ZANNOO YƐLƐ 23
YIELOŊ 2 Jehovah Is Your Name (Ho Yuori La Jehoova)
Wala Ka Jehoova Yuori Na E Tegroŋ A Ko Bo Seŋ?
“‘Yɛnee la N sieree deme,’ Jehoova la yeli.”—AIZ. 43:10.
YƐLƐ TE NAŊ NA ZANNE
Te na zanne nyɛɛ yɛlɛ teŋ na baŋ e a vɛŋ ka Jehoova yuori na pɛgeyi, a lɛ vɛŋ ka a pɛle meŋ ka yɛlɛ na zaa Setaana naŋ yeli kyaaroo na eɛ zirii.
1-2. Wala teŋ e baŋ ka Jehoova yuori na eɛ tegroŋ yaga zaa ko Yezu?
YEZU yɛŋ zieŋ, Jehoova yuori na eɛ tegroŋ yaga zaa a gaŋ bon la bonzaa. Yezu la neɛ naŋ zɛge o Saa yuori na oŋ do a gaŋ neɛ la neɛzaa. A yi a zannoo naŋ pare na poɔŋ, te da zannɛɛŋ ka Yezu da yi la o poɔ zaa a kpi ko Jehoova yuori na. Lɛ da vɛŋɛɛŋ ka Jehoova yuori na pɛgeyi, a lɛ wuli meŋ ka Jehoova yel-eree zaa toreeŋ. (Mak. 14:36; Hib. 10:7-9) Ka Yezu Yuoŋ Turi Naaloŋ Diibu naŋ wa baare, o na yi la o poɔ zaa a leɛ de a kpeɛ̃o zaa ko Jehoova, bonso o boɔrɔŋ ka pugibu zaa gɛrɛ Jehoova zie. (1 Kor. 15:26-28) Lɛ na Yezu naŋ nɔŋ Naaŋmen yuori na vɛŋɛɛŋ teŋ baŋ ka o neŋ o Saa na niiloŋ eɛ kpeɛŋaa yaga zaa. Yel la yelzaa Yezu naŋ e wuleeŋ ka o nɔŋɛɛ Jehoova yaga zaa.
2 Yezu wa la a teŋɛzu ka o wa wuli noba Jehoova yɛlɛ. (Gyn. 5:43; 12:13) O da vɛŋɛɛŋ ka o potuuribo na baŋ o Saa na velaa zaa. (Gyn. 17:6, 26) O da maŋ vɛŋeŋ aŋ pɛle ka Jehoova la koo yɛŋ naŋ e zuluŋ, ka lɛ vɛŋ oŋ toɔ̃ wulo noba Jehoova yɛlɛ. O da lɛ vɛŋɛɛŋ aŋ pɛle ka Jehoova la koo a kpeɛ̃o oŋ tonɔ toŋseɛlɛ meŋ. (Gyn. 10:25) Yezu da puore sɔrɛɛ Jehoova a yelka o kaara o potuuribo na zu velaa O yuori na zuŋ. (Gyn. 17:11) Ho ba nyɛ ka Jehoova yuori na eɛ tegroŋ yaga zaa a ko Yezu bee? Azuŋ, ka neɛŋ ba baŋ Jehoova yuori na, kyɛbee a ba de a yuori tonɔ neŋ toma, o soba na baŋ yeliŋ ka o eɛ Yezu yelmeŋɛ potuuro na kaŋa bee? Wala hoŋ teɛre?
3. Bo yɛlɛ teŋ na zanne a zannoo ŋa poɔŋ?
3 Te naŋ e yelmeŋɛ Kristabiiri zuŋ, te maŋ tɔglɛɛ Yezu a de te yel-eree wuli ka te taaɛ gyeremɛ neŋ nɔmmo naŋ e zuluŋ ko Jehoova yuori na. (1 Pit. 2:21) A zannoo ŋa poɔŋ, te na nyɛɛ bon nanso ka Jehoova de o yuori ko noba naŋ moɔlɔ “a Naaloŋ duorisoŋ.” (Mat. 24:14) Te na lɛ nyɛɛ lɛ na te yeni yeni zaa naŋ na baŋ e a de wuli ka te de la Jehoova yuori na tegroŋ yaga zaa.
