Kibaro duman waajuli kɛ yɔrɔ bɛɛ

¹ Kerecɛn fɔlɔw ye kibaro duman waajuli kɛ yɔrɔ bɛɛ. U tun ka kisɛ, fɔɔ saan 30 Yesu Kirista lakununen kɔ, Masaya kibaro “fɔra sankolo jukɔrɔ dafɛn bɛɛ ye.” —Kolos. 1:23.

² Bi, Jehova ka baarakɛla kisɛmanw be o laɲinita kelen magwɛnna: ka Masaya kibaro duman lase mɔgɔ bɛɛ ma, n’a be se ka kɛ. Mun lo be se k’an dɛmɛ k’o laɲinita dafa? Mɔgɔ caaman be baara la wagati bɛɛ. Tuma caaman, an t’u sɔrɔ u ka soo waajuli kɛtɔ. N’u tɛ baara la, n’a sɔrɔ u be tagama la, u be koow ɲɛnabɔra, wala u be ɲɛnagwɛra. U minw ka kan ni Masaya kibaro ye, an be se k’a lase olu ma cogo di? —Mat. 10:11.

³ Dɔw be se ka sɔrɔ u ka baarakɛyɔrɔ la. Hali gale dugufitininw kɔnɔ, baaradaw be yen. Mɔgɔ caaman be tile fanba kɛ o yɔrɔw la. Dugubaw kɔnɔ, mɔgɔ caaman siɲɛ fɔlɔ ye seereya sɔrɔ, sabu a man nɔgɔ k’u sɔrɔ: dɔw be baara kɛ izini kɔnɔ wala biro la sangasow kɔnɔ. Dɔ wɛrɛw ka soo be sangasow kɔnɔ, minw tanganen be kosɔbɛ. Lɔgɔkun laban na, seereya dira dɔw ma tuma min na u tun be lafiyara zaradɛn kɔnɔ, ɲɛnagwɛ yɔrɔ dɔ la, kanpeman na. U dɔw tun be kɔnɔni kɛra mobiliw lɔyɔrɔ dɔ la wala feerekɛyɔrɔ dɔ la. O mɔgɔ dɔw sɔnna kibaro duman na ni dusu diya ye.

⁴ Foroba yɔrɔ o yɔrɔ mɔgɔ be sɔrɔ, weleweledala caaman be jijaliba kɛra walisa ka seereya kɛ yen. A daminɛ na, o Seerew tun be sigasiga, ani u tun be hami sabu u tun delila ka waajuli kɛ soo ni soo dama. Sisan do?

⁵ Balimacɛ dɔ tun delila waajuli la. Nka a kabara ko: “O ye barika kura don ne ka waajulibaara la!” Dɔ wɛrɛ y’a fara a kan ko: “O be ne dɛmɛ k’an hakili sigi n’ ka baara kan.” Piyɔniye dɔ, baliku lo, y’a fɔ ko: “O ye barika kura don ne la: miiriya, ni farikolo ni hakilimaya ta fan fɛ, . . . ani ne be ɲɛtaga sɔrɔla ka taga.” Weleweledala dɔ y’a kɔrɔsi ko sisan, a be seereya dira mɔgɔ caaman ma, minw tun ma kuma ka ye ni Jehova Seerew ye. Denmisɛnw fana b’u sen donna o ɲagali baara la ni dusu diya ye. Kamalen dɔ y’a ka fɛta lakali nin cogo la: “A ka di, sabu i be se ka kuma mɔgɔ caaman fɛ.” Dɔ wɛrɛ y’a fɔ ko: “Ne ma deli ka gafe caaman to mɔgɔw bolo nin cogo la!” O walew bɛɛ kɛra kiin kɔnɔ, yɔrɔ min na waajuli delila ka kɛ siɲɛ caaman.

