Yuli

Yesesi be e waka na a hii kondee e du bun gi sama. A be e deesi ala sama di Didibii be e fooseli, bika Gadu be de anga en. Te we luku den wonduu di Yesesi be e du, we si kiin taki a abi denseefi manii fi en Dda (Yoh. 14:9). San u sa leli fu den wonduu di Yesesi be e du? A fosi sani: Ná pikin lobi Yesesi anga en Dda lobi u. Di Yesesi be de a goontapu, a be e soi taki a lobi sama, bika a be e koboloiki a makiti fi en fu yeepi den sama di e pina. Wan leisi, tu beendiman be bali begi Yesesi fu a yeepi den (Mat. 20:30-34). ‘Tyali fu den man ya be kisi Yesesi’ neen meke a yeepi den. A Giiki wowtu ‘tyali’ wani taki wan sama e fii gi wan taawan tuutuu. A sani di Yesesi du ya e soi taki a be lobi sama. A be e gi den sama di angii be e kii nyanyan. A be e deesi den sama di be abi gwasi tu (Mat. 15:32; Malik. 1:41). U sa biibi taki Yehofa a Gadu di ‘abi tyali-ati’ anga en Manpikin lobi u tuutuu. Ai du den ogii te den si fa we pina (Luk. 1:78; 1 Peit. 5:7). Neen meke den o puu ala den polobelema di e miti u. w23.04 3 ¶4-5

U mu meke moiti fu u nai leisi, luku, efuso aliki sani di o meke u bigin denki enke den sama fu a goontapu fu Saatan. U mu meke moiti fu fuu u pakisei anga bun sani tu. Te we leisi efuso sutudeli Beibel, a sani ya o yeepi u fu denki enke fa Yehofa e denki. Den komakandaa anga a peleikiwooko e yeepi u tu fu a goontapu fu Saatan á poli a denki fu u. Boiti dati, Yehofa paamisi u taki a naw meke tesi miti u di a sabi taki u naw poi tyai (1 Kor. 10:12, 13). Ala wi abi fu begi Yehofa moo enke faw be gwenti fu a yeepi u fu pasa den lasiti dei ya. Sani e kon moo ogii dei fu dei, neen meke u mu abi wan yuu di we taki bunbun fasi anga Yehofa. Yehofa wani u ‘puu ala san de a wi ati taigi en’ (Ps. 62:8). U mu e gafa en. U mu e gi en daa fu ala den sani di ai du giw. Akisi en fu a yeepi i fu abi deki-ati te ye du a peleikiwooko. Begi en fu a yeepi i anga iniiwan booko-ede di yu abi. Akisi en fu a yeepi i tu fi ya du sani di aa lobi te tesi e miti i. Ya mu meke nawan sani efuso nawan sama, tapu i fu begi Yehofa ala dei. w23.05 7 ¶17-18

Saide we go a komakandaa? A fosi sani, a fu di u wani gafa Yehofa (Ps. 26:12; 111: 1). Te we go a den komakandaa, we gi den baala anga sisa fu u taanga-sikin tu, winsi fa a ten e kon moo taanga namo (1 Tes. 5:11). Te we gi piki a den komakandaa, we gafa Yehofa, ma we gi den baala anga sisa fu u taanga-sikin tu. Ma tu sani de di sa meke a taanga gi u fu gi piki a den komakandaa: (1) Te we feele fu gi piki. (2) Te u wani gi piki, ma u nai fende a okasi fu gi piki. San u sa du te a sani ya e pasa? A apostel Pawlesi be taki u mu meke moiti fu ‘gi useefi taanga-sikin’. U mu holi a pakisei taki den piki fu u e gi den baala anga sisa taanga-sikin. Efu u holi a sani ya a pakisei, u naw feele fu gi piki. Winsi wa fende a okasi fu gi piki, tokuso u sa piisii, bika taa sama fende a okasi.​—1 Peit. 3:8. w23.04 20 ¶1-3

Wan basiya bali! Den Dyu di be de a katibo a Babilon 70 yali langa be sa daai go a den kondee baka (Esra 1:2-4). A Yehofa namo be sa du sowan sani. Bika te Babilon be kisi sama tyai gwe enke katiboman, den á be e fika den fu daai go a den kondee baka (Yes. 14:4, 17). Ma wan taa kondee be teke Babilon abaa. A nyun tiiman ya taigi den Dyu taki den sa daai go a den kondee baka. Di a basiya ya bali, ala den osufamii edeman be abi fu luku san den osufamii be o du. Den be mu luku efu den be o daai go a den kondee baka efuso den be o tan a Babilon. A sani ya a ná be wan makiliki sani. Son wan fu den Dyu be gaandi, neen meke den á be poi waka a langa pasi. Taawan a Babilon den be meke, den á be sabi nawan taa peesi. Den be e si Islayeli enke a kondee fu den gaansama fu den. Boiti dati, son wan fu den Dyu di be de a Babilon be kon gudu. Neen meke a be musu taanga gi den fu fika a switi libi di den be abi a Babilon, fu go tan a wan peesi di den á be gwenti. w23.05 14 ¶1-2

