Ala teriw be juguman haramuya

Sitanɛ be mɔgɔw kɔrɔbɔ koo jugumanw kɛli fɛ. Ni mɔgɔ dɔ b’a fɛ ka kɛ Ala teri ye, Jehova be koo minw kɔniya, a tigi ka kan k’u kɔniya (Zaburuw 97:10). Ala teriw be koo minw kɔniya, o dɔw filɛ nin ye:

Cɛnimusoya jurumuw. “I kana jatɔya kɛ.” (Ekisode 20:14). Ka cɛnimusoya kɛ sanni furu ka kɛ, o fana ka jugu.—1 Kɔrɛntekaw 6:18.

Dɔlɔtɔya. “Dɔlɔtɔw . . . [tɛna] Ala ka masaya sɔrɔ.”—1 Kɔrɛntekaw 6:10.

Mɔgɔfaga, kɔnɔcɛn. “I kana mɔgɔ faga.”— Ekisode 20:13.

Sonyali. “I kana sonyali kɛ.”—Ekisode 20:15.

Nkalontigɛ. Jehova be “nɛnkun nkalontigɛla” kɔniya.—Ntalenw 6:17.

Fariya ani dusubɔli min ma kɔrɔsi. “Fariya koo ka di mɔgɔ min ye, olu ko man di [ Jehova] ye fyeu.” (Zaburuw 11:5). “Farisogo ka kɛwali [dɔ ye] . . . dusu dimi.”—Galasikaw 5:19, 20.

Sobonli. “Wasabali . . . aw ni ale kana jɛ ko si la.”—1 Kɔrɛntekaw 5:11.

Siya ni kaan kɔniyali. “Aw ka aw juguw kanu ka taga, ka delili kɛ aw kɔrɔbɔbagaw ye.”—Matiyu 5:43, 44, NW.

Ala be koo minw fɔ an ye, u ye an ɲɛta ye. A man nɔgɔ ka kojugu kɛ haramuya tuma bɛɛ la. Jehova ka dɛmɛ sababu la ani a Seerew ka dɛmɛ fɛ, koo minw ka gwo Ala ye i be se k’u kɛli haramuya.—Esayi 48:17; Filipekaw 4:13; Heburuw 10:24, 25.