An ka mɔgɔ sifaw bɛɛ waaju

1. Mun na waajulikɛla setigiw be i n’a fɔ bololabaarakɛla ŋanaw?

¹ Bololabaarakɛla ŋana be ni minan sifa caaman ye ani a b’a lɔn cogo min na ani tuma min na u kelen kelen bɛɛ be se k’a mako ɲɛ. O cogo kelen na, an be ni gafe sifa caaman ye minw b’an dɛmɛ k’an ka waajuli baara kɛ. Ɲɛyirali fɛ, kitabunin sifa caaman sɛbɛra walisa k’an dɛmɛ ka mɔgɔ sifaw bɛɛ waaju (1 Kɔr. 9:22). U dɔw yiracogo kofɔra sɛbɛ nin kɔnɔ. U dilanna mɔgɔ sifa minw kama ani an be se k’u yira cogo min na, o fana ɲɛfɔra yen.

2. Tuma juman na an be se ka baara kɛ ni kitabuninw ye waajuli la?

² Baara kɛtuma ni kitabuninw ye: Bololabaarakɛla ŋana be baara kɛ ni minan dɔ ye tuma o tuma min na a bɛnnin lo. O cogo kelen na, n’an y’a ye ko kitabunin dɔ be se k’an lamɛnbaga nafa, an be se k’o yira a la hali n’an tɛ baara kɛra n’o ye kalo kɔnɔ. Ɲɛyirali fɛ, n’an be baara kɛra ni gafe Bibulu ka kalan ye ani an lamɛnbagaw t’u mako bɛrɛ don Bibulu koo la, n’a sɔrɔ a ka fisa ka kitabunin bɛnnin dɔ di u ma. Kɔfɛ, n’an sera ka Bibulu nege don u la, an be se ka gafe Bibulu ka kalan kofɔ u ye.

3. Mun na an ka kan ka baara kɛcogo lɔn n’an ka gafew ye?

³ Minw be se koɲuman u ka baara la, Bibulu b’olu tando (Ntal. 22:29). Siga t’a la, baara si kɔrɔtanin tɛ ka se kibaro diiman waajuli baara senuman ma bi (Rom. 15:16). N’an b’a fɛ ka kɛ baarakɛla ye ‘maloya sababu tɛ min na,’ fɔɔ an k’an jija ka baara kɛcogo lɔn n’an ka baarakɛminanw ye.—2 Tim. 2:15.