Hane Kö Epuni Thawa Hnyawa La Wesiula i Akötresie?
1 Pëkö atr ka atreine ini tui Iesu Keriso. Atreine catre nyidrë troa ithahnata me kuca matre troa ketr la hni ne la itre atr, me enijëne la itre aliene hni angatr, me iupi troa kuca la itre huliwa ka loi. (Mata. 7:28, 29) Hnei nyidrëti palahi hna nyitrepene la ini, hnene la wesiula i Akötresie. (Luka 24:44, 45) Hnei nyidrë hna amamane fe ka hape, qa thei Iehova la nöjei ewekë hnei nyidrë hna atre, ketre tune mina fe la atreine i nyidrë troa hamëne la ini. (Ioane 7:16) Nyidrë a hamëne la ketre tulu ka sisitria kowe la itretre drei nyidrë, ngöne la aqane troa thawa hnyawa la wesiula i Akötresie.—2 Tim. 2:15.
2 Hnei Paulo aposetolo fe hna hane amamane laka, ketre ka atreine fe angeice huliwane hnyawa la wesiula i Akötresie. Thaa hnei angeice hmekuje kö hna e la itre mekene tusi kowe la itre xaa atr; hnei angeice fe hna qejepengöne me thele mekune hune la hnei angeice hna e, me anyipicine jëne la wesiula i Akötresie laka, Iesu hi la Keriso. (Ite Huliwa 17:2-4) Ketre tui Apolose mina fe, angeice la ketre atre drenge ekö ka “atreine inamacanëne la itre hna cinyihan,” nge angeice a fe amamane hnyawa itre ej, jëne la ketre aqane tro fë la nyipici ka hetre thangane catr.—Ite Huliwa 18:24, 28.
3 Loi e Itre Ka Inine Së La Wesiula i Akötresie: Atraqatre la madrine ne la itretre cainöjëne la baselaia ne la hnedrai së enehila, hnene laka, hetre thangane catre la hnei angatre hna inine la itre atr ka hni ka menyik; angatre a fe la Tusi hmitrötre me wai mekune jëne ej. Hna kuca tune hnene la ketre trejine trahmanyi ngöne la angeice a ithahnatane la tusi Ezekiela 18:4 me itre xaa xötre ju kö, matre troa qejepengöne kowe la ketre hnamiatr me köni sine hmi nyidrë, la pengöne elanyi la itre atr ka ngazo me ka meköt thupene la mec. Ame hë la pune lai, hetrenyi la itre atrene la hmi ka nyiqaane etid, nge caasi qa thei angatr, a ka nyiqaane kapa la nyipici. Ketre, hnene la ketre söre hna thele troa sa la hnyinge ne la ketre trahmanyi ka icilekeu memine la föe i nyidrë ka drei eahlo, ngöne la kepine matre, thaa hane fe kö la itretre anyipici Iehova atrune la Noel memine la itre aniveresere ne la drai ne hnahon. Kola aejëne la itre mekune hnene la trahmany, pine laka, hnei söre hna xome mekötine la itre xötre qa hnine la itus Comment raisonner. Haawe, atraqatre pi hë la madrine ne la föe i nyidrë kowe la itre mekune hna hamën, celë hi matre eahlo a qaja ju ka hape: “Tro fe hë nyiho kowe la itre hnei epuni hna icasikeu.” Ketre thaa qeje jole kö trahmany.
4 Huliwane Jë La Ixatua Hna Hamën: Kola hamë së me xatua së hnyawa troa tro fë la wesiula i Akötresie, hnene la Huliwa ne Baselaia me porogarame göi icasikeu ne cainöje trootro. Nyimutre la itretre cainöje ka madrine la emanane la itre pengöne aqane troa trofë ithahnata hna hamëne me amacaane thatraqai së. Itre eje a amamane hnyawa fe laka, hmekune hi la itre aja ne la itre atr, nge ka troa hetre thangane fe koi angatr. Hetrenyi e hnine la itus, Comment raisonner à partir des Écritures la itre mekune göi aqane troa qeje pengöne hnyawa la 70 nge sin lao mekune ka tru, hna ithahnatane hnene la wesiula i Akötresie. Kola hamëne fe e hnine la itus La Connaissance qui mène a la vie éternelle, la itre ini hna nyitrepene hnei Tusi Hmitrötr ka thaa jole kö nge ka nyipiewekë troa trotrohnine hnyawa hnene la itre ka xötrei ini. Kola amamai së fe hnene la itre ini 24 me 25 ngöne la itus Manuel pour l’École du ministère théocratique la aqane tro la ka ini a maca, göi troa nyiqaane ithahnata me e, me qejepengöne la itre mekene tus. Loi e tro asë hi së a huliwane hnyawa la itre ixatua celë, ka troa hamë thangane ka lolo catre koi së.
5 Maine tro së a thawa hnyawa la wesiula i Akötresie, tro hë së a öhne laka, ame eje ke, ka “mele nge ka men . . . nge ate mekötine la ite mekune me ite aja ne la hni” ne la itre hne së hna cainöje kow. (Heb. 4:12) Tro la madrine ka tru së kowe la wesiula i Akötresie a upi së troa catre qaja pala hi la nyipici!—Ite Huliwa 4:31.