Xatuane Jë La Itre Xaa Atr Troa “Trongëne La Nöjei Ewekë Hna Cinyihan”
1 Ejehi laka, tha eje kö la troa “drenge” hmekuje la nöjei wesi ula hna perofetane ngöne la tusi Hna Amamane. Sisitria catre kö e troa “trongëne” la hna cinyihan, matre manathith. (Hna Ama. 1:3) Ame la troa hamë itus, ke, celë hi jëne hna pune kuca matre troa inine la itre atr. Nge, e hetre hne së hë hna öhne ka pune drei së, loi e tro hmaca së a canga bëeke troa xatua angatre matre kökötre palahi la wangatrehmekune i angatre ngöne la Tusi Hmitrötr. Hawe, nemene la hne së hna troa qaja ngöne la easë a troa bëeke troa iwai hmaca?
2 Maine hnei epuni hna ithahnataane lo foa lao ka ti hoos ngöne la epuni a xötrei iöhny, ke, epuni pa qaja jë ka hape:
◼ “Hnei nyiso lo hna ce goeëne lo tusi Hna Amaman, me ce ithahnataane la aqane eatre ngöne la hneijine së lo itre ewekë hna perofetaane hë ekö. Hnene la tusi Hna Amamane mekene 6 hna qaja la aqane nyinyape ne la foa lao hoos, celë hi kepine matre tiqa ha la fene hnei iakötrë me hleuhleu. Tha sihngödri kö koi së la itre ewekë cili. Alanyimu la itre ka isa hnyingëne la ijine troa paatre la akötre matre mele madrine jë së ngöne fene gaa tingeting. Hapeue fe la mekune i epun? [Nuepi troa sa.] Hna thele la aliene la hnyinge celë hnene la itretre drei Iesu.” Eje ngöne Mataio 24:3, nge hna sa hnei Iesu ngöne la xötre 34. Maine loi la thangane la hna porotrik, ke, ithahnataane jë fe hë lo aliene la itre drai hnapin.
3 Maine hnei epuni hna ithahnataane hë e cili la Baselaia i Akötresie, ke, sisedrëne jë hnene la hnyinge celë:
◼ “Hapeu, nemene la musi hnei epuni hna mejiune kow, ka troa axulune la itre aja ne la nöjei atr e celë fen? [Nue pi troa sa. E jë la Ieremia 10:23.] Ejehi laka, tha hnei Akötresieti kö hna mekune tro la atr a ketre musinëne la mele i angeic. Celëhi matre ame la itre akötre enehila, ke, thangane hi la pi hun, ngo tha thele pe la ixatua qa thei Akötresie. Baselaia i Akötresieti hmekujehi la nyin lo itre aja së.” Fe jë kowe la götrane 339 ne la itus Comment raisonner, nge ithahnataane ju la itre hna cinyihane fene la mekune hnapan. Qejepengöne ju la kepine matre ijije tro së a catre mejiune koi Akötresie.
4 Pane tupathe ju cahu hnepe aqane ithahnata:
◼ Amamane ju la iatr, götrane 302 ne la itus Révélation: dénouement, nge qaja ju ka hape: “Tro la fene hnengödrai a mele tune la, ngöne la ijine troa amanathithine la fen tune lo hnengödrai. Itre xan’a xouene e fetra hmaca lo itre aqane mele ka ngazo. Ngo, pëjë kö, pine laka paatre hë lo itre atr ka ngazo.” E ju la Salamo 37:10, 11. Nge xatuane ju lai atr troa hane inine la Tusi Hmitrötre me easë matre tro fe angeic’a hetrenyi trootro la atrehmekune.
5 Maine hnei epuni hna amë pe lo tarak “Une vie paisible dans un monde nouveau,” amamane ju lai iatr ngöne la götrane hnapan, nge e ju la paragarafe 1 fene la hna cinyihane “La vie dans le monde nouveau de Dieu.” Nge qaja ju ka hape:
◼ “Maine ajane së troa hane mele ngöne la fene ka tune la, ke, hetre ewekë nyine tro së a kuca.” E jë la paragarafe hnapin, nge, hamëne ju lai itus Révélation: dénouement.
6 Eje hi laka ame la hne së ajan, ke, troa nyiqaane inine la Tusi Hmitrötre memine la itre atr, nge troa eje lai mekun, e hne së hna catre iwai hmaca. Ami ijine ju göi troa iwai hmaca, nge hnëkë hnayawa ju. Qa ngöne lai, ijije tro së a xatuane hnyawa la itre atr ka hni ka meköt.—Hna Ama. 22:6, 7.