Meke moiti fu begi moo bun

1. San Yehofa wani den sama di e dini en du? (Luku a fowtow tu.)

SAMA u mu go te we fii booko-saka efuso te u wani sabi saw mu du? Ala u sabi a piki fu a akisi ya. U sa begi Yehofa. Neenseefi taigi u taki u sa begi en. A wani u ‘begi en naamo’ (1 Tes. 5:17). U sa taki anga Yehofa ala yuu fu a yeepi u fu du sani anga koni (Odo 3:5, 6). Yehofa a wan Gadu di lobi gi sama sani, neen meke a taigi u taki u sa begi en naamo.

2. San wo luku aini a artikel ya?

² Ai bigi giw taki u sa taki anga Yehofa. Ma na ala yuu we abi sani fu du. Neen meke a ná ala yuu we poi fende ten fu begi. Kande wo si tu taki u mu meke moiti fu begi moo bun. Ma Beibel e giw taanga-sikin taki wa mu weli fu begi. Ai soi u tu faw mu begi. Aini a artikel ya, wo si faw sa meke ten fu begi te wo ondoosuku a libi fu Yesesi. Wo taki fu feifi sani tu di o yeepi u fu begi moo bun.

YESESI BE E MEKE TEN FU BEGI

3. San Yesesi be sabi fu begi?

³ Yesesi be sabi taki den begi fu u pelensipali gi Yehofa. Fosi a be kon a goontapu a be e si fa en Dda be e aliki den begi fu den sama di be e dini en aini a ten di pasa. Yesesi be si fa Yehofa be piki den begi fu Hana, David, Eliya, anga omen taa sama di be e dini en anga den hii ati (1 Sam. 1:10, 11, 20; 1 Kow. 19:4-6; Ps. 32:5). A fu di Yesesi sabi taki en Dda e piki begi, meke a leli den bakaman fi en taki den mu e begi naamo.​—Mat. 7:7-11.

4. San we leli te we luku a fasi fa Yesesi be e begi?

⁴ Den bakaman fu Yesesi be sa waka neen baka te den luku a fasi fa a be e begi. A ten di a be e du a peleikiwooko, na ala yuu a be e begi. A be mu e meke ten fu du a sani ya, bika na ala yuu a be e abi sani fu du. Boiti dati, a omen sama be e de makandaa anga en (Malik. 6:31, 45, 46). A be lobi opo fuuku mmanten fu de en wawan fu begi (Malik. 1:35). Wan leisi di a be mu teke wan pelensipali bosoloiti, a wan hii neti a begi (Luk. 6:12, 13). Aa be makiliki gi Yesesi a neti fosi a dede. Neen meke a begi Yehofa omen leisi a neti de fu a yeepi en fu kaba a wooko di a be gi en.​—Mat. 26:39, 42, 44.

5. Faw sa waka a Yesesi baka te we begi?

⁵ A fasi fa Yesesi be e begi e leli u taki winsi u lai sani fu du, toku u mu e meke ten fu begi. Leti enke Yesesi, kande i sa begi a neti te a peesi koo efuso fuuku mmanten te tyaipi sama á weki ete. Efu we du den sani ya, da we soi Yehofa taki we teke a kado di a giw fu bigi. Wan sisa den e kai Lynne e membee ete fa a be doo en ati a fosi leisi di a kon sabi taki u sa begi Yehofa. A taki: ‘Di mi leli taki mi sa taki anga Yehofa ala yuu, a sani ya yeepi mi fu si en enke mi tuutuu mati. A yeepi mi tu fu meke moiti fu begi moo bun.’ Leti enke a sisa ya, a so useefi e fii tu. Kow luku feifi pelensipali sani dii mu taki te ye begi.

