Xatuane Jë La Itre Ka Ajane Troa Trotrohnin
1 Hnei Peteru aposetolo hna wangatrehmekune laka ame la itre xaa ewekë hna qaja hnine la Tusi Hmitrötr, ke, ka “huliwa troa trotrohnin.” (2 Pet. 3:16) Alanyimu la itre ka mekune tune lai göne la tusi Hna Amamane. Ngo loi pe, hna qejepengöne hnyawa la alien ej hnine la itus La Révélation: le grand dénouement est proche! Tro së a xatuane tuneka la itre ka ajane matre troa huliwane hnyawane ej?
2 Maine hnei epuni hna ithahnatane la xötre ngöne Hna Amamane 1:3, ene la kola xötrei iöhny, ke, ma tro jë hi la mekune celë a xomexatuane la aja i angeic:
“Ame lo pane traqa ni, ke, hne so hna ithahnatane la ketre aqane tro la trotrohnine la tusi Hna Amamane a hamëne la manathith. Ngo, tha tro kö jë kö a traqa xane la manathithi cili. Eje hi laka, lue ewekë ka sisitria hna thele the së: Nyipi ewekë tro së a inine la Tusi Hmitrötr, nge loi e tro fe së a trongëne la itre hne së hna inin.” E jë, nge qejepengöne jë la xötre Iakobo 1:25. Nge fe jë kowe la götrane 8, paragarafe 9, nge amamane hnyawane ju la aqane tro la trotrohnine la tusi Hna Amamane a xatua së, ene la troa atrepengöne la aqane tro së a hane mele manathithi ngöne la paradraiso ngöne la fene ka hnyipixe.
3 Maine hnei epuni hna ithahnatane la xötre Ioane 17:3 ngöne la xötrei iöhny, ke, amamane ju la enyipiewekëne la troa atrepengöne hnyawa la Tusi Hmitrötr, qaja ju ka hape:
“Ame lo xötrei traqa ni, ke, hne so hna ce e la Ioane 17:3, ketre ithuecatre koi së troa atre Akötresie, ke, ka troa thuejë së kowe la mele ka tha ase palua kö. Ngo, hapeu, ajane kö epuni troa hetrenyi la mele ka tha ase palua kö ngöne la fene hnengödrai ka ceitu memine la hnedrai hne së hna melëne enehila? [Nue pi troa sa.] Nyimutre catre la itre atr ka troa tha ajan. Qa ngöne lai, loi e tro së a madrine la easë a drenge la hnei Akötresieti hna thingehnaean.” Fe jë kowe la götrane 303, paragarafe 6, nge e jë la Hna Amamane 21:4, thupene lai qaja ju la pengöne la fene hnengödrai ngöne la ijine “pate hë la ite ewekë hnapan.” Qaja ju ka hape tro hmaca epuni a bëeke troa sisedrëne la porotrik.
4 Maine hnei epuni hna amamane la iatr ngöne la götrane 302 matre troa amamane laka tro la Baselaia i Akötresie a apaatrene la akötr, ke, fe jë la itus kowe lai götrane cili, nge qaja ju ka hape:
“Hne së hna ithahnatane la itre loi hna qejepengöne hnene ca hu iatr, nge itre manathithi hna troa melëne hnene la itre atr fene la mus ne la Baselaia i Akötresie. Hapeue la mekune i epun, nemene la nyine tro së a kuca maine easë a ajane troa mele fene la mus ne la Baselaia? [Nue pi troa sa.] Ame itre xaa atr ngöne la hneijine la Tusi Hmitrötr, ke, hnei angaatre hna amamai tulu ka loi nyine tro së a nyitipune matre hane fe së öhnyi loi.” E jë la Ite Huliwa 17:11, nge amamane hnyawane ju la enyipiewekëne la troa ‘thele o drai la ite hna cinyihan.’ Qaja hnyawa ju ka hape itre Temoë i Iehova a xatuane la itre ka hni ka meköt matre troa inine la Wesiula i Akötresie, me trotrohnine hnyawa ej.
5 Maine hnei epuni hna amë pe la tarak “Le monde actuel survivra-t-il?” kowe la ketre atr ka tru jolen, ke, tupathe ju la aqane trofë celë:
“Ame lo xötrei traqa ni, ke, tru la jole i nyipë. Hnenge hna amë pe koi nyipë lo tarak, nge e kuhu hnine lo hnyinge kola hape tro kö a cile huti la fene ngöne la itre ijine gomegom. Easë a e jë la Hna Amamane 21:4, hna fejane hnine la itusi celë, ene La Révélation: le grand dénouement est proche! [E jë ngöne la götrane 303 paragarafe 6.] Jëne la iatr celë [ngöne götrane 302], ke, kola nyijë së troa nyiqaane mekune la pengön ej ngöne la ‘Akötesie a köle tije la nöjei tenge timida asëjëihë qa ngöne la ite lue meke së.’ Kola anyipicine hnene la hna cinyihane ka hape easenyi catre hë troa eatre la hna thingehnaeane celë. Maine ajane nyipë troa e ej, ke, tru la madrinenge troa amë pe la sine itusi celë ka 400 F la thupen.”
6 Maine epuni a öhne la ketre atr ka ajan, ke, epuni a amamai angeice ju la itus La connaissance qui mène à la vie éternelle, nge nyiqane ju troa inine la Tusi Hmitrötre me angeice jëne la itusi cili. Nyipici laka, troa tru la madrine hne së hna kapa qa ngöne la hna “ateinëne la ite wangadrapa.”—Sal. 119:130.