NAAŊMEN ‘KAA IREE NOBA A DE O YUORI DƆGLE BA ZUŊ’
4. (a) Bo toma ka Yezu de eŋ o potuuribo nuuriŋ sɛre kyɛ gaa sazu? (b) Bo soorebie ka neɛ kaŋa na baŋ soore a kyaare ana toma na?
4 Bebiri na Yezu naŋ na do sazu na, o da yelko la o potuuribo na ka: “Yɛ na nyɛ la kpeɛ̃o saŋa na a vooroŋ soŋ naŋ na sigi wa yɛ eŋɛŋ, yɛ na di la sieree a kyaare ma Gyɛruzɛlɛm poɔŋ, Gyudiya ane Samareya zaa, a te ta a teŋɛzu lombori zaa.” (Tom. 1:8) Lɛ wuleeŋ ka a Izerayɛl paaloŋ yoŋ naane baŋ na moɔle a duorisoŋ, kyɛ ba na moɔlɛɛ a duorisoŋ a tendaa lombori zaa. Noba naŋ be paaloŋ yobo na nyɛɛ apoɔsori a woŋ a duorisoŋ, ka lɛ vɛŋ ka ba leɛre ba eebo a wa leɛ Yezu potuuribo. (Mat. 28:19, 20) Kyɛ ka hooŋ kaa a sɛgre soŋ, Yezu da yeleeŋ ka: “Yɛ na di la sieree a kyaare ma.” Azuŋ, neɛ kaŋa na sooreŋ ka, a fɛrɛɛŋ ka a nempaalba ŋa naŋ wa leɛ Yezu potuuribo na baŋ Jehoova yuori na bee? Kyɛbee ba na diree sieree a kyaara Yezu yoŋ? Yɛlɛ naŋ be Toma zuri 15 na soŋ teŋ ka te nyɛ a soorebie ama nɔɛ iribo.
5. Wala ka a bitontonee neŋ a nembɛrɛ naŋ da be Gyɛruzɛlɛm na da e a de wuli ka a eɛ nimizeɛ ka noba zaa baŋ Jehoova yuori na? (Kaa a foto.)
5 Yuoni 49 C.E., a bitontonee neŋ a nembɛrɛ naŋ da be Gyɛruzɛlɛm da laŋɛɛ taa ka ba di dama a kyaare yelnimizeɛ kaŋa. A yelnimizeɛ la ka, ka noba naŋ ba e Gyuu noba naŋ boɔrɔ ka ba wa leɛ Kristabiiri, a da fɛrɛɛŋ ka ba iri ba dɛgre bee? Saŋa na baŋ wa e a lammo baare na, Yezu yɔɔ Gyimisi da yelee yelnimizeɛ kaŋa. O da yeleeŋ ka: “[Piita] manne ko teŋ aŋ pɛle welweli a kyaare lɛ Naaŋmen naŋ piili a leɛre o teɛroŋ eŋ a paalonne noba eŋɛŋ ka o kaa iri noba a de o yuori dɔgle ba zuŋ.” Nembuo yuori ka Gyimisi da manna o yɛlɛ? O da de la yɛlɛ na daŋyele Eemos naŋ sɛge biŋ na toŋ neŋ toma o yelyaga na poɔŋ. O da yeleeŋ ka: “Ka lɛ vɛŋ ka dɔba na naŋ kyɛre na moɔ̃ niŋe a boɔrɔ Jehoova, ane a paalonne noba zaa, bana ka N yuori dɔgle ba zuŋ na, lɛ ka Jehoova yel.” (Tom. 15:14-18) A nempaalba ŋa naŋ wa leɛ Yezu potuuribo na na zannɛɛ Jehoova yɛlɛ, kyɛ ba na lɛ eɛ noba Jehoova ‘yuori naŋ na dɔgle ba zuŋ.’ Lɛ wuleeŋ ka ba na vɛŋeŋ ka noba baŋ Naaŋmen yuori na, ka noba meŋ baŋ ka ba eɛ Naaŋmen puorebiiri.
