Itre Itus Ka Nyitrepene La Mel Me Huliwa Ne Cainöj Pepa Nyine Huliwan
2-8 MAAC
ITRE TRENGAMO QA HNINE LA TUSI HMITRÖTR | GENESE 22-23
“Hnei Akötesieti Hna Tupathi Aberahama”
w12 1/1 23 ¶4-6
Pine Nemene Matre Hnei Akötresie Hna Upi Aberahama Troa Huujë Isaaka?
Hanawange la trengewekë i Iehova koi Aberahama, kola hape: “Xomejë la nekö i ’ö, nekö i ’ö ka cas, ene Isaaka hnimina i ’ö . . . nge hujë nyëne jë e cili nyine huje ne deuth.” (Genese 22:2) Hnei Iehova hna qeje Isaaka ka hape, “hnimina i ’ö.” Tha ka sihngödri kö koi Iehova la etrune la ihnimi Aberahama koi Isaaka. Ketre, trotrohni Aberahama hi hnei Akötresie, ke, ka tru la ihnimi Nyidrë koi Iesu, nekö i Nyidrë. Ka jui la ihnimi Iehova koi Iesu, nge alua ithanata Nyidrë koi Iesu qa hnengödrai, me hape, “Nekönge hniminang.”—Mareko 1:11; 9:7.
Ame ngöne la Tusi Hmitrötr Fene Ka Hnyipixe Hna Ujën qene Papale, Iehova a “sipo” koi Aberahama. Önine la ketre atre qejepengöne la Tusi Hmitrötr ka hape, “atre hi la Joxu la ehacene la sipo i Nyidrë koi Aberahama.” Eje hi laka, kola akötr hnei Aberahama ngöne la Akötresie a sipo angeic la ewekë cili. Ngo the qaja palaha la akötre i Iehova ngöne lo Nyidrëti a öhne la nekö hnimina i Nyidrë, kola akötr me mec. Easa trotrohnine laka, pëkö ewekë ka akötrë Nyidrëti catr hune lai.
Eje hi laka, tha trotrohnine kö së la kepin matre Akötresie a upi Aberahama troa kuca la ewekë cili. Ngo, hnei Nyidrëti hna canga sewe Aberahama troa humuthi Isaaka. Hnei Iehova hna thupë Aberahama, matre tha tro kö a ulumi angeic hnene la akötr. Ame la kola mec la nekönatr, tre, hace ka tru kowe la keme me thin. Hnei Iehova hna thupë Isaaka matre tha tro kö angeic a mec. Ngo, “tha hnei nyidrëti kö hna cipane la nekö i nyidrë, ngo hna nue Iesu pe troa meci pi së asë.” (Roma 8:32) Pine nemene matre Iehova a ujë tun? Matre “troa amele së.” (1 Ioane 4:9) Drei la ketre hatrene ihnim! Hapeu, tha kolo kö lai a upi së troa hnimi Nyidrë?
w12 15/10 23-24 ¶6
Drei Akötresieti Jë, Nge Troa Eatre La Itre Hna Thingehnaean
6 Hnei Iehova hna acile la itre isisinyikeu memine la itre atr. Hnei Nyidrëti hna qaja la itre trengewekë ka hape: “Öni Joxu Iehova, ka hape, Loine eni.” (Ezek. 17:16) Ame ngöne la Tusi Hmitrötr, traqa koi 40 lao ijine sisinyi tune hnei Iehova Akötresie. Ame la ijine ka mama catr koi së, kolo ijin Nyidrëti a sisinyi koi Aberahama. Ame ngöne la itre macatre, anyimua amexeje Iehova koi Aberahama la hna isisinyikeu laka, tro la matran a fetra qaathei Aberahama jëne Isaaka. (Gen. 12:1-3, 7; 13:14-17; 15:5, 18; 21:12) Thupene lai, hnei Iehova hna tupathi Aberahama, me upi angeic troa huujë Isaaka, nekö hnimina i angeic. Tha cile kö Aberahama. Ame ngöne la Aberahama a troa huujë Isaaka, hnene la angela i Akötresie hna sewe angeic. Ame hnei Akötresie hna sisinyi me hape: “Hnenge hna sisinyi göi ni kö, ke ase hë eö kuca la ewekë cili, nge tha hnei ’ö kö hna cipane la nekö i ’ö nekö i ’ö ka cas ; qa ngöne lai tro ni a nyipi amanathithi ’ö, me nyipi amanane la ite matra i ’ö mate tune la ite wëtesiji e hnengödrai, nge tune la ngöni ne ngöne gejë ; nge tro ha la ite matra i ’ö a hetenyi la qanahage ne la ite ithupëjia me angat ; nge tro ha manathithi qa thene la matra i ’ö la nöjei nöje asëjëihë e celë fen ; qa ngöne la hnei ’ö hna denge thenge la tenge ewekëng.”—Gen. 22:1-3, 9-12, 15-18.
