Waajuli kɛcogo jago kɛyɔrɔw la

¹ Yala i t’a fɛ ka waajuli kɛ kiin dɔ kɔnɔ yɔrɔ min na u be deli ka lonanw bisimila ani mɔgɔw tɛ fɔn yen wa? N’a sɔrɔ i be se k’o kɛ i ka kafo kiin dɔw kɔnɔ. Cogo juman na do? I kɛtɔ ka taga waajuli kɛ magazɛnw na. Weleweledala minw be waajuli kɛ magazɛn ni magazɛn, u be sanga sɔrɔ o la tuma caaman na.

² Magazɛnw ka ca kafo dɔw ka kiinw kɔnɔ. Balimacɛ min be waajuli kɛyɔrɔ koow ɲɛnabɔ, a be se ka karti dɔw labɛn dan na o jago kɛyɔrɔ babaw kama. N’o jago kɛyɔrɔw be kiin dɔ kɔnɔ, a’ y’a yira ka gwɛ kartiw kan ko jagokɛlaw daa t’a la. Waajuli bena kɛ olu fɛ dan na. Kiin wɛrɛw kɔnɔ, jagokɛlaw fana be se ka seereya sɔrɔ ni waajuli be kɛra soo ni soo. N’i ma deli ka waajuli kɛ jago kɛyɔrɔw la, i be se k’a daminɛ ni magazɛn fitininw ye fɔlɔ.

³ Baro ladon cogo nɔgɔman na: N’i be waajuli kɛ magazɛn ni magazɛn, i ka fani don i ko i be taga lajɛn na Masaya Boon na. A fana ka ɲi i ka taga yen tuma min na magazɛn degunnen tɛ. N’a be se ka kɛ, don magazɛn kɔnɔ tuma min na sannikɛlaw tɛ kɔnɔni kɛra. A ɲini ka kuma patɔrɔn wala magazɛn tigi fɛ. I ka kuma ka surunya ani a ka tilen. I be se ka mun lo fɔ?

⁴ N’i be kuma ni jagokɛla wala magazɛn patɔrɔn dɔ ye, i be se k’a fɔ ko: “Jagokɛlaw bolo degunnen be kosɔbɛ fɔɔ a man nɔgɔ k’u sɔrɔ u ka soo. O le y’a to an nana bɔ i ye i ka baarakɛyɔrɔ la. An ka zurunaliw b’a yira koo minw be kɛra duniɲa kɔnɔ an tilew la.” O kɔ, miiriya surun kelen yira zurunali dɔ kɔnɔ.

⁵ Walima i be se ka baro ladon cogo nɔgɔman nin na: “Mɔgɔ caaman b’a fɛ ka dɔ fara u ka lɔnniya kan Bibulu koo la, nka wagati man ca u fɛ. Sɛbɛnin nin b’a yira labɛn min kɛra bibulukalan kama. O be se k’i dɛmɛ i ka jaabiliw sɔrɔ i ka ɲiningaliw la Bibulu kɔnɔ.” O kɔ, sɛbɛnin ɲɛɛ 4-5nan yira a la: Yala i b’a fɛ ka dɔ fara i ka lɔnniya kan Bibulu koo la wa?

⁶ N’a be komi jagokɛla bolo degunnen be, i be se ka sɛbɛnin dɔrɔn to a ye, ani k’a fɔ ko: “N’ bena segi ka na tuma min na i bolo labilanen be. Ne b’a fɛ ka lɔn i be min miiri nin sɛbɛnin ko la.”

⁷ An k’a ɲini ka makodon mɔgɔw dɛmɛ: N’a sɔrɔ i be se yɛrɛ ka bibulukalan kɛ jago kɛyɔrɔw la. Dan na piyɔniye dɔ tun delila ka na zurunaliw di jagokɛla dɔ ma. O cɛɛ y’a yira k’o zurunaliw kalan ka di a ye minkɛ, piyɔniye tɛmɛna kitabunin Ɲini fɛ ka bibulukalan kɛcogo ɲɛyira a la. Bibulukalan daminɛna kelen o cɛɛ ka baarakɛyɔrɔ la. Ka kɛɲɛ ni koow cogoya ye, piyɔniye ye kalan dan miniti 10 wala 15 ma tuma o tuma. O cogo kelen na, an ka to ka mɔgɔ sɔbɛw ɲini an kɛtɔ ka waajuli kɛ jago kɛyɔrɔw la.

[Study Questions]

1. Nafa jumanw b’a la ka waajuli kɛ jago kɛyɔrɔw la?

2. Waajuli baara be se ka labɛn cogo di jago kɛyɔrɔw la?

3. Waajuli kɛtɔ magazɛn ni magazɛn, mun lo be se k’an dɛmɛ ka sanga sɔrɔ?

4-6. N’an be kuma ni magazɛn tigi wala jagokɛla ye, an be se ka mun fɔ?

7. An be makodon mɔgɔ minw sɔrɔ jago kɛyɔrɔw la, cogo juman na an be se k’u dɛmɛ?