Loi e Keukawahnine La Aqane Kapa La Itre Ka Traqa Ngöne La Ijine Atrune La Drai Ne Amekunën
1 Ame lo itre macatre ka ase hë, ke, ame la angetre sine la Drai ne Amekunën, ke, troa aceitunëne me ca atre cainöj, nge lue atr qa trön. Ma tro jë fe hi a ceitune memine la macatre celë. Ame itre xan, ke, troa könë angatre hnene la ketre sine i angatre maine hnene la ketre atr ka atre angatr, nge ame itre xan, ke, troa könë angatre kö hnene la itretre cainöje trootro ne la zi angatr. Nge ame itre xan, ke, itre hna bapataisone hë, ngo tha ka cainöje trootro hmaca kö. Tro së a kapa hnyawane hnene la hni së ka pexeje la angetre metrötrëne la hna ahnithe hnei Iesu ka hape: “Kucajë la nyine mekune koi ni.” — 1 Kor. 11:24; Rom. 15:7.
2 Tro la angetre cilëne la serevisi ne ikep a kapa la nöjei atr, ngo loi pe troa canga kapa la ka hnyipi traqa ngöne la uma ne Baselaia. Ngo ame pe, loi e tro asë hi së a xötrethenge la thina ne la ka hnimi trehnyiwa, ene la troa kapa la nöjei atr ngöne la Drai ne amekunën. (Rom. 12:13) Nemene la aqane troa kuca?
3 Ame la heji cili, troa tru la jolene la itretre cainöje trootro pine laka tro angatr’a trotheng’trongëne la itre ka pi hane sine la Drai ne Amekunën. Ame pë hë itre ka tha itrothei, loi e tro angatr’a canga traqa göi troa kapa la itre ka traqa cas. Maine kola lö la ka hane xötrei traqa ngöne la uma ne Baselaia, ke, kepe angeice hnyawa ju, nge nango porotrike jë me angeic. Hnyingëne ju ka hape hetre trejine kö me easë hnei angeice hna atre ngöne la ekalesia. E maine eje hi, ke, porotrike ju me angeice utihë la kola traqa hnene lai atr hnei angeice hna atre. (Goeëne ju la Luka 10:35.) E maine pëkö hnei angeice hna atre, ke, hnauëne matre tha hë angeice kö troa hane lapa ezi epuni ngöne la ijine icasikeu? Qejepengöne jë la aqane trongene la waina me areto ngöne la porogaram. Nge xatua angeice ju fe troa thele la itre mekene tusi hna amamane hnene la ka cilefë la cainöj.
4 Ngöne la pune la Drai ne Amekunën, ke, amamai angeice jë ka hape madrine catre së la angeic’a traqa. Maine hetre hnei angeice hna pi hnyingëne göne la huliwa së, ke, loi e hetre aja së troa sa koi angeic. Maine easë a nyipiewekë angeic, ke, jëne tro hi së lai a nyiqaane ithahnata Tusi Hmitrötre me angeic, ngöne la uma ne Baselaia maine e ketre götran. Ame la itre xaa trejin, ke, hnei angatre hna thupëne la itre ijine ka tune lai, troa nyiqaane la itre etid ka tro loi hnyawa enehila. Qëmekene la tro la atr ka hane xötrei traqa a tro hmaca qa hnine la uma ne Baselaia, ke, loi e troa pane amamai angeice kowe la itre xan, nge loi e keukawahnine la aqane tro së a hë angeice troa sine hmaca la icasikeu ka troa xulu.
5 Atraqatre la madrine së troa kapa la itre trejine ka tha hane kö sine lapaane la itre icasikeu, maine pena ka tha cainöje trootro hmaca kö! Loi e troa qaja la madrine së troa ce me angatre la ijine cili hune la troa hnyingëne la kepine matre paatre kö angatre ngöne la itre icasikeu. Eje hi laka, ma tro la ketre mekune qa hnine la cainöje hnei angatre hna dreng’a xatua angatre matre sipu wai pengöi angatre göi troa easenyi hmaca koi Iehova. E keukawahnine la aqane kepe angatre hne së me loi la aqane nyipiewekë angatre hne së, nyipici tro la aqane ujë cili a ketr la hni angatr. Qaja ju koi angatre ka hape, madrine palahi së troa kepe angatr. — Rom. 1:11, 12.
6 Troa kuca la cainöje ka ketre pengöne ngöne la itre ekalesia, e 10 eiperem kola hape “La vraie religion comble les besoins de la société humaine.” Hëne jë kowe la icasikeu cili lo nöjei atr ka sine lo Drai ne amekunën, nge aijijë angatr’asë jë troa hane sin. Ame la aja së, ke, tro la ange ka sine la itre icasikeu cili, a drenge la ekeukawane la ihnimekeu ka eje hnine la nöje i Iehova. — Sal. 133:1.