Troa Sine Thel La Itre Mekune Ka Sisitria
it-2 642 ¶2-3
Troa Atre La Ka Troa Traqa Elany
Kola huliwane hnyawane la mene i Nyidrë. Akötresie a huliwane hnyawane la mene i Nyidrë troa atre la ka troa traqa elany, thenge la itre trepene meköti Nyidrë, memine la pengöi Nyidrë ka mama e hnine la Tusi Hmitrötr. Tha Akötresieti kö a huliwane lapane la mene i Nyidrë. Nyidrëti a pane waipengöne la itre ewekë ka traqa, me axecië mekun e cili.
Ame ngöne Genese 11:5-8, hnei Akötresie hna goeëne la fene hnengödrai, me waipengöne la ewekë ka traqa e Babela. Nge e cili, Nyidrëti a axeciën la hnei Nyidrëti hna troa kuca matre troa sawa la itre atr troa kuca la itre huliwa ka ngazo. Ame la kola elë la ngazo e Sodoma me Gomora, hnei Iehova hna thuemacanyi Aberahama (jëne la itre angela) laka, tro Nyidrëti a “uti enehila me wang, ma hnei angate hna cengöne kuca thenge la hë teije ka xulu koi ni ; nge maine pëkö, tro ni a ate.” (Gen. 18:20-22; 19:1) Öni Akötresie, “ate” Aberahama ha hnei Nyidrë. Ngo thupene la hnei Aberahama hna thel troa huujë Isaaka, öni Nyidrë, “Öhnë hë ni enehila laka eö a qoue Akötesie, nge tha hnei ’ö kö hna cipa ni la nekö i ’ö, ene la nekö i ’ö ka cas.”—Gen. 18:19; 22:11, 12; wange ju Neh. 9:7, 8; Ga 4:9.
16-22 MAAC
ITRE TRENGAMO QA HNINE LA TUSI HMITRÖTR | GENESE 25-26
“Esau a Salemëne La Edrö Ne Neköne Haetra”
it-1 1224
Iakobo
Esau la hna nekö hnimën hnei Isaaka, atre weje öni angeic, nge ka majemine tro. Ngo ame Iakobo hna nekö hnimëne hnei thin, “ate thina ka [meköt] [Heb., tam] . . . me ate ne hnalapa,” angeic a thupëne la itre mamoe, me kuci jol e kuhu hnalapa. (Gen. 25:27, 28) Hna majemine xome la hnëewekë qene Heberu tam, matre troa qaja la atre hna kapa hnei Akötresie. “Ame la ate kuci madra, te, kola methinëne la [atr ka meköt]” [qene Heberu. tam], ngo Iehova a sisinyi laka, troa “hete pune ka loi kowe la ate ka [meköt].” (Ite edomë 29:10; Sal. 37:37) Nge, ame Iobu, atre “nyipi loi thina me meköti [qene Heberu., tam].”—Iobu 1:1, 8; 2:3.
it-2 637
Haetra
Qaane ekö, hna atrune la itre nekön haetra, ke, angeic la ka troa xome la hnëqa ne keme ne la hnalapa. Tro angeic a kapa la lue edrö qaathei kem. (Deu. 21:17) Ame ngöne la ijine xen, hnei Iosefa hna hamë Reubena la göhnë ne la nekön haetra. (Gen. 43:33) Ngo, ame e hnine la Tusi Hmitrötr, tha hna amë wengëne kö la ëjene la itre nekönatr, qaane la haetra utihë la wenepuhnen. Eje pe a pane qaja la ëjene la nekönatr ka mele nyipici, ngo tha nekön haetra kö.—Gen. 6:10; 1 Aqane. l. Ite jo. 1:28; wange ju Gen. 11:26, 32; 12:4; wange ju fe EDRÖ NE HAETRA; EDRÖ.