A Wowtu fu Gadu e giw taanga-sikin fu holidoo, fu abi tyali-ati, anga fu soi lobi. Lukasi 21:19 e taki: ‘Efu u holidoo, wo fende libi.’ Kolosesama 3:12 e taki: ‘U mu wei tyali-ati enke wan koosi aw sikin.’ 1 Tesalonikasama 4:9, 10 e taki: ‘Gadu seefi soi u taki u mu lobi useefi. . . . Baala we giw taanga-sikin fu meke moiti fu soi taki u lobi den moo faw be lobi den kaba.’ Den tekisi ya be sikiifi gi Kelesten di be e holidoo kaba. Den Kelesten ya be abi tyali-ati, den be e soi lobi tu. Ma den be mu tan meke moiti fu soi den manii ya. Na aseefi sani ya u mu du tu. Fu man abi den manii ya, luku fa den fosi Kelesten be e soi den manii ya. Yo si tu fai sa waka a den baka fu de seekaseeka gi a gaan banowtu. Te a gaan banowtu o doo, yo man holidoo fu dii be e holidoo kaba aini a ten di pasa. w23.07 3 ¶4, 8

Winsi u de aini a kulu fu den salufu Kelesten efuso aini a kulu fu den sama di o tan a goontapu ya, ala wi abi fu meke moiti fu tan na a pasi ya, bika a so wo man dini Yehofa aini a ten ya te enke u fende den wini di a Kownukondee fi en o tyai gi libisama (Yoh. 10:16). Fanafu a yali 1919, a omen miliyun sama komoto aini a Gaan Babilon. A Gaan Babilon na ala den falisi keliki di de a goontapu. Den sama di komoto aini bigin waka ‘a Pasi fu Santafasi’. Di den Dyu komoto a Babilon Yehofa solugu taki nawan sani á tapu den fu doo pe den be e go (Yes. 57:14). Ma fa a de anga a ‘Pasi fu Santafasi’ aini a ten ya? Omen ondoo yali fosi a yali 1919, Yehofa be teke wantu man di be e lesipeki en fu yeepi sama fu komoto aini a Gaan Babilon. (Luku Yesaya 40:3 tu) A wooko di den man ya be du, be o opo a pasi gi den sama di e lesipeki Gadu fu komoto aini den falisi keliki. Den sama ya be o dini Gadu makandaa anga den sama di e du sani enke fa a wani. w23.05 15-16 ¶8-9

Yehofa wani u dini en anga u hii ati. A wani we piisii te we wooko gi en (2 Kor. 9:7). Kow taki u poti wan maiki di u wani doo, ma u nai fii fu meke moiti fu doo a maiki ya. I si enke u mu dwengi useefi fu doo en? Luku a toli fu apostel Pawlesi. A be taki: ‘Mi e naki mi sikin anga kofu, mi e basi en enke wan saafu’ (1 Kor. 9:25-27). Pawlesi be e dwengi enseefi fu du san bun, winsi a ná ala yuu a be e fii fu du son sani. Yehofa be e piisii anga den sani di Pawlesi be e du gi en? Eeye. A pai en fu a fasi fa a wooko taanga gi en (2 Tim. 4:7, 8). Yehofa e piisii te a si fa ye meke moiti fu doo den maiki fii winsi aa makiliki. A sabi taki son wan fu den maiki di u wani doo, a ná fu di u lobi den meke we poti den. Ma a fu di u lobi en. Leti enke fa Yehofa be belesi Pawlesi, a so aw belesi i tu (Ps. 126:5). Te ye si fa Yehofa e belesi i, a sani ya o gii taanga-sikin. w23.05 29 ¶9-10

Pawlesi e maiki den sama di naw pasa a dei fu Yehofa anga wan sama di e siibi. Wan sama di e siibi á sabi sai pasa neen lontu. Aa poi sabi on lati a de tu. Boiti dati, aa poi du nawan sani, bika ai siibi. A so omen sama e siibi aini a ten ya (Rom. 11:8). Den nai biibi den polofeititoli di e soi taki aini den ‘lasiti dei’ we libi. Den nai biibi taki dyonson a gaan banowtu o kon tu (2 Peit. 3:3, 4). Ma u sabi taki a kaba e koosube namo, neen meke Beibel e taigi u taki u mu de na ain (1 Tes. 5:6). Wa mu buuya. U mu de na ain tu. Saide u mu du den sani ya? Bika den sani ya o yeepi u fu wa mumui anga politiki. Te dyugudyugu de aini a kondee pe we tan, u naw teke se. O moo a dei fu Yehofa e koosube, o moo sama o wani dwengi u fu teke se. Ma aa de fu u feele. A santa yeye poi yeepi u fu wa buuya. A poi yeepi u tu fu du sani anga koni.​—Luk. 12:11, 12. w23.06 10 ¶6-7