⁶ Tagama kɔrɔsibagaw be ɲɛmɔgɔya ta: Komi Sosiyete y’a lɔn ko “duniɲa nin cogo be yɛlɛmana”, a ye tagama kɔrɔsibagaw ladi k’u ka waajuli baara labɛn makɛɲɛ lɔgɔkun o lɔgɔkun walisa ka se ka kibaro duman lase mɔgɔ caamanba ma (1 Kɔr. 7:31, NW). Kabini saan caaman, kafokulu kɔrɔsibagaw ye sɔgɔma labila waajuli kama soo ni soo lɔgɔkun kɔnɔ. Ani, wulafɛ labilara viziti kuraw ni Bibulukalanw kama. Yɔrɔ dɔw la, o labɛn ka nɔgɔ. Yɔrɔ wɛrɛw la, baara bɛrɛ tɛ se ka kɛ soo ni soo sɔgɔma lɔgɔkun kɔnɔ. O la, tagama kɔrɔsibagaw be se k’a latigɛ ko sɔgɔma, a ka fisa ka waajuli kɛ magazɛn ni magazɛn na wala sirada la. Walima, a be se ka labɛn kɛ walisa jɛkulu fitinin dɔ ka taga waajuli kɛ birow kɔnɔ sangasow kɔnɔ, feerekɛyɔrɔw la, mobiliw lɔyɔrɔw la, wala foroba yɔrɔ wɛrɛw la. Ni weleweledalaw ye jijali sɔbɛ kɛ wagati labilanen kɔnɔ, mɔgɔ caaman wɛrɛw bena seereya sɔrɔ.

⁷ Lakalitaw b’a yira ko tagama kɔrɔsibagaw ni weleweledala tɔɔw sɔnna o yɛlɛmani na koɲuman. Kafo dɔw mako tun b’a la k’u janto waajuli faan dɔw la. Diinan mɔgɔkɔrɔ jɛkulu dɔw y’a ɲini kafokulu kɔrɔsibaga fɛ a ka weleweleda dɔw dege o kɛli la. U kɛtɔ k’o kɔrɔsibaga bila sira o waajuli faanw kama, u ye dɛmɛ sɔrɔ. O kɔ, olu yɛrɛw sera ka mɔgɔ wɛrɛw dege fana (2 Tim. 2:2). O senfɛ, kibaro duman be lasera mɔgɔ caaman ma sisan.

⁸ Ayiwa, waajibi tɛ i ka kafokulu kɔrɔsibaga nali kɔnɔ k’a sɔrɔ k’o waajuli kɛcogow kɛ k’a filɛ. Hakilinata dɔw filɛ nin ye. N’a sɔrɔ u dɔw be se ka bɛn i ka kiinw cogoya ma:

⁹ Seereya kɛ siradaw la: Waajuli kɛtɔ sɔgɔma, kiin lakolonw kɔnɔ, lɔgɔkun kɔnɔ, an be kaba tuma dɔw la ko: ‘mɔgɔw bɛɛ tagara min?’ U dɔw be se ka sɔrɔ u ɲɛnakow la. Yala i delila ka kuma u fɛ i kɛtɔ ka seereya di sirada la wa? N’a kɛcogo ɲɛna, o waajuli faan be se ka den kosɔbɛ. Sanni i ka zurunaliw ta i bolo ani ka lɔ yɔrɔ kelen na, a ka fisa ka mɔgɔw kunbɛn ani ka baro daminɛ n’u ye teriya la. Waajibi tɛ ka seereya di tɛmɛbagaw bɛɛ ma. Minw kɔrɔtɔlen tɛ, minw be ɲaden lɔgɔ lɔra fɛnɛtiriw la, minw sigilen be u ka mobiliw lɔnen kɔnɔ, minw be bolifɛn dɔ kɔnɔna, kuma olu fɛ. A daminɛ k’a tigi fo teriya la dɔrɔn, ani a ka jaabili makɔnɔ. N’a tigi labilanen be ka baro kɛ, a ka fɛta ɲininga a makoya koo dɔ kan.