Troa Sine Thel La Itre Mekune Ka Sisitria
Itre Hnying Ne La Itre Ka e
Tro sa ce wange la tusi Heberu 12:16, kola hape: “Thupëne kö matre tha tro kö a hetrenyi thei nyipunie la atre kuci ngazo, me atre wangesixane la itre ewekë ka hmitrötr, tui Esau, lo atre nuetrij la edrö ne haetra göi ca trepe xen.” Nemene la ini koi së?
Tha Paulo aposetolo kö e celë a qaja la itre xötrapane ne la Mesia. Angeic a thuecatrene la itre keresiano troa ‘amekötine la itre gojeny thatraqane la lue ca i angatr,’ matre tha tro kö ketre a ‘triane la ihnimi gufa i Akötresie.’ Angeic a hmekë angatr göne la troa kuci ngazo. (Heb. 12:12-16) Maine tro angatr a kei kowe la huliwa cili, ceitui angatr me Esau. Hnei angeic hna “wangesixane la itre ewekë ka hmitrötr,” maine kei kowe la huliwa hna sisin.
Hnei Esau hna mel ngöne la ijine la itre keme ne lapa, matre hna aijijë angeic troa tro fë huuj. (Gen. 8:20, 21; 12:7, 8; Iobu 1:4, 5) Ngo pine laka, ka tru koi angeic la itre huliwa ne ngönetrei, hnei angeic hna nuetrij la edrö ne nekön haetra göi ca trepe xen. Maine jë, aja i angeic troa triane la itre akötr hna troa melën hnene la itre matra i Aberahama, thenge la hna perofetan. (Gen. 15:13) Ketre, hnei Esau hna amamane laka, angeic a wangesixane la itre ewekë ka hmitrötr, ngöne la angeic a xome la lue föe wanaithihlë. Nge celë hi ka akötrëne la keme me thine i angeic. (Gen. 26:34, 35) Ka isapengöi angeic me Iakobo, ke, hnei Iakobo hna isine troa faipoipo memine la ketre hlue i Akötresie!—Gen. 28:6, 7; 29:10-12, 18.
it-2 255 ¶6
Thoi
Tusi Hmitrötr a wathebone troa silitrengathoi ketre matre troa akötrë angeic. Ngo, tha kolo kö lai a qaja ka hape, tro sa qaja asë la itre ithuemacanyi kowe la itre atr ka ngazo, nge tha ijiji angatre pe troa atre. Öni Iesu Keriso: “The hamëne kö la ewekë ka hmitrötr kowe la itre kuli, me trije la itre penina koi puaka, wanga waja fica pi me thaujë troa hej angazo nyipunie.” (Mat. 7:6) Celë hi matre, ame itre xaa ijin, Iesu a lapa thaup, maine qaja sinëne la ketre ewekë ngöne la kola hnyinge koi nyidrë, wanga troa akötrë ketre. (Mat. 15:1-6; 21:23-27; Ioane 7:3-10) Celë hi hna kuca hnei Aberahama, Isaaka, Rahaba, me Elisaia ngöne la kola thele troa atre la itre xaa ithuemacanyi hnene la itre atr ka tha nyihlue i Iehova kö.—Gen. 12:10-19; mek 20; 26:1-10; Ios. 2:1-6; Iako. 2:25; 2 Ite jo. 6:11-23.
