Tro Së a Xome Catrëne La Hmi Ne La Mejiune Së, Matre Tha Luelue Kö Së
1 Ame la La Tour de Garde, ke, eje la sipu gojenyi ne troa hamëne la “xeni ngöne la nyipi ijin” kowe la nöje i Akötresie enehila. Loi e tro së a hetrenyi la lue mekune ngöne la easë a sine la icasikeu celë ka nyipiewekë — tro ej’a acatrenyi së ngöne la ua, nge tro fe së a qaja amamane la hmi ne la mejiune së kowe la itre xan. — Heb. 10:23-25.
2 Tro së a thele la thangane ka loi: Hna wangatrehmekune laka ngöne la itre ekalesia, ke, e köni atr ne la ekalesia, ke, alacasi hi la ka hnëkëne la etidi angatr. Nge angatre fe hi lai la itre ka lapa sa la itre hnying. Ngo tha ngöne casi kö la ijine icasikeu, la tro së a xomi thangane la nyipi xeni ne la ua cili, qa hnine la La Tour de Garde. Celëhi matre nyipiewekë troa hetre ijine hna amë, thatraqane la troa hnëkën’ej.
3 Ngöne la epuni a hnëkëne la nyine troa inin, ke, loi e troa pane hetre mekune kowe la itre hnyinge hna ekö hagën, lo hne së hna öhne easenyine la pune la taane nyine etidin. Tro la aqane kuca cili, a xatua epuni troa atrehmekune la itre mekune katru e kuhu hnin.
4 Ngöne la ijine icasikeu, ke, troa drenge hnyawane la itre hna qaja. Nyipiewekë tro së a qatixenyëne la itre xötrei ithahnata hna hamën, hnene la ka cilefë; itr’eje lai a ami trepene la etid. Tro nyidrëti lai a amamane la könitre maine eke mekune hna troa ithahnataane ngöne la etid, maine troa ce wange lo itre mekune ne lo etide ne lo wiike hnapan, e sine palahi la etid. Maine hetre mekune nyine troa amekötine hnyawane ngöne la trotrohnine së, göne la ketre perofeta maine ketre hna amekötine pena e kuhu hnine la Tusi Hmitrötr, ke, tro lai ka cilefë lai etid a qejepengöne hnyawane koi së. Eje hi laka, tha tro kö angeice a aqeane la itre xötrei ithahnata cili, pine laka ame la aliene la etid, ke, nyine troa xatuane la ekalesia troa amamane la mejiune i angatre qa ngöne la itre hna sa. Drenge hnyawane ju la hna qeje mekune hnene la itre xan,qa ngöne la hnei angatre hna inin; qa ngöne lai, troa catre la lapaune i epun.
5 Loi e troa qaja la mejiune së: Hapeu, majemine kö epuni hane sa maine e, lo ijine etid? Loi e troa qaja la itre mekune ka ihmeku memine la hnying, nge ka hopatr. (Goeëne ju Luka 21:1-4.) Easë asë a kapa madrine la itre aqane sa ka tha jole kö, ngo ka xulu qa kuhu hni. Ame la aqane sa panëne la hnying, ke, troa sa mekötin, nge tha tro kö a aqean. Nge thupene lai, ijije tro la itre xan’a hane sa, maine troa e la ketre mekene tus, maine troa amejëne la ketre mekune qa hnine la paragaraf. Qa ngöne lai, alanyimu la angetre ka amamane la mejiune i angatr. Loi e tro la itre hne së hna sa a hamë nyipi mekun, me nyine ixatua.
6 Maine tha ka hekö petrekö epuni sine la etid, nge maine xou i epuni troa hane sa, ke, ma aja i epuni troa sipo ixatua kowe la atr cilefë. Sipo nyidrëti jë troa goeëne la hmekune hnei epuni hna lapa, maine jë tro epuni a lime ngöne la kola ce wange la paragarafe hnei epuni hna mekune troa sa. Ijije fe tro epuni a sipu mekune troa e la ketre mekene tusi me troa qejepengön’ej, tha tro pe a aqean. Loi fe tro epuni a cinyihane ezine la paragaraf, la ketre mekune matre xatua epuni troa amekunëne la hnei epuni hna ajan troa qaja, ngöne la epuni a troa sa. Maine itre thöthi epun, ke, mekune hnyawane ju laka ame la itre hnei epuni hna qaja, ke, itre hna kapa hnyawane me kapa madrin. — Mata. 21:16.
7 Mele lai, la troa qaja amamane la lapaune së, nge ijine kuca hi lai ngöne la kola inine la La Tour de Garde. Nge maine jole koi epuni troa sa, ke, thelejëne jë troa elë hune la itre hna jolën, nge tupathe jë troa sa la ca hnying. Celëhi matre epuni fe a hane ce hni me angetre sine la reinio, nge hetre madrine i epun. Hawe, tuneka matre nyiqaane mekune jë troa a ca sa ngöne la etide ne la La Tour de Garde hnapin? — Ite Edom. 15:23.