Tro Drei a Kapa La Maca Së?

¹ Thaa hna öhne kö ekö ngöne la mele ne la atr, la aqane manane la itre ithuemacanyi tune enehila, nge nyimutre catre la itre ka pëkö hnënyengön, nge ka hetre pune ka ngazo. Celë hi matre, troa jole koi së troa hane cainöjëne la maca ka loi ne la baselaia i Akötresie, qa ngöne laka, pë hë ihneimeke i angatre hnene la wenge maca. Thaa öhne hë angatre la eloine kowe la mele i angatr, la troa drenge la wesiula i Akötresie.​—Luka 11:28.

² Easë a madrine laka, ngöne la nyimu götrane la fen, alanyimu catre la itre atr, itre thauzane pala hi la etrun, angetre hane drenge la maca cili me ajane troa hane etid. Ngo ame pena ha ngöne la itre xaa nöj, jole e troa öhne la itre atr hne së hna iöhnyi hë memin, pine laka, paatre kö angatre ngöne la easë a traqa troa iwai hmaca.

³ Loi e tro së a thupën, wanga nanazije pi së. Hnei Paulo hna qejepengöne ka hape: “ ‘Ke tro ha mele angat’asë angete hëne la atesiwa i Joxu.’ Tro angate a hë nyidëti tune ka . . . lo hnei angate hna tha deng? Nge tro angate a denge tune ka nge pëkö ate cainöj? . . . Tune la hna cinyihane ka hape: ‘Lolopi hë la ite lue ca i angete amamane la evangelia ne la ite ewekë ka loi!’ ” (Rom. 10:13-15) Maine hne së hna catre jume trongëne pala hi la itre itine la Baselaia, tro hë Akötresie a aciane itre eje e kuhu hni ne la itre atr ka hni ka menyik.​—1 Kor. 3:6.

⁴ Tro Pala Hi a Iwai Hmaca, Celë Hi Kii: Maine hne së hna amë, maine thaa hna ami itusi pena, ame la nyipi ewekë ke, ene la tro së a thele troa akökötrene la aja ne la itre atr hne së hna öhn. Hnauëne laka, canga uthi he ju hi me mekune ka hape, pëkö thangane hna troa kapa? Ngöne la easë a jume la itre itine feja, thatre kö së la göhnë gaa loi hnene la itine feja hna troa cia ngön. (Ate Cai. 11:6) Maine hne së hna hnëkëne hnyawa ngöne la easë a bëek, la ketre mekune qa hnine la Tusi Hmitrötr, ngacama thaa tru kö la hne së hna troa qaja, ngo atreine hi troa ketr la hni ne la atr. Ijije hi tro së a amë pe la ketre tarak, maine itre zonale ka hnyipixe. Atreine fe tro së a amamane e thupen, la aqane troa inine la Tusi Hmitrötr. Tro hë së a öhne me madrine la aqane amanathithine Iehova la trengecatre hne së hna kuca.​—Sal. 126:5, 6.

⁵ Hna kapa la caa tarake hnene la ketre föe ka pi hane drenge la maca ka loi. Paatre pi kö eahlo ngöne la hnalapa uti hë la kola öhnyi eahlo thupene la lue treu, nge tru catre hmaca pena ha hnei jole i eahlo, matre pëkö ijine troa ithahnata. Eahlo a kapa hmaca ju la tarake ka ceitune memine lo hnapan. Thupene la köni treu ne thele la atre cainöje troa wai eahlo ngöne la hnalapa, kola traqa öhnyi eahlo a ka wezipo. Hna iwai hmaca ju hnene la trejine föe ngöne la wiike thupen, nge e cili, hna nyiqaane ithahnatane lo lai tarak. Ame hë ngöne la kola bëeke hmaca la ketre wiik, hnene la föe hna amamane la hni ne ajane i eahlo troa drenge la maca ne la Baselaia. Hnene la itre ewekë ka traqa ngöne la mele i eahlo hna amejëne la ajane i eahlo kowe la itre ewekë ne la ua. Ame hna nyiqaane ju la etid, nge atraqatre la madrine i eahlo toa inine la Tusi Hmitrötre ngöne la nöjei wiike e thupen.

⁶ Tune la nöjei ewekë hne së hna ajane troa cia hnyawa, maine itre engen, itre feja, maine hni ka ajane kowe la maca ne Baselaia, nyipi ewekë catre tro së a eëne hnyawa me nyihnyawane itre ej. Loi e troa hetre traeme thatraqane lai, troa hnëkë hnyawa, troa hnengazone la huliwa, me troa catre ngo thaa tro kö a nuetrije la huliwa. Ngöne lo macatre hnapan, hna sasaithe la theri hadredre thauzane lao atr ka xome la bapataiso, itre atr lai ka nue la itre itine feje ne la baselaia troa cia ngöne la itre hni angatr! Maine tro së a catre cainöj, troa nyimutre catre hnei atr ka troa drenge la maca hne së hna tro fë.​—Wange ju la Galatia 6:9.