¹⁰ Tagama kɔrɔsibaga dɔ y’a ɲini weleweledala wɔɔrɔ fɛ u ka jɛn n’ale n’a muso ye ka seereya di sirada la. Mun sɔrɔla o la? A ko: “An ka sɔgɔma baara diyara kosɔbɛ! An ma mɔgɔw ɲini ka dɛsɛ. An ye zurunali 80 ni sɛbɛnin caaman to mɔgɔw bolo. An ye baro duman kɛ ni mɔgɔ caaman ye. Weleweledala dɔ siɲɛ fɔlɔ tun lo ka seereya kɛ sirada la. A kabakoyara ko: ‘Ne be tiɲɛn sira kan kabini saan caaman. Nka ne tun ma bɔ a kalama ko ne be fɔnna fɛɛn dɔ la!’ Kafo ka zurunaliw tun ka ca ka dama tɛmɛ. Nka lɔgɔkun laban na, foyi ma to.”

¹¹ Lɔgɔkun nɔfɛta, o kɔrɔsibaga kelen sera kafo wɛrɛ kɔnɔ. A y’a mɛn ko weleweledala caaman ye seereya di sirada la sɔgɔmada fɛ, nka u ka baara ma den kosɔbɛ. Balimamuso dɔ tun sera ka kuma mɔgɔ fila dɔrɔn fɛ o wagati bɛɛ kɔnɔ. Mɔgɔ bɛɛ tun kɔrɔtɔlen be ka taga baara la. Tagama kɔrɔsibaga y’a fɔ k’u bɛɛ ka segi ka taga o sira kelen daa la, nka sɔgɔmada tɛmɛnen kɔ. U y’o lo kɛ, ani u tora yen fɔɔ midi. Balimamuso min tun sera ka kuma ni mɔgɔ fila dɔrɔn ye fɔlɔ la sɔgɔmada fɛ, a ye caaman kɛ sisan: A ye zurunali 31 ni kitabunin 15 to mɔgɔw ye. A fana ye mɔgɔ 7 tɔgɔw n’u ka ladɛrɛsiw sɔrɔ ka sɛbɛ, ani a ye Bibulukalan 2 daminɛ! Weleweledala wɛrɛw fana y’o ɲɔgɔn kɛ, ani u jagwɛlɛyara.

¹² N’i ye mɔgɔ sɔrɔ min b’a mako don, a ɲini k’a tigi tɔgɔ n’a ladɛrɛsi n’a ka telefɔni nimɔrɔ sɔrɔ ka sɛbɛ. Sanni i ka sin k’o kunnafoniw ɲininga a fɛ, i be se k’a fɔ ko: “Baro nin diyara ne ye. Yala an be se k’a lataga ɲɛ wagati wɛrɛ wa?” Wala, a ɲininga ko: “Ne be se k’i sɔrɔ i ka soo cogo juman na?” O cogo la, mɔgɔ caaman be sɔn an ka na viziti kura kɛ u ye. I janto ka weeleli sɛbɛ caaman ta i kuun walisa k’u di mɔgɔw ma, minw b’a fɛ ka na lajɛnw na.

¹³ N’i kumana ni makodon mɔgɔ dɔ ye, ani a sigilen be kafo wɛrɛ ka kiin na, i k’o kunnafoniw lase o kafo ma. O cogo la, balimaw bena bɔ o tigi ye. Yala sirada la seereya ye fɛɛrɛ barikaman ye walisa ka kibaro duman jɛnsɛn i ka kiin na wa? N’o lo, segi ka barokun nin lajɛ: “Trouvons des personnes bien disposées en prêchant dans la rue de façon efficace ” (An ka makodon mɔgɔw sɔrɔ, an kɛtɔ ka seereya kɛ siradaw la cogo barikaman na). A filɛ An ka Masaya Cidenyabaara kɔnɔ (saan 1994, zuwekalo ta). O kɔ, i yɛrɛ labɛn k’i sendon waajuli la siradaw la. A kɛ wagati min na mɔgɔ caamanba be sɔrɔ sira kan.