San ye pakisei tei yee a nen Simson? Kande ye denki taki a man ya be taanga. A tuu. Ma Simson be du sani tu di be tyai takuu bakapisi gi en. Winsi fa sani be waka so, toku Yehofa be poti pakisei na ala den sani di Simson be du fu dini en. Gadu be meke sama sikiifi den toli fu Simson aini Beibel fu di a be e dini en anga en hii ati. A du a sani ya fu u sa leli wan sani fu Simson. Yehofa be koboloiki Simson fu yeepi den Islayelisama, a foluku fi en. Omen ondoo yali baka di Simson dede, Yehofa meke apostel Pawlesi sikiifi a nen fu Simson tu enke wan fu den sama di biibi be taanga (Heb. 11:32-34). A toli fu Simson e gi u taanga-sikin, bika a be e fitoow Yehofa winsi fa aa be makiliki gi en. U sa leli omen sani fu Simson. w23.09 2 ¶1-2

Wan taa sani di o yeepi u fu holidoo, a te wi abi a gwenti fu e begi Yehofa. U mu e taigi en san a den booko-ede fu u (1 Tes. 5:17). A ná te wan gaan tesi miti i fosi i mu begi Yehofa, ma i mu abi a gwenti fu e begi en. Efu kande yu abi wan booko-ede efuso kande ya sabi sai mu du, i sa begi Yehofa. Te yu abi a gwenti fu begi fu pikinpikin sani, da a sani ya o meke a moo makiliki gii fu begi Yehofa te gaan sani miti i. Bika i sabi taki a naabi misi, Yehofa sabi fa aw yeepi i anga o ten aw yeepi i (Ps. 27:1, 3). Efu we holidoo nownow te tesi e miti u, aw moo makiliki giw fu pasa a gaan banowtu (Rom. 5:3). Saide u sa taki a sani ya? A omen baala anga sisa taki ala yuu te den pasa wan tesi, a sani ya e meke a moo makiliki gi den fu holidoo te wan taa tesi miti den. Te den si fa Yehofa yeepi den fu holidoo, da a sani ya e yeepi den fu moo biibi taki Yehofa o yeepi den ala yuu. A sani ya e yeepi den fu holidoo tu te wan taa tesi miti den.​—Yak. 1:2-4. w23.07 3 ¶7-8

Fu di Yehofa abi sakafasi anga tyali-ati, meke a nai suku fini tumisi. Di Yehofa be de fu poli a foto Sodom, a be soi taki a abi sakafasi. A be sende wantu engel fu go taigi Lot taki a mu lowe go a den mongo, ma a be e feele fu go anda. Neen meke a akisi den efu en anga en osufamii be sa lowe go a Sowar, wan pikin foto di Yehofa be o poli. Yehofa be sa meke Lot du san a be taigi en. Ma aa du a sani de. Ma a meke Lot go a Sowar. Aa poli a foto de moo tu (Gen. 19:18-22). Baka omen ondoo yali, Yehofa be soi tyali-ati gi den sama fu Ninifei. A sende polofeiti Yona fu go wasikoi den sama ya taki aw poli a foto ya. Di den sama fu Ninifei soi taki den sani di den be e du hati den, Yehofa soi tyali-ati gi den. Aa poli a foto ya moo.​—Yona 3:1, 10; 4:10, 11. w23.07 21 ¶5

Saw sa leli fu a toli fu Yowas? Yowas be de enke wan bon di den lutu fi en á dipi. A Yoyada be de enke a ahala di be e holi en taampu. Faisi Yoyada dede, a so Yowas kai holow. A sani ya e soi u kiin taki, wa mu e du enke we lesipeki Yehofa fu di u famii efuso wan baala efuso sisa e lesipeki en. Efu wa wani u biibi swaki, u mu meke moiti fu wi anga Yehofa toon bun mati. U mu meke moiti tu fu moo lesipeki en. Neen meke u mu e sutudeli, daw teke ten pakisei saw leli. U mu e begi ala yuu tu (Yel. 17:7, 8; Kol. 2:6, 7). Yehofa nai akisi u fu du omen sani. Peleikiman 12:13 e soi san Yehofa wani u du. Ai taki: ‘Lesipeki a tuu Gadu, du san den weiti fi en taki, bika a fu dati a meke u.’ Te we lesipeki Gadu, da winsi sai pasa, u naw gwe fika en. Nawan sani o poi poli wi anga Yehofa. w23.06 19 ¶17-19