A yi lammo kaŋa a lantaa zukaareba naŋ da bebe a dɛndɛŋ yuoŋ kɔɔ na saŋa naŋ da e na poɔŋ, ba da wa nyɛɛŋ ka Kristabiiri eɛ noba Naaŋmen yuori naŋ dɔgle ba zuŋ (Kanne wɛlbo 5)
6-7. (a) Bonso ka Yezu wa a teŋɛzu? (b) Bo yelnimizeɛ meŋɛ zuŋ la ka Yezu wa a teŋɛzu?
6 A yuori Yezu muni la “Jehoova La Faabo.” Jehoova na tu la Yezu zie a faa noba na zaa naŋ taa sagediibu o neŋ o Bidɔɔ na eŋɛŋ. Yezu da wa la a teŋɛzu ka o wa kpi a de o nyɔvore yɔɔdeɛ neŋ nensaaleba. (Mat. 20:28) Azuŋ, Yezu yɔɔdeɛbo sareka na yuo la sori ko te ka te nyɛ faabo ane nyɔvore naŋ ba taa baaraa.—Gyn. 3:16.
7 Kyɛ, bonso aŋ fɛre ka ba yɔɔdeɛ nensaaleba? Ho teɛrɛɛ yɛlɛ naŋ da e a Eedin gaadin na poɔŋ bee? A zannoo naŋ pare na poɔŋ, te da zannɛɛŋ ka Adama neŋ Hawaa da zagrɛɛ Jehoova noɔre, azuŋ ba da kɔŋ la apoɔsori na baŋ da taa ka ba zeŋ a teŋɛzuŋ tegitegilɛ na. (Mun. 3:6, 24) Yelmeŋɛ la, a fɛrɛɛŋ ka ba yɔɔdeɛ nensaaleba. Kyɛ, yelnimizeɛ kaŋa naŋ e kpoŋ yaga zaa a gaŋ nensaaleba faabo da nyɛɛ eebo a Eedin gaadin poɔŋ. Setaana da dɛgɛɛ Jehoova yo-forifori na. (Mun. 3:4, 5) Azuŋ, yelnimizeere ayi mine da wa la a yɛlɛ poɔŋ. A dɛndɛŋ yelnimizeɛ naŋ e kpoŋ yaga zaa la lɛ na Jehoova naŋ na pɛge o yuori na, a lɛ vɛŋ ka a pɛle ko neɛzaa ka sori na oŋ maŋ tu a dire o Naaloŋ na toreeŋ. A yiiloŋ yɛlɛ naŋ tu la, sori na oŋ na tu a faa Adama neŋ Hawaa biiri yineŋ faaloŋ poɔŋ. Jehoova da de la a yɛlɛ ayi ŋa lantaa aŋ leɛ yelyenaa. Yezu maŋ arɛɛ Jehoova gbɛbɔgriŋ a erɛ yelzaa. Azuŋ, o da mɔɔ la o moɔbo zaa a e yɛlɛ naŋ vɛŋ ka Jehoova yuori na pɛgeyi fanana.
Ka neɛŋ ba baŋ Jehoova yuori na, kyɛbee a ba de a yuori tonɔ neŋ toma, o soba na baŋ yeliŋ ka o eɛ Yezu yelmeŋɛ potuuro na kaŋa bee?
8. Bo yelnimizeɛ aŋ seŋ ka Yezu potuuribo zaa baŋ?
8 Kristabiiri zaa naŋ taa sagediibu Yezu eŋɛŋ, ka ba eɛ Gyuu noba kyɛbee ba ba e Gyuu noba, kyɛ aseŋ ka ba wulo Yezu Saa na gyeremɛ naŋ e zuluŋ, bonso O zie ka ba faabo na yi wa. (Gyn. 17:3) Ane meŋ, ba na de la Jehoova yuori na dɔgle ba zuŋ, aŋa lɛ na Yezu naŋ da e na. Aseŋ ka ba meŋ wa baŋ lɛ na aŋ e nimizeɛ yaga zaa ka Jehoova yuori na pɛgeyi. Bonso, lɛ eebo na soŋ baŋ ka ba nyɛ nyɔvore naŋ ba taa baaraa. (Tom. 2:21, 22) Azuŋ, a da fɛrɛɛŋ yaga zaa ka Yezu potuuribo na zanne Jehoova neŋ Yezu yɛlɛ velaa. Saŋa na Yezu naŋ da wa baara o puore sɔroo na baŋ sɛge eŋ Gyɔɔn zuri 17 na, o da yeleeŋ ka: “N eɛɛ la ka ba baŋ a ho yuori, kyɛ na e ka ba baŋ o. Lɛ la ka a nɔmmo ho naŋ nɔŋ ma na be ba poɔ, kyɛ ka N be ba poɔ.” (Gyn. 17:26) A ba e te seɛlee Yezu naŋ de a yɛlɛ ŋa baare neŋ o puore sɔroo na.