¹⁴ Ka seereya kɛ foroba bolifɛnw kɔnɔ: Loon dɔ sɔgɔma, piyɔniye dɔw y’a latigɛ ka seereya di mɔgɔw ma: mɔgɔ minw be bisi kɔnɔna funankɛw kalanso dɔ kɔrɔ. U tun be baro duman dɔw daminɛ, nka gwɛlɛya dɔ tun b’a la. Tuma min na baro tun ka di, bisi be na, ani baro tun be bari ka tigɛ. Piyɔniyew y’o gwɛlɛya ɲɛnabɔ u kɛtɔ ka don bisi kɔnɔ. Bisi tagatɔ n’u ye dugu kɔnɔ, u tora ka seereya di mɔgɔw ma a kɔnɔ. Bisi tun mana se a ka sira daan na, piyɔniye tun be kɔsegi a kɔnɔ, u kɛtɔ ka seereya di mɔgɔw ma ka taga. U ye taga ni segi kɛ siɲɛ caaman. O kɔ, u y’u ka jijali kɛli jateminɛ: Zurunali 200 ni kɔ tora mɔgɔw bolo, ani Bibulukalan wɔɔrɔ daminɛ. Mɔgɔ dɔw sɔnna k’u ka ladɛrɛsi ni telefɔni nimɔrɔ di walisa ka viziti kura sɔrɔ u ka soo. Lɔgɔkun nɔfɛta, piyɔniyew segira ka taga bisi lɔyɔrɔ la, ani u ye seereya di o cogo kelen na. U ye zurunali 164 to mɔgɔw bolo, ani u ye Bibulukalan kelen wɛrɛ daminɛ. Yɔrɔ dɔ la, mɔgɔ dɔ donna bisi kɔnɔ. Sigiyɔrɔ kelenpe labilanen tun be yen: piyɔniye dɔ gɛrɛ fɛ. A sigira yen. A ye balimacɛ filɛ ka yɛlɛmisɛn bɔ, ani k’a fɔ ko: “Ne y’a lɔn ko La Tour de Garde b’i fɛ k’a di ne ma.”

¹⁵ Weleweledala caaman be seereya barikaman di n’u be tagara dugu la mobili kɔnɔ, tɛrɛn wala awiyɔn kɔnɔ. Mɔgɔ min sigilen be i gɛrɛ fɛ, i be se ka baro daminɛ n’a ye cogo di? Saan 12 weleweledala dɔ y’a daminɛ ka Réveillez-vous ! kalan dɔrɔn sunguru dɔ gɛrɛ fɛ bisi kɔnɔ. A jigi tun b’a la k’o sunguru ɲɛminɛ. O lo kɛra. Sunguru y’a ɲininga a be mun lo kalanna. Kamalen y’a jaabi ko kamalenw ni sunguruw be gwɛlɛya minw kunbɛnna, ale b’o ɲɛnabɔcogo lo kalanna. A y’a fara a kan k’o kalan y’ale nafa kosɔbɛ, ani a be se ka sunguru fana dɛmɛ. Sunguru sɔnna zurunali la ni nisɔndiya ye. Denmisɛn fila wɛrɛw tun b’u ka baro lamɛnna. Olu fana ye zurunaliw deli. O tuma, sofɛrɛ ye mobili lalɔ sirada la. A ye ɲiningali kɛ ko fɛɛn duman juman lo be yen o zurunaliw kɔnɔ. A y’a faamu tuma min na, ale fana sɔnna ka dɔw ta. Ayiwa, nin si tun tɛna kɛ ni zurunali caaman tun tɛ o weleweledala kamalen kun k’u di makodon mɔgɔw bɛɛ ma!

