Iehova Kö a Madrine Koi Eö?

1. Nemene la mekuna ne la itre xaa hlue i Iehova?

EASA madrine la easa atre ka hape, Iehova a kapa la nöje i Nyidrëti asë! Öni Tusi Hmitrötr: “Iehova a madine la nöjei ate i nyidë.” (Sal. 149:4) Ngo tha loi kö itre xan, matre angatr a hnying ka hape, ‘Ka madrine kö Iehova koi ni?’ Hna traqa tune fe lai kowe la itre hlue i Iehova ekö.​—1 Sam. 1:​6-​10; Iobu 29:​2, 4; Sal. 51:11.

2. Drei la itre ka amadrinë Iehova?

² Tusi Hmitrötr a amamane ka hape, ngacama tha ka pexeje kö së, ngo ijije hi tro sa amadrinë Iehova. Tro sa tune kaa? Loi e tro sa lapaune koi Iesu Keriso me bapataiso. (Ioa. 3:​16) Jëne la bapataiso, easa amamane koi itre xan ka hape, ase hë së ietrane la itre ngazo së matre kuca la aja i Nyidrë. (It. Hu. 2:​38; 3:​19) Madrine catre Iehova la easa trongëne la itre ewekë cili matre nyisinee i Nyidrë. Maine tro sa isine troa kuca la aja i Iehova, tro kö Nyidrëti a madrine koi së me nyisinee së.​—Sal. 25:14.

3. Nemene la hne së hna troa ce wang ngöne la tane mekun celë?

³ Ngo hnauëne kö la itre xan a mekun ka hape, tha madrine kö Iehova koi angatr? Nyidrëti a amamane tune kaa ka hape, Nyidrëti a madrine koi së? Nge nemene la nyine tro la ketre hlue i Iehova a kuca matre troa öhne laka, Iehova a madrin koi angeic?

ITRE XAN A MEKUN KA HAPE THA MADRINE KÖ IEHOVA KOI ANGATR

4-5. Ngacama eö palahi a wangaconyi eö, ngo nemene la mekuna i Iehova?

⁴ Qane lo angatr a co, tru la itre ka wangaconyi angatr. (Sal. 88:15) Öni Adrián, ketre trejin ka hape: “Qane ekö, hnenge palahi hna mekun ka hape, tha ka nyipiewekë kö ni. Ame lo eni a co, hnenge palahi hna thith fë la faming matre tro angatr a hane mel ngöne la paradraiso. Ngo ame pë hë ni, tha ijijinge fe kö la mele cili.” Ame pena Tony, tha hna hetru angeic kö ngöne la nyipici. Öni angeic: “Tha hane fe kö kaka me nenë qaja ka hape, nyidroti a hnimi ni me madrine koi ni. Matre ame koi ni, ka pëkö ca eloing.”

⁵ Maine eö fe hi a hane mekun tui nyidro, the thëthëhmine kö laka, Iehova la ka ee eö koi Nyidrë. (Ioa. 6:​44) Maine tha öhne kö eö la ka loi thei eö, ngo öhne kö Nyidrë ke, atre eö hnyawa hi hnei Nyidrë. (1 Sam. 16:7; 2 Aq. Jo. 6:​30) Matre the luelue kö laka, ka tru eö koi Nyidrë.​—1 Ioa. 3:​19, 20.

6. Tune kaa la aqane qaja Paulo la pengöi angeic?

⁶ Ame la itre xan, angatr palahi a hmahman lo itre ewekë hnei angatr hna kuca ekö, qëmeken troa atre Iehova. (1 Pet. 4:3) Ame la itre xaa trejin, angatr a isi memine lo itre hnei angatr hna majemin kuca ka ngazo. Ame eö ke, kolo kö a jelengazo eö hnene la hni eö? Maine eje hi, tha eö casi kö. Kolo fe a hace la hni Paulo aposetolo la angeic hmaca a mekun lo itre tria i angeic. (Roma 7:​24) Nyipici, hnei angeice lo hna ietra me bapataiso. Ngo angeice palahi a mekun ka hape, angeic “la aposetolo ka co catr,” nge “ka tru ngazon thei angatr.”​—1 Kor. 15:9; 1 Tim. 1:​15.

7. Tune kaa la aqane tro sa goeën la itre ngazo së ekö?

⁷ Maine tro sa ietra, tro kö Iehova a nue la itre ngazo së. (Sal. 86:5) Haawe, e ase hë eö ietran la itre ngazo i eö ekö, eje hi, ase hë Iehova nue la ngazo i eö.​—Kol. 2:​13.