FEIFI PELENSIPALI SANI DII MU TAKI TE YE BEGI

6. Enke fa Openbaring 4:10, 11 e soi, da san Yehofa abi a leti fu fende?

⁶ Gafa Yehofa. Aini wan fisyun, apostel Yohanisi si 24 owluman a hemel e dini Yehofa. Den be e gafa Gadu. Den be e taki ‘a yu fiti fu fende gaandi, anga gafa anga makiti’. (Leisi Openbaring 4:10, 11.) Den engel di e dini Yehofa anga den hii ati sabi taki na ala yuu den mu e gafa en. A den anga Yehofa e tan a hemel, neen meke den sabi en bun. Den e si den manii fi en te den e luku den sani di ai du. Te den luku a fasi fa Yehofa e du sani, da den á poi tan den á gafa en.​—Yopu 38:4-7.

7. Fu san u sa gafa Yehofa?

⁷ Useefi wani gafa Yehofa tu te we begi. U sa taigi en den sani fi en di u lobi. Te ye leisi efuso sutudeli Beibel, meke moiti fu si sowtu manii fu Yehofa i moo lobi (Yopu 37:23; Rom. 11:33). Bakadati, taigi Yehofa fa den manii fi en ya e meke i fii. U sa gafa en fu a fasi fa ai yeepi u. U sa gafa en tu fu a fasi fa ai yeepi den baala anga sisa fu u. Na ala yuu Yehofa e poti pakisei a wi. Ai kibii wi tu.​—1 Sam. 1:27; 2:1, 2.

8. San a wantu sani di u sa gi Yehofa daa fu den? (1 Tesalonikasama 5:18)

⁸ Gi Yehofa daa. A omen sani de di u sa gi Yehofa daa fu den. (Leisi 1 Tesalonikasama 5:18.) U sa gi en daa fu ala den bun sani di wi abi, bika neen e gi wi ala den sani ya (Yak. 1:17). U sa gi en daa fu a fasi fa a meke a goontapu, anga ala den taa sani di a meke. Boiti dati, u sa gi en daa fu a libi di a giw, den mati fu u, den famii fu u, anga a howpu di wi abi. U mu e gi en daa tu fu a gaandi di a giw fu wi anga en de mati.

9. Saide u mu e meke moiti fu teke den sani di Yehofa e du giw fu bigi?

⁹ We libi aini wan goontapu pe sama á sabi kiyoo. Gaanse sama e meke moiti fu fende moo sani. Den nai tifeedi anga san den abi. Neen meke son yuu a bunbun moiti useefi mu meke fu si san Yehofa e du giw. Efu u waka a den sama fu a goontapu ya baka, da a soso akisi wo go e akisi Yehofa sani. U naw go e gi en daa. Neen meke efu wa wani a sani ya miti u, u mu e meke moiti ala yuu fu si fa Yehofa e yeepi u, daw gi en daa fu ala den sani di ai du giw.​—Luk. 6:45.

10. Fa a poti di wan sisa be e poti pakisei a den bun sani di Yehofa e du gi en yeepi en fu holidoo? (Luku a fowtow tu.)

¹⁰ Te we teke sani fu bigi, a sani ya o yeepi u fu holidoo te tesi e miti u. Luku a toli fu wan sisa den e kai Kyung-sook, aini A Wakititolen fu 15 yanuari 2015. Dataa be taigi a sisa ya taki a abi kanker neen fokofoko. A taki: ‘A tesi ya be taanga gi mi tuutuu. Mi be e fii enke mi lasi ala sani. Mi be e feele te.’ San yeepi a sisa ya fu holidoo? A taki ala neti fosi a go didon, a be e subi go na a daki fi en osu, da a be e begi taanga. A be e gi Yehofa daa fu feifi sani di a du gi en a dei de. A sani ya be e yeepi en fu aa booko en ede moo. A be e taigi Yehofa tu taki a lobi en. Boiti dati, a kon si fa Yehofa e yeepi den sama di e dini en te sani e miti den. A kon si tu taki den bun sani di Yehofa e du giw, ipi moo den tesi di e miti u. Leti enke a sisa ya, a omen sani de di u sa gi Yehofa daa fu den winsi tesi e miti u. Te we teke den sani di Yehofa e du giw fu bigi, a sani ya o yeepi u fu holidoo. Aw yeepi u tu fu we piisii ala yuu.