¹⁶ Ka seereya kɛ zaradɛnw ni mobiliw lɔyɔrɔw la: O ye fɛɛrɛ ɲuman ye walisa ka mɔgɔ caaman sɔrɔ. Yala i ye waajuli kɛ k’a filɛ mobiliw lɔyɔrɔ dɔ la magazɛnw daa la wa? I setɔ yen, wagati dɔɔni ta ka kɔrɔsili kɛ k’i lamini. Mɔgɔ dɔ ɲini, min kɔrɔtɔlen tɛ, wala min sigilen be mobili dɔ kɔnɔ. A ɲini ka baro daminɛ n’a ye teriya la. Ni baro tara ɲɛ, Masaya kibaro ladon. A ɲini ka baara kɛ i kelen, nka kana janfa kojugu weleweledala wɛrɛ la. Kana sakɔsiba ta i bolo, wala kana mɔgɔ hakili sama ka kɛ i ka baara kan cogoya dɔ la. Koow kɛ nɛmɛnɛmɛ. A be se ka fisaya i ka wagati fitinin dɔrɔn kɛ yɔrɔ kelen na, ani i ka taga ɲɛ yɔrɔ wɛrɛ la. Ni mɔgɔ dɔ t’a fɛ ka baro kɛ n’i ye, bonya la a kan, i mabɔ a la, ani a ɲini ka kuma ni mɔgɔ wɛrɛ ye. O kɛtɔ, balimacɛ dɔ sera ka zurunali 90 to mɔgɔw bolo kalo kelen na mobiliw lɔyɔrɔw la.

¹⁷ Mɔgɔ dɔw be taga zaradɛn na walisa ka lafiya, ka tulon kɛ yen, wala ka wagati dɔ kɛ n’u denmisɛnw ye. Kana u kɔnɔgwan, nka fɛɛrɛ ɲini ka seereya di u ma. Balimacɛ dɔ ye baro daminɛ ni zaradɛn garadiɲɛ ye. A y’a kɔrɔsi k’o cɛɛ be hami dɔrɔgi koo la, an’a deenw ka siniɲasigi koo la. Bibulukalan dɔ daminɛna, ani a tora ka kɛ tuma o tuma o zaradɛn kɔnɔ.

¹⁸ Ka waajuli kɛ feerekɛyɔrɔw la n’i ma wili a kama: Dansigini dɔw kosɔn waajuli tɛ se ka kɛ feerekɛyɔrɔw la magazɛn ni magazɛn tuma bɛɛ. O bɛɛ n’a ta, weleweledala dɔw ye cogoya ɲini ka waajuli kɛ o yɔrɔw la n’u tun m’a lawili a kama. U be sigi baan dɔ kan. Ani u be baro diiman dɔ daminɛ ni mɔgɔw ye, minw ye baara lalɔ walisa ka lafiya. Dɔ mana a mako don, u b’a kɛ nɛmɛnɛmɛ ka sɛbɛnin wala zurunali dɔ di a tigi ma. Ani, u b’u jija ka labɛn kɛ walisa ka segi ka na viziti kura kɛ. U mana miniti damanin kɛ yɔrɔ kelen na, u be bɔ yen ka taga feerekɛyɔrɔ wɛrɛ la. O yɔrɔ la, u be baro daminɛ ni mɔgɔ wɛrɛ ye. Tiɲɛn na, an ka kan ka kɔrɔsili kɛ walisa an kana mɔgɔw hakili sama n’an be waajuli kɛra o cogo la.

¹⁹ N’i ye mɔgɔ dɔ fo, baro daminɛ n’a ye teriya la. N’a tigi y’i jaabi, ɲiningali dɔ bila a ye. O kɔ, a lamɛn kosɔbɛ n’a b’a ka miiriya fɔra. A be min fɔra, i mako don o la. A yira a la ko i b’i janto a ka miiriya la. N’a bɛnnen be, a fɔ a ye k’i sɔnna a ka fɔta la.