8-9. Nemene la nyine tro eö a kuca, e eö a mekun ka hape, tha ijije kö la itre huliwa hnei eö hna kuca koi Iehova?

⁸ Aja i easë asë troa kuca la hne së hna atreine ngöne la huliwa i Iehova. Ngazo pe, itre xan a mekun ka hape, tha ijije kö la nöjei huliwa hnei angatr hna kuca troa amadrinë Nyidrë. Öni Amanda ketre trejin föe ka hape: “Hnenge palahi hna mekun ka hape, ame la troa hamën la ka sisitria koi Iehova ke, ene la troa hamën atrun. Matre eni a pi hamën atrun, ngo tha ijijinge kö. Nge maine tha eatrëne pena kö ni, tha madrine kö ni, ma ketre tui Iehova fe.”

⁹ Maine easa mekun ka hape, tha ijije kö la itre huliwa hne së hna kuca koi Iehova, ke nemene la nyine tro sa kuca? The thëthëhmine kö ka hape, ame Iehova ke, ka itrotrohni. Tha Nyidrëti kö a upi së troa kuca la ketre ewekë hne së hna thatrein. Nyidrëti a kapa la hnei eö hna atrein hamën. Ketre, mekune ju la tulu ne la itre hlue i Iehova ekö, itre ka catre huliwa, tui Paulo. Itre macatre hnei angeic hna trongëne la itre gojenyi gaa nanyi catr me acil la itre ekalesia. Ngo ame e thupen, saze pi hi la mele i angeic, matre tha cainöje hë angeic tun ekö. Hapeu, tha madrine hë Iehova koi angeic? Waea. Pine laka, hnei angeic palahi hna kuca la hnei angeic a atrein, matre hnei Iehova hna amanathithi angeic. (It. Hu. 28:​30, 31) Ketre tun, tro fe lai a hane saze la mele i eö. Ngo ame la ka tru koi Iehova ke, ene la aja i eö troa huliwa koi Nyidrë. Tro pena sa ce wang la itre xaa aqane amamane Iehova ka hape, ka madrine Nyidrëti koi së.

AQANE AMAMANE IEHOVA LA MADRINE I NYIDRËTI KOI SË

10. Tro eö a dreng tune kaa la Iehova a qaja ka hape, Nyidrëti a madrine koi eö? (Ioane 16:27)

¹⁰ Jëne la Tusi Hmitrötr. Tha cile kö Iehova troa amamane la madrine i Nyidrë, kowe la itre hnimina i Nyidrë. Alua qeje Iesu hnei Nyidrë ka hape, Nekönge hniminang, eni a madri nyën. (Mat. 3:​17; 17:5) Aja i eö fe kö troa drenge la Iehova a qaja ka hape, ‘Ka madrine ni koi eö’? Tha tro kö Iehova a ithanata meköti koi eö, ngo tro pe Nyidrëti a ithanata jëne la Tusi Hmitrötr. Tro eö a dreng la Nyidrëti a qaja ka hape, Nyidrëti a madrine koi eö, la eö a e la itre trenge ithanata i Iesu, ngöne la itre Evangelia. (E jë la Ioane 16:27.) Ka ceitune hi la pengöi Iesu me Keme i nyidrë. Anyimua qaja Iesu kowe la itretre dreng ka hape, nyidrëti a madrine koi angatr, ngacama tha ka pexeje kö angatr. Ame la eö a e la itre hna qaja hnei Iesu, ke kösë Iehova hi lai a ewekë koi eö.​—Ioa. 15:​9, 15.

11. Pine nemene matre tha tro kö eö a mekun ka hape, tha madrine kö Iehova koi eö la kola traqa la itre itupath? (Iakobo 1:​12)

¹¹ Jëne la itre huliwa i Nyidrë. Iehova a amamane la aja i Nyidrë troa xatua së ngöne la Nyidrëti a hamën la ka nyipiewekë kowe la mele së. Ame itre xaa ijin, Nyidrëti a nue easë troa melën la itre itupath, tui Iobu. (Iobu 1:​8-​11) Ngo tha kolo kö lai a hape, tha madrine hë Iehova koi eö. Itre ijine lai tro eö a amamane la etrune la ihnimi eö me mejiune i eö koi Nyidrë. (E jë la Iakobo 1:​12.) Nge ijine fe hi lai tro eö a öhne la etrune la ihnim me ixatua i Nyidrë koi eö.

