Isa Ini Tus—Ketre Götrane Ka Sisitria
1 Nemene la ka nyipiewekë koi së? Tro së a akötrehnin, me nyihnyawaane palahi la aqane tro së a mele koi Iehova. Ijiji së tro së a qale catre koi Iehova qa ngöne la hne së hna isa ini tus. Ame qa the së enehila, ala xalaithe hi angetre thele troa amë hnyawa la ketre ijine göi troa lapa mekune la itre ewekë hna inin. Ejehi laka, e maine tha tro hë së a e lapaane la Tusi Hmitrötr, , canga saqe së hi nanazij, nge pë hë trenge catre së troa icilekeu memine la itre mekune ne la fen, me itre aja i ngönetrei.
2 Catrë Jë Ajane La Wesi Ula: Ame la easë a nyiqaane atre la itre trepene mekune i Akötresie, easë fe hi lai a canga ajane troa hetrenyi la atrehmekun’atrun. Ngo, e qea ha, ke, maine jë, tro ha paatre trootro la aja kowe la itre ewekë ne la ua. Hawe, loi e eje the së la “ajane” la xeni ne la ua. (1 Pet. 2:2) Nemene la aqane tro së a akökötrene la aja celë?
3 Hna amejëne la trenge pi xeni së hnene la hna drenge la punepune ne la itre xeni ka loi aja së. Hawe, ka ceitune lai memine la itre ewekë ne la ua laka hna amejëne hnene la itre hnepe ijine easë a isa ini tus. Nyipici laka, lolo la ehnyapane la itre xeni ne la ua, ke, aja së troa sine thele catrëne la itre nyipici. Ame la madrine hna kapa qa ngöne la atrehmekun, ke, kola xatua së catre troa sinethele palahi la wesi ula i Iehova.
4 Loi e Majemi Epuni Kowe La Ketre Porogarame Ka Loi: Ame itre xan, ke, angatr’a isa ini tusi ngöne la heji ka pexej, ame itre xane ka ini lapa, ngo tha qea pe. E epuni a mekune laka hmaloi koi epuni troa ini e hmahmakany, ke, maine jë ka loi la tro epuni a axeciëne troa ini qëmekene troa iji kofi. E maine loi koi epuni e hej, ke, ijije tro epuni a iëne la troa kuca, maine qëmekene troa meköl. Qanyine kö la isa ijine ka loi koi së, ame la ka nyipiewekë, ke, troa kuca lapaan, nge tro epuni a trongëne hnyawaane la porogarame ka ihmeku memine la hnei epuni hë hna axeciëne ka ijij.
5 Ame ngöne la kola thuecatre koi së troa eatrëne la itre ijine ini, maine jë saqe së qaja ka hape pexeje hë la porogarame së. Ngo ame pe, isa qanyi së thawa hnyawa la itre ewekë ka ijije troa kuca ngöne la traeme ka eje the së. Tuneka lo itre hawa së ka nyimutre, tha hna thapa kö o drai hnene la televizio? Hetrenyi kö the së la ajane troa hujëne la itre sipu aja së matre hetre ijine së troa isa ini? Qa ngöne la hna pane mekune la aqane huliwaane la trame së, easë a öhne laka hetre ijine së, e nöjei drai, troa isa ini tus.—Efe. 5:15, 16.
6 Tro së a nyipiine catrëne la ini Tusi Hmitrötr. Tha tro kö a tru la thangane ka loi hne së hna kapa qa ngön, e easë a tupathe troa kuca la ketre jole la ijine cili. E maine hne së hna majemine troa ini ngöne la easë a xen, maine ngöne la easë a drei poos, maine ngöne la easë a wai televizio, ke, tha ijiji së kö troa trotrohnine la itre mekune hne së hna tupathe troa atrepengön. (1 Tim. 4:15) Hawe, loi e tro së a nuetrije la itre qeqene iajolë.—Goeëne ju la itus Manuel pour l’école, götrane 32-3.
7 Nyipiewekë catre troa ini, me trongëne la itre eamo hna hamëne hnene la Tusi Hmitrötr, e nöjei drai, pine laka jëne tro Iehova hi lai a eatrongë së. Loi e aliene la mele i epuni la tro la nyipici a jilapaane la hni epun. Thupëne jë la nöjei ijine matre troa e, me ini, me waipengöne la itre mekune ne la ua, ngacama tha tru kö hnei traeme së.—Deut. 6:6-8; Kol. 1:9, 10.