²⁰ Balimamuso dɔ ye baro diiman kɛ ni musokɔrɔba dɔ ye, a kɛtɔ k’a fɔ ko fɛɛnw sɔngɔ yɛlɛla. O muso sɔnna joona, ani baro diiman dɔ daminɛna. Balimamuso sera k’o muso tɔgɔ n’a ka ladɛrɛsi sɔrɔ. Ani, a segira ka taga bɔ a ye o lɔgɔkun kelen kɔnɔ.

²¹ Waajuli kɛtɔ magazɛn ni magazɛn: Magazɛnw ka ca kafo dɔw ka kiinw kɔnɔ. Balimacɛ min be waajuli kɛyɔrɔ koo ɲɛnabɔ, a be se ka karati dɔw labɛn daan na o jagokɛyɔrɔ babaw kama. N’o jagokɛyɔrɔw be kiin dɔ kɔnɔ, a y’a yira ka gwɛ karatiw kan ko jagokɛlaw daa t’a la. Waajuli bena kɛ olu fɛ daan na. Kiin wɛrɛw kɔnɔ, jagokɛlaw fana be se ka seereya sɔrɔ ni waajuli be kɛra soo ni soo. Diinan mɔgɔkɔrɔw be se k’a ɲini weleweleda setigiw fɛ u ka waajuli kɛ jagokɛyɔrɔw la tuma o tuma. O cogo la magazɛn ni magazɛn waajuli tɛna to kɔfɛ.

²² N’o y’a ɲini i fɛ i k’i sendon o baara la ani i ma deli k’a kɛ, i be se ka ‘jagwɛlɛya sɔrɔ’ n’i y’a daminɛ ni magazɛn fitininw ye fɔlɔ. O kɔ, i jaa mana sigi, baara kɛ magazɛn belebelebaw kɔnɔ (1 Tes. 2:2). N’i be waajuli kɛ magazɛn ni magazɛn, i ka fani don i ko i be taga lajɛn na Masaya Boon na. N’a be se ka kɛ, don magazɛn kɔnɔ tuma min na sannikɛbagaw tɛ kɔnɔni kɛra. A ɲini ka kuma patɔrɔn wala magazɛn tigi fɛ. I dusu diya n’a ye, nka i ka kuma surunya dɛ. Kuun t’a la ka yafa deli. Jagokɛla caaman be baara la sannikɛbagaw kama, ani u y’a lɔn ko mɔgɔ dɔ bena u lalɔ ka kuma u fɛ.

²³ I mana jagokɛla dɔ fo, i be se k’a fɔ ko: “Jagokɛlaw bolo degunnen be kosɔbɛ fɔɔ a man nɔgɔ k’u sɔrɔ u ka soo. O de y’a to an nana bɔ i ye i ka baarakɛyɔrɔ la walisa ka kalan dɔ to i ye. A be mɔgɔ lasun ka koow jate minɛ.” O kɔ, lakalita kelen wala fila kɛ zurunali yirata kan.

²⁴ N’i ye patɔrɔn lo kunbɛn, i be se ka nin fɔ ka filɛ: “An y’a kɔrɔsi ko jagokɛlaw b’u jija ka kunnafoni tigitigiw sɔrɔ. Kalan dɔ be sɔrɔ kɔsa La Tour de Garde (wala Réveillez-vous ! ) kɔnɔ. A ɲɛsinna an kelen kelen bɛɛ ma.” A lakali, ani kuma kuncɛ nin cogo la: “An lara a la ko kalan bena diya i ye.”

²⁵ Ni baarakɛlaw be yen, ani a bɛnnen be, i be se k’a fɔ ko: “Yala i bena sɔn ko ne k’a yira ka surunya i ka baarakɛlaw la fana wa?” N’a sɔnna, i hakili to a la ko i y’i daa di ko i bena kuma ka surunya. Patɔrɔn bena a ɲini i fɛ i ka kɛ kantigi ye. Ni baarakɛla dɔw b’a fɛ ka baro janya, a ka fisa i ka taga bɔ u fɛ u ka soo.

