Atraqatre La Madrine Kowe La Ketre Itusi Ka Hnyipixe
Ej’a Amamane La Atrehmekune Qa Thei Akötresie
1 Drei la elolone la porogarame hne së hna kapa ngöne la kovasio ne distrik, 1995! Kola elë la madrine ne la itre atrene la kovasio ngöne lo hnaipajö ne mecixen, ijine kola amamane la itusi ka hnyipixe, ene La connaissance qui mène à la vie éternelle, nge hetre mekune hna qaja thupen. Itre thauzane milio lao atr ka ajane la atrehmekune hna troa kapa qa thei Akötresie hmekuj—Atrehmekune qa thei Akötresie, me Hupuna i Nyidrë, ene Iesu Keriso.—Ite Edo. 2:1-6; Ioane 17:3.
2 Drei la ecatrehninene memine la elolone la aqane amamane la itre mekune qa hnine la itus! Tro la itre mekene hna cinyihane ngöne la qaan, me itre iatr ka tru alien, me ketre aqane amamane ka maca ne la nyipici, me itre hnyinge ka tha jole kö troa trotrohnin, nge, ngöne mina la pune la nöjei meken, ke, hetrenyi la itre hna cinyihane hna eköhagen, kola hape “Hapeue la hnei epuni hna inin,” itre jëne lai ka troa upe la itre atr troa hane e la itus. Ngo ejehi laka troa öhnyi loi jëne la itusi hnene la itre ka ini Tusi Hmitrötr, ene laka tro angatr’a canga trotrohnine la itre trepene ini qa hnine la Tusi Hmitrötr.
3 Jëne la itre cainöje ne nyipune ngöne lo mecixeni me sabath, ke, hna xatua së troa inine la Tusi Hmitrötre memine la fami, jëne la itusi ka hnyipixe celë. Qa ngöne lai, loi e troa ej ngöne la mekune i epuni la itre ini hna troa ithahnataane ngöne la epuni a troa trofë eje ngöne la hna cainöje trootro.
4 Troa Wange Hmaca La Itre Mekun: Ijije tro epuni a amekunëne hmaca lo kola kuca lo taane cainöje hna hape “Pine nemene matre nyipiewekë catre la Atrehmekune qa thei Akötresie kowe la nöjei atr,” ke, hnene la ka cilefë cainöje hna amamane hnyawaane la itre mekune celë, kola hape: (1) Ngöne la epuni a inine la itre atr jëne la itusi celë, ke, tha loi kö troa xome la itre xaa mekun, wanga jole jë e troa trotrohnine la itre mekune ka tru; tha tro kö a ithahnata e tröne la hna cinyihane ngöne la itre mekene ne la itus. (2) Pine laka tha qea menu kö la itre meken, ijije tro epuni a aca kuca asë la caa mekene ngöne la epuni a inine la itre xane jen’ej. (3) E traqa ha kowe la pune lai mekene hna inin, ke, troa amekunëne hmaca la itre mekune katru; celë hi matre hna hnëkëne la itre hnyinge hna eköhagen, hna hape “Hapeue la hnei epuni hna inin,” ka troa amekunëne hmaca la itre mekune ka tru.
5 Huliwaane Jë Ngöne La Kola Inine La Itre Atr: Hnei itre xaa ka cainöje hna hnyingëne thele ka hape, loi kö troa saze itusi enehila hnene laka hetrenyi hë thei angatre lo lai ka hnyipixe. Ejehi laka, maine easenyi hë tro epuni a traqa kowe la pune la itusi hnapan, ke, loi e troa afenesin’ej. Ngo ejehi laka, hna xatuane la itre trejine troa saze itusi nyine inin, ene la itus Connaissance. E maine hnei epuni hna nyiqaane inine la Tusi Hmitrötre memine la ketre atr jëne la ketre boroshüre maine ketre tarak, ke, thele jëne jë troa amamane la itusi ka hnyipixe ngöne la ijine ka ijij, nge inine jë lai atr jën’ej. Tro pëhë epuni a kapa jëne la Huliwa ne Baselaia, la itre xaa ithuemacanyi göne la aqane troa huliwaane lai itus Connaissance, ngöne la itre treu ka troa traqa.
6 Hnei Iehova hna hamëne la itusi ka hnyipixe celë, nyine troa xatua së troa inine la itre xane matre hetrenyi fe angatre lo atrehmekune ka tro xomi së kowe la mele ka tha ase palua kö. Ame enehila, ke, nyipiewekë koi së troa hnëkë hnyawa, me catre cainöj.