Vers 5 e bigin so: ‘A Sama di be sidon na a Kownusutuu taki’ (Openb. 21:5a). Den wowtu ya e soi taki a Yehofa seefi e taki ya. Den wowtu ya pelensipali, bika a dii peesi aini Openbaring we leisi san Yehofa seefi taki. Yehofa á meke wan engel taigi u den sani ya. Aa meke Yesesi taigi u tu, ma neenseefi mofu taki den. Den sani ya e soi taki u sa biibi taki den sani di a taki o pasa tuu, bika Yehofa ‘á poi lei’ (Tit. 1:2). Den wowtu ya e soi taki den sani di sikiifi a Openbaring 21:5, 6 o kon tuu, a naabi misi. Luku san a wowtu ‘luku!’ wani taki. Den koboloiki a Giiki wowtu ‘luku!’ omen leisi aini a buku Openbaring. San Gadu taki baka di a taki a wowtu ‘luku’? A taki: ‘Mi e meke ala sani kon nyun.’ A Yehofa e taki fa sani o waka aini a ten di e kon. A sabi taki aw meke ala den paamisi ya kon tuu enke fa a taki, bika ala yuu ai du san a taki. Neen meke a taki enke den sani ya pasa kaba.​—Yes. 46:10. w23.11 3-4 ¶7-8

Apostel Peitilisi be mu feti anga den swakifasi fi en. Wan leisi di Yesesi be taki a be o pina te enke a dede enke fa den polofeititoli fu Beibel be taki, Peitilisi kai en go a wanse neen a taigi en taki ‘a sani ya naw miti en seefiseefi’ (Malik. 8:31-33). Na ala yuu Peitilisi anga den taa apostel be e sitee anga denseefi sama na a moo gaan wan (Malik. 9:33, 34). A neti fosi Yesesi dede, Peitilisi ati boon te neen a koti wan man yesi puu (Yoh. 18:10). A seefi neti de, Peitilisi be feele te neen a taki dii leisi taki aa sabi en mati Yesesi (Malik. 14:66-72). Peitilisi bali kee di a kon fusutan san a du. Yesesi a daai baka gi Peitilisi di a be e fii booko saka. Di Yesesi weki baka a gi Peitilisi a okasi fu soi taki a lobi en ete. A gi Peitilisi a wooko fu luku den sikapu fu en (Yoh. 21:15-17). Peitilisi be de kabakaba fu du a wooko di Yesesi be gi en. A be de na a pinkster fesa di be holi a Yelusalem. A dei de Gadu be salufu en anga santa yeye tu. w23.09 22 ¶6-7

Peitilisi be taigi den taa owluman taki den mu ‘solugu den sikapu fu Yehofa’ (1 Peit. 5:1-4). Efu ya wan owluman, u sabi taki i lobi den baala anga sisa. U sabi taki ye meke moiti fu gi den taanga-sikin. Ma son yuu, kande ye fii enke a libi e doloki gii. Kande ye weli son yuu tu. Saw yeepi i fu tan du a wooko fii? Taigi Yehofa fa ye fii. Peitilisi sikiifi taki: ‘Efi ye yeepi taawan, i mu fitoow a kaakiti di Gadu e gi’ (1 Peit. 4:11). Den baala anga sisa lai polobelema di naw poi seeka aini a goontapu ya. Den sani ya e meke a libi e taanga gi den. Ma holi a pakisei taki Yesesi Kelestesi a gaan sikapuman fu u poi yeepi den. Ai yeepi den nownow kaba, ma aw du moo sani gi den aini a nyun goontapu. A wan kodo sani di Gadu wani owluman du, a fu lobi den baala anga sisa. Den mu gi den taanga-sikin. Boiti dati, den mu tyai denseefi bun fu den baala anga sisa man waka a den baka. w23.09 29-30 ¶13-14