²⁶ Dugu dennin dɔ kɔnɔ, weleweledala dɔw ye kafokulu kɔrɔsibaga bila sira ka taga waajuli kɛ magazɛn ni magazɛn. A daminɛ na, u dɔw tun be sigasiga, sabu u tun m’o baara ɲɔgɔn kɛ ka ye. Nka, u hakili sigira joona, ani a diyara u ye. Sanni lɛri kelen ka se, u kumana mɔgɔ 37 fɛ, ani u ye zurunali 24 ni kitabunin 4 to mɔgɔw bolo. Balimacɛ dɔ y’a fɔ ko tuma caaman na, u tɛ se ka mɔgɔ caaman sɔrɔ ka kuma u fɛ soo ni soo kalo kelen kɔnɔ i n’a fɔ u y’a kɛ wagati kunkurunin kɔnɔ u tagatɔ magazɛn ni magazɛn.

²⁷ Cogoyaw ɲini ka waajuli kɛ: Yesu ye seereya minw di, a tun ma wili u bɛɛ kama. A ye kibaro duman jɛnsɛn cogoya bɛnnen bɛɛ la (Mat. 9:9; Luka 19:1-10; Yuh. 4:6-15). A filɛ, weleweledala dɔw be fɛɛrɛ ɲini cogo min na ka waajuli kɛ.

²⁸ Dɔw delinanko ye ka seereya di bangebagaw ma lakɔli daa la, tuma min na u b’u denmisɛnw kɔnɔna. Komi bangebagaw be kɔn ka na kabini miniti 20, wagati be Seerew fɛ ka baro diiman dɔ daminɛ n’u ye Bibulu kan.

²⁹ An ka zurunali barokun dɔw ɲɛsinna mɔgɔ sifa dɔw ma tigitigi. Piyɔniye caaman be jijaliw kɛ k’o zurunaliw lase o mɔgɔw ma. Ɲɛyirali fɛ, barokun “L’école en crise” (lakɔli be farati la) tun be sɔrɔ Réveillez-vous ! dɔ kɔnɔ (saan 1995, desanburukalo tile 22nan ta). Balimamuso dɔ tagara a yira lakɔliso wɔɔrɔ la a ka kafo kiinw kɔnɔ. U sɔnna k’a ta. Zurunali minw be kuma gwa koo la ani denmisɛnw nɔgɔli koo la (cɛko ni musoko ta fan fɛ) a fana tagara u yira birow la: biro minw be gwaw ka kunkow ɲɛnabɔ. U y’a fɔ a ye k’o zurunali ɲɔgɔnna wɛrɛw mana bɔ, a ka na n’u ye. A tagara saan 1996, marisikalo tile 8nan ka Réveillez-vous ! yira biro dɔ kɔnɔ: biro min be baarantanya koo ɲɛnabɔ. A ko u y’ale jaabi ka ɲɛ cogo “kabakoman” na.

³⁰ Kobe kɔrɔsibaga dɔ y’a lakali ko koo dɔw ɲɛnabɔtɔ, ale n’a muso be seereya di mɔgɔw ma tuma o tuma hali n’u ma bɔ o kama. U be taga magazɛn na tuma min na mɔgɔ caamanba tɛ yen, ani sannikɛbagaw lafiyanen be yaala magazɛn kɔnɔ. U sera ka baro diiman caaman daminɛ.

³¹ Weleweledala caaman be nafa sɔrɔ u kɛtɔ ka seereya di mɔgɔw ma fanikoyɔrɔw la. U tɛ zurunaliw to yen ka taga dɔrɔn hali ni mɔgɔ tɛ yen. U ka laɲinita ye ka kibaro duman lase mɔgɔw ma. O kama, u b’u jija ka mɔgɔw kunbɛn o fanikoyɔrɔw la ani ka kuma n’u ye.