“YƐNEE LA N SIEREE DEME”
9. Wala teŋ na toɔ̃ e a de wuli ka Jehoova yuori na eɛ tegroŋ yaga zaa a ko te?
9 Aseŋ ka Jehoova yuori naŋ na pɛgeyi na yɛlɛ e yelnimizeɛ yaga zaa ko Yezu yelmeŋɛ potuuribo zaa. (Mat. 6:9, 10) Aseŋ ka ba de Jehoova yuori na tegroŋ yaga zaa a gaŋ neɛzaa, bee bonzaa. Aseŋ ka ba de ba yel-eree wulo ka ba de la Jehoova yuori na tegroŋ a gaŋ yelzaa. Kyɛ, wala teŋ meŋ na baŋ e a soŋ ka Jehoova yuori na pɛgeyi, a lɛ vɛŋ ka noba baŋ ka yɛlɛ na Setaana naŋ yeli kyaare Jehoova na eɛ zirii?
10. Bo yɛlɛ la be Aizeeya zuri 42 a te ta 44? (Aizeeya 43:9; 44:7-9) (Kaa a foto.)
10 Ka hooŋ kanne yɛlɛ naŋ be Aizeeya zuri 42 a te ta 44, ho na nyɛɛ yelnimizeere na teŋ na baŋ e a de soŋ ka Jehoova yuori na pɛgeyi. A yi ana sɛgre na poɔŋ, Jehoova da soorɛɛ noba naŋ ba puoruu na ka ba tere sieree naŋ wuli ka ba ŋmema na sereŋ bebeŋ. Jehoova da lɛ yeleeŋ ka neɛ kaŋa bebeŋ a na toɔ̃ di sieree ka a ŋmema ŋa sereŋ bebeŋ meŋɛmeŋɛ bee? Kyɛ, siere-dire zaa da ba kyebe.—Kanne Aizeeya 43:9; 44:7-9.
Te maŋ tu la te yelyelii ane te yel-eree zaa poɔŋ a wuli ka Jehoova yoŋ la a yelmeŋɛ Naaŋmen (Kanne wɛlbo 10-11)
11. Bo yɛlɛ ka Jehoova da yelko o puorebiiri a yi Aizeeya 43:10-12?
11 Kanne Aizeeya 43:10-12. Jehoova da yelko la o puorebiiri na ka: ‘Yɛnee la N sieree deme ka maaŋ la Naaŋmen.’ Jehoova da soorɛɛ o puorebiiri na ka: ‘Naaŋmen kaŋa bebeŋ N puoriŋ bee?’ (Aiz. 44:8) Jehoova da boɔrɔŋ ka o puorebiiri na iri a soorebiri ŋa noɔre. Te meŋ taaɛ apoɔsori ka te iri a soorebiri ŋa noɔre. Te na baŋ tu la te yelyelii ane te yel-eree eŋɛŋ, a di sieree ka Jehoova yoŋ la a yelmeŋɛ Naaŋmen. Te na baŋ lɛ vɛŋeŋ ka noba baŋ ka o yuori na eɛ tegroŋ yaga zaa a gaŋ yuori zaa. Te na baŋ de la te zemmo yɛlɛ zaa wuli ka te sereŋ nɔŋ la Jehoova. Lɛ zaa Setaana naŋ vɛŋ ka zemmo e kpeɛŋaa ko te aseŋ, kyɛ aseŋ ka te naŋ moɔ̃ niŋe a dire yelmennoŋ korɔ Jehoova. Ka teneeŋ erɛ lɛ, te na toɔ̃ soŋeŋ ka Jehoova yuori na pɛgeyi.
