Kola Sa La Itre Hnyinge i Nyipunie

◼ Hapeu, ka loi kö tro sa xeexe ngöne la kola kapa hmaca la ketre trejine hna upetrij?

Atraqatre la ihnimi gufa i Iehova, matre hnei Nyidrëti hna hamëne jëne la Tusi Hmitrötre la aqane tro la itre trejine hna upetrije ka ietra, a hane kuca matre troa kepe angatre hmaca hnei Nyidrë, me hane nyi atrene hmaca la ekalesia i keresiano. (Sal. 51:12, 17) Eje hi laka, hna ithuecatre pala hi koi së troa amamane la ihnimi së kowe la itre atr ka ietra cememine la hni ka menyik.—2 Kor. 2:6-8.

Maine nyipici laka, troa atraqatre la madrine së ngöne la kola bëeke hmaca la ketre sine së maine ketre atr hne së hna atre, a hna upetrije qa hnine la ekalesia, ngo loi e tro pala hi së a hetrenyi la metrötre ngöne la ijine kola thuemacane la ekalesia. Hna amamane hnene la zonal, La Tour de Garde ne 1 okotropa 1998, ka hape: “Ngo nyipi ewekë tro së a mekune hmaca laka, ala nyimu la itre atr hnine la ekalesia ka thatre pengöne kö la itre kepine matre kola upetrije la ketre atr, maine kola kepe angeice hmaca. Ketre, ame itre xane ke, maine jë hna ketri angatre maine hna akötrë angatre pena—a itre hnepe ijine ka qeadridri—hnene la itre ethane la ngazo hna kuca hnene la atr ka ietra. Loi e tro së a wangatrune la itre ewekë cili, matre e ithuemacanyine jë me kapa la ketre atr hna upetrij, haawe, nyipi ewekë tro së a hetrenyi la wangatrehmekune me xome hnöthe la aqane tro së a ikep, qëmekene tro së a isa amamane pë hë la madrine së koi angeic.”

Haawe, ngacama troa tru la madrine së ngöne la kola bëeke hmaca la ketre atr kowe la nyipici, thaa nyipi loi kö e troa xeexe ngöne la ijine kola kepe angeice hmaca hnine la ekalesia.