³² Yɔrɔ dɔw la, sira dira weleweledala sugandilenw ma u ka waajuli kɛ awiyɔnsow kɔnɔ. Tuma dɔw la, u ɲagalila ka seereya di mɔgɔ dɔw ma, minw be jamanaw tagama, ani Jehova Seerew man ca u ka jamana na. O mɔgɔw mana u mako don, Seerew be sɛbɛnin wala zurunaliw di u ma.

³³ Kafo dɔw ka kiinw kɔnɔ, sangaso dɔw donda tanganen be kosɔbɛ. N’u tɛ se ka kuma mɔgɔw fɛ boonw kɔnɔ, weleweledala dɔw delila ka seereya di garadiɲɛw ma daa la. Walima, u ɲɛsinna patɔrɔnw ma birow kɔnɔ. U b’o kelen lo kɛ yɔrɔ minw na mɔgɔw ka halala luuw tanganen be. Kafokulu kɔrɔsibaga ni weleweledala dɔw y’o lo kɛ. U tagara bɔ o luu ɲɔgɔn wolonfila ye. Luuw daa la, u y’a ɲɛfɔ luu marabaga ye ko hali ni sira ma di olu ma ka kuma mɔgɔw fɛ i ko u delila k’a kɛ cogo min na, u kɔni t’a fɛ ale ka fɔn zurunali kuramanw ka kunnafoniw la. Luu marabaga wolonfila bɛɛ sɔnna ka zurunaliw ta ni nisɔndiya ye. Ani, u y’a fɔ k’u b’a fɛ ka zurunali nataw fana sɔrɔ! O kɔ, luuw kɔnɔ mɔgɔw be sɔrɔ telefɔni lo fɛ. O kɛcogo yirala An ka Masaya Cidenyabaara lankana kɔnɔ faransɛkan na (saan 2001, feburukalo ta). A barokun ko: “Seereya kɛ telefɔni fɛ.”

³⁴ I jija ka waajuli kɛ yɔrɔ bɛɛ: Cii dira an ma ka Masaya waajuli kɛ. Walisa an ka ɲɛnamaya kɛcogo ka bɛn n’an ka yɛrɛkundili ye, fɔɔ an k’a lɔn ko kɔrɔtɔba b’o baara la. Wagati min bɛnna mɔgɔw ma n’an b’a fɛ k’u sɔrɔ o wagati la, fɔɔ an k’an ɲɛnakow bila gɛrɛ fɛ ‘walisa cogo o cogo, an k’u dɔw kisi.’ Minw bɛɛ y’u yɛrɛkun di Jehova ma ani u batisera, u b’a fɛ olu ka se ka Pol ka kuma ɲɔgɔnw fɔ. A ko: “Ne bɛ fɛn bɛɛ kɛ Kibaru Duman kosɔn walisa ne ka niyɔrɔ sɔrɔ a nafa la tɔw fɛ.” —1 Kɔr. 9:22, 23.

³⁵ Pol y’a fara a kan ko: “Ayiwa ne bɛ sɔn kosɛbɛ ka ne yɛrɛ bonya ne ka barikantanya kow la ka tɛmɛn fɛnw bɛɛ kan, walisa Krista ka sebaaya ka to ne kan. . . . K’a masɔrɔ ne ye barikantan ye tuma min na, o b’a sɔrɔ ne ye barikama de ye.” (2 Kɔr. 12:9, 10) O kɔrɔ ko an si tɛ se k’o baara nin kɛ an yɛrɛ barika sababu fɛ. An mako b’a la ka Jehova deli walisa k’a ka hakili senu sebagaya dɔ sɔrɔ. N’an ye fanga deli Ala fɛ, an be se ka la a la ko a bena an ka deliliw jaabi. O la, mɔgɔw ka kanuya min be an na, o bena an lasun ka cogoyaw ɲini ka kibaro duman fɔ u ye: u mana sɔrɔ yɔrɔ o yɔrɔ. Ladili minw dira lankana nin kɔnɔ, mun na i tɛ baara kɛ ka filɛ n’u dɔ ye lɔgɔkun nata la?