I ka kɛ koow kɛbaga dubaden ye
1 Yesu tun y’a fɔ ko wagati min na a be yen, mɔgɔ caamanba tun ‘tɛna kɔrɔsili kɛ’ i n’a fɔ Nuhun tile la (Mat. 24:37-39). O kama i be taga a sɔrɔ, mɔgɔ caaman tɛna Masaya kibaro duman lamɛn. Mun lo be se k’an dɛmɛ ka ɲagali mara an dusu la waajuli kɛtɔ?—Zab. 100:2.
2 Fɔlɔ, an ka kan k’a to an hakili la ko Ala ye cii di an ma ka waajuli kɛ. Waajuli kɛtɔ, mɔgɔ mana ban ka lamɛnni kɛ an ka jijali bɛɛ n’a ta, u banna Jehova lo la. An k’an hakili to a la ko an be Jehova dusu diya n’an be kantigiya kɛ waajuli baara la. O lo bena an dɛmɛ ka ɲagali ni lafiya mara an dusu la i ko Ala ka baarakɛbaga.—Yak. 1:25.
3 Filanan, mɔgɔw be yen hali bi minw bena sɔn Jehova ka kisili fɛɛrɛ la. Hali ni mɔgɔ caaman tɛ u mako don, o bɛɛ n’a ta, dɔw be yen i ko sagaw minw ka kan ka lajɛn sisan yɛrɛ, wagati laban tuma na. An ka kan ka to ka waajuli kɛ, an kɛtɔ ka taga “dugu o dugu la, duguba wala dugu misɛn” ka “mɔgɔ sɛbɛ ɲini.”—Mat. 10:11-13.
4 I ka to ka koow filɛ ni miiriya ɲuman ye: Ngalon diinan ka kɛwale juguw ye mɔgɔ dɔw jigi tigɛ. Dɔ wɛrɛw “sɛgɛnnen jigi tigɛlen” lo nin koow sigicogoya bolo (Mat. 9:36). I be taga a sɔrɔ caaman niin tɔɔrɔlen lo kɛnɛyako kosɔn, wala u ka baara tiɲɛna u bolo, u lafiyanen tɛ. O koo faamuyali bena an dɛmɛ ka timinandiya an ka baara la. I jija ka barow dabɔ minw ɲɛsinna kiin na mɔgɔw ka haminanko babaw ma. U dɛmɛ k’a faamuya ko Ala ka Masaya kelenpe lo ye koow ɲɛnabɔ cogo ye. I ka baara kɛ ni Bibulu ni gafew ka hakilinata tilennenw ye k’u dusukun sɔrɔ ni kibaro duman ye.—Heb. 4:12.
5 Ala ka baarakɛbaga dubadenw hakili b’a la tuma bɛɛ ko: Jehova “ye nisɔndiya min di [an] ma, o ye [an] barika ye.” (Neh. 8:10). Kuun si t’a la k’a to an ka ɲagali ka bɔsi an na. “Ni o du kɔnɔ mɔgɔw ka kan ni o hɛrɛ ye, o ka to u fɛ, nka ni u man kan n’a ye, aw ka hɛrɛ ka kɔsegin aw ma.” (Mat. 10:13). Jehova be an ka ɲagali n’an ka fanga lakuraya n’an be makɔnɔni ni muɲuli kɛ a ka baara senuman kɔnɔ. Ani a b’an duga an ka kantigiya kosɔn.