“Troa Methinë Nyipunie Hnene La Nöjei Nöj’asë”
1 Easë asë a madrine troa drenge la itre maca kola qeje pengöne ngöne la itre macatre celë, la itre manathithi ka lolo hna kapa hnene la nöjei Iehova e cailo fene hnengödrai asë. Nge kola treije madrine la itre hni së troa wange la kola fe hnei Musi la huliwa i Akötresie ngöne la nöje Malawi, thupene 26 lao macatre ne iaxösisi. Nge uqa fe hë la itre hni së troa wange laka ngöne la itre nöje e kohië ne Örop, ke, kei fe hë la Musi kominis ka pëkö Akötresieti ngön, matre nunue hë la wenge thauzane lao trejine me easë qa ngöne la ime i angeic. Nge ase hë së seseune la kola ithahnatane la hmi së ngöne la nöje e Heleni; ngo madrin’atraqatre hë së laka ase hmaca ha nue thupene la hna axeciëne ngöne la tiribinale ka tru e kohië e Örop. Nge easë fe a madrine troa drenge laka kola kökötre la Sasaiatri, matre tru la itre wapicin’ej ngöne la fene hnengödrai, matre hetre jëne tro la nöjei atr ka ajane la nyipici, a hetrenyi la nöjei itusi ka nyimutre. Tru la madrine së troa atre laka ala 7400 lao hna bapataisone ngöne la icasikeu e Kiev, e Ukeren. Nge nyipici laka thatreine kö së troa qaja la etrune la madrine së, la easë a goeëne la aqane kökötrene la huliwane la baselaia i Akötresie.
2 Ngo ngacama tru la madrine së, loie tro së a hmekëne matre tha tro kö la madrine cili a thinge la lue meke së. Eje hi laka ame la easë a drenge la itre maca ka loi celë, ke, sasaqe së troa mekune ka hape kei asë hë la itre ithupëjia, nge troa kepe së itre hlue i Iehova ngöne la fene hnengödrai asë. Ngo ijije tro la aqane mekune cili a hnihni së. Nyipici, ase hë së ngaane la itre xaa ehacen, me xometrije la itre xaa ejolene ngöne la itre xaa nöj, ngo tha tro kö së a thëthëhmine la aqane tro së a mele kowe la fene hnengödrai. Ame la atre xötrethenge Iesu, ke “tha sine i angeice fe kö la fene hnengödrai”. Celë hi matre xecie hnyawa palahi koi së laka troa “methinë së hnene la nöjei nöj’asë”. (Ioane 15:19; Mata. 24:9) Nge eje mina fe laka troa eje palahi la trenge ewekë celë utihë la pune la itre musi ne la fene hnengödrai celë, ene laka “troa axösisi angatr’asë angete ajane troa lapa fë la thina ka ijiji Akötesie thei Keriso Iesu.” — 2 Tim. 3:12.
3 Nge hna anyipicine la hnaewekë celë ngöne la melene la atr. Ngacama Iesu la qaane la keresiano, nge hnei nyidrëti hna cainöje ekö qëmekene la itre joxu ka tru me qëmekene la nöj, ngo hna akötrë nyidrëti o drai palahi, nge hna thele fe troa humuthi nyidrë. Ketre tune la ang’aposetolo. Ngacama hnei angatre hna xatuane la ka alanyimu troa xötrethenge Iesu, nge ngacama hnei angatre hna cinyihane la Tusi Hmitrötre qene Heleni me kuca la nöjei huliwa ka men, ngo hna methinë angatre fe, me qanangazo angatr. Ketre tune mina fe la nöjei keresiano asë, tro la nöjei atr a goeëtili angatre ceitune me “ketre hmi hna qaja angazon e cailo fen.” (Ite Hul. 28:22) Nyipici laka hnei Iehova Akötresieti hna amamane kowe la ekalesia la aqane troa kuca la aja i nyidrë, ngo hetrenyi palahi la itre hnepe ewekë qangöne la itre Musi enehila ka ithunge gojenyi, me iqajangazo. Celëhi matre tha tro kö së a mekune ka hape troa paatre la itre ewekë cili.