11. Saide den bakaman fu Yesesi be abi deki-ati fanowdu baka di a go a hemel?

¹¹ Begi Yehofa fu a gii deki-ati te ye du a peleikiwooko. Fosi Yesesi be go a hemel a be taigi den bakaman fi en taki den mu de en kotoigi a ‘Yelusalem, Yudeya anga Samaliya te doo den moo faawe peesi a goontapu’ (Toli 1:8; Luk. 24:46-48). Aa langa bakadati, neen den keliki fesiman kisi apostel Peitilisi anga Yohanisi tyai go na a Sanhedrin. Den bali den taki efu den á tapu anga a peleiki di den e peleiki, sani naw waka bun gi den (Toli 4:18, 21). San Peitilisi anga Yohanisi du?

12. Enke fa Toli fu den apostel 4:29, 31 e soi, da san den bakaman fu Yesesi du?

¹² Di den Dyu keliki fesiman taigi Peitilisi anga Yohanisi taki den á mu peleiki moo, den piki den taki: ‘A useefi mu luku efu Gadu fende en bun taki wi aliki u pe fu wi aliki en. Ma wi á poi tapu fu taki fu den sani di u si anga den sani di u yee’ (Toli 4:19, 20). Baka di den losi Peitilisi anga Yohanisi, den bakaman fu Yesesi begi Yehofa fu a yeepi den fu den du a wani fi en. Den taigi en taki: ‘Gaantangi yeepi den saafu fii fu den á feele te den e paati a wowtu fii.’ Yehofa aliki a begi fu den.​—Leisi Toli fu den apostel 4:29, 31.

13. San a toli fu baala Jin-hyuk e leli u?

¹³ U sa waka a den bakaman fu Yesesi baka te lanti wani u tapu anga a peleikiwooko. Luku a toli fu wan baala den e kai Jin-hyuk. Den be sooto a baala ya fu di aa be wani go a suudati. Di a be de a sitaafu-osu den be gi en a faantiwowtu fu solugu wantu sitaafu man di wawan be de aini wan kambaa. Den be taigi en taki aa mu taki anga den fu nawan taa sani, a fu den sani di den be abi fanowdu namo a be mu taki anga den. Dati wani taki aa be mu taki anga den fu a Beibel. Ma a begi Yehofa fu gi en deki-ati anga koni fu peleiki a iniiwan okasi (Toli 5:29). A baala ya taki: ‘Yehofa aliki a begi fu mi, bika a be gi mi deki-ati anga koni fu sutudeli anga den sitaafuman ya aini feifi miniti, leti na a doomofu fu a pikin kambaa fu den. Neti da mi be e sikiifi biifi gi den sitaafuman, da mi be e gi den den biifi a taa dei.’ Leti enke a baala ya, useefi sa begi Yehofa fu a giw deki-ati anga koni. U sa biibi taki Yehofa o yeepi u fu du a peleikiwooko.

14. Saw yeepi u fu holidoo te sani e miti u? (Psalm 37:3, 5)

¹⁴ Akisi Yehofa fu a yeepi i fu holidoo te sani e miti i. A omen sani e miti u. Kande u siki, kande we booko wi ede anga sani tumisi, kande wan sama di u lobi dede, kande wi abi polobelema aini a osufamii, kande sama e libi ogii anga u, efuso wan taa polobelema. Te yu abi den sowtu polobelema ya, sani e kon moo ogii te siki paati a hii goontapu efuso te feti e feti na a pisi pe we tan. Neen meke i mu e taigi Yehofa san de a yu ati. Leti enke fai be o taigi wan bun mati fii fa ye fii, a so i sa taigi Yehofa fa ye fii tu. I sa biibi taki aw yeepi i.​—Leisi Psalm 37:3, 5.

