɛŋ ka Daaniel baŋ ka o eɛ neŋtegroŋ Naaŋmen nimitɔɔreŋ. Azuŋ, Naaŋmen maŋ kyɛllɛɛ o puore sɔroo na zaa. (Kanne Daaniel 9:23.) Boŋ da vɛŋ ka Naaŋmen nɔŋ Daaniel yɛlɛ yaga zaa lɛ? Gyog-sonne na Daaniel naŋ da taa zuŋ oŋ nɔŋ o yɛlɛ lɛ. Daaniel da eɛ yelmeŋɛ soba naŋ nɔŋ dantorii. (Izik. 14:14) Jehoova vɛŋɛɛŋ baŋ sɛge a yɛlɛ ŋa eŋ a Baabole poɔŋ ka a dii te sukyie. (Uro. 15:4) Jehoova maŋ kyɛllɛɛ ho meŋ puore sɔroo. Lɛ na hoŋ nɔŋ yelsonne eebo, a naŋ dire yelmennoŋ korɔ Jehoova na vɛŋɛɛŋ oŋ de bo tegroŋ yaga zaa.—Maik. 6:8; Hib. 6:10.

16. Boŋ na baŋ soŋ bo ka ho wa sagedi ka Jehoova eɛ ho Saa naŋ nɔŋ bo?

¹⁶ Sagedi ka Jehoova eɛ ho Saa naŋ nɔŋ bo. Jehoova boɔrɔŋ ka o soŋ bo. Ho yelfaare naane oŋ maŋ kaara. (Yiem. 130:3; Mat. 7:11; Luk. 12:​6, 7) Noba yaga naŋ teɛre ka ba ba taa tɔnɔ zaa maŋ teɛrɛɛ a yɛlɛ ŋa gaa tɔɔre. A soŋ baŋ baŋ iri ana teɛroŋ faa na yi ba teɛroŋ poɔŋ. Te de te yɔɔpɔge Michelle zemmo yɛlɛ manne neŋ a yɛlɛ. O be la Spain paaloŋ. O serɛ da maŋ toorooŋ zombi-laama, azuŋ o da maŋ teɛreŋ ka o ba taa tɔnɔ zaa. O yeleeŋ ka: “Ka maaŋ wa teɛre ka N ba taa tɔnɔ zaa, N maŋ ŋmaaɛ foto N teɛroŋ poɔŋ a nyɛ Jehoova naŋ kore ma, a go ma, a kyɛ wulo ma nɔmmo meŋ.” (Yiem. 28:9) South Africa paaloŋ ka te yɔɔpɔge Lauren be. O meŋ maŋ leɛteɛrɛɛ o meŋɛ ka: “Jehoova naŋ yi nɔmmo poɔŋ a tage ma waneŋ o zie zuŋ oŋ soŋ ma maŋ naŋ be o zieŋ a yuomo ŋa zaa poɔŋ. O maŋ tu la N zie a de wuluu ko noba mine. Lɛ wuleeŋ ka N taaɛ tɔnɔ koo, a lɛ e neŋtegroŋ meŋ.”—Hoz. 11:4.

17. Boŋ na baŋ soŋ bo ka ho sagedi ka Jehoova poɔ pɛle ne boŋ? (Yieme 5:12) (Kaa a foto.)

¹⁷ Sagedi peɛlaaŋ ka Jehoova poɔ pɛle ne boŋ. (Kanne Yieme 5:12.) Deevid da yeleeŋ ka, ka Jehoova poɔŋ wa pɛle neŋ sontuuribo, a maŋ waa ŋa oŋ de “kuri bonlɛgraa naŋ e kpoŋ” a ŋmaa gyeere ba. Ka hooŋ wa baŋ ka Jehoova poɔ pɛle ne boŋ, a lɛ sonnɔ bo meŋ, ana soŋ boŋ ka ho iri teɛroŋ zaa hoŋ taa ka ho ba taa tɔnɔ bare. Wala hoŋ na toɔ̃ e baŋ ka Jehoova poɔ pɛle ne boŋ? Aŋa lɛ na teŋ nyɛ yi a zannoo ŋa poɔŋ na, Jehoova maŋ tu la a Baabole eŋɛŋ a vɛŋ teŋ baŋ ka o poɔ pɛle ne teŋ. O maŋ lɛ tu la a lantaapuoruu nembɛrɛ, te zɔmenne, ane te Kristabitaaba zieŋ a vɛŋ teŋ baŋ ka te eɛ neŋtegrɛ o nimitɔɔreŋ. Ka ho taabaŋ wa eŋnɛ bo faŋa, wala aŋ seŋ ka ho e?

18. Ka ho yɔɔmineŋ wa eŋnɛ bo faŋa, bonso aŋ seŋ ka ho sage a faŋa emmo?

¹⁸ Ka ho yɔɔmine naŋ baŋ bo a nɔŋ ho yɛlɛ meŋ wa eŋnɛ bo faŋa, maŋ yi ho poɔ zaa a sage ba faŋa emmo na. Teɛre baŋ ka Jehoova na baŋ tu la ba zieŋ a vɛŋ ka ho baŋ ka o poɔ pɛle ne boŋ. Te yɔɔpɔge Michelle lɛ yeleeŋ ka: “Fẽẽfẽẽ fẽẽfẽẽ, N wa nyɛɛŋ ka aseŋ ka N maŋ sage yelsonne na N yɔɔmine naŋ yele a kyaare ma na. A ba e mɔlɔ yɛŋ, kyɛ N baŋɛɛŋ ka lɛ ka Jehoova boɔrɔ ka N e.” A lantaapuoruu nembɛrɛ soŋɛɛ Michelle oŋ wa nyɛ ka Jehoova poɔ pɛlɛɛ o yɛlɛ. Pampana ŋa, o eɛ regular paaneɛ, a maŋ be o yiriŋ a kyɛ tonɔ toma korɔ Bɛɛtil.

19. Bonso hoŋ na baŋ sagedi ka ho eɛ neŋtegroŋ Jehoova nimitɔɔreŋ?

¹⁹ Yezu da yi la nimimaaroŋ poɔŋ a vɛŋ teŋ baŋ ka te Saa naŋ be sazuŋ na ba deɛnɛ neŋ te yɛlɛ fẽẽ zaa. (Luk. 12:24) Azuŋ, te na baŋ sagediŋ peɛlaaŋ ka te eɛ neŋtegrɛ Jehoova nimitɔɔreŋ. Daŋ ta wa inne a yɛlɛ ŋa zaa. Yɛ vɛŋ ka te moɔ̃ niŋe a sonnɔ te taaba ka ba meŋ wa nyɛ ka ba eɛ neŋtegrɛ Naaŋmen nimitɔɔreŋ.