U sa waka a den bakaman fu Yesesi baka te lanti wani u tapu anga a peleikiwooko. U sa biibi taki Yehofa o yeepi u fu du a peleikiwooko. Neen meke i mu begi Yehofa fu a gii deki-ati anga koni. Akisi en tu fu a yeepi i fu holidoo te sani e miti i. A omen sani e miti u. Kande u siki, kande we booko wi ede anga sani tumisi, kande wan sama di u lobi dede, kande wi abi polobelema aini a osufamii, kande sama e libi ogii anga u, efuso wan taa polobelema. Te yu abi den sowtu polobelema ya, sani e kon moo ogii te siki paati a hii goontapu efuso te feti e feti na a pisi pe we tan. Neen meke i mu e taigi Yehofa san de a yu ati. Leti enke fai be o taigi wan bun mati fii fa ye fii, a so i sa taigi Yehofa fa ye fii tu. I sa biibi taki aw yeepi i (Ps. 37:3, 5). Te we begi naamo, a sani ya o yeepi u fu ‘holidoo te tesi e miti u’ (Rom. 12:12). Yehofa sabi sai miti den sama di e dini en. ‘Ai yee te den e bali kai en fu a yeepi den.’​—Ps. 145:18, 19. w23.05 5-6 ¶12-15

Te u de fu du wan gaan sani, u mu meke moiti fu sabi ‘san Yehofa wani’, daw du sani enke fa a wani (Efe. 5:17). Te we meke moiti fu sabi sowtu tekisi e taki fu a sani di u wani du, we soi taki u wani du sani enke fa Gadu wani. Efu u fusutan san Gadu wani u du, neen u du sani na a fasi de, sani o waka bun anga u. ‘A feyanti fu u ‘a ogiiwan’, wani we du den sani fu a goontapu ya te, daw naabi ten moo fu wooko gi Gadu (1 Yoh. 5:19). Wan Kelesten sa bigin booko en ede anga sani enke gudu, wooko, efuso sikoo te, da a naabi ten moo fu wooko gi Yehofa. Efu a sani ya e miti wan Kelesten, da a sani ya e soi taki a bigin denki enke den sama fu a goontapu. A tuu taki aa fowtu fu du den sani ya, ma den á mu de den moo pelensipali giw. w24.03 24 ¶16-17

A tekisi ya taki 2 pelensipali sani: (1) Wan leti-ati sama lai polobelema. (2) Yehofa e yeepi wi anga den polobelema fu u. Fa Yehofa e yeepi u? Wan fasi fa ai du a sani ya, a di ai yeepi u fu si den sani di e pasa nownow enke fa ai si den. Yehofa paamisi u taki wo piisii te we dini en, ma aa taigi u taki sani naw miti wi aini a ten ya (Yes. 66:14). Ai gi u taanga-sikin fu poti pakisei na a ten di ala den sani di a paamisi o kon tuu (2 Kor. 4:16-18). Ala dei ai yeepi u fu tan dini en (Tyali 3:22-24). San u sa leli fu sama di be e dini Yehofa a fositen anga a ten fu u ya? Son yuu sani e miti u di wa be denki, ma efu we fitoow Yehofa, noiti aw gwe fika u.​—Ps. 55:22. w23.04 14-15 ¶3-4