4 Ame ngöne la itre macatre ne xötrei acile la keresiano, ke, nyimu aqane akötrëne hnei Satana la angetre drei Iesu. Hna silithoi angatre hnene la itre atr ka imethinë, matre troa adronyi angatre qëmeke i nöjei atr. (Ite Hul. 14:2) Hna qaja koi angatre la itre trenge ewekë ka hnyigotre matre ameijëne la itre mekune i angatr. (Ite Hul. 4:17, 18) Hna traqa koi angatre hnene la ka alanyimu matre thinge la itre që i angatre troa cainöje trootro. (Ite Hul. 19:29-34) Hna kuië angatre ngöne la itre kalabus, ngo pëkö kepin. (Ite Hul. 12:4, 5) Hna lepi angatre hnei angetre iaxösisi. (Ite Hul. 14:19) Nge hna humuthe la itre xan, ngo pëkö engazo i angatr. (Ite Hul. 7:54-60) Hna traqa koi Paulo la nöjei ewekë asë cili. (2 Kor. 11:23-27) Nge hnene la angetre icilekeu me angatre hna thele palahi la nöjei ijine ka ijije troa thinge jëne la huliwa ne cainöje trootro, me akötrëne la angetre huliwa me lapaune cili.
5 Ngöne la hneijine së, ke, ceitune palahi la aqane ujë i Satana. Nyimutre la nöjei trengathoi hna qaja, nge hna xöjetriji së ka hape hmi ka thoi, maine seket, ene lo itretre akaqan. Ame ngöne la itre xaa nöj, ke, hnei Musi hna dreuthe trije la itre itusi së me sawa laka tha tro kö a e itr’ej. Hna qaja fe laka easë a metrötrëne menune la madra. Ngöne la itre macatre 1940 koi 1945, ke, hna methinëne la itre trejine hnene la nöjei atr, pine laka tha hnei angatre fe kö hna hane thili kowe la itre darapo, matre hna qaja koi angatre la itre trenge ewekë ka sis, nge hna thë trije la itre hnalapa i angatr. Nge hna akalabusine la itre trejine ka alanyim, pine laka tha sine fe kö angatre la itre isi ne la fene hnengödrai. Nge ngöne la itre nöje hna musinëne hnei itretre musi ka iakötrë, ke, hna silithoine la itre trejine ka hape itretre pitru kowe la itre hna amekötin, matre nyimu hadredre la itre hna axösisin, me hna humuthe hnine la itre kalabus, me hnine itre göhnë ne hagëne xötreithe la ka alanyim. Tha ka hmaloi kö la itre iaxösisi cili, ngo kola amamane laka hna methinë së ngacama pëkö sipu kepine ka meköt. — Goeëne ju la itus Prédicateurs, mekene 29.
6 Nemene la mejiune së kowe la itre drai ka calemi? Ngacama hetrenyi la itre xaa ijine kola nunue la iaxösisi kowe la itre hlue i Iehova ngöne la itre xaa nöj, ngo ceitune palahi la mele i angatre ngöne la fen’asë. Tro pala kö Satana a nue koi angatre la elëhni angeic, thupene lo hna ukapië nyëne qa hnengödrai ngöne la macatre 1914. Atre hi angeice laka xoxopatre pe hi la traeme i angeic. Nge troa kökötre trootro la elëhni angeic, ke, easenyi catrë hë lo drai ne akötre atraqatr. Hawe, tro angeic’a nu’asë la trenge catre i angeice troa icilekeu memine la joxu Keriso uti hë la pun. Ngo tro angeice me itre dremoni angeic’a nue la elëhni cili kowe la itre hlue i Iehova e celë fen, itretre lapaune koi nyidrë me “drenge thenge la nöjei wathebo i Akötresie, me angetre xome la nyine anyipici Iesu Keriso.” — Hna Ama. 12:12, 17.
7 Celëhi matre loi e tro së a goe hnyawa, ngöne la aqane tro së a mejiune la itre drai ka troa xulu, ke, tha tro kö së a mekune ka hape tro Driabolo a nanazij. Ame la elëhni hnei angeice hna nuane koi së e celë fen, ke, ijije palahi tro ej’a fetra e ketre ijine ngöne ketre nöje maine ketre nöj. Nyimutre la itre nöje laka traqa ha la tingetinge troa cainöje trootro, ngo thupene itre macatre ne isine troa traqa kow, me thupene itre macatre ne xomihni. Ngo, tha ka cile huti kö la tingetinge cili, ke, ej’a të hi hune ketre atre musi ka loi thinan, maine qangöne ketre wathebo hna acile hnei itre xan, ngo itre ka troa paatre hmaca e ketre ijin. Ijije palahi troa traqa la gomegome ka asesëkötrë së, nge ka angazone la isa emeköti së itre atr troa kuca la isa hne së hna ajan.