23-29 MAAC
ITRE TRENGAMO QA HNINE LA TUSI HMITRÖTR | GENESE 27-28
“Iakobo a Kapa La Manathith”
w04 15/4 11 ¶4-5
Rebeka—Ketre Föe Ka Xoue Akötresie
Tha hna qaja kö hnei Tusi Hmitrötr ka hape, atre hi Isaaka laka, tro Esau a nyihlue i Iakobo. Ngo, atre hi Rebeka me Iakobo laka, tro Iakobo a kapa la manathith. Ame la Rebeka a drei mejene laka, tro Isaaka a amanathithi Esau thupene la angeic a tro fë öni ka pui loi koi nyidrë, hetre ewekë hnei eahlo hna kuca. Kolo palahi a mama thei eahlo la catr, me atreine axecië mekun tune ekö, lo eahlo a thöth. Hnei eahlo hna ‘upi’ Iakobo troa xome la lue neköi nani ka loi. Tro eahlo a hnëkëne la ketre trepe xen ka loi thatraqane la föi eahlo. Thupene lai, tro Iakobo a xome la pengöi Esau matre troa kapa la manathith. Ngo, xele kö Iakobo. Maine tro Isaaka a trotrohnine la hnei angeic hna kuca, tro nyidrëti lai a ahnëjinë angeic! Rebeka a iele angeic, me hape. “Neköng, troa tithi ni pe la troa hnëji ’ö.” Eahlo a hnëkë Iakobo memine la trepen xen, me upi angeic koi Isaaka.—Genese 27:1-17.
Thatre kö së la kepine matre hnei Rebeka hna ujë tune lai. Alanyimu enehila la itre ka wange angazone la hnei eahlo hna kuca. Ngo, tha celë kö la mekuna i Tusi Hmitrötr. Nge, ame la Isaaka a trotrohnine laka, hnei nyidrëti hna amanathithi Iakobo, tha hnei nyidrëti kö hna wange angazone lai. Hnei nyidrëti pe hna atrune hmaca kö la manathith. (Genese 27:29; 28:3, 4) Atre hi Rebeka la hna thingehnaean hnei Iehova göne la lue nekö i eahlo. Celë hi matre, hnei eahlo hna kuca asë la hnei eahlo hna atreine matre tro Iakobo a kapa la manathith, thenge la hna thingehnaean. Ka ihmeku hnyawa memine la aja i Iehova.—Roma 9:6-13.
w07 1/10 31 ¶2-3
Itre Hnying Ne La Itre Ka e
Tha hna qaja kö hnei Tusi Hmitrötr la kepin matre hnei Rebeka me Iakobo hna ujë tune lai, ngo ame pe hna asesëkötrë nyidro. Tha Tusi Hmitrötre kö a qaja aloin, maine qaja angazone la hnei nyidroti hna kuca, matre tha nyine xomi ini kö göi thoi maine iaö. Ngo, eje pe a qejepengöne la ijine cili.
Ame la hnapan, kola mama ngöne la itre xötre ka tro pa me ka tro pi laka, Iakobo la ka ijij troa kapa la manathithi qaathei kem, ngo tha Esau kö. Hnei Iakobo hna itöne la edrö ne nekön haetra i Esau, ke, hnei Esau hna wangesixane la edrö cili. Hnei angeic hna salemën la edrö i angeic göi ca trepe xen. “Hnei Esau hna sixele” la edrö i angeic. (Genese 25:29-34) Celë hi matre, meköt e tro Iakobo a kapa la manathith qaathene la keme i angeic.
it-1 295 ¶6
Manathith
Ame ngöne la ijine la itre keme ne lapa, hnene la keme hna majemine amanathithine la itre nekö i nyidrë trahmanyi qëmekene troa mec. Ka nyipiewekë catre la manathith cili, nge ka sisitria. Hnei Isaaka hna amanathithi Iakobo, ke, ame koi nyidrë, nyidrëti a hamëne la manathithi koi Esau, nekön haetra. Öni Isaaka, tro Iakobo a tru, nge tro angeic a sisitria catr hui Esau, trejin me angeic. Eje hi laka, hnei Isaaka hna sipo Iehova troa eatrëne la manathithi cili, ke, ti hë la lue meke i nyidrë, nge qatre menu hë nyidrë. (Gen. 27:1-4, 23-29; 28:1, 6; Heb. 11:20; 12:16, 17) Thupene lai, hnei Isaaka hna acatrene la manathith, me nyixane hmaca kö. (Gen. 28:1-4) Qëmekene tro Iakobo a mec, hnei nyidrë hna pane amanathithine la lue nekö i Iosefa, nge thupene lai, hnei nyidrëti hna amanathithine la itre sipu nekö i nyidrë. (Gen. 48:9, 20; 49:1-28; Heb. 11:21) Ketre tune mina fe, qëmekene tro Mose a mec, hnei nyidrë hna amanathithine la nöje Isaraela. (Deu. 33:1) Kola amamane e celë laka, ame la itre trengewekë i angatr, tre, itre hna perofetan. Ame ngöne la kola hamëne la manathith, hnene la atr hna majemine ati ime hune la he ne la atr ka troa kapa lai manathith.—Gen. 48:13, 14.
