Mo̱ o ta o bia nika e?

Njika pat’a ebamban mot’a Etiopia a tano̱ a bolane̱ ponda Filipo a sisedino̱ mo̱ be̱be̱ e?

EYALA Bibe̱l e timbise̱le̱no̱ ná “ebamban” ye ná e pula kwala to̱ njika pat’a ebamban. (Bebolo 8:28, 29, 38) Nde e me̱ne̱ne̱ biana ebamban mot’a Etiopia a tano̱ a bolane̱ e ta e kola buka tet’a ebamban a bila to̱ bebamban ba tano̱ ba bolane̱ ońola pembisan. Jombweye njo̱m iwo̱ ońola nje di makwalano̱ nika.

Nu mot’a Etiopia a ta nde muboled’a go̱bina nunde̱ne̱ ńena nu ta nu wa o lo̱ndo̱ l’etum. A ta nde “soele̱ na muboled’a janea ńa Kandake, ńango a mundi ńa Etiopia, mombwed’a bema bao be̱se̱.” (Bebolo 8:27) Etiopia ńa kwaṅ e ta e bambe̱ ekombo a Sudan ńa we̱nge̱ na mikondo ma Egipto. To̱ná yen ebe nu mot’a Etiopia a si bolane̱no̱ mulemlem ma ebamban o di lo̱ndo̱ lao le̱se̱, a ta a boṅsane̱ eyek’a masango ońola di lo̱ndo̱ la bwaba. O ebwe’a mbu yaboso, bebamban bō̱ ba tano̱ ba bolane̱ ońola ndiyo be ta be be̱ne̱ mabao mane̱i na muńua. Kalati po̱ e makwala ná: “Be bebamban be ta be bo̱bise̱ bale̱ lo̱ndo̱ ńolo ebanja be ta be be̱ne̱ wuma ba wusano̱ we̱le̱ masango jita, yen ebe be ta pe̱ be longabe̱ ńai be mawe̱lisane̱no̱ lo̱ndo̱ la bwaba.”

Mot’a Etiopia a ta nde a langa ponda Filipo a sisedino̱ mo̱ be̱be̱. Bibe̱l e makwala ná: “Na Filipo ala oten, a senga [mot’a Etiopia] a malanga muto̱ped’a mudī Yesaya.” (Bebolo 8:30) Be bebamban be si ta be po̱ngo̱be̱ ná ba duane̱ mo̱ ná pe̱le̱pe̱le̱. Nik’e ta so̱ e bola mot’a Etiopia epolo o langa na bo̱bise̱ la ńolo, e bola pe̱ Filipo ńena nu ta nu dangwa na myende epolo o damea y’ebamban.

Mot’a Etiopia “a so̱so̱me̱ye̱ Filipo ná ondeye, a je na mo̱.” (Bebolo 8:31) Baduane̱ bebamban ba pembisan ba ta nde ba te̱me̱ omo̱ń. Nde ebamban yena ba tano̱ ba bolane̱ ońola ndiyo mo̱ e ta e be̱ne̱ bejedi, ońola mot’a Etiopia na Filipo.

Di se̱medi te̱ o nje Bibe̱l e makwalano̱ o Bebolo bepasi 8, na o kalat’a myango, e te̱nge̱n ná min mimbu mi tombi kalat’asu i lee̱ mot’a Etiopia a jai o ebamban ye bonde̱ne̱ buka ebamban a bila to̱ ye ba tano̱ ba bolane̱ ońola pembisan.