8 Eje hi laka ame la tingetinge me loi hne së hna kapa enehila ngöne la itre xaa nöj, ke, ijije tro hmaca elanyi a paatr, matre tro hmaca la itre trejine me easë, ngöne la itre nöje cili, a xomi akötre tuune ecililo. Celëhi matre thatreine kö së troa lapa thaenije me lapa meek, me mekune ka hape ase hë ngaane la itre ithupëjia. Ame la fene ka imethinë, ke, tha asesë kö angeice nu’asë la elëhni angeic. Hna amamane palahi ngöne la wesi ula i Akötresie, laka ame la easë a easenyi kowe la pun, ke, troa elë trootro la icilekeu. Celëhi matre loi e tro së a hmeke palahi, me “inamacane tune la ite un, nge menyike tune la ite piny.” (Mata. 10:16) Loi mina fe tro së a catre uti hë la pun, nge tro së a atre laka xomihni la emele së. — Iuda 3; Mata. 24:13.
9 Ma ngöne la nöje hne së hna mele ngön, ke, tro së a mekune ka hape pëkö hatrene iangazo, pine laka kola kökötre la huliwa. Celëhi matre tha wang’atrune kö së la itre ewekë celë. Ngo loi e tro pala kö së a cile hmek, ke ijije palahi troa saze nyimenyime la itre drai. Nge tro la itre ka inuetrije a thele kepine iajolë. Tro mina fe la itre atrene hmi ka methinë së a qejeqeje së koi itre joxu me nöjei atr, ke, angatr’a xouene la hmi së. Nge ame fe la itre mekune së troa xupi uma ne Baselaia, ke, troa wenemejelëne hnene la itretre hnalapa xötreithi së. Hetre itre zonale fe ka iqajangazo, kola xöjetriji së. Nge ame la easë a cainöje trootro, ke, kola xelemadrei së, ke, hetre itre atr ka mama ngöne la nöje ka hamë ithahnata nyine adrone la huliwa së qëmeke i nöjei atr. Nge tro fe la itre sipu sine së a wesitre me qaja angazo së. Celëhi itre kepine matre tro së a lapa hmeke palahi, ke, ka catre la imethinë ne la fene hnengödrai, nge tro palakö ej’a fetra hmaca ngöne la itre drai.
10 Nemene la thangane la itre ewekë cili? Troa ketr la mekune së me aqane goeëne së la itre drai ka troa xulu. Kola hape hapeu? Kola hape ijije tro së a hnengazo me xouene la itre ewekë ka troa traqa koi së. Ngo hapeu, tro hë së a tro wemetre ngöne laka kola ha ngönengöne hnene la itre xan? ijije kö tro së a jolëne la kola xöjetrije menu së? Tro kö a la itre iangazo, ngacama catrehnin, a ajolë së troa nyihlue i Iehova? Lueluëne kö së laka troa hetre pune la itre ewekë celë? Ohea, epi tha tro jë kö a eje lai. Pine nemene?
11 Epi tha tro jë kö së a thëthëhmine laka ame la maca hne së hna qaja trongën, ke, tha qa the së kö, ngo qa thei Iehova. (Iere. 1:9) Hawe, loi e tro së a tro atre la hna qaja ka hape: “hënejë la atesiwa i nyidë, amamanejë thene la ite nöje la ite huliwa i nyidë (...) e cailo fene asë.” (Isa. 12:4, 5) Hetre kepine matre nyidrëti a xomihnine la kola akötrëne la itre hlue i nyidrë, ke, matre troa “hlemu la ëje i nyidrë e cailo fene asë.” (Eso. 9:16) Easë a kuca la huliwa hna amekötine hnei Iehova, hawe, nyidrëti hmekuje hi la ka atreine troa hamë së la trenge catre ka tru matre troa ewekë. (Ite Hul. 4:29-31) Celëhi huliwa lai ka nyipiewekë, ka hetre thangane ka loi, nge nyimenyime la nyine troa kuca ngöne la itre drai tixenuëne ne la itre musi enehila.
12 Ame la wangatrehmekune cili, ke, tro ej’a hamë së la ixatua troa cile catre koi Satana me kowe la fen. (1 Pet. 5:8, 9) Ketre, hetre “catre së me iahlë”, ke, Iehova la enexöle së, atre troa xometrije qa the së la xou qëmekene la itre ithupëjia. (Deut. 31:6; Heb. 13:6) Nge loi e tro palahi së a thina ka menyik, me inamacan, me hetre wangatrehmekune ngöne la easë a ixelë me itretre iaxouny, ngo tro mina fe së a amamane hnyawa laka ame la götrane la hmi, ke, easë a pane “drenge thenge Akötresie hune la at.” (Ite Hul. 5:29) Nge maine ijije tro së a qaja la mejiune së ngöne la ijine cili, ke, the hnöthe kö troa ithahnata. (1 Pet. 3:15) Ngo ame pe, ke, tha tro kö a aluzi traeme troa isi ithahnata me itre ka catreqë ka thele hmekuje hi troa jelengazo së. Nyipiewekë troa “nue angat” hune la troa wesitr, maine itëkeune la hnei angatre hna iqajangazo. — Mata. 15:14.