Troa Sine Thel La Itre Mekune Ka Sisitria
w06 15/4 6 ¶3
Aqane Tro La Itre Trefën a Ifekeun La Itre Mekun
Hapeu, atreine kö Isaaka me Rebeka ifekeune la itre mekun i nyidro? Thupene la hnei Esau hna xome la lue föe ne Heth, kola jole la mele ne la hnepe lapa. Öni Rebeka koi Isaaka: “Hace hë la hninge pine la lue föe ne Heth ; maine tro lakobo [nekön cipa] a xomi föe qa thene la ite nekö i Heth jajiny . . . , nyine ue hmaca la mele koi ni?” (Genese 26:34; 27:46) Haawe, hnei eahlo e celë hna fe la aliene hni eahlo koi Isaaka.
Hnei Isaaka hna qaja koi Iakobo, fini me Esau, laka, tha tro kö angeic a xome la itre föe ne Kanana. (Genese 28:1, 2) Hnei Isaaka hna drei Rebeka. Hnene laka, hnei nyidro hna ifekeune la itre mekun, matre hna canga nyinyine lai jol ka tru. Ketre tulu ka lolo koi së enehila. Ngo, nemene la nyine troa kuca, e thatreine kö la lue trefën troa ce axecië mekun?
w04 15/1 28 ¶5
Itre Mekun Ka Sisitria Ne La Tusi Genese—II
28:12, 13—Nemene la aliene la pu i Iakobo göne la “ija”? Ame la “ija,” celë, tre, ceitune me escalier nyine troa elën. Kola amamane laka, tha ka iananyi kö la ihnadro me hnengödrai. Nge, kola elë me ut la itre angela i Akötresie. Kolo hi lai a amamane la enyipiewekëne la huliwa i angatr göi troa acatrene la aqane imelekeu Iehova memine la itre hlue i Nyidrë.—Ioane 1:51.
30 MAAC–5 EIPEREM
ITRE TRENGAMO QA HNINE LA TUSI HMITRÖTR | GENESE 29-30
“Iakobo a Faipoipo”
w03 15/10 29 ¶6
Ka Tru Koi Iakobo La Itre Ewekë Ka Hmitrötr
Ame ngöne la ijine cili, tro la trahmanyi me föe a faipoipo, e tro la trahmanyi a pane kuië manie kowe la hnepe lapa ne la föe. Ame ngöne la Trenge Wathebo i Mose, tro la trahmanyi a kuiëne la 50 lao sekel sileva matre troa faipoipo memine la ketre jajinyi hnei angeic hna angazon. Öni Gordon Wenham, ketre atr ka qejepengöne la Tusi Hmitrötr, ka hape, celë hi “ahnahna ka tru hna hamëne ngöne la faipoipo” ngo ame itre xaa ijin, “tha saisaithe kö” la etrune la manie cili. (Deuteronomi 22:28, 29) Pëkö manie i Iakobo nyine troa hamën koi Labana, matre angeic a sipo Labana troa huliwa koi nyidrë 7 lao macatre. Öni Gordon Wenham, “Ame ekö, hna nyithupene la atre ka huliwa göi hnepe ijine hi, ca sekel maine sine ngöne la treu, matre ka tru catr la ahnahna hnei Iakobo hna hamën koi Labana göi troa faipoipo me Rakela.” Celë hi matre Labana a canga kapa la sipo i angeic.—Genese 29:19.