15. Gi wan toli di e soi fa begi e yeepi u fu ‘holidoo te tesi e miti u’.

¹⁵ Te we begi naamo, a sani ya o yeepi u fu ‘holidoo te tesi e miti u’ (Rom. 12:12). Yehofa sabi sai miti den sama di e dini en. ‘Ai yee te den e bali kai en fu a yeepi den’ (Ps. 145:18, 19). Wan pionili sisa den e kai Kristie be kon si taki a sani ya a tuu. A sisa ya abi 29 yali. A be bigin siki wanboowanboo. A sani ya meke a be e kusumi te, neen a daai toon siki gi en. Bakaten dataa si wan takuu siki neen mma di be o meke a dede bakaten. Kristie taki: ‘Mi be e begi Yehofa fu a gi mi deki-ati anga kaakiti fu pasa ibii dei. Mi be e meke moiti fu go a den komakandaa ala yuu. Mi be e sutudeli anga miseefi tu. A begi yeepi mi fu pasa den tesi di miti mi. Mi be sabi taki noiti Yehofa o gwe fika mi. A sabi di mi be sabi a sani ya be e yeepi mi fu holidoo. Winsi fa Yehofa á be puu den polobelema fu mi, toku mi be sabi taki ai aliki den begi fu mi, bika a be e yeepi mi fu mia booko mi ede so moo. Mi be poi piisii baka.’ Ala yuu i mu holi a pakisei taki ‘Yehofa sabi fa fu yeepi den sama di e dini en anga den hii ati te tesi e miti den’.​—2 Peit. 2:9.

16. Saide u mu begi Yehofa fu a yeepi u fu wa du sani di aa lobi?

¹⁶ Akisi Yehofa fu a yeepi i te ye fii fu du sani di aa lobi. Fu di wi abi sondu, meke na ala yuu we fii fu du sani di á bun. Saatan e du ala san a poi fu meke a moo taanga giw fu du san Yehofa wani. A omen felon abi hululibi aini. Tyobo sani de aini buku anga den poku di sama e singi tu. Den sani ya sa fuu u pakisei anga sani di á bun. Te den sowtu sani ya lai aini u pakisei, te fii denki a sa meke u du wan gaan sondu.​—Malik. 7:21-23; Yak. 1:14, 15.

17. Saw mu du baka te u begi Yehofa fu a yeepi u fu wa du sani di aa lobi? (Luku a fowtow tu.)

¹⁷ Te we fii fu du wan sani di á bun, da u mu begi Yehofa fu a yeepi u. Di Yesesi be e leli den bakaman fi en fu begi, a be taigi den taki den mu akisi Yehofa taki: ‘Yeepi u fu wa sondu te tesi e miti u, kibii u fu Didibii á fende u kisi’ (Mat. 6:13). Yehofa wani yeepi u, ma a wi mu akisi en fu a yeepi u. Te u begi kaba, u mu du sani di e soi taki u wani Yehofa yeepi u. U mu meke moiti fu u nai leisi, luku, efuso aliki sani di o meke u bigin denki enke den sama fu a goontapu fu Saatan (Ps. 97:10). U mu meke moiti fu fuu u pakisei anga bun sani tu. Te we leisi efuso sutudeli Beibel, a sani ya o yeepi u fu denki enke fa Yehofa e denki. Den komakandaa anga a peleikiwooko e yeepi u tu fu a goontapu fu Saatan á poli a denki fu u. Boiti dati, Yehofa paamisi u taki a naw meke tesi miti u di a sabi taki u naw poi tyai.​—1 Kor. 10:12, 13.

18. Te a abi fu du anga begi, da san ala u mu e du?

¹⁸ Ala wi abi fu begi Yehofa moo enke faw be gwenti fu a yeepi u fu pasa den lasiti dei ya. Sani e kon moo ogii dei fu dei, neen meke u mu abi wan yuu di we taki bunbun fasi anga Yehofa. Yehofa wani u ‘puu ala san de a wi ati taigi en’ (Ps. 62:8). U mu e gafa en. U mu e gi en daa fu ala den sani di ai du giw. Akisi en fu a yeepi i fu abi deki-ati te ye du a peleikiwooko. Begi en fu a yeepi i anga iniiwan booko-ede di yu abi. Akisi en fu a yeepi i tu fi ya du sani di aa lobi te tesi e miti i. Ya mu meke nawan sani efuso nawan sama, tapu i fu begi Yehofa ala dei. Ma fa Yehofa e piki den begi fu u? Wo luku a pelensipali toli ya aini a taa artikel.