12. Sobuo ka daŋyelbo naŋ be Aizeeya 40:3, 5 da tu a nyɛ eebo?
12 Ka teneeŋ wa erɛ yɛlɛ naŋ na vɛŋ ka Jehoova yuori na pɛgeyi, a wuleeŋ ka te tɔglɛɛ Yezu Krista. Aizeeya da daŋyeleeŋ ka neɛ kaŋa na de la weɛ a wa ‘maale Jehoova sori na.’ (Aiz. 40:3) Sobuo ka a daŋyelbo ŋa da nyɛ eebo? Gyɔɔn naŋ korɔ noba suobu la da de weɛ a wa maale Yezu sori koo. Jehoova yuori naŋ da dɔgle Yezu zuŋ na, yɛlɛ na Gyɔɔn naŋ da e na da vɛŋɛɛŋ aŋ e mɔlɔ koo ka o manne Jehoova yuori na yɛlɛ ko noba. (Mat. 3:3; Mak. 1:2-4; Luk. 3:3-6) Aizeeya daŋyelbo na da gaaɛ nimitɔɔre a yelka: ‘Jehoova gyeremɛ na kyaane la.’ (Aiz. 40:5) Sobuo ka a daŋyelbo ŋa da nyɛ eebo? A daŋyelbo da nyɛɛ eebo saŋa na Yezu naŋ wa a teŋɛzu na. Bonso, saŋa na Yezu naŋ da be a teŋɛzu na o da tɔglɛɛ Jehoova o yel-eree ane o yelyelii zaa poɔŋ. Azuŋ, a da waa ŋa Jehoova meŋɛ la be a teŋɛzuŋ.—Gyn. 12:45.
13. Bo yɛlɛ teŋ na baŋ e a de wuli ka te tɔglɛɛ Yezu?
13 Te meŋ eɛ Jehoova Sieree Deme aŋa lɛ na Yezu naŋ waa na. Jehoova yuori dɔglɛɛ te zuŋ, azuŋ, aseŋ ka te maŋ manna yelsonne na Jehoova naŋ erɛ na yɛlɛ korɔ noba. Kyɛ, aseŋ ka te lɛ e yelnimizeɛ kaŋa meŋ poɔ. Aseŋ ka te soŋ noba ka ba baŋ toŋ tegroŋ na Yezu naŋ toŋ a vɛŋ ka Jehoova yuori na pɛgeyi. (Tom. 1:8) Yezu la neɛ naŋ maŋ de weɛ a dire Jehoova yɛlɛ sieree. Te meŋ maŋ moɔrɛɛ te moɔbo zaa a tuuro o gbɛbɔgri. (Yel. 1:5) Kyɛ, wala ka te yeni yeni zaa na baŋ e a de wuli ka te de la Jehoova yuori na tegroŋ yaga zaa?
YƐLƐ MINE TEŊ NA BAŊ LƐ E A DE WULI KA JEHOOVA YUORI NA EƐ TEGROŊ YAGA ZAA A KO TE
14. Aŋa lɛ na 1 Korinti 1:31 naŋ wuli na, bo teɛroŋ teŋ taa kyaare Jehoova yuori na?
14 Te maŋ de la Jehoova yuori na duoro neŋ te menne. (Kanne 1 Korinti 1:31.) Ka teneeŋ wa de Jehoova yuori na duoro neŋ te menne, Jehoova poɔ zaaŋ maŋ pɛle. (Jer. 9:23, 24; 2 Kor. 10:17) Ka ba naŋ yelka te ‘duoro te menne Jehoova eŋɛŋ,’ wala ka lɛ wuli? A wuleeŋ ka te zɛgrɛ te menne Jehoova yuori naŋ dɔgle te zuŋ. Tenee yɛŋ zieŋ, a eɛ apoɔsori naŋ e kpoŋ a ko te ka te vɛŋ ka noba baŋ ka Jehoova yuori na eɛ forifori, ka o yel-eree meŋ zaa tori. A ba seŋ ka te zoro vi ka te vɛŋ ka te tontoŋtaaba, sakuubitaaba, te laŋkpeɛreba, ane noba mine baŋ ka te eɛ Jehoova Sieree Deme. Setaana ba boɔrɔ ka te manna Jehoova yuori na yɛlɛ korɔ noba. (Jer. 11:21; Yel. 12:17) Setaana neŋ o zirii daŋyelba na boɔrɔŋ ka noba inni Jehoova yuori na. (Jer. 23:26, 27) Kyɛ, nɔmmo na teŋ taa ko Jehoova yuori na maŋ vɛŋeŋ teŋ taa popeɛloŋ ‘a yi beguo gɛrɛ zisoɔree.’—Yiem. 5:11; 89:16.