13 Easë a amadrinë Iehova la easë a cilecatre ngöne la itupath. (1 Pet. 2:19) Nemene la thupene koi së? Hapeu, pë hë madrine së pine laka kola methinë së me icilekeu me easë? Pëkö! Ase hë Iehova qaja laka tro nyidrëti a nyi thangane la drenge thenge së hnei “madrine me thingeting.” (Rom. 15:13) Ngacama hnei Iesu ekö hna thue la akötre ka tru, ngo hnei nyidrë hna xomihni qangöne la “madrine hna amë xajawa i nyidrë.” (Heb. 12:2) Ceitune hi lai me easë. Qangöne laka easë a xomihnine la nöjei itupathi ka akötre koi së, ngo tusi a upi së troa “madrine me aciacin.” (Mata. 5:11, 12) Nge ngacama jole la itre drai celë koi së, ngo ame la madrine cili, ke, nyine atrunyi Iehova ngöne la easë a tro fë la maca ne la Baselaia.
14 Ngo hapeu, hetre kepine kö matre tro së a lueluëne maine xouene la pune la itre ewekë celë? Ohea, ame la pune la icilekeu ne la organizasio i Iehova kowe la fene hnengödrai i Satana, ke ase hë ekö amekötin. (1 Ioane 2:15-17) Ngacama catrehnine la itre ithupëjia, ngo tro Iehova a kuca matre tro kö së a catre hune itr’ej. (Isa. 54:17; Rom. 8:31, 37) Celëhi matre pëkö ca ewekë ka troa ajolë së troa kapa la thupen, pine laka cile catre kö së ngöne la itupath. Ketre, thatreine kö së troa “kukehnine la ketre ewekë,” ke, tro Iehova a hamë së la tingetinge lo hne së hna xëwe fë ngöne la itre thith. — Fil. 4:6, 7.
15 Celëhi matre easë a ole palahi koi Iehova, la easë a drenge la itre maca, kola qaja la itre trejine hna nue hmaca troa cainöje trootro ngöne la itre nöje hna thinge ekö. Easë a madrine la itre ewekë ka hnyipixe, kola traqa matre fepi la qëhnelö kowe la itre thauzane ka alanyim, matre tro angatre a hane ixelë memine la ithuemacanyine la Baselaia. Easë a olene la hnei Iehova hna acatrenyi së qëmekene la itre ithupëjia ka elëhni së. Nge nyipici laka tro nyidrëti a amanathithine me akökötrene la huliwa së ngöne la itre götrane ka ijij, matre troa draië la uma i nyidrë, me hmi i nyidrë ka nyipici, nge matre troa lö kow, hnene la “nöjei ewekë lo hna ajane” ngöne la nöjei nöj. — Hag. 2:7; Isa. 2:2-4.
16 Ngo ngöne la ketre götran, ke, loi e tro së a atre laka tru pala kö la menene la ithupëjia me easë, ene Satana, nge tro angeic’a icilekeu me easë uti hë la pun. Lue pengöne aqane isi angeic: troa isi amamany, maine troa menyike thoi me iaö. Ijije troa hetre jole ngöne la itre nöje hne së hna mekune laka tingetinge hë ekö. Troa hetrenyi palahi la itre atr ka atreine thele iangazo me ka pë ihnim, matre troa qanangazo së menu. Ngo ame la pun, ke, troa mama laka angatr’a “isi me Akötesie”, nge tro nyidrëti a apatrenyi angatr. (Ite Hul. 5:38, 39; 2 Thes. 1:6-9) Ngo eje hi laka, ngacama tru la itre ewekë hne së hna troa xomihnin, ngo tro së a cile huti ngöne la nyipici, me nyihlue i Iehova, me cainöjëne la maca ne la Baselaia. Easë la nöje ka lolo me ka madrine ngöne la huneihnadro celë, ke atre hë së laka ‘thupene la itupath, ke, tro së a hetrenyi la korona ne mel.’ — Iako. 1:12.