Qaja Trongëne Jë Së La Nyipici o Drai Tui Iesu
1 Hetrenyi la ketre huliwa ka nyipi ewekë hna troa aeatrëne hnei Iesu ngöne lo nyidrëti a traqa e celë fen. Eje hi laka, thaa jole kö troa trotrohnin ej: ‘tro nyidrë a anyipicine la nyipici.’ (Ioane 18:37) Hnei nyidrëti hna qaja trongëne la nyipici göi Tretretro i nyidrë, ngöne laka nyipi lolo la itre thiina me itre trepene mekune i Nyidrë. Hnei nyidrë hna xome la huliwa cili ceitu me xen; hnene la huliwa cili hna lapaane la mele i nyidrë, nge kösë mele i nyidrë hi lai. (Ioane 4:34) Hnei Luka hna qaja ka hape Iesu “a ini o drai ngöne la ēnē.” (Luka 19:47) Hnei Iesu mina fe hna huliwane hnyawa la traeme i nyidrë ngöne la itre itre ijine ka ijij. (Ioane 9:4) Celë hi, qëmekene la tro nyidrë a mec, atreine hi tro nyidrë a qaja kowe la Tretretro i nyidrë ka hape: “Ase hë ni atrunyi cilieti e celë fen; ase hë ni umuthe la huliwa hnei cilieti hna nunuë nie troa kuca.”—Ioane 17:4.
2 Eje hi laka, maine tiqa la itre hni së hnei madrine pine la nöjei ewekë hnei Iehova hna kuca, celë hi ka troa upi së lai troa qeje Nyidrë o drai. Easë a tune la itretre drei i Iesu ngöne la angatre a caasi me ce catre qaja ka hape: “Thateine kö nyiho troa tha qaja la nöjei ewekë hnei nyiho hna goeëne me deng.” (Ite Huliwa 4:20) Hnei angatre palahi hna cesedrëne troa qeje Iehova, ke, kola qaja ka hape “o drai . . . tha mano kö angatr.” (Ite Huliwa 5:42) Loi e tro së a isa hnyinge ka hape, ‘Eni kö a nyitipune la ka Ini ni, ene Iesu?’
3 Catre Jë Troa Cainöj: Hnei Iesu hna ahnithe ka hape thupene la hna cainöjëne la maca ne Baselaia ngöne la fene asë, ke, “ame hna traqapi la pun.” (Mata. 24:14) Celë hi mekune lai ka upi së troa anyipi ewekëne la huliwa me canga hniine troa kuca ej. Pëkö xaa huliwa nyine troa kuca ka nyipi ewekë nge ka hetre thangane e hune la huliwa cili, pine laka e mele ne hi la itre milio lao atr lai. Nge, pine laka easenyi catre hë la pune la fene hnengödrai celë, ketre xoxopatre pe hi la itre ijine matre nyi pune pi hë la huliwa!
4 Hnene la itre rapore hna amamane laka Iehova a anyimenyimëne la huliwa ne iacasinekeune la itre atr hna aceitunëne me itre mamoe. (Isa. 60:22) Ngöne la itre götrane ka nyimutre ne la fen, kola lö la itre atr hnine la nyipici, nge angaatr a qaja madrine ka hape, “Tro huni a ce tro me nyipunie, ke, ate hë huni laka thei nyipunie la Akötesie”! (Zaka. 8:23) Kola eatre hnyawa la trenge ewekë i Iesu ngöne la hnedrai së ngöne lo nyidrë a qaja ka hape, “Atraqate la meledrai, nge xalaithe hi la angete troa menue. . . . Xëwejë nyipunie kowe la Joxu ne la meledrai, matre upepi la angete troa menue kowe la meledrai i anganyidë.” (Mata. 9:37, 38) Hapeu, tha kolo kö lai a upi së troa catre tune la itretre drei i Iesu, ngöne laka “angatre pala hi ngöne la ēnē a qaja aloinyi Akötresie NW”?—Luka 24:53.
5 Qaja Trongëne Jë La Nyipici o Drai: E nöjei drai, loi e tro së a thele ngöne la nöjei drai la itre aqane troa hane qaja la nyipici koi itre xan. Nyimu ijine tro së a cainöj. Hapeu, ijije kö tro epuni a pane xome la itre xaa hnepe menetre matre troa telefone kowe ketre sine celo i epuni maine ketre atr hnei epuni hna mekune ka troa ajane troa drei epun? Maine hapeu matre tha cinyanyi pena la ketre tus kowe la ketre atr ka tha lapa huti kö ngöne hnalapa? Hapeu, hnei epuni kö hna mekune troa hane hamë tarake kowe la ka cilë magazë, ngöne la epuni a itö? Ketre, atreine hi tro epuni a mekune la itre xaa aqane troa qaja ngöne la nöjei drai la mejiune. Maine tro epuni a catre thele jëne troa kuca tune lai, eje hi laka tro hë Iehova a xatua epun.—1 Thes. 2:2.
6 Haawe, isa hnyingëne ju së ngöne la easë a nyiqane la drai ka hape, ‘Hapeu, tro jë kö ni ce thawa la mejiunenge memine la ketre atr, e hna aijijë ni hnene la ketre hnepe ijine ka ijije koi ni?’ Xötrethenge jë la aqane ujë i Iesu, ene lo kepine la traqa i nyidrë e celë fen; öni nyidrë, “Qange troa cainöjëne la maca ka loi ne la baselaia i Akötesie.” (Luka 4:43) Maine easë a ajane tro së a ceitu memine la ka Ini së, ke, loi e tro së a xomi tulu qa thei nyidrë ngöne la troa qaja trongëne la nyipici.—Luka 6:40.