12. Nemene la ini nyine tro eö a xom qa ngöne la hna melën hnei Dmitrii?

¹² Tro sa ce wang la hna melën hnei Dmitrii, ketre trejin qa Asie. Pëhë huliwa i angeic, nge jol e tro hmaca a öhnyi ketre. Hnei angeic hna catre cainöj matre troa amamane la mejiune i angeic koi Iehova. Kola tro la itre treu, nge pë palahi huliwa i angeic. Tithi angeice pi hnei mec, matre angeic pë hë a lapa uma. Angeic ha mekun ka hape, thatreine hë angeic kuca la hnëqa ne trahmanyi me kem, nge tha madrine hë Iehova koi angeic. Ame la ketre hej, hnene la nekö i angeic jajinyi hna imprimé la tusi Isaia 30:​15, hna hape: “Ame la trengecatre i eö, ke troa lapa thaup me mejiun.” Nyën pa trofë jë koi angeic ngöne la ili me hape, “Kaka, e ngazo mina la mekuna i nyipë, tro la xötre celë a xatua nyipë.” Öhne ju hi Dmitrii e cili ka hape, Iehova palahi a thupë angatr. Hnei Nyidrë hna thue xen, me iheetr, me uma i angatr. Öni angeic, “Ame pe hi la qang, ke troa lapa thaup me catre mejiun koi Akötresie.” Maine eö fe a hane melën la jole celë, tro kö Iehova a akötrehni eö, me xatua eö troa cilecatr.

13. Tune kaa la aqane amamane Iehova la ihnimi Nyidrëti koi së?

¹³ Jëne la itre trejin. Iehova a amamane la ihnimi Nyidrëti koi së jëne la itre trejin. Maine jë, tro Nyidrëti a uku angatr troa ithuecatre koi së la easa aja ixatua. Celë hi hna melën hnene la ketre trejin föe qa Asie. Hna pë huliwa i eahlo, nge hna tithi eahlo hnei mec. E thupen, hna amë la föi eahlo qa ngöne la hnëqa ne qatre thup pine nyidrë kuca la ketre ngazo ka tru. Öni eahlo, “Hnauën la kola traqa la itre ewekë cili koi ni? Ma hetre ewekë ka ngazo hnenge hna kuca matre tha madrine hë Iehova koi ni.” Hnei eahlo hna sipo iele Iehova troa xatua eahlo. Nemene la hna kuca hnei Iehova? Öni eahlo, “Hnene la itre qatre thup hna wai ni me akeukawanyi ni ka hape, tru la ihnimi Iehova koi ni.” Nge e thupen, hnei eahlo hmaca hna sipo Iehova troa xatua eahlo. Öni eahlo, “Ame ju kö la drai cili, hnenge hna kapa la ketre tus ka ithuecatr qaathene la itre trejin ne la ekalesia. Ame la eni a e lai tus, ke xecie koi ni laka, hnei Iehova hna dreng la thithing.” Eje hi, Iehova a amamane la ihnimi Nyidrëti koi së jëne la itre trejin.​—Sal. 10:17.

14. Nemene la ketre aqane amamane Iehova laka, Nyidrëti a madrine koi së?

¹⁴ Jëne la eamo hna hamën hnene la itre trejin, Iehova a amamane la madrine i Nyidrëti koi së. Ame ngöne la hneijine la itre pane keresiano, hnei Iehova hna upi Paulo troa cinyanyin la 14 lao tus kowe la itre ekalesia. Ame ngöne la itre tusi cili, hetre eamo ka catr, ngo hna hamën ngöne la ihnim. Hnauën la Iehova a upi Paulo troa cinyanyine la itre eamo cili? Pine laka, Iehova la ketre Kem ka ihnim, matre Nyidrëti a hajine la itre ‘kuku hna hnim.’ (It. Ed. 3:​11, 12) Matre e hna haji eö hnene la ketre trejin, the mekune kö laka, tha madrine kö Iehova koi eö. Nyidrëti pe a hnimi eö. (Heb. 12:6) Nemene la itre xaa aqane amamane Iehova laka, Nyidrëti a madrine koi së?