15. Ka ba naŋ yelka te boɔlɔ Jehoova yuori na, wala ka lɛ wuli?
15 Naŋ moɔ̃ niŋe a boɔlɔ Jehoova yuori na. (Jool. 2:32; Uro. 10:13, 14) Ka ba naŋ yelka te boɔlɔ Jehoova yuori na, wala ka lɛ wuli? A wuleeŋ ka aseŋ ka te baŋ Jehoova yuori na, ane gyog-sonne na oŋ taa na, ka lɛ vɛŋ ka te dɛloo, a maŋ gaa o zie a te bɔ sowuli ane sommo. (Yiem. 20:7; 99:6; 116:4; 145:18) A lɛ wuleeŋ meŋ ka te maŋ manna o yuori na, ane o gyog-sonne na yɛlɛ korɔ noba, a lɛ eŋnɛ ba faŋa ka ba leɛre ba eebo a wa leɛ Jehoova zɔmenne.—Aiz. 12:4; Tom. 2:21, 38.
16. Wala teŋ na toɔ̃ e a de wuli ka Setaana eɛ ziri-ŋmaara?
16 Nare ho meŋɛ ka ho di dɔgɛɛ Jehoova yuori na zuŋ. (Gyi. 5:10, 11) Ka teneeŋ wa dire dɔgɛɛ a kyɛ kpimare Jehoova a dire yelmennoŋ koroo, a maŋ vɛŋeŋ aŋ pɛle ka Setaana eɛ ziri-ŋmaara. Gyoob saŋa na, Setaana da ŋmaɛ zirii dɔgle Jehoova puorebiiri zaa. O da yeleeŋ ka: “Nensaalaa na de la bonzaa oŋ taa tere kyɛ na deɛ o nyɔvore.” (Joob 2:4) Setaana da boɔrɔŋ ka o wuli ka, ka yɛlɛŋ wa kyɛnɛ soŋ a korɔ te, te maŋ moɔ̃ la niŋe a puoro Jehoova. Kyɛ, ka teneeŋ wa tuoro yelkpeɛne yɛŋ, te na zoŋ a kyɛ bare Jehoova. Gyoob da di la yelmennoŋ a vɛŋ aŋ pɛle ka ziri-kpoŋ la ka Setaana ŋma. Te meŋ taaɛ apoɔsori ka te de te yel-eree wuli ka yɛlɛ na Setaana naŋ yeli kyaare te na eɛ zirii. Azuŋ, ka teneeŋ wa tuoro yelkpeɛne, a ba seŋ ka te zagre Jehoova bare. Te na baŋ taaɛ sagediibu meŋ ka Jehoova na kaarɛɛ te zu o yuori na zuŋ.—Gyn. 17:11.
17. Aŋa lɛ na 1 Piita 2:12 naŋ wuli na, bo yɛlɛ teŋ na baŋ lɛ e a vɛŋ ka Jehoova yuori na nyɛrɛ pugibu?
17 Aseŋ ka te de te yel-eree wuli ka te taaɛ gyeremɛ naŋ e zuluŋ ko Jehoova yuori na. (Yeng. 30:9; Jer. 7:8-11) Te eɛ Jehoova Sieree Deme, azuŋ Jehoova yuori na dɔglɛɛ te zuŋ. Lɛ wuleeŋ ka te yel-eree na toɔ̃ vɛŋeŋ ka Jehoova yuori na nyɛ pugibu, kyɛbee ka o yuori na dɛge. (Kanne 1 Piita 2:12.) Azuŋ, aseŋ ka te maŋ mɔɔ te moɔbo zaa a de te yelyelii ane te yel-eree pugiro Jehoova. Aneazaa ka te eɛ noba naŋ ba pɛgeyi, kyɛ ka teneeŋ moɔ̃ niŋe erɛ lɛ, te na vɛŋeŋ ka Jehoova yuori na nyɛrɛ pugibu.