U mu luku bun fu wa denki enke fa den sama di nai holi den weiti fu Yehofa e denki. Efu we si sani enke fa libisama e si den, a sani ya sa meke u daai baka gi Yehofa anga den weiti fi en (1 Kor. 3:19). ‘A koni fu a goontapu’ ya e gi sama taanga-sikin fu du sani enke fa denseefi wani. Den nai aliki Gadu. Wantu Kelesten fu Pergamum anga Tiyatira be bigin denki enke den sama aini den foto ya di be e dini falisi gadu. Den be e libi wan hululibi tu. Yesesi be puu kaasi gi den tu kemeente ya, bika den be e si taki son sama be e libi wan hululibi, ma den á be e puu den aini a kemeente (Openb. 2:14, 20). Aini a ten ya, sama sa koli u fu teke den fowtu denki fu den. Den famii fu u anga sama di u sabi, sa meke u denki taki u sa pasa den weiti fu Yehofa. Den sa meke u si enke a sani de ná ogii so. Kande den o taigi i taki aa de fii libi wan kiin libi, bika a Beibel a ná fu a ten fu u ya moo. Kande son yuu wo si enke Yehofa nai taigi u kiin faw mu du sani. A sa pasa tu taki wo wani ‘du sani di á sikiifi aini den santa buku’.​—1 Kor. 4:6. w23.07 16 ¶10-11

Maliya, a mma fu Yesesi be abi taanga-sikin fanowdu. A be kon de anga bee ma aa be toow. Aa be sabi fa a mu kiya wan pikin tu. Ma now a be o toon a mma fu a pikin di be o toon a Mesiyas. Boiti dati, aa be siibi anga man ete. A pisiten di a engel be taigi en a sani ya, Maliya be abi mofu fu toow. Fa a be o taigi Yowsefu a sani ya? (Luk. 1:26-33) Fa Maliya fende taanga-sikin ? A suku yeepi a taawan. A be akisi Gabriyel fu a taigi en moo sani fu a faantiwowtu di a be fende (Luk. 1:34). Aa langa seefi neen Maliya go ‘a wan foto di be de a den mongo mindii’ fu Yuda fu go luku wan famii fi en den e kai Elisabet. Elisabet gafa Maliya neen a taki wan polofeititoli fu a pikin di Maliya be o meke. A sani di a be taki be gi Maliya taanga-sikin (Luk. 1:39-45). Maliya taki ‘Yehofa du omen gaan sani anga a makiti fi en’ (Luk. 1:46-51). Yehofa be meke Gabriyel anga Elisabet gi Maliya taanga-sikin. w23.10 14-15 ¶10-12

A wan kulu Kelesten namo salufu anga santa yeye. Den sama ya toon Gadu manpikin. Den 144.000 salufuwan o tii makandaa anga Yesesi enke pilisite a hemel (Openb. 14:1). A Santa Peesi fu a tabernakel e soi taki Gadu teke den salufu Kelesten enke en manpikin, winsi fa den de a goontapu ete (Rom. 8:15-17). A Moo Santa Peesi fu a tabernakel wani taki hemel pe Yehofa e tan. ‘A gaiden’ di e paati a Santa Peesi anga a Moo Santa Peesi e soi go na a sikin fu Yesesi. Fu di Yesesi be abi wan libisama sikin ete, meke aa be poi go a hemel fu tii enke Gaan Pilisite aini a ageisi tempel. Di Yesesi gi en sikin enke wan ofaandi gi libisama, a opo a pasi gi ala den salufu Kelesten fu go a hemel. Denseefi mu dede fosi den o fende den pai a hemel.​—Heb. 10:19, 20; 1 Kor. 15:50. w23.10 28 ¶13

Fu di Gidiyon be sabi taki enseefi abi swakifasi, meke aa ligei di den Efrayimsama be e kuutu en (Kuut. 8:1-3). A be abi sakafasi, neen meke a aliki san den Efrayimsama be wani taki. Aa kwali anga den, ma a taki switi anga den. A fasi fa Gidiyon taki anga den meke den ati koo. Leti enke Gidiyon den owluman e aliki bun. Den ati nai boon te taawan e kuutu den tu (Yak. 3:13). Te owluman e du sani na a fasi ya, a kemeente o poi libi na a wan. Di Gidiyon wini den Midiyansama, sama be bigin gafa en. Ma a soi den taki a Yehofa den mu gafa (Kuut. 8:22, 23). Fa owluman sa waka a Gidiyon baka te sama e gafa den? Den sa gafa Yehofa fu den sani di ai yeepi den fu du (1 Kor. 4:6, 7). Kow taki sama e gafa wan owluman fu a fasi fa ai gi leli, a sa soi den taki den leli ya komoto aini a Wowtu fu Gadu. A sa soi den tu taki na a olikanisâsi fu Yehofa e giw den moin leli ya. Son yuu owluman mu luku bun efu a fasi fa den e gi leli nai meke sama poti pakisei a den tumisi, bika a Yehofa sama mu gafa. w23.06 4 ¶7-8