ITRE XAA KA ANYIPICINE LAKA IEHOVA A MADRINE KOI SË

15. Drei la itre ka kapa la uati hmitrötre i Iehova, nge pine nemene matre kola ithuecatre koi së?

¹⁵ Iehova a hamëne la uati hmitrötr kowe la itre atr ka amadrinë Nyidrë. (Mat. 12:18) Isa hnyinge jë ka hape, ‘Atreine kö ni huliwane la itre thiina ka xulu qaathene la uati hmitrötr?’ Ma eö ha öhne ka hape, atreine hë eö xomihnine la itre xan hun ekö, lo thatre Iehova palakö eö. Maine eö ha huliwane la itre thiina ka lolo, ke kolo hi lai a amamane ka hape, hetre thangane la uati hmitrötr thei eö. Celë hi matre Iehova a madrine koi eö!​—Wange ju la hna eköhagen “Ame La Wene La Ua Ke . . . ”

16. Hnei Iehova hna ahnith koi drei la huliwa ne cainöj, nge tune kaa fe la mekuna i eö? (1 Thesalonika 2:4)

¹⁶ Hnei Iehova hna ahnith la huliwa ne cainöj kowe la itre atr ka amadrinë Nyidrë. (E jë la 1 Thesalonika 2:4.) Tro sa ce wang la aqane xatua Jocelyn ketre trejin föe, hnene la huliwa ne cainöj. Ame lo ketre hmakany, hnei Jocelyn hna hlë nge tha madrine kö eahlo. Öni eahlo, “Pëkö trengecatreng, nge kösë pëkö eloing. Ngo ka pionie ni, nge ame la drai cili, hnenge hna mekun troa cainöj. Matre hnenge hna thith me tro troa cainöj.” Ame la hmakanyi cili, hnei eahlo hna iöhnyi me Mary, ketre föe ka pi ini Tus. Itre treu thupen, öni Mary ka hape, eahlo a thith koi Akötresie lo Jocelyn a fenifeni qëhnelö. Tune kaa Jocelyn la eahlo a drenge lai? Öni eahlo, “Kösë Iehova hi lai a qaja koi ni ka hape, ‘Ena madrine koi eö.’ ” Eje hi, tha tro kö la itre atr asë a kapa la maca ka loi. Ngo ka madrine Iehova la eö a kuca asë la hnei eö hna atreine matre cainöjëne la maca ka loi.

17. Nemene la ini hne së hna xom qa ngöne la hna melën hnei Vicky? (Salamo 5:​12)

¹⁷ Ame hi la itre ka kepe thangane la thupene mel qaathei Iehova, ke itre atr ka amadrinë Nyidrë. (1 Tim. 2:​5, 6) Ngacama ka lapaune eö kowe la thupene mel me bapataiso, ngo maine jë jole koi eö troa mekun ka hape, Iehova a madrine koi eö. Nemene la nyine tro eö a kuca? The thëthëhmine kö laka, tha tro kö sa mejiun kowe la itre sipu aliene hni së, ngo koi Iehova pe. Ame koi Nyidrë, ame la itre ka mejiun kowe la thupene mel, ke itre ka meköt, nge tro kö Nyidrëti a amanathithi angatr. (E jë la Salamo 5:​12; Rom. 3:​26) Hetre thangan ka loi hnei Vicky hna kapa qa ngöne la hna lapa mekun la thupene mel. Öni angeic: “Hnenge hna öhne laka, tru catr la hnei Iehova hna xomihni ni. . . . Kösë eni ekö a qaja koi Nyidrë ka hape: ‘Tha ijije kö tro nyipëti a hnimi ni. Thatreine kö la madra ne la nekö i nyipë troa köletrij la itre ngazong.’ ” Ame la angeic a nyiqane lapa mekun la ahnahna cili, ene la thupene mel, ke angeic petre hi a dreng la ihnimi Iehova. Tro fe eö a öhne laka, Iehova a hnimi eö me madrine koi eö, e tro eö a lapa mekune la thupene mel.

18. Nemene la ka troa traqa e tro sa catre hnimi Iehova?

¹⁸ Ngacama tro eö a trongëne la itre hna qaja ngöne la tane mekune celë, ngo tro kö a traqa koi eö la mekun ka hape, tha Iehova kö a madrine koi eö. Maine kolo mina traqa la mekune cili, the thëthëhmine kö laka, Iehova a madrine kowe “la itre ka catre hnimi Nyidrë.” (Iako. 1:​12) Haawe, acatrene jë la imelekeu i eö me Nyidrë, nge thele jë la itre aqane hnimi eö hnei Nyidrë. Ketre, the thëthëhmine kö laka, “tha ka nanyi kö [Iehova] koi së.”​—It. Hu. 17:27.