18. Bo yɛlɛ teŋ na baŋ lɛ e a de wuli ka Jehoova yuori na eɛ tegroŋ yaga zaa ko te? (Kaa a muni zie yɛlɛ na.)
18 Te maŋ de la Jehoova yuori na oŋ e tegroŋ yaga zaa a gaŋ yo-soŋ teŋ na taa nensaaleba nimitɔɔreŋ. (Yiem. 138:2) Bonso ka a yɛlɛ ŋa e nimizeɛ yaga zaa? Ananso la ka, saŋa na teŋ moɔrɔ ka te de te yel-eree a wulo ka te nɔŋ la Jehoova yuori na, a na toɔ̃ vɛŋeŋ ka te neŋ noba naŋ ŋmaa gyeere te na niiloŋ sãã.a Saŋa na baŋ da ko Yezu na, noba mine teɛroŋ poɔŋ o da eɛ yelfa-erɛ naŋ seŋ neŋ kũũ. Azuŋ, ba da ba de Yezu boɔle bonzaa. Kyɛ, Yezu da sagɛɛŋ a kpi a kũũ ŋa tɔ, bonso, lɛ eebo da vɛŋɛɛŋ ka Jehoova yuori na pɛgeyi. Yezu da ba de o teɛroŋ zaa eŋ teɛroŋ na noba naŋ taa kyaaroo na eŋɛŋ. O da ba vɛŋ ka ana yɛlɛ na meŋ dɔɔnoo. (Hib. 12:2-4) Yɛlɛ oŋ da de biŋ o nimitɔɔreŋ la ka o e yɛlɛ Jehoova naŋ boɔrɔ.—Mat. 26:39.
19. Bo teɛroŋ hoŋ taa kyaare Jehoova yuori na? Bonso hoŋ yeli lɛ?
19 A e teŋ noɔ̃ yaga zaa te naŋ nyɛ apoɔsori a puoro Jehoova. Te lɛ zɛgrɛɛ te menne yaga zaa ba naŋ boɔlɔ te Jehoova Sieree Deme. Azuŋ, ka nobaŋ wa eŋnɛ te nyaaba Jehoova yuori na zuŋ, kyɛ te na yi la te poɔ zaa a are a noɔreŋ. Te lɛ baŋɛɛŋ meŋ ka, Jehoova yuori na eɛ tegroŋ yaga zaa a gaŋ yo-soŋ teŋ na taa noba nimitɔɔreŋ. Setaana naŋ na moɔ̃ la niŋe a pigre te nyɛrɛ, azuŋ, lɛ zaa naŋ la, yɛ vɛŋ ka te zaa moɔ̃ niŋe a naŋ pugiro Jehoova yuori na. Ka teneeŋ erɛ lɛ, te na wuliŋ ka Jehoova yuori na la e tegroŋ yaga zaa ko te a gaŋ yel la yelzaa. Lɛ meŋ eebo na wuliŋ ka te tɔglɛɛ Yezu Krista.
YIELOŊ 10 Praise Jehovah Our God! (Pugi Jehoova Te Naaŋmen!)
a Saŋa na Gyoob zɔmenne bata naŋ da yelka o eɛ yelfaa kaŋa azuŋ oŋ tuoro yelkpeɛne na, a da vɛŋɛɛŋ ka Gyoob leɛ de o teɛroŋ zaa eŋ o meŋɛ eŋɛŋ, a boɔrɔ ka o pɛge o yuori. Saŋa na o biiri naŋ da kpi, ka o bontaree zaa meŋ yi o nuuriŋ na, a Baabole yeleeŋ ka, “Gyoob da ba e yelfaa zaa kyɛbee a yelka Naaŋmen eɛ yelfaa kaŋa.” (Joob 1:22; 2:10) Kyɛ, saŋa na o zɔmenne naŋ da ŋmaa yɛlɛ dɔgle Gyoob a yelka o eɛ yelfaa kaŋa na, Gyoob da piili yelee ‘yelbie naŋ waa toloŋ.’ Gyoob da de la o teɛroŋ zaa eŋ lɛ na oŋ na toɔ̃ e a pɛge o yuori, o da ba lɛ de o teɛroŋ eŋ lɛ na oŋ na e ka Jehoova yuori na pɛgeyi.—Joob 6:3; 13:4, 5; 32:2; 34:5.