Tusi Hna Amamane—Kii Ne La Nyipi Manathith
1 Maca ka loi la itre hna qaja koi së hnei Ioane aposetolo ngöne la tusi Hna Amamane 1:3, pine laka angeic a qaja koi së la aqane troa thele manathith. Hnei angeice hna cinyihane ka hape, “Manathithi hë angeic ate e me angete denge la nöjei wesi ula hna perofetan, me trongëne la nöjei ewekë hna cinyihane ngön.” Hnene la itus La Révélation: le grand dénouement est proche! hna xatuane la ka alanyimu troa öhnyi manathith. Hetre nyipi kepine matre tro së a tro fë trongëne ej koi itre xan.
2 Maine jë epuni a ajane troa nyiqaane hnyinge ka hape:
“Hapeue la mekune i nyipë, hna cinyihane kö la tusi Hna Amamane matre troa trotrohnin, maine tro pala hi ej a sihngödre koi së? [Nue pi troa sa.] Alanyimu catre la itre ka ce mekune me epuni tune lai. Pane wange ju la hna qaja hnene la Tusi Hmitrötre ngöne Hna Amamane 1:3. [E jë.] Haawe, atreine hi tro së a trotrohnine la tus Hna Amamane, nge tro la atrehmekun ej a hamë manathithi koi së. Troa eatre tuneka?” Pane ce wange ju la itre mekune ngöne la paragarafe 2 ngöne la götrane 6, nge thupene lai qaja ju ka hape: “Kola qejepengöne trongëne la itre xötre ne la tus Hna Amamane jëne la itusi celë. Loi e tro epuni a ami ijine matre tro pala hi a e ej. Tru la madrinenge troa hane nue pe la itusi celë koi nyipë, 400 F la thupen.”
3 Pine laka nyimutre la itre ka kukehnine thatraqane la itre aja i angaatr, atreine së troa ahlëne la aja i angaatre hnene la aqane ithahnata celë:
“Hapeue la mekune i nyipë, nemene la sipu aja së ka tru? [Nue pi troa sa.] Nyimutre la itre ka catre fë ka hape ame la ka nyipi ewekë koi së, ke, ene la troa thele la itre ewekë ne ngönetrei.” Fe jë kowe la götrane 73 nge ce wange ju la itre mekune ka tru ngöne la itre hna cinyihane hna eköhagene hna hape “Le matérialisme opposé à la sagesse.” Kola qaja ka hape: “Kolo lai a amamane ka hape tru kö la hne së hna wangatrune la itre ewekë ne ngönetrei; loi e tro së a akötrehnine la itre aja së ngöne la ua. Ame la aja së ka sisitria me ka tru, ke, ene la nyipi atrehmekun. Ngo atrehmekune göi nemene?” E jë la Ioane 17:3, nge qejepengöne jë la aqane tro la atrehmekune i Akötresie a thuejë i epuni kowe la mele ka pë pun. Tro fë trongëne jë la itus, nge bëeke hmaca jë matre troa ithahnatane la aqane fe amamane hnen ej la itre mekune ka sheminge göne la trepene mekune i Akötresie, ene la troa hamëne la itre ewekë hna ajane hnene la nöjei atr.
4 Pine laka alanyimu la itre ka kukehnine la itre ejolene la fen, tupathe jë troa qaja ka hape:
“Ame asë hi la nöjei atr hnenge hna ithahnata memin, ke, angaatr pala hi a hnehengazone la itre drai ka troa xulu. Ame itre xaa hene ka tru ne la fen, ke, angaatr a mekune ka hape easë a mele ngöne la pune la ijine ka ngazo, nge easë a troa lö kowe la ketre ijine tingetinge ka hnyipixe. Tuneka fe la mekune i nyipë? [Nue pi troa sa.] Ngacama kola catre thele hnene la itre atr la tingeting, ngo ame pe, ke, kolo pala hi a elë la etrune la ihumuth, me hleuhleu, e celë fen. Tusi Hmitrötr a amamane laka casi hi la nyine ka ijije troa apaatrene paluane la itre jole celë. [E jë la 2 Peteru 3:13. Fe jë kowe la iatr ngöne la götrane 302, nge qejepengöne jë la aqane tro la Baselaia i Akötresie e koho hnengödrai a amë hutine la tingeting, memine la lapa loinöje e celë fen.] Tro la itusi celë a xatua epuni troa goeëne la aqane tro epuni a hane ketre atrene lai fene ka hnyipixe, me hane kapa la itre manathithi ka troa epine palua fene la mus ne la Baselaia i Akötresie.”
5 Maine epuni a öhne la ketre atr ka tru jolen, matre jole e tro epuni a ithahnata aqeany, ke, qaja ju hi ka hape:
“Maine hetre hnepe traeme i nyipë, ke eni a ajane troa hamë nyipë la tarake celë [maine hna cinyihane ngöne la ketre zonal] hna hape [iëne ju la tarak maine lai hna cinyihan]. Eni a ithuecatre koi nyipë matre tro nyipëti a hane e ej. Ame e ketre traqa hmaca ni, ke, eni ajane troa atre la mekune i nyipë qa ngöne la hnei nyipë hna e.”
6 Ame la easë a trofë trongëne la itus Révélation: dénouement, ke, easë lai a caasi memine la itre atr me ce madrine me angatre hnene laka kola waipengöne hnyawa la aliene la itre hna perofetane ngöne la tusi Hna Amamane.—Ite Edo. 3:13.