Loi e Troa Xatuane La Itre Xan Jëne La Itre Mekune Hna Ithawakeun Ngöne La Ijine Icasikeu
1 Kola ithuecatre koi së ngöne Heberu 10:24 troa ‘imekunekeune mate troa aciane la ihnimi me itre huliwa ka loi.’ Kola hape, troa thuecatrene la ketre atrene la icasikeu, hnene la itre mekune ka lolo hne së hna hane hamëne ngöne la itre icasikeu ne la ekalesia. Pine nemene matre nyipi ewekë troa qeje mekune? Nemene la aqane tro së a hnëkëne la itre mekune së? Drei la ka troa kepe thangane itre ej?
2 Mekune ju së lo nöjei ijine easë a kepe thangane la itre mekune ka thaa jole kö troa trotrohnin, hna hamëne hnene la itre xan; ketre itre hnëewekë lai ka akökötrene la trotrohnine së, me acatrene la lapaune së. Atreine fe tro së a hane kuca tui angatr. Ame ngöne la easë a qeje mekun, easë hi lai a amamane la aja së troa “hamë kete ihnimi ne [ua NW],” matre nyine ixatua fe kowe la nöjei atr ka sine la itre icasikeu.—Rom. 1:11, 12.
3 Nemene La Aqane Troa Hamë Mekune Ka Loi: The tro kö a aqeane menune pala ha la itre mekune hna hamëne thenge la aliene la itre paragarafe hna ce wang. Kola mama ka hape, maine qeadridri menu pala ha la itre mekun, haawe, tro ha triane la mekune ka sa hmekune la hnying, nge troa nanazije la itre atrene la icasikeu troa hane hamë mekun. Loi e troa xoxopatre hi la mekune hna troa hamëne ngöne la paragaraf, nge ka sa mekötine la hnyinge hna fejan. Ame pë hë koi itre mekune nyine nyixan, troa thele la itre xaa aqane troa trongëne lai mekun, maine troa amamane la aqane troa trotrohnine eje jëne la itre xötre ne la Tusi Hmitrötr. Wange ju la Manuel pour l’École, götrane 90-2.
4 Maine hetrenyi the së la qou troa hamë mekun, canga hnëkëne jë la ketre hnepe mekune ka xoxopatr, nge sipone jë kowe la atre xomiujine la icasikeu, troa pane hnyinge koi epuni ngöne la paragarafe hna troa ithahnatan. Thupene hë la itre xaa hnepe icasikeu, tro ha hmaloi koi së troa hane hamëne la itre mekune së. Amekunëne hmaca jë lo ewekë ka traqa koi Mose me Ieremia; hnei nyidroti hna qaja amamane laka, thatreine kö nyidroti troa ithahnata kowe la itre atr ka ala nyim. (Eso. 4:10; Ier. 1:6, ith. e cahu fen.) Ngacama jole koi nyidro, ngo hnei Iehova hna xatua nyidroti troa ithahnata. Haawe, ketre tro fe hë Nyidrëti a hane xatua së fe.
5 Drei La Ka Troa Kepe Thangane La Itre Mekune Së? Easë kö pine laka, easë a amamane jëne la itre mekune së laka, kökötre la nyipici ngöne la he së me ngöne la hni së; matre kösë hmaloi koi së troa mekune hmaca thupen, la ithuemacanyi hne së hna kapa ha. Troa kepe thangane mina fe hnene la itre xane la itre mekune ka lolo hne së hna hane hamën. Atraqatre la madrine së ngöne la easë a drenge la itre thöth, me itre ka lapa thaup, maine itre ka xötrei traqa pena kowe la hna icasikeu, angatre a catre troa fe amamane la lapaune i angatr, ngöne la itre ijine icasikeu.
6 Easë a mejiune laka, troa ‘nyipi lolo la trenge ewekë hna hamëne ngöne la ijine ej,’ e hna xome itre eje nyine ithuecatre kowe la itre xaa atr ngöne la itre ijine icasikeu!—Ite edomë 15:23.