Hna ‘Xulu La Lapa i Isaraela’ Qaathene La Lue Trejin Ka Melëne La Itre Akötr
Hnei Lea kö hna thel troa iaö Iakobo? Maine pena hnei angeic hna drengethenge la keme i angeic. Nge, ekaa Rakela la ijine cili? Atre fe kö angeic la hna troa kuca hnene la keme i angeic? Maine eje hi, nemene la mekuna i angeic? Hapeu, ijiji angeice kö troa elë hune la musi ne la keme i angeic? Pëkö hna qaja hnei Tusi Hmitrötr göne la itre hnyinge celë. Atre ju hë Rakela me Lea la ewekë celë maine thatre kö, ngo tha madrine kö Iakobo. Ka wesitre Iakobo koi Labana, ngo tha koi lue jajinyi kö. Öni Iakobo: “Tha hnenge hna huliwa i ’ö thupe i Rakela ? Ue lae eö a iaö ni ?” Öni Labana: “Tha thina ne kö la nöje huni troa pane hamëne la cipa, nge pine pe la haetra. Atixenuëneju la ite drai ka [7] i nyën, nge tro hmaca huni a hamë eö la kete thupene la huliwa tro eö a kuca koi ni ite xa macate ka [7].” (Genese 29:25-27) Haawe, hnei Iakobo hna xome la lue föe, ngo tha aja i angeice kö. Nge, celë hi ka aciane la izalukeu ngöne la hnepe lapa i angeic.
it-2 222 ¶5
Faipoipo
Ijine feet. Ame e Isaraela ekö, pëkö nyi pengöne ngöne la ijine faipoipo, ngo ame e thupen, hetre feet ka tru. Ame ngöne la drai cili, föe a ketre hnëkë ngöne la hnalapa i angeic. Angeic a pane si, me köle oelene la ngönetrei angeic. (Wange ju la Rutha 3:3; Ezek. 23:40.) Ame itre xaa ijin, itre hlue a xatua angeic troa heetrëne la ketre heetre ka wië hna cane hnyawan, me itre beletr, thenge la hna hetrenyi hnene la hnepe lapa. (Iere. 2:32; Hna ama. 19:7, 8; Sal. 45:13, 14) Maine hetre manie i angeic, angeic a thaip, me li otrene wanakoim (Isa 49:18; 61:10; Re 21:2), nge angeic a heetrëne la he i angeic utihë la lue ca hnene la ketre imaano ka hmelele. (Is. 3:19, 23) Celë hi matre, hmaloi koi Labana troa iaö Iakobo, me hamë Lea koi angeic, ngo tha Rakela kö. (Gen. 29:23, 25) Hnei Rebeka hna juetrëne la qëmekei angeic qëmekene troa iönyi me Isaaka. (Gen. 24:65) Föe a ujë tun, matre troa amamane laka, angeic a troa drengethenge la föi angeic, nge trahmanyi la ka troa he ne la hnepe lapa.—1 Kor. 11:5, 10.
Troa Sine Thel La Itre Mekune Ka Sisitria
it-1 49
Nekönatr Hna Xome
Hnei Rakela me Lea hna xome la itre nekö i Iakobo hna hnahone hnene la itre hlue, ceitu me sipu nekö i nyidro, ke, hna ‘hnahone thatraqai nyidro.’ (Gen. 30:3-8, 12, 13, 24) Hnene la itre nekönatre cili hna kapa la edrö qaathei Iakobo, ceitu memine la itre nekönatr hna hnahone hnene la lue sipu föi nyidrë. Itre sipu nekö i Iakobo angatr, ke, nyidrëti la kem. Nge ame la itre hlue, tre, ewekë i Rakela me Lea, matre hetre musi nyidro hune la itre nekönatre cili.
w04 15/1 28 ¶6
Itre Mekun Ka Sisitria Ne La Tusi Genese—II
30:14, 15—Pine nemene matre hnei Rakela hna iëne troa xome la itre dudai (mandragores) hune la troa ce meköle me Iakobo me upune? Ame ekö, hna xome la itre mandragores matre troa amekölene la ketre atr, maine xatua angeic ngöne la kola ön. Ketre, kola mekun laka, jëne la wene cili, troa ahlëne la aja troa ce meköl, me hnaho atrun. (Nyima i Solomona 7:13) Tha hna qaja kö hnei Tusi Hmitrötr la kepin matre Rakela a xome la itre dudai. Maine jë, eahlo a mekun laka, tro la feja cili a xatua eahlo troa hnaho, me apatrene la hmahma ka ej thei eahlo. Ngo, hnei Iehova hna aijijë eahlo troa hnaho a itre macatre thupen.—Genese 30:22-24.