Efu Yehofa nai piki den begi fu u, da u mu akisi useefi taki: ‘A fu a moo bun sani mi e begi?’ Son yuu we si enke u sabi san moo bun gi useefi. Ma Kande a sani di we begi Yehofa naw tyai wini giw tuutuu. Efu we begi Yehofa fu wan polobelema di wi abi, a bun fu u holi a pakisei taki wan moo bun fasi de fu losi a polobelema moo enke san useefi e denki. Boiti dati, son sani di we akisi Yehofa nai kai anga a wani fi en (1 Yoh. 5:14). Luku a toli fu wan dda anga wan mma di e begi Yehofa fu a yeepi a pikin fu den fu tan a waaleiti. Aa fowtu efu wan sama e begi Yehofa a sani ya. Ma u mu holi a pakisei taki Yehofa nai dwengi u fu dini en. A wani useefi luku efu wo dini en. A wani den pikin fu useefi luku efu den o dini en tu (Deit. 10:12, 13; 30:19, 20). Neen meke a mma anga dda ya sa begi Yehofa fu a yeepi den fu doo a pikin fu den ati te den o taki anga en. Bika a sani ya sa yeepi a pikin fu kon lobi Yehofa anga fu toon en mati.​—Odo 22:6; Efe. 6:4. w23.11 21 ¶5; 23 ¶12

Saide a toosutu di we toosutu u baala anga sisa, a wan fasi fa we soi taki u lobi den? Wan buku taki a wowtu ‘toosutu’ di Pawlesi koboloiki ya wani taki, ‘i taampu a wan sama se fu gi en taanga-sikin fu di wan gaan sani miti en’. Te we yeepi wan baala efuso sisa fu holidoo winsi sai miti en, da a sani ya o yeepi en fu tan dini Yehofa. Ala yuu te we giw baala anga sisa taanga-sikin we soi taki u lobi den (2 Kor. 7:6, 7, 13). A te ye fii gi wan sama fosi yo man gi en taanga-sikin. Saide u sa taki a sani ya? Efu we fii gi wan sama, wo wani gi en taanga-sikin te wan sani miti en. Wo wani du wan sani fu yeepi en tu. Pawlesi be taki a fu di Yehofa e fii giw meke ai toosutu u. Pawlesi kai Yehofa ‘a Dda di abi tyali-ati, a Gadu di e toosutu sama’.​—2 Kor. 1:3. w23.11 9-10 ¶8-10

Ala sama di e dini Yehofa poi holidoo te tesi e miti den. Pakisei den sani di Pawlesi be taigi den Kelesten fu Tesalonika. A be taigi den taki: ‘Di u be de makandaa anga u, u be taigi u a fesi taki u be o nyan pina. Na a sani ya pasa tu’ (1 Tes. 3:4). A sikiifi gi den Kelesten fu Korente tu taki: ‘Baala, u wani u sabi sowtu tesi miti u . . . A be ibi giw te, u denki taki u be o dede’ (2 Kor. 1:8; 11:23-27). A omen sowtu tesi e miti wi enke Kelesten tu (2 Tim. 3:12). Fu di ye meke moiti fu waka a Yesesi baka, meke kande i mati efuso i famii e libi ogii anga i. Kande i basi efuso den sama a wookope e soso i fu di ye taki a tuu (Heb. 13:18). Efuso, kande lanti á wani i peleiki gi taa sama. Pawlesi taki winsi sowtu tesi e miti u, toku u poi piisii. w23.12 10-11 ¶9-10

A omen sani be miti Yakopu, ma winsi fa den sani ya be e miti en, toku a be e holidoo. Simeyon anga Leifi, tu fu den boi fu Yakopu, du wan ogii di gi a famii polinen. A sani di den du poli Yehofa nen tu. Wan taa gaan ogii di miti Yakopu, a di Lakeli, a uman fi en di a be moo lobi kon dede baka di a meke a lasiti boi fi en. Boiti dati, fu di wan gaan angiiten be de aini a kondee meke Yakopu be abi fu foloisi go a Egepte winsi fa a be gaandi kaba (Gen. 35:16-19; 37:28; 45:9-11, 28). Winsi fa omen sani be e miti Yakopu, toku a be e fitoow Yehofa. A be sabi taki aw du den sani di a paamisi en. Ala yuu Yehofa be e soi Yakopu taki a lobi en. Winsi fa Laban be e libi ogii anga en, toku Yehofa be e belesi en anga tyaipi gudu. A be musu bigi gi en tu taki Yehofa be meke a si Yowsefu baka, bika a omen yali langa a be denki taki Yowsefu dede. Fu di Yakopu anga Yehofa a be tuutuu mati, meke a be poi holidoo di tesi be e miti en (Gen. 30:43; 32:9, 10; 46:28-30). Efu useefi e meke moiti fu wi anga Yehofa toon moo bun mati, wo poi holidoo tu te sani e miti u di wa be denki. w23.04 15 ¶6-7

Psalm 23, David e taki fa ai fii taki Yehofa lobi en. En anga Yehofa a be bun mati. Neen meke a be kai en mi Sikapuman. David be e piisii te Yehofa be e soi en fa a mu du sani. A be e fitoow en anga en hii ati tu. A be sabi taki solanga a de a libi Yehofa o tan lobi en. Saide David be e biibi taki Yehofa lobi en? David be sabi taki Yehofa be e booko en ede anga en, bika na ala yuu a be e yeepi en fu fende den sani di a abi fanowdu. A sabi taki Yehofa neen mati. A be sabi tu taki Yehofa e piisii anga en. Neen meke winsi san be o miti en aini a ten di e kon, a be sabi taki aw yeepi en. Fu di David be e biibi taki Yehofa lobi en, meke aa be e booko en ede. A be e piisii tuutuu.​—Ps. 16:11. w24.01 29 ¶12-13

Fanafu Du Fu Tu Goontapu feti, a foluku fu Yehofa fende a okasi fu peleiki aini omen kondee sondee fu sama tapu den. A omen sama kon sabi Yehofa. Nownow na ala se fu goontapu a foluku fi en e peleiki. Den baala di e tii a wooko e du sani enke fa Yesesi wani. Fosi den akisi den baala anga sisa fu du wan sani, den e luku efu Yehofa anga Yesesi e holibaka gi a sani di den wani du. Bakaten den e meke den kelen-owluman anga den owluman taigi a kemeente san den mu du. Owluman di salufu de a ‘Gadu leti-ana (Openb. 2:1). Den owluman a sondu sama, neen meke denseefi e meke fowtu. Son yuu Mosesi anga Yowsuwa be e meke fowtu tu. Den apostel seefi be e meke fowtu (Num. 20:12; Yow. 9:14, 15; Rom. 3:23). Toku we si kiin taki a Yesesi e soi den baala di e tii a wooko anga den owluman fa den mu du sani. Aw tan du a sani ya. A sani ya e soi taki u sa fitoow den baala di e teke fesi. w24.02 23-24 ¶13-14

Aini a ten ya, we meke Yehofa piisii te we leli taawan sani fi en. Te we taki anga den, we soi taki ai bigi giw taki wi anga en a mati. We soi tu taki u lobi en tuutuu. Te u de aini a peleikiwooko, a maiki fu u a fu yeepi sama fu toon Yehofa mati. U wani den lobi Yehofa enke faw lobi en (Yak. 4:8). We fii bun te we leli sama taki Yehofa a wan Gadu di lobi sama, ai du sani a wan letifasi, a koni, a taanga tu. Beibel e taki fu omen taa manii di Yehofa abi ete. Wan taa fasi fa we gafa a nen fu Yehofa a te we meke moiti fu waka neen baka. Efu we du a sani ya, sama o si taki wi anga den sama fu a goontapu a ná aseefi. Kande den o akisi denseefi saide u de taa fasi (Mat. 5:14-16). Te u miti den sama ya, we abi a okasi fu soi den saide u de taa fasi. A sani ya sa meke a sama wani kon sabi moo sani fu a Gadu fu u. Te we gafa Yehofa a den fasi ya, ná pikin piisii ai piisii.​—1 Tim. 2:3, 4. w24.02 10 ¶7

Efii wani toon wan sama di e du sani enke Yesesi, i mu sabi son sani aini a libi. Den sani ya o yeepi i fu tyai gaan faantiwowtu aini a kemeente. Den o yeepi i fu wooko solugu iseefi anga yu osufamii. Den sani ya o yeepi i tu fu de wan bun osufamii edeman. I mu meke moiti fu leisi bun, i mu sabi sikiifi tu. Beibel taki efu wan sama wani piisii, efu a wani en libi waka bun, a mu e meke moiti fu leisi Beibel ala dei. A mu e sidon pakisei san a leisi tu (Ps. 1:1-3). Te ye leisi Beibel ala dei ye kon sabi fa Yehofa e denki. A sani ya o yeepi i fu denki bun sani. Aw yeepi i tu fu denki bun fosi i du wan sani (Odo 1:3, 4). Den baala anga sisa abi baala fanowdu di o man yeepi den fu fusutan san Beibel e taki. Tei sabi sikiifi anga leisi bun, a sani ya o yeepi i fu man holi lezing di o gi taawan taanga-sikin. Yo man gi piki tu di e gi taawan taanga-sikin. Yo man sikiifi sani di i sa koboloiki fu taanga a biibi fi yu anga taawan. w23.12 26-27 ¶9-11

Te ye feele, pakisei san Yehofa o du aini a ten di e kon te Saatan naw de moo. Na a konkelesi di be holi aini 2014, den baala be pee wan dalaama fu soi fa wan dda e taki anga en osufamii fa den sani di sikiifi a 2 Timotiyesi 3:1-5, be o sikiifi efu a tekisi ya be e taki fu fa a libi o de aini a paladeisi. A taki: ‘A so a libi o de aini a nyun goontapu. Sama o lobi denseefi, den o lobi a tuu, den o sabi san den poi du anga san den á poi du, den o abi sakafasi, den o gafa Gadu, den o aliki den mma anga den dda, den o sabi kiyoo, den naw gwe fika taawan, den o lobi den osufamii, den o meke kuudei, den o taki bun fu taawan ala yuu, den o man dwengi denseefi, den o abi switifasi, den o lobi bun sani, sama o fitoow den, den naw du san denseefi wani, den naw abi heimembee, den o lobi Gadu moo piisii, den o dini Gadu anga den hii ati. Anga den sowtu sama ya i mu e paa.’ Yu anga yu osufamii efuso den baala anga sisa e taki fa a libi o de aini a nyun goontapu? w24.01 6 ¶13-14

Beibel taki: ‘Yehofa e piisii anga a foluku fi en.’ Te u pakisei a sani ya, ná pikin piisii we piisii (Ps. 149:4). Ma son yuu te we fii booko-saka, da kande we taki: ‘Mi sabi taki Yehofa e piisii anga a foluku fi en, ma ai piisii anga mi?’ A omen sama aini a ten fu Beibel be mu feti anga a fii taki Yehofa nai piisii anga den (1 Sam. 1:6-10; Yopu 29:2, 4; Ps. 51:11). Beibel e soi u kiin taki sondu libisama poi meke Yehofa piisii. Fa den sa du a sani ya? Den mu soi taki den e biibi aini Yesesi. Den mu dopu tu enke wan bakaman fu Yesesi (Yoh. 3:16). Te u dopu, we soi ala sama taki den sondu di u be du fosi e hati u. We soi tu taki u naw du den sani de moo. Boiti dati, we soi taki u paamisi Yehofa taki wo libi enke fa a wani (Toli 2:38; 3:19). Yehofa e piisii te we du den sani ya, bika na a sani ya e meke wi anga en toon mati. Efu u tan meke moiti fu du saw paamisi Yehofa, aw piisii anga u. Aw si wi enke en mati tu.​—Ps. 25:14. w24.03 26 ¶1-2

U sa waka a den bakaman fu Yesesi baka te lanti wani u tapu anga a peleikiwooko. U sa biibi taki Yehofa o yeepi u fu du a peleikiwooko. Neen meke i mu begi Yehofa fu a gii deki-ati anga koni. Akisi en tu fu a yeepi i fu holidoo te sani e miti i. A omen sani e miti u. Kande u siki, kande we booko wi ede anga sani tumisi, kande wan sama di u lobi dede, kande wi abi polobelema aini a osufamii, kande sama e libi ogii anga u, efuso wan taa polobelema. Te yu abi den sowtu polobelema ya, sani e kon moo ogii te siki paati a hii goontapu efuso te feti e feti na a pisi pe we tan. Neen meke i mu e taigi Yehofa san de a yu ati. Leti enke fai be o taigi wan bun mati fii fa ye fii, a so i sa taigi Yehofa fa ye fii tu. I sa biibi taki aw yeepi i (Ps. 37:3, 5). Te we begi naamo, a sani ya o yeepi u fu ‘holidoo te tesi e miti u’ (Rom. 12:12). Yehofa sabi sai miti den sama di e dini en. ‘Ai yee te den e bali kai en fu a yeepi den.’​—Ps. 145:18, 19. w23.05 5-6 ¶12-15

Te u de fu du wan gaan sani, u mu meke moiti fu sabi ‘san Yehofa wani’, daw du sani enke fa a wani (Efe. 5:17). Te we meke moiti fu sabi sowtu tekisi e taki fu a sani di u wani du, we soi taki u wani du sani enke fa Gadu wani. Efu u fusutan san Gadu wani u du, neen u du sani na a fasi de, sani o waka bun anga u. ‘A feyanti fu u ‘a ogiiwan’, wani we du den sani fu a goontapu ya te, daw naabi ten moo fu wooko gi Gadu (1 Yoh. 5:19). Wan Kelesten sa bigin booko en ede anga sani enke gudu, wooko, efuso sikoo te, da a naabi ten moo fu wooko gi Yehofa. Efu a sani ya e miti wan Kelesten, da a sani ya e soi taki a bigin denki enke den sama fu a goontapu. A tuu taki aa fowtu fu du den sani ya, ma den á mu de den moo pelensipali giw. w24.03 24 ¶16-17