Baara kɛtɔ ni gafe Qu’enseigne la Bible ye, an ka Karamɔgɔba ladegi
1 Karamɔgɔba Yesu tun be koow ɲɛfɔ ka gwɛ cogo nɔgɔman na tuma bɛɛ. Tuma dɔw la, walisa k’a lamɛnbagaw lasun u ka miiri koo dɔ kan, a tun b’u ɲininga u ka fɛta la fɔlɔ (Mat. 17:24-27). A tun be mɔgɔw ɲɛɛ yɛlɛma ka sin Ala ka Kuma ma (Mat. 26:31; Marka 7:6). A tun b’a janto a kana a ka kalandenw sɛgɛn ni kunnafoni caaman ye kojugu sabu a tun y’a lɔn ko u ma tila kalan na (Yuh. 16:12). Yesu tun b’a fɛ k’a lɔn fana n’a ka kalandenw lanen be ale ka kalan na ani yala u b’a faamu wa (Mat. 13:51). Gafe Qu’enseigne la Bible labɛnna walisa k’an dɛmɛ an ka kalan kɛ o cogo kelen na.
2 Ɲiningali minw be kalan ladon: An mana sapitiri dɔ daminɛ ni kalanden ye, a ka ɲi an k’a hakili sama ɲiningaliw kan minw be sɔrɔ sapitiri tɔgɔ jukɔrɔ. An k’o ɲiningaliw lawuli walisa ka kalan diya don kalanden na dɔrɔn. Wala, an k’a ɲini a fɛ a k’u jaabi dɔɔni dɔrɔn. Kun t’a la ka kuma caaman kɛ a ka jaabiliw kan, wala k’a ka ngalon jaabili kelen-kelen bɛɛ latilen. An be se k’a fo dɔrɔn a ka miiriyaw la ani ka kalan daminɛ n’a ye. Kalanden b’o ɲiningaliw jaabi cogo min na, o be se k’an dɛmɛ k’a lɔn an ka ɲi k’an janto kalan yɔrɔ min na k’o ɲɛfɔ koɲuman.
3 Bibulusenw: Kalan ka kan ka basigi Bibulu lo kan (Heb. 4:12). Nka waajibi tɛ ka kalansen ka vɛrise kelen-kelen bɛɛ kalan. An ka sinsin vɛrisew kan minw b’a yira ko an ka lannakow basiginen be Bibulu kan. Vɛrise minw ɲɛsinna kunnafoni misɛnmanw ma, waajibi tɛ k’olu kalan. Gafe Qu’enseigne la Bible be tiɲɛn yira cogo nɔgɔman na. An fana kana kalan gwɛlɛya. An ka sinsin hakilinata jɔnjɔnw kan. An kana a ɲini ka kuma caaman kɛ kunnafoni misɛnw kan wala ka miiriya wɛrɛ ta ka don kalan kɔnɔ gwansan.
4 Gafe kɔnɔ kunnafoni wɛrɛw: Barokun 14 be sɔrɔ gafe ɲɛɛ 195-223 kɔnɔ ka fara sapitiriw yɛrɛ kan. Waajibi tɛ k’u lajɛ ni kalanden ye. I be se k’a latigɛ ka kalanden jija a k’o barokun dɔw lajɛ a yɛrɛ ma sanko ni kalanden yɛrɛ be sapitiri kɔnɔ koow faamu ani a be sɔn u la. Ɲɛyirali fɛ, kalan kɛtɔ sapitiri 4nan kan (“Yesu Krista ye jɔn ye?”), ni kalanden lanen b’a la ka ban ko Yesu ye Masiya ye, waajibi tɛ ka barokun wɛrɛ nin lajɛ n’a ye tugun: “Yesu Krista—Masiya layidu talen”. Nka a dɔ la, an be se ka wagati dɔ ta ka barokun wɛrɛ lajɛ wala k’a yɔrɔ dɔ lajɛ ni kalanden ye kalan kɛtɔ yɛrɛ.
5 N’an y’a latigɛ k’o kunna-foni wɛrɛ dɔ lajɛ ni kalanden ye, an be se ka kɔn ka ɲiningali dɔw labɛn ka bila, ani an be se ka dakunw lajɛ sapitiri ka kalan kɛcogo la. Walima, ka kɛɲɛ ni kalanden ka makoya ye, an be se k’a latigɛ ka miniti damaninw ta k’o kunnafoniw lajɛ n’a ye kalan kɛtuma na. O bena an dɛmɛ an k’a filɛ kalanden ye koo minw lajɛ a yɛrɛ ma ni a ye u faamu.
6 Koorilen minw kɛra segi-kanni kama: Kuma dɔw be sɔrɔ koorilen kɔnɔ sapitiri bɛɛ laban na. U be sapitiri daminɛ ka ɲiningaliw jaabi. An be se ka baara kɛ n’u ye ka segi sapitiri ka hakilinata jɔnjɔnw kan. Weleweledala dɔw y’a ye ko nafa b’a la k’o kuma kelen-kelen kalan ani k’u nɔfɛ vɛrisew kalan ni kalanden ye. O kɔ, u b’a ɲini kalanden fɛ a k’a ɲɛfɔ dɔɔni cogo min na o vɛrisew be koorilen ka kumaw kɔrɔta. O kɛcogo b’a yira karamɔgɔ la ni kalanden ye kalan ka hakilinata jɔnjɔnw faamu, a b’u ɲɛfɔ ni Bibulu ye cogo min na, ani yala a yɛrɛ be sɔn u la wa? O kɛcogo fana be kalanden degi baara kɛcogo la ni Bibulu ye walisa ka tiɲɛn ɲɛfɔ mɔgɔw ye.
7 Cii dira an ma ka mɔgɔw kalan ani k’u kɛ Krista ka kalandenw ye. O cii dafacogo bɛrɛbɛrɛ ye ka Yesu ka kalan kɛcogo degi (Mat. 28:19, 20). Gafe Qu’enseigne la Bible be se k’an dɛmɛ k’o kɛ. An ka baara ɲuman kɛ n’a ye ka mɔgɔw kalan tiɲɛn koo la cogo gwɛnen nɔgɔman na, ani cogo diiman na.
[Study Questions]
1. Yesu tun be kalan kɛ cogo di?
2. Ɲiningali minw be sapitiri kelen-kelen ka kalan ladon, an be se ka baara kɛ n’u ye cogo di?
3. An be se k’a kɛ cogo di kalan kana gwɛlɛya?
4. Kalan kɛtɔ ni kalanden ye, mun lo b’a to an be se ka kunnafoni wɛrɛ lajɛ gafe ɲɛɛ 195-223 kɔnɔ?
5. N’an y’a latigɛ ka gafe ɲɛɛ 195-223 ka kunnafoniw lajɛ ni kalanden ye, an be se k’o kɛ cogo di?
6. Koorilen min be sapitiri bɛɛ laban na, baara be kɛ n’a ye cogo di ka segikanni kɛ?
7. An be se ka baara kɛ ni gafe Qu’enseigne la Bible ye k’